Oʻzbekiston Respublikasi Prezidentining “Taʼlim muassasalarini rekonstruksiya qilish, mukammal taʼmirlash va jihozlash boʻyicha budjetdan tashqari jamgʻarmani tashkil etish toʻgʻrisida” 2010-yil 10-noyabrdagi PQ-1432-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Budjetdan tashqari Taʼlim muassasalarini rekonstruksiya qilish, mukammal taʼmirlash va jihozlash jamgʻarmasi toʻgʻrisidagi nizom 1-ilovaga muvofiq;

Taʼlim muassasalarini rekonstruksiya qilish, mukammal taʼmirlash va jihozlashning har yilgi dasturlarini ishlab chiqish va tasdiqlash tartibi 2-ilovaga muvofiq tasdiqlansin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda Oʻzbekiston Respublikasi Moliya vazirligi huzuridagi budjetdan tashqari Maktab taʼlimi jamgʻarmasi tugatilishi munosabati bilan qonun hujjatlariga kiritiladigan oʻzgartirish va qoʻshimchalar toʻgʻrisida bir oy muddatda Oʻzbekiston Respublikasi Vazirlar Mahkamasiga takliflar kiritsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Mazkur Nizom budjetdan tashqari Taʼlim muassasalarini rekonstruksiya qilish, mukammal taʼmirlash va jihozlash jamgʻarmasi (keyingi oʻrinlarda Jamgʻarma deb ataladi) faoliyatining maqsadi va asosiy vazifalarini, Jamgʻarmani boshqarish tartibini, uning mablagʻlarini shakllantirish manbalarini va ulardan foydalanish yoʻnalishlarini belgilaydi.

2. Jamgʻarma Oʻzbekiston Respublikasi Prezidentining “Taʼlim muassasalarini rekonstruksiya qilish, mukammal taʼmirlash va jihozlash boʻyicha budjetdan tashqari jamgʻarmani tashkil etish toʻgʻrisida” 2010-yil 10-noyabrdagi PQ-1432-son qaroriga muvofiq taʼlim muassasalarining yaratilgan moddiy-texnika bazasidan samarali foydalanish va uni muntazam ravishda yangilab borishni, ularni tizimli asosda eng zamonaviy kompyuter texnikasi, oʻquv-laboratoriya uskunalari, mebel va anjomlar bilan qayta jihozlash, shuningdek oʻquv jarayoniga ilgʻor taʼlim texnologiyalari va axborot-kommunikatsiya tizimlarini keng joriy etishni taʼminlash maqsadida tashkil etilgan.

3. Jamgʻarma oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidenti farmonlari, qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, ushbu Nizomga hamda boshqa normativ-huquqiy hujjatlarga, shuningdek Jamgʻarmani boshqarish kengashi qarorlariga amal qiladi.

4. Quyidagilar Jamgʻarmaning asosiy vazifalari va mablagʻlaridan foydalanish yoʻnalishlari hisoblanadi:

Jamgʻarmaga tushayotgan mablagʻlarni keyinchalik ulardan taʼlim muassasalarini — umumtaʼlim maktablarini, akademik litseylar va kasb-hunar kollejlarini jihozlash (toʻliq jihozlash)da maqsadli foydalanish uchun jamlash;

taʼlim muassasalarini rekonstruksiya qilish va mukammal taʼmirlash, shu jumladan zarurat boʻlganda, oʻquv binolarini oʻquv ustaxonalari va laboratoriyalari bilan kengaytirish, sport zallari va maydonchalarini, boshqa infratuzilma obyektlarini barpo etish ishlarini moliyalashtirish;

zamonaviy talablarni hisobga olgan holda va tasdiqlangan normativlardan kelib chiqib taʼlim muassasalarini eng yangi oʻquv-laboratoriya va ishlab chiqarish uskunalari, kompyuter texnikasi, axborot-kommunikatsiya texnologiyalarining oʻqitishga koʻmaklashuvchi boshqa elementlari, shuningdek oʻquv mebeli va anjomlari bilan tizimli jihozlash va toʻliq jihozlashni moliyalashtirish.

