Oʻzbekiston Respublikasi Oliy Majlisi Senatining 2010-yil 7-maydagi 42 — II-sonli Qarori bilan tasdiqlangan Oʻzbekiston Respublikasi Prezidenti I.Karimovning 2010-yil 26-yanvardagi Oʻzbekiston Respublikasi Oliy Majlisi Senatining birinchi majlisidagi, 2010-yil 27-yanvardagi Oʻzbekiston Respublikasi Oliy Majlisi Qonunchilik palatasi va Senatining qoʻshma majlisidagi “Mamlakatimizni modernizatsiya qilish va kuchli fuqarolik jamiyati barpo etish — ustuvor maqsadimizdir” nomli maʼruzalarining asosiy qoida va xulosalarini roʻyobga chiqarish yuzasidan Oʻzbekiston Respublikasi Oliy Majlisi Senatining Harakat dasturi 1.1-bandining 1.1.5-kichik bandini ijro etish maqsadida Oʻzbekiston Respublikasi Oliy Majlisi Senatining Kengashi qaror qiladi:

Oʻzbekiston Respublikasi Oliy Majlisi Senati tomonidan Oʻzbekiston Respublikasi Bosh prokurorining yillik hisobotini va Oʻzbekiston Respublikasi adliya vazirining davlat boshqaruvi organlari, huquqni muhofaza qiluvchi organlari va nazorat tuzilmalari tomonidan qonunlarning ijro etilishi holati toʻgʻrisidagi axborotini koʻrib chiqish tartibi ilovaga muvofiq tasdiqlansin.

1. Ushbu Tartib Oʻzbekiston Respublikasi Konstitutsiyasiga, “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonuniga, “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonuniga va Oʻzbekiston Respublikasi Oliy Majlisi Senatining Reglamentiga muvofiq Oʻzbekiston Respublikasi Oliy Majlisi Senati tomonidan Oʻzbekiston Respublikasi Bosh prokurorining yillik hisobotini va Oʻzbekiston Respublikasi adliya vazirining davlat boshqaruvi organlari, huquqni muhofaza qiluvchi organlari va nazorat tuzilmalari tomonidan qonunlarning ijro etilishi holati toʻgʻrisidagi axborotini koʻrib chiqish tartibini belgilaydi.

2. “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonunning 32-moddasiga muvofiq Oʻzbekiston Respublikasi Bosh prokurorining Oʻzbekiston Respublikasi Oliy Majlisi Senatiga (bundan buyon matnda Senat deb yuritiladi) qonun hujjatlari bilan belgilangan tartibda taqdim etilgan yillik hisoboti (bundan buyon matnda hisobot deb yuritiladi) Senatning navbatdagi yalpi majlisida koʻrib chiqiladi.

Oʻzbekiston Respublikasi Bosh prokurorining hisoboti Oʻzbekiston Respublikasi prokuratura organlarining hisobot Senatda tinglanishidan oldingi yildagi faoliyatining asosiy yoʻnalishlarini oʻz ichiga oladi.

3. Oʻzbekiston Respublikasi adliya vaziri har yili Senatga davlat boshqaruvi organlari, huquqni muhofaza qiluvchi organlari va nazorat tuzilmalari tomonidan qonunlarning ijro etilishi holati toʻgʻrisida axborot (bundan buyon matnda axborot deb yuritiladi) taqdim etadi.

Axborotda, qoida tariqasida, Oʻzbekiston Respublikasi Adliya vazirligi tomonidan davlat boshqaruvi organlari, huquqni muhofaza qiluvchi organlari va nazorat tuzilmalarining axborot Senatda tinglanishidan oldingi yildagi faoliyatini monitoringlari, tahlillari va tekshirishlarni amalga oshirish natijalari bayon etiladi.

4. Hisobot va axborot Senatga har yili 1-fevraldan kechiktirmasdan bir nusxada tegishincha Oʻzbekiston Respublikasi Bosh prokurori va Oʻzbekiston Respublikasi adliya vaziri tomonidan imzolangan ilova xati bilan bevosita yoxud pochta aloqasi vositalari orqali taqdim etiladi.

Senatga ushbu hujjatlarning elektron nusxalari ham elektron axborot tashish vositalarida taqdim etilishi yoki ular Senatga elektron pochta tizimi orqali yuborilishi shart.

