Mamlakatimiz poytaxti Toshkent shahrida joylashgan, xalqimiz ma’naviy merosining uzviy bir qismi bo‘lgan Hazrati Imom (Hastimom) me’moriy majmuasi yurtimiz va musulmon olamida katta obro‘-e’tibor qozongan tabarruk maskan hisoblanadi. Majmua tarkibidagi Qaffol Shoshiy maqbarasi, Baroqxon va Mo‘yi muborak madrasalari, Tilla shayx va Namozgoh masjidlari kabi tarixiy obidalar xalqimiz tomonidan asrlar davomida asrab-avaylab kelinmoqda.

Bu qutlug‘ dargoh diyorimizda muqaddas islom dini va falsafasini, uning insonparvarlik g‘oyalarini keng yoyishda yirik ilmiy-ma’rifiy markaz bo‘lib xizmat qilayotganini, ayniqsa, O‘zbekiston musulmonlari idorasining kutubxonasida saqlanayotgan Qur’oni karimning eng qadimiy va mo‘tabar nusxalaridan biri bo‘lgan mashhur Usmon Qur’oni, shuningdek, ming-minglab noyob qo‘lyozmalar jahon jamoatchiligining e’tiborini o‘ziga tortib kelayotganini ta’kidlash lozim.

Hazrati Imom majmuasining tariximiz, ma’naviy hayotimizdagi o‘rni va ahamiyatini inobatga olib hamda uning asl tarixiy qiyofasini tiklash, bu yerda keng ko‘lamli qurilish-ta’mirlash va obodonlashtirish ishlarini amalga oshirish, majmuaning infratuzilmasini har tomonlama rivojlantirish maqsadida:

1. O‘zbekiston Musulmonlari idorasi, Madaniyat va sport ishlari vazirligi, Fanlar akademiyasi, Respublika Ma’naviyat targ‘ibot markazi hamda bu savobli ishga hissa qo‘shish va unda ishtirok etish istagini bildirgan jismoniy va yuridik shaxslarning tashabbusi bilan Toshkent shahar hokimligi qoshida Hazrati Imom (Hastimom) jamoatchilik jamg‘armasi ta’sis etilgani ma’lumot uchun qabul qilinsin va keng jamoatchilikning mazkur jamg‘armani qo‘llab-quvvatlash to‘g‘risidagi takliflari ma’qullansin.

Jamg‘armaning mamlakatimizdagi tashkilotlar, idoralar, korxonalar, tijorat banklari va boshqa muassasalardan iborat homiylar guruhi ilovaga muvofiq e’tiborga olinsin.

2. Jamg‘arma Hazrati Imom majmuasida qurilish-ta’mirlash, qayta tiklash va obodonlashtirish ishlari olib boriladigan davrda buyurtmachi sifatida faoliyat yuritishi, uning asosiy vazifasi majmua hududida amalga oshiriladigan qurilish-ta’mirlash, qayta tiklash va obodonlashtirish ishlariga ko‘maklashish uchun zarur mablag‘larni to‘plash va ularning maqsadli ravishda sarflanishini ta’minlashdan iborat ekani belgilab qo‘yilsin.

3. Jamg‘arma notijorat tashkilot bo‘lib, unga notijorat tashkilotlar uchun qonunchilikda ko‘zda tutilgan soliq imtiyozlari tatbiq etiladi.

4. O‘zbekiston Respublikasi Adliya vazirligi 15 kun muddatda Hazrati Imom jamoatchilik jamg‘armasining Nizomini o‘rnatilgan tartibda ro‘yxatga olsin.

5. O‘zbekiston Respublikasi Moliya vazirligi Vazirlar Mahkamasining zaxira jamg‘armasidan Hazrati Imom jamoatchilik jamg‘armasining faoliyatini qo‘llab-quvvatlash uchun 500 million so‘m miqdorida mablag‘ ajratsin.

6. O‘zbekiston milliy teleradiokompaniyasi, O‘zbekiston milliy axborot agentligi va boshqa ommaviy axborot vositalariga Hazrati Imom majmuasida amalga oshiriladigan qurilish-ta’mirlash, qayta tiklash, obodonlashtirish, uning infratuzilmasini rivojlantirish bilan bog‘liq ishlarni muntazam yoritib borish tavsiya etilsin.

7. Mazkur qarorning bajarilishini nazorat qilish O‘zbekiston Respublikasining Bosh vaziri Sh. Mirziyoyev zimmasiga yuklansin.