5. Jamgʻarma daromadlari quyidagi manbalar hisobiga shakllantiriladi:

xoʻjalik yurituvchi subyektlar tomonidan Jamgʻarmaga qonun hujjatlarida belgilangan tartibda majburiy ajratmalarni toʻlashdan tushadigan mablagʻlar;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari;

xalqaro moliya institutlari hamda boshqa xorijiy donorlarning grantlari va imtiyozli kreditlari (qarzlari);

xayriya qiluvchilar — yuridik va jismoniy shaxslar, shu jumladan Oʻzbekiston Respublikasi norezidentlarining mablagʻlari;

Jamgʻarmaning vaqtincha boʻsh mablagʻlarini joylashtirishdan olinadigan daromadlar va qonun hujjatlarida taqiqlanmagan boshqa tushumlar.

6. Xoʻjalik yurituvchi subyektlar (toʻlovchilar) tomonidan Jamgʻarmaga majburiy ajratmalar summasi har yili Oʻzbekiston Respublikasi Prezidenti qaroriga koʻra belgilanadigan toʻlov obyekti va stavkasidan kelib chiqqan holda aniqlanadi.

7. Xalqaro moliyaviy tashkilotlar va institutlarning grantlari va imtiyozli kreditlari (qarzlari), xayriya qiluvchilar mablagʻlari, shu jumladan Oʻzbekiston Respublikasi norezidentlarining mablagʻlari Jamgʻarma hisobiga qonun hujjatlarida belgilangan tartibda tushadi.

8. Tarkibi Oʻzbekiston Respublikasi Prezidenti tomonidan tasdiqlanadigan Jamgʻarmani boshqarish kengashi Jamgʻarmani boshqarishning yuqori organi hisoblanadi.

9. Jamgʻarmani boshqarish kengashi:

umumiy rahbarlikni amalga oshiradi va Jamgʻarmaga yuklangan vazifalarning bajarilishini tashkil qiladi;

Jamgʻarma daromadlari barqaror shakllantirilishi, oʻz vaqtida moliyalashtirilishi va Jamgʻarma mablagʻlaridan maqsadli foydalanilishi taʼminlanishini doimiy nazorat qiladi;

Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan taʼlim muassasalari moddiy-texnika bazasining holati muntazam ravishda oʻrganilishini va ularning Oʻzbekiston Respublikasi Iqtisodiyot vazirligi, “Davarxitektqurilish” qoʻmitasi va Moliya vazirligi, Qoraqalpogʻiston Respublikasi Vazirlar Kengashi viloyatlar va Toshkent shahar hokimliklari bilan birgalikda taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yillik dasturlari shakllantirilishini tashkil etadi;

taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yillik dasturlarini tasdiqlaydi;

umumiy tasdiqlangan parametrlar doirasida, zarurat boʻlganda, Jamgʻarma daromadlari (manbalar boʻyicha) va xarajatlarining prognoz parametrlariga oʻzgartirish va aniqliklar kiritadi;

Jamgʻarma Ijro etuvchi direksiyasi faoliyatini nazorat qiladi;

Jamgʻarma oldiga qoʻyilgan vazifalarni hal etish uchun manfaatdor vazirliklar, idoralar, xoʻjalik yurituvchi subyektlarni va notijorat tashkilotlarni jalb qiladi, shuningdek xayriya qiluvchilar, shu jumladan Oʻzbekiston Respublikasi norezidentlarining mablagʻlarini jalb etishda Jamgʻarmaga koʻmaklashadi.

10. Jamgʻarmani boshqarish kengashi majlislari zaruratga koʻra, biroq har chorakda kamida bir marta oʻtkaziladi.

Jamgʻarmani boshqarish kengashi qarorlari majlisda qatnashayotgan Jamgʻarmani boshqarish kengashi aʼzolarining oddiy koʻpchilik ovozi bilan qabul qilinadi. Ovozlar teng boʻlib qolganda Jamgʻarmani boshqarish kengashi raisining ovozi hal qiluvchi hisoblanadi.

11. Jamgʻarmani boshqarish kengashining oʻz vakolatlari doirasida qabul qilgan qarorlari Oʻzbekiston Respublikasining vazirliklari, idoralari va boshqa tashkilotlari tomonidan bajarilishi majburiydir.