5. Hisobot va axborot Senat Devonida roʻyxatga olingan kundan boshlab Senatga taqdim etilgan hisoblanadi.

6. Kelib tushgan hisobot va axborot Senat Raisiga topshiriladi. Senat Raisi Senatning Qonunchilik va sud-huquq masalalari qoʻmitasiga (bundan buyon matnda Senat qoʻmitasi deb yuritiladi) hisobot va axborotni Senat qoʻmitasining majlisida dastlabki tarzda koʻrib chiqishni topshiradi.

7. Hisobot va axborot Umumiy boʻlimga nusxa koʻchirish va Senat qoʻmitasiga hamda Senat Raisining topshirigʻida koʻrsatilgan boshqa shaxslarga berish uchun topshiriladi.

8. Hisobot va axborot Senat Devonining Rahbariga, ularning nusxalari esa Senat Raisining oʻrinbosariga, Senat qoʻmitasiga, Yuridik boʻlimga, Nazorat-axborot boʻlimiga, Matbuot va tarjima boʻlimiga, Senatning matbuot kotibiga beriladi.

9. Senat qoʻmitasi:

a) hisobot va axborotni koʻrib chiqish bilan bogʻliq zarur materiallarni tayyorlashni tashkil etadi;

b) Senat qoʻmitasi ishida qatnashish uchun davlat organlari, nodavlat notijorat tashkilotlar, ilmiy muassasalar vakillarini, mutaxassislar va olimlarni, jamoatchilik va xoʻjalik yurituvchi subyektlar vakillarini, shuningdek ommaviy axborot vositalarining vakillarini taklif qiladi;

v) tegishli hujjatlar (Senat qoʻmitasining qarorlari, Senat qoʻmitasi majlislarining bayonnomalari va h.k.) rasmiylashtirilishini tashkil etadi;

g) Senat Kengashiga, Senat Raisiga hisobot va axborotni koʻrib chiqish bilan bogʻliq topshiriqlarning bajarilishi haqida maʼlumot beradi;

d) hisobot va axborotni tinglash haqidagi masalalarni Senatning navbatdagi yalpi majlisi kun tartibi loyihasiga kiritish yuzasidan Senat Kengashiga takliflar kiritish toʻgʻrisida qarorlarni qabul qiladi;

e) ushbu masalalar boʻyicha Senatning tegishli qarorlari loyihalarini tayyorlaydi;

j) davlat organlari va boshqa tashkilotlardan, mansabdor shaxslardan hisobot va axborotni koʻrib chiqish bilan bogʻliq hujjatlar, ekspert xulosalari va boshqa xulosalarni, statistik va boshqa maʼlumotlarni talab qilib oladi;

z) qonun hujjatlariga muvofiq boshqa vakolatlarni amalga oshiradi.

10. Hisobot va axborot Senat qoʻmitasiga kelib tushganidan keyin Senat qoʻmitasi raisining qarorlari bilan qoʻmita huzurida hisobot va axborotni tahlil qilish hamda Senat qarorlarining loyihalari boʻyicha takliflar ishlab chiqish uchun ishchi guruhlar tuzilishi mumkin.

Hisobot boʻyicha ishchi guruh tarkibiga senatorlar, Oʻzbekiston Respublikasi Bosh prokuraturasining, davlat organlari va boshqa tashkilotlarning vakillari kiritiladi.

Axborot boʻyicha ishchi guruh tarkibiga senatorlar, Oʻzbekiston Respublikasi Adliya vazirligining vakillari, taqdim etilgan axborotda koʻrsatilgan davlat boshqaruvi organlari, huquqni muhofaza qiluvchi organlari va nazorat tuzilmalarining vakillari kiritiladi.

11. Ishchi guruhlar taqdim etilgan hisobot va axborotni tahlil qiladi, ushbu masalalar yuzasidan ilgari qabul qilingan Senat qarorlari ijro etilishining holatini oʻrganadi.

12. Ishchi guruh aʼzolari ishchi guruh majlislari oʻtkaziladigan sana haqida oldindan xabardor qilinadi.

13. Hisobot va axborotni koʻrib chiqish natijalari boʻyicha Senat qoʻmitasi tomonidan Senatning tegishli qarorlari loyihalari tayyorlanadi.

