Qimmatli qogʻozlar bozorining ishlash samaradorligini oshirish va uni davlat yoʻli bilan tartibga solish, uning qatnashchilari faoliyatini muvofiqlashtirish, sarmoyadorlarning huquq va manfaatlari ishonchli himoya qilinishini taʼminlash maqsadida:

1. Oʻzbekiston Respublikasi Moliya vazirligi huzuridagi qimmatli qogʻozlar va fond birjalari boʻyicha Davlat komissiyasi negizida Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazi hamda uning joylarda Oʻzbekiston Respublikasi Davlat mulki qoʻmitasi tuzilmalari tarkibida hududiy boʻlinmalari tashkil qilinsin.

2. Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazi faoliyatining asosiy vazifalari hamda yoʻnalishlari quyidagilardan iborat qilib belgilansin:

qimmatli qogʻozlar bozorini shakllantirish, rivojlantirish, nazorat qilish va tartibga solish sohasida davlat siyosatini amalga oshirish;

respublikada roʻyxatga olingan qimmatli qogʻozlar chiqarilishi va bozor qatnashchilarining yagona reyestrlarini yuritish, qimmatli qogʻozlar bozorining strukturasi va rivojlanishi toʻgʻrisidagi maʼlumotlar bankini tashkil etish, qimmatli qogʻozlar muomalasini tartibga solish, hisob-kitob va hisobotini yoʻlga qoʻyish;

barcha davlat organlari va xoʻjalik yurituvchi subyektlar tomonidan qimmatli qogʻozlar toʻgʻrisidagi qonunlar qanday bajarilayotganini nazorat qilish va ularning ijrosini taʼminlash;

oʻzbek va xorijiy emitentlarning qimmatli qogʻozlar chiqarishlari hamda ularning milliy va xalqaro qimmatli qogʻozlar bozorida samarali muomalada boʻlishi uchun zarur huquqiy shart-sharoitlarni taʼminlovchi normativ hujjatlarni ishlab chiqish;

qimmatli qogʻozlar bilan operatsiyalarni amalga oshiruvchi yuridik va jismoniy shaxslar — sarmoyadorlarning huquq va manfaatlarini himoya qilish;

qimmatli qogʻozlar bozorining holati hamda uning qatnashchilari toʻgʻrisida sarmoyadorlarni va jamoatchilikni keng xabardor qilish.

3. Quyidagilar belgilab qoʻyilsin:

Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazining oʻz vakolatlari doirasida qabul qilingan qarorlari davlat va mahalliy boshqaruv organlari, xoʻjalik yurituvchi subyektlar, qimmatli qogʻozlar bozorining professional va noprofessional qatnashchilari, ularning birlashmalari (uyushmalari), shuningdek, Oʻzbekiston Respublikasi va xorijiy davlatlarning Oʻzbekiston Respublikasi hududida operatsiyalarni amalga oshiruvchi fuqarolari ijro etishlari uchun majburiy hisoblanadi;

qimmatli qogʻozlar bozori ishlashini muvofiqlashtirish va nazorat qilish Markazining rahbari Oʻzbekiston Respublikasining Vazirlar Mahkamasi tomonidan tayinlanadi va ayni vaqtda Oʻzbekiston Respublikasi Davlat mulki qoʻmitasi raisining birinchi oʻrinbosari hisoblanadi;

qimmatli qogʻozlar bozori ishlashini muvofiqlashtirish va nazorat qilish Markazi huzurida shikoyat arizalarini koʻrib chiqish boʻyicha Kengashi tuziladi, uning shaxsiy tarkibi Oʻzbekiston Respublikasining Vazirlar Mahkamasi tomonidan tasdiqlanadi.

4. Oʻzbekiston Respublikasi Davlat mulki qoʻmitasining, Respublika “Toshkent” fond birjasining qimmatli qogʻozlar bozori qatnashchilariga maslahat-auditorlik va axborot xizmatlarini koʻrsatuvchi nohukumat Agentligini tashkil qilish toʻgʻrisidagi taklifi maʼqullansin.

Oʻzbekiston Respublikasi Davlat mulki qoʻmitasi qimmatli qogʻozlar bozori qatnashchilariga maslahat-auditorlik va axborot xizmatlarini koʻrsatuvchi Agentlikka xususiylashtirishdan tushayotgan mablagʻlar hisobidan 20 million soʻm miqdorida qaytarib olinmaydigan bir yoʻla moliyaviy yordam bersin.

Oʻzbekiston Respublikasi Davlat mulki qoʻmitasi, Moliya vazirligi, Adliya vazirligi manfaatdor tashkilotlar bilan birgalikda bir oy muddat ichida mazkur Agentlikni tuzish toʻgʻrisidagi zarur takliflarni kiritsinlar.

5. Oʻzbekiston Respublikasining Vazirlar Mahkamasi Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazining faoliyatini tashkil etish toʻgʻrisida bir hafta muddat ichida qaror qabul qilib, Markazning strukturasini va uning toʻgʻrisidagi Nizomni tasdiqlasin.

6. Oʻzbekiston Respublikasi Prezidentining “Qimmatli qogʻozlar bozorini rivojlantirishga oid qoʻshimcha chora-tadbirlar toʻgʻrisida” 1995-yil 7-sentabrdagi Farmonining 1 — 4-bandlari oʻz kuchini yoʻqotgan deb hisoblansin.