12. Jamgʻarmani joriy boshqarish Jamgʻarmaning Ijro etuvchi direksiyasi tomonidan amalga oshiriladi.

Quyidagilar Jamgʻarma ijro etuvchi direksiyasining asosiy vazifalari hisoblanadi:

Jamgʻarma daromadlari va xarajatlari prognozini hamda ularning bajarilishi toʻgʻrisidagi hisobotni tayyorlash;

Jamgʻarmani boshqarish kengashiga daromadlar manbalari bilan bogʻlagan holda Jamgʻarma mablagʻlaridan asosiy yoʻnalishlar (taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash) boʻyicha foydalanish yuzasidan takliflar kiritish;

taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning manzilli roʻyxatlarining bajarilishini tahlil qilish va monitoring olib borish;

zarurat boʻlganda joylarga chiqqan holda, taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yillik dasturlarini shakllantirishda ishtirok etish;

Jamgʻarma daromadlari va xarajatlarini oyma-oy tasdiqlash, shuningdek daromadlar parametrlarini mintaqalar boʻyicha Oʻzbekiston Respublikasi Moliya vazirligi va Davlat soliq qoʻmitasining tegishli boʻlinmalariga hamda xarajatlar parametrlarini Jamgʻarma mablagʻlaridan foydalanish yoʻnalishlari boʻyicha Moliya vazirligining tegishli boʻlinmalariga va hududiy moliya organlariga yetkazish, shuningdek Oʻzbekiston Respublikasi Moliya vazirligi tomonidan ishlab chiqiladigan shakllar boʻyicha ularning oʻz vaqtida va toʻliq bajarilishi monitoringini olib borish;

taʼlim muassasalarini rekonstruksiya qilish va jihozlash (toʻliq jihozlash)ga Jamgʻarma tomonidan jalb etilayotgan xorijiy imtiyozli kreditlar va qarzlar hisobga olinishini, shuningdek qarz bitimlari shartlariga muvofiq ularning oʻz vaqtida qaytarilishini va ularga xizmat koʻrsatilishini taʼminlash.

Jamgʻarmaning ijro etuvchi direktori vazifalari Oʻzbekiston Respublikasi Moliya vazirining mutasaddi oʻrinbosariga yuklanadi.

13. Jamgʻarma daromadlari va xarajatlari prognozini tayyorlash, koʻrib chiqish va tasdiqlash “Budjet tizimi toʻgʻrisida”gi Oʻzbekiston Respublikasi Qonuniga va ushbu Nizomga muvofiq Oʻzbekiston Respublikasi Davlat budjetini tayyorlash bilan bogʻliq holda amalga oshiriladi.

14. Jamgʻarmaning ijro etuvchi direksiyasi har yili navbatdagi yil uchun:

Oʻzbekiston Respublikasi Davlat soliq qoʻmitasi bilan birgalikda — Jamgʻarmaga majburiy ajratmalar tushumlari prognozini tayyorlaydi;

Oʻzbekiston Respublikasi Iqtisodiyot vazirligi, Moliya vazirligi, Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda — budjetdan tashqari manbalardan, shu jumladan xalqaro tashkilotlar va moliya institutlarining grantlari va kreditlarini, xayriya qiluvchilarning ehsonlarini jalb etishdan tushumlar prognozlarini tayyorlaydi.

15. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Oʻzbekiston Respublikasi Iqtisodiyot vazirligi, “Davarxitektqurilish” qoʻmitasi va Moliya vazirligi bilan birgalikda 1-avgustgacha keyingi yil uchun Jamgʻarmaning Ijro etuvchi direksiyasiga barcha yoʻnalishlar boʻyicha Jamgʻarma xarajatlari prognozlarini hamda keyingi yil uchun Qoraqalpogʻiston Respublikasi, viloyatlar va tumanlar (shaharlar) boʻyicha taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yilgi dasturlarini taqdim etadilar.

16. Jamgʻarmaning Ijro etuvchi direksiyasi Jamgʻarmaga tushayotgan mablagʻlar doirasida, Oʻzbekiston Respublikasi Moliya vazirligi va Iqtisodiyot vazirligi bilan birgalikda Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash) dasturining uzil-kesil parametrlarini shakllantiradi hamda Oʻzbekiston Respublikasi Davlat budjeti loyihasi kiritilishi bilan bogʻlangan muddatlarda Oʻzbekiston Respublikasi Vazirlar Mahkamasiga koʻrib chiqish va tasdiqlash uchun kiritadi.