Oʻzbekiston Respublikasi Bosh prokurorining Oʻzbekiston Respublikasi prokuratura organlarining oʻtgan yildagi faoliyati toʻgʻrisidagi hisoboti haqidagi Senat qarorining loyihasida, qoida tariqasida, Oʻzbekiston Respublikasi prokuratura organlari tomonidan olib borilayotgan ishlar haqidagi maʼlumotlar, qonuniylikning va jinoyatchilikka qarshi kurashning ahvoli, shuningdek Oʻzbekiston Respublikasi prokuratura organlari faoliyatini yanada takomillashtirish, qonuniylikni va jinoyatchilikka qarshi kurashni taʼminlash boʻyicha tavsiyalar bayon etiladi.

Oʻzbekiston Respublikasi adliya vazirining davlat boshqaruvi organlari, huquqni muhofaza qiluvchi organlari va nazorat tuzilmalari tomonidan oʻtgan yilda qonunlarning ijro etilishi holati toʻgʻrisidagi axboroti haqidagi Senat qarorining loyihasida, qoida tariqasida, Oʻzbekiston Respublikasi Adliya vazirligining qonun ijodkorligi va huquqni qoʻllash sohasidagi yagona davlat siyosatini amalga oshirishni taʼminlash borasidagi ishi toʻgʻrisidagi maʼlumotlar, shu jumladan davlat boshqaruvi organlari, huquqni muhofaza qiluvchi organlari va nazorat tuzilmalari tomonidan qonunlarning ijro etilishi holati toʻgʻrisidagi maʼlumotlar, shuningdek bu yoʻnalishda aniqlangan kamchiliklarni bartaraf etish boʻyicha tavsiyalar aks ettiriladi.

Oʻzbekiston Respublikasi adliya vazirining davlat boshqaruvi organlari, huquqni muhofaza qiluvchi organlari va nazorat tuzilmalari tomonidan oʻtgan yilda qonunlarning ijro etilishi holati toʻgʻrisidagi axboroti haqidagi Senat qarorining loyihasida Oʻzbekiston Respublikasi Vazirlar Mahkamasiga, Oʻzbekiston Respublikasi Oliy sudi va Oliy xoʻjalik sudiga hamda boshqa organlar va tashkilotlarga ham tegishli tavsiyalar berilishi mumkin.

14. Hisobot va axborot dastlabki tarzda Senat qoʻmitasining majlisida koʻrib chiqiladi.

15. Senat qoʻmitasining majlisi, agar unda Senat qoʻmitasi aʼzolarining kamida yarmi hozir boʻlsa, vakolatli hisoblanadi.

16. Senat qoʻmitasining majlisi ochiq oʻtkaziladi. Zarur hollarda Senat qoʻmitasi yopiq majlis oʻtkazish haqida qaror qabul qilishi mumkin.

17. Senat qoʻmitasining majlisiga Oʻzbekiston Respublikasi Bosh prokuraturasi, Oʻzbekiston Respublikasi Adliya vazirligining vakillari, shuningdek davlat boshqaruvi organlari, huquqni muhofaza qiluvchi organlari va nazorat tuzilmalarining rahbarlari taklif qilinadilar.

Senat qoʻmitasining majlisiga davlat organlarining, nodavlat notijorat tashkilotlar, ilmiy muassasalarning vakillari, mutaxassislar va olimlar, xoʻjalik yurituvchi subyektlarning vakillari, shuningdek ommaviy axborot vositalarining vakillari taklif qilinishi mumkin.

18. Senat qoʻmitasining majlisida: hisobot boʻyicha — Oʻzbekiston Respublikasining Bosh prokurori, axborot boʻyicha — Oʻzbekiston Respublikasi adliya vaziri maʼruza bilan chiqadi. Oʻzbekiston Respublikasining Bosh prokurori va Oʻzbekiston Respublikasi adliya vaziri boʻlmagan taqdirda tegishincha ularning oʻrinbosarlaridan biri maʼruza bilan chiqadi.

Majlis davomida Senat qoʻmitasining aʼzolari taqdim etilgan hisobot va axborotni aniqlashtirish maqsadida maʼruzachilarga, shuningdek davlat boshqaruvi organlari, huquqni muhofaza qiluvchi organlari va nazorat tuzilmalari rahbarlariga savollar berishlari mumkin.

