Qimmatli qogʻozlar bozorining ishlash samaradorligini oshirish va uni davlat yoʻli bilan tartibga solish, uning qatnashchilari faoliyatini muvofiqlashtirish, sarmoyadorlarning huquq va manfaatlari ishonchli himoya qilinishini taʼminlash maqsadida:

1. Oʻzbekiston Respublikasi Moliya vazirligi huzuridagi qimmatli qogʻozlar va fond birjalari boʻyicha Davlat komissiyasi negizida Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazi hamda uning joylarda Oʻzbekiston Respublikasi Davlat mulki qoʻmitasi tuzilmalari tarkibida hududiy boʻlinmalari tashkil qilinsin.

Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazi qimmatli qogʻozlar bozorini tartibga solish boʻyicha vakolatli davlat organi etib belgilansin.

2. Belgilansinki, Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazi:

qimmatli qogʻozlar bozorini shakllantirish, rivojlantirish, nazorat qilish va tartibga solish sohasida davlat siyosatini amalga oshiradi;

qimmatli qogʻozlar bozorida kasbga doir faoliyatni litsenziyalaydi;

investorlarning hamda qimmatli qogʻozlar egalarining huquqlari va qonuniy manfaatlari himoya qilinishini taʼminlaydi;

qimmatli qogʻozlar bozorini va uning ishtirokchilari faoliyatini shakllantirish hamda tartibga solish sohasida normativ-huquqiy hujjatlarni ishlab chiqadi;

qimmatli qogʻozlar bozorida kasb faoliyatini amalga oshirishga boʻlgan talablarni, qimmatli qogʻozlar bozori professional ishtirokchilari mutaxassislariga nisbatan malakaviy talablarni belgilaydi, ularni attestatsiyadan oʻtkazadi va malaka attestatlarini beradi;

emission qimmatli qogʻozlarni (davlatnikidan tashqari) muomalaga chiqarish qoidalarini, qimmatli qogʻozlar bilan boʻladigan bitishuvlarni roʻyxatga olish qoidalarini, qimmatli qogʻozlar bilan oʻtkaziladigan operatsiyalarni hisobga olish va hisobot standartlarini, qimmatli qogʻozlar egalarining reyestrlarini va qimmatli qogʻozlar bilan boʻladigan bitishuvlarning hisob registrini yuritish tartibini tasdiqlaydi;

davlat boshqaruvi organlari, qimmatli qogʻozlar bozori qatnashchilari tomonidan qimmatli qogʻozlar bozori toʻgʻrisidagi qonun hujjatlari bajarilishi ustidan nazoratni amalga oshiradi va qimmatli qogʻozlar bozori toʻgʻrisidagi qonun hujjatlarini buzish hollari aniqlanganda ular yuzasidan xulosalar chiqaradi hamda bajarilishi majburiy boʻlgan koʻrsatmalar beradi, qoidabuzarlarga nisbatan qonun hujjatlariga muvofiq sanksiyalar qoʻllaydi;

qimmatli qogʻozlar bilan oʻtkaziladigan operatsiyalar xatarini cheklovchi shaxsiy mablagʻlar yetarliligi va boshqa koʻrsatkichlarning majburiy normativlarini, shuningdek davlatnikidan tashqari qimmatli qogʻozlar operatsiyalari boʻyicha hujjatlarni saqlash muddatlarini belgilaydi.

3. Quyidagilar belgilab qoʻyilsin:

Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazining oʻz vakolatlari doirasida qabul qilingan qarorlari davlat va mahalliy boshqaruv organlari, xoʻjalik yurituvchi subyektlar, qimmatli qogʻozlar bozorining professional va noprofessional qatnashchilari, ularning birlashmalari (uyushmalari), shuningdek, Oʻzbekiston Respublikasi va xorijiy davlatlarning fuqarolari ijro etishlari uchun majburiy hisoblanadi;

qimmatli qogʻozlar bozori ishlashini muvofiqlashtirish va nazorat qilish Markazining rahbari qonun hujjatlarida belgilangan tartibda tayinlanadi va ayni vaqtda Oʻzbekiston Respublikasi Davlat mulki qoʻmitasi raisining oʻrinbosari hisoblanadi;

4. Oʻzbekiston Respublikasi Davlat mulki qoʻmitasining, Respublika “Toshkent” fond birjasining qimmatli qogʻozlar bozori qatnashchilariga maslahat-auditorlik va axborot xizmatlarini koʻrsatuvchi nohukumat Agentligini tashkil qilish toʻgʻrisidagi taklifi maʼqullansin.

Oʻzbekiston Respublikasi Davlat mulki qoʻmitasi qimmatli qogʻozlar bozori qatnashchilariga maslahat-auditorlik va axborot xizmatlarini koʻrsatuvchi Agentlikka xususiylashtirishdan tushayotgan mablagʻlar hisobidan 20 million soʻm miqdorida qaytarib olinmaydigan bir yoʻla moliyaviy yordam bersin.

Oʻzbekiston Respublikasi Davlat mulki qoʻmitasi, Moliya vazirligi, Adliya vazirligi manfaatdor tashkilotlar bilan birgalikda bir oy muddat ichida mazkur Agentlikni tuzish toʻgʻrisidagi zarur takliflarni kiritsinlar.

5. Oʻzbekiston Respublikasining Vazirlar Mahkamasi Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori ishlashini muvofiqlashtirish va nazorat qilish Markazining faoliyatini tashkil etish toʻgʻrisida bir hafta muddat ichida qaror qabul qilib, Markazning strukturasini va uning toʻgʻrisidagi Nizomni tasdiqlasin.