17. Jamgʻarma daromadlari va xarajatlarining yillik parametrlari tasdiqlangandan keyin Jamgʻarmaning ijro etuvchi direksiyasi 5 kun mobaynida Jamgʻarma mablagʻlarini oluvchilarni (Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati injiniring kompaniyalarini) ular uchun belgilangan xarajatlar hajmi toʻgʻrisida xabardor qiladi.

18. Jamgʻarma mablagʻlari Jamgʻarmaning gʻazna hisob raqamidan, Qoraqalpogʻiston Respublikasi, viloyatlar va Toshkent shahri boʻyicha Gʻaznachilik boshqarmalarida (keyingi oʻrinlarda Gʻaznachilik hududiy boshqarmalari deb ataladi) ochiladigan gʻaznachilik shaxsiy hisob raqamlari orqali sarflanadi.

19. Jamgʻarma mablagʻlaridan foydalanish Qoraqalpogʻiston Respublikasi Moliya vazirligida, viloyatlar va Toshkent shahar moliya boshqarmalarida roʻyxatdan oʻtkazilgan xarajatlar smetalari asosida quyidagilar tomonidan:

taʼlim muassasalarini rekonstruksiya qilish va mukammal taʼmirlash boʻyicha — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” injiniring kompaniyalari tomonidan, tanlov savdolari asosida va kapital qurilish sohasidagi qonun hujjatlari bilan belgilangan tartibga muvofiq;

taʼlim muassasalarini jihozlash (toʻliq jihozlash) boʻyicha — Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, shuningdek Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hududiy boshqarmalari tomonidan, qonun hujjatlarida belgilangan tartibda oʻtkazilgan tanlov savdolari asosida amalga oshiriladi.

20. Qoraqalpogʻiston Respublikasi, viloyatlar va Toshkent shahri boʻyicha Gʻaznachilik hududiy boshqarmalari taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash) boʻyicha shartnomalarni belgilangan tartibda roʻyxatdan oʻtkazishni hamda ular boʻyicha qatʼiyan xarajatlar smetalarida nazarda tutilgan mablagʻlar doirasida hamda taʼlim muassasalarini rekonstruksiya qilish va mukammal taʼmirlashning belgilangan tartibda tasdiqlangan aniq manzilli roʻyxatlariga muvofiq xarajatlar toʻlovini amalga oshiradilar.

21. Taʼlim muassasalarini rekonstruksiya qilish va mukammal taʼmirlash boʻyicha xarajatlarni toʻlash Qoraqalpogʻiston Respublikasi, viloyatlar va Toshkent shahri boʻyicha Gʻaznachilik hududiy boshqarmalari tomonidan, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlarining toʻlov topshiriqnomalari asosida, taʼlim muassasalarini rekonstruksiya qilish va mukammal taʼmirlashning aniq manzilli roʻyxatlari boʻyicha hamda tanlov savdolari natijalarini hisobga olgan holda tuzilgan shartnomalar boʻyicha, belgilangan limitlar doirasida amalga oshiriladi, shartnomalarda quyidagilar nazarda tutiladi:

rekonstruksiya qilish va mukammal taʼmirlashning dastlabki ikki oyi mobaynida teng ulushlar bilan, qurilishning prognoz qilinayotgan yili uchun tanlov savdolari natijalari boʻyicha aniqlangan ishlar qiymatining 30 foizigacha miqdorda avans toʻlovlarini amalga oshirish;

har oyda, ajratilgan avansni mutanosib ravishda ushlab qolishni hisobga olgan holda, bajarilgan ishlar qiymatining 95 foizi miqdorida joriy moliyalashtirishni amalga oshirish;

shartnomada koʻrsatilgan kafolat muddati tugagach — qolgan 5 foizni pudratchiga toʻlash.

22. Taʼlim muassasalarini jihozlash (toʻliq jihozlash) boʻyicha xarajatlarni toʻlash Qoraqalpogʻiston Respublikasi, viloyatlar va Toshkent shahri boʻyicha Gʻaznachilik hududiy boshqarmalari tomonidan, Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalarining, shuningdek Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazi hududiy boshqarmalarining toʻlov topshiriqnomalari asosida, nazarda tutilgan mablagʻlar doirasida hamda Gʻaznachilik boshqarmalarida roʻyxatdan oʻtkazilgan, belgilangan tartibda tuzilgan shartnomalar boʻyicha amalga oshiriladi, shartnomalarda quyidagilar nazarda tutiladi:

shartnoma umumiy summasining 15 foizi miqdorida avans toʻlovini amalga oshirish;

har oyda, ajratilgan avans toʻlovlarini ushlab qolgan holda, yetkazib berilgan tovarlarning amaldagi hajmidan kelib chiqib joriy moliyalashtirishni amalga oshirish.