19. Senat qoʻmitasi Oʻzbekiston Respublikasi Bosh prokurori, Oʻzbekiston Respublikasi adliya vazirini, shuningdek davlat boshqaruvi organlari, huquqni muhofaza qiluvchi organlari va nazorat tuzilmalari, davlat organlari, nodavlat notijorat tashkilotlar, ilmiy muassasalar rahbarlarini, mutaxassislar va olimlarni, ommaviy axborot vositalarining vakillarini Senat qoʻmitasining majlisi oʻtkaziladigan sana toʻgʻrisida oldindan xabardor qiladi.

20. Senat qoʻmitasining hisobot va axborotni tinglash haqidagi masalalarni Senatning navbatdagi yalpi majlisi kun tartibining loyihasiga kiritish boʻyicha Senat Kengashiga takliflar kiritish toʻgʻrisidagi qarorlari Senat qoʻmitasi aʼzolari umumiy sonining koʻpchilik ovozi bilan qabul qilinadi.

21. Senat qoʻmitasining hisobot va axborotni tinglash haqidagi masalalarni Senatning navbatdagi yalpi majlisi kun tartibining loyihasiga kiritish toʻgʻrisida takliflar qilingan qarorlari Senat Kengashining muhokamasiga taqdim etiladi.

22. Senat qoʻmitasining majlislari bayonnoma bilan rasmiylashtiriladi.

23. Senat Kengashi hisobot va axborotni tinglash haqidagi masalalarni muhokama qilish uchun Senatning navbatdagi yalpi majlisi kun tartibi loyihasiga kiritish toʻgʻrisida qarorlar qabul qiladi.

24. Senat qoʻmitasining raisi Umumiy boʻlim bilan birgalikda Oʻzbekiston Respublikasi Bosh prokuraturasi, Oʻzbekiston Respublikasi Adliya vazirligi vakillariga, shuningdek davlat boshqaruvi organlari, huquqni muhofaza qiluvchi organlari va nazorat tuzilmalari, davlat organlari, nodavlat notijorat tashkilotlar, ilmiy muassasalar rahbarlariga, mutaxassislar va olimlarga Senatning navbatdagi yalpi majlisida qatnashish uchun tegishli ruxsatnoma berilishini tashkil etadi.

25. Senatning yalpi majlisida hisobot va axborotni tinglash tartibi Oʻzbekiston Respublikasi Oliy Majlisi Senatining 2005-yil 6-maydagi 29 — I-sonli Qarori bilan tasdiqlangan Oʻzbekiston Respublikasi Oliy Majlisi Senatining Reglamenti bilan belgilanadi.

26. Hisobot va axborotni tinglash haqidagi masalalar boʻyicha Senat qarorlarining loyihalariga Senat qoʻmitasi raisi, Senat Devonining Rahbari, Yuridik boʻlim mudiri, Matbuot va tarjima boʻlimi mudiri tomonidan viza qoʻyilib, Senat Raisining oʻrinbosariga topshiriladi.

Senat Raisining oʻrinbosari tomonidan viza qoʻyilgan Senat qarorlarining loyihalari Senat qoʻmitasiga qaytariladi.

27. Hisobot va axborotni tinglash haqidagi masalalar boʻyicha Senat qarorlarining belgilangan tartibda viza qoʻyilgan loyihalari Senat qoʻmitasining raisi tomonidan Senat Devoni Rahbariga topshiriladi.

28. Hisobot va axborotni tinglash haqidagi masalalar boʻyicha Senat qarorlari loyihalarning nusxalari, shuningdek boshqa zarur hujjatlar Umumiy boʻlim xodimlari tomonidan koʻpaytiriladi va Nazorat-axborot boʻlimiga topshiriladi.

29. Hisobot va axborotni tinglash haqidagi masalalar boʻyicha Senat qarorlarining loyihalari bilan bir vaqtda Senat qoʻmitasi tomonidan Senat Devoni Rahbari bilan kelishilgan holda ushbu qarorlarni tarqatish varaqlari tayyorlanadi.

30. Senatorlarga Senatning yalpi majlisida muhokamada qatnashish uchun hisobot va axborotni tinglash haqidagi masalalar boʻyicha Senat qarorlarining loyihalari va boshqa zarur hujjatlar topshiriladi.

31. Senatning yalpi majlisida hisobot va axborotni tinglash haqidagi masalalar boʻyicha qabul qilingan Senat qarorlarini tegishli blankada chiqarilishi taʼminlanib, Senat qarorlarining rus tilidagi elektron nusxasi Umumiy boʻlimda, davlat tilidagi nusxasi esa Matbuot va tarjima boʻlimida saqlanadi.

32. Hisobot va axborotni tinglash haqidagi masalalar boʻyicha Senat Raisining oʻrinbosari, Senat qoʻmitasining raisi, Senat Devonining Rahbari, Yuridik boʻlim mudiri, Matbuot va tarjima boʻlimi mudiri tomonidan viza qoʻyilgan Senat qarorlari Senat qoʻmitasining raisi tomonidan imzolash uchun Senat Raisiga topshiriladi.

33. Hisobot va axborotni tinglash haqidagi masalalar boʻyicha Senat qarorlarining Umumiy boʻlim muhri bilan tasdiqlangan nusxalari qarorlar qabul qilingan kundan boshlab oʻn kun ichida ushbu qarorlarni tarqatish varaqlarida koʻrsatilgan tegishli tashkilotlarga yuboriladi.

34. Hisobot va axborotni tinglash yakunlari boʻyicha qabul qilingan Senat qarorlarining ijrosini nazorat qilish, qoida tariqasida, Senat qoʻmitasi zimmasiga yuklatiladi. Senat qoʻmitasining raisi Senat qarorining ijro etilishi ustidan nazorat qilishni amalga oshirish uchun shaxsan javobgardir.

35. Hisobot va axborotni tinglash yakunlari boʻyicha qabul qilingan Senat qarorlari tegishincha Oʻzbekiston Respublikasi Bosh prokuraturasi, Oʻzbekiston Respublikasi Adliya vazirligi, shuningdek agar ushbu qarorlar faoliyatiga taalluqli boʻlsa, davlat boshqaruvi organlari, huquqni muhofaza qiluvchi organlari va nazorat tuzilmalari tomonidan koʻrib chiqilishi va ijro etilishi shart.

36. Oʻzbekiston Respublikasi Bosh prokuraturasi, Oʻzbekiston Respublikasi Adliya vazirligi, shuningdek davlat boshqaruvi organlari, huquqni muhofaza qiluvchi organlari va nazorat tuzilmalari hisobot va axborotni tinglash yakunlari boʻyicha qabul qilingan Senat qarorlarining ijro etilishi bilan bogʻliq axborot va materiallarni Senatning tegishli qarorlari bilan belgilangan muddatlarda taqdim etishlari shart.

37. Senat qoʻmitasi tomonidan Oʻzbekiston Respublikasi Bosh prokuraturasidan, Oʻzbekiston Respublikasi Adliya vazirligidan, shuningdek davlat boshqaruvi organlari, huquqni muhofaza qiluvchi organlari va nazorat tuzilmalaridan Senat qarorining ijro etilishi natijalari boʻyicha kelib tushayotgan axborotlarni umumlashtirish va tahlil qilish yuzasidan ish olib boriladi.

38. Zarur hollarda Senat qoʻmitasi Oʻzbekiston Respublikasi Bosh prokuraturasidan, Oʻzbekiston Respublikasi Adliya vazirligidan, shuningdek davlat boshqaruvi organlari, huquqni muhofaza qiluvchi organlari va nazorat tuzilmalaridan qoʻshimcha hujjatlar, xulosalar, statistik va boshqa maʼlumotlarni talab qilib olishi mumkin.

39. Senatning hisobot va axborotni koʻrib chiqish bilan bogʻliq faoliyatini tashkiliy, axborot, moddiy-texnikaviy jihatdan taʼminlash Senat Devoni tomonidan amalga oshiriladi.

Senat Devoni boʻlimlarining Senatning yuqorida koʻrsatilgan vakolatini taʼminlash bilan bogʻliq faoliyati Oʻzbekiston Respublikasi Oliy Majlisi Senati Raisining 2010-yil 22-iyuldagi 85-sonli Farmoyishi bilan tasdiqlangan Oʻzbekiston Respublikasi Oliy Majlisi Senati Devonining boʻlimlari toʻgʻrisidagi nizomlar bilan belgilanadi.