23. Mablagʻlarni (shu jumladan tovarlarni yetkazib beruvchilar, ishlar va xizmatlarni bajaruvchilar tomonidan shartnoma majburiyatlarining bajarilmaganligi uchun jarima sanksiyalarini qoʻllashdan olingan mablagʻlarni) xarajatlarning tasdiqlanmagan smetasisiz, shuningdek Jamgʻarma xarajatlari prognozida nazarda tutilmagan tadbirlarga yoki ham umuman xarajatlar smetalari boʻyicha va ham xarajatlarning alohida turlari boʻyicha smetalarda belgilanganidan ortiqcha sarflash taqiqlanadi.

24. Joriy moliya yili yakunlari boʻyicha rekonstruksiya qilish, mukammal taʼmirlash va jihozlash (toʻliq jihozlash)ning aniq manzilli roʻyxatlarida nazarda tutilgan toʻliq moliyalashtirilmagan mablagʻlar, Jamgʻarmaning daromadlari va xarajatlari balanslanganligi taʼminlanishini hisobga olgan holda, Oʻzbekiston Respublikasi Moliya vazirligi tomonidan belgilangan tartibda kelgusi moliya yilida toʻlanadi.

25. Jamgʻarmaning hisob raqamlaridan mablagʻlarni ushbu Nizomda nazarda tutilmagan maqsadlarga oʻtkazish va vaqtinchalik olib qoʻyish taqiqlanadi.

26. Jamgʻarmaning ijro etuvchi direksiyasi Jamgʻarmaning buxgalteriya hisobi, daromadlari va xarajatlari ijrosi toʻgʻrisidagi hisobotlarning tuzilishi va taqdim etilishi uchun javob beradi.

Jamgʻarmaning ijro etuvchi direksiyasi har oyda, hisobot oyidan keyingi oyning 10-kunidan kechikmay Oʻzbekiston Respublikasi Moliya vazirligi tomonidan ishlab chiqilgan shakl boʻyicha Oʻzbekiston Respublikasi Moliya vazirligiga Jamgʻarma daromadlari va xarajatlari ijrosi toʻgʻrisida hisobot taqdim etadi.

27. Oʻzbekiston Respublikasi Davlat soliq qoʻmitasi va davlat soliq xizmatining hududiy organlari:

Jamgʻarmaga majburiy ajratmalarning toʻgʻri hisoblanishi, toʻliq va oʻz vaqtida toʻlanishi yuzasidan nazoratni;

toʻlovchilar boʻyicha Jamgʻarmaga majburiy ajratmalar hisobi yuritilishini;

xoʻjalik yurituvchi subyektlar tomonidan Jamgʻarmaga majburiy ajratmalarning toʻgʻri hisoblanishi va toʻlanishi boʻyicha tekshirishlarning amalga oshirilishini taʼminlaydilar.

28. Oʻzbekiston Respublikasi Davlat soliq qoʻmitasi har oyda, hisobot oyidan keyingi oyning 10-kunidan kechikmay Jamgʻarmaning ijro etuvchi direksiyasiga hisobot davridan keyingi oyning 1-kunidagi holati boʻyicha Jamgʻarmaga majburiy ajratmalarning hisoblangan va tushgan summalari, shuningdek Qoraqalpogʻiston Respublikasi, viloyatlar va Toshkent shahri, shuningdek vazirliklar va idoralar boʻyicha mazkur ajratmalar yuzasidan qarzlar toʻgʻrisida tezkor hisobot taqdim etadi.

Jamgʻarmaning ijro etuvchi direksiyasi Oʻzbekiston Respublikasi Davlat soliq qoʻmitasidan Jamgʻarmaga majburiy ajratmalar toʻlovlaridan mablagʻlar tushishiga taalluqli qoʻshimcha maʼlumotlarni soʻrab olish huquqiga ega.

29. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlari tomonidan har oyda, hisobot davridan keyingi oyning 5-kunidan kechikmay Qoraqalpogʻiston Respublikasi Moliya vazirligiga, viloyatlar va Toshkent shahar moliya boshqarmalariga – taʼlim muassasalarini rekonstruksiya qilish va mukammal taʼmirlashga ajratilgan Jamgʻarma mablagʻlaridan foydalanilishi boʻyicha hisobotlar taqdim etiladi.

30. Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, shuningdek Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hududiy boshqarmalari tomonidan har oyda, hisobot davridan keyingi oyning 5-kunidan kechikmay Qoraqalpogʻiston Respublikasi Moliya vazirligiga, viloyatlar va Toshkent shahar moliya boshqarmalariga — taʼlim muassasalarini jihozlashga (toʻliq jihozlashga) ajratilgan Jamgʻarma mablagʻlaridan foydalanilishi boʻyicha hisobotlar taqdim etiladi.

31. Qoraqalpogʻiston Respublikasi Moliya vazirligi, viloyatlar va Toshkent shahar moliya boshqarmalari — amalga oshirilgan xarajatlar yuzasidan har oyda, hisobot oyidan keyingi oyning 8-kunidan kechikmay Jamgʻarmaning ijro etuvchi direksiyasiga Oʻzbekiston Respublikasi Moliya vazirligi tomonidan ishlab chiqilgan shakl boʻyicha hisobot taqdim etadilar.

32. Oʻzbekiston Respublikasi Moliya vazirligi Davlat soliq qoʻmitasi bilan birgalikda respublika mintaqalari boʻyicha Jamgʻarmaga majburiy ajratmalar tushumlaridan Jamgʻarma daromadlar prognozining bajarilishi holatini tahlil qiladi hamda daromadlarning oʻz vaqtida va toʻliq tushishiga salbiy taʼsir koʻrsatgan aniqlangan omillar asosida ularni bartaraf etishga doir qoʻshma chora-tadbirlar koʻradi.

33. Jamgʻarma mablagʻlaridan maqsadli foydalanilishi yuzasidan nazorat Oʻzbekiston Respublikasi Moliya vazirligining Nazorat-taftish bosh boshqarmasi va uning hududiy boʻlinmalari tomonidan amalga oshiriladi.

34. Jamgʻarmaning ijro etuvchi direksiyasi:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlarining — taʼlim muassasalarini rekonstruksiya qilish va mukammal taʼmirlash boʻyicha bajarilgan ishlar hamda toʻlangan mablagʻlar toʻgʻrisidagi hisobot maʼlumotlari asosida;

Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalarining, shuningdek Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazi hududiy boshqarmalarining — taʼlim muassasalariga zamonaviy oʻquv-laboratoriya asbob-uskunalari, kompyuter texnikasi, mebellar va boshqa anjomlarning amalda yetkazib berilganligi hamda toʻlangan mablagʻlar, shuningdek ularning boshlangʻich hujjatlarga (schyot-fakturalarga) va amalda bajarilgan ishlarga (xizmatlarga) muvofiqligi toʻgʻrisidagi hisobot maʼlumotlari asosida Jamgʻarma mablagʻlaridan maqsadli va oqilona foydalanilishi boʻyicha doimiy monitoring olib boradi.

35. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tuzilmalaridagi taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning aniq manzilli roʻyxatlarini shakllantirish va monitoring guruhlari hamda Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalaridagi, shuningdek Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hududiy boshqarmalaridagi tegishli shuʼbalar ishlab chiqiladigan baholash mezonlari asosida, taʼlim standartlari talablarini hisobga olgan holda, oʻquv jarayonida zamonaviy oʻquv-laboratoriya asbob-uskunalari, kompyuter texnikasi, mebellar va anjomlardan foydalanish samaradorligi monitoringi qatʼiyan taʼminlanishi yuzasidan shaxsan javob beradilar.

36. Jamgʻarma mablagʻlaridan tasdiqlangan xarajatlar smetalariga muvofiq qatʼiyan maqsadli va samarali foydalanilishi yuzasidan javobgarlik Jamgʻarma mablagʻlarini oluvchilar — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi tegishli yagona buyurtmachi xizmatlari, Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, shuningdek Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hududiy boshqarmalari rahbarlari zimmasiga yuklanadi.

37. Jamgʻarmani qayta tashkil etish va tugatish Oʻzbekiston Respublikasi qonun hujjatlarida belgilangan tartibda amalga oshiriladi.

1. Ushbu Tartib Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Iqtisodiyot vazirligi, Moliya vazirligi, boshqa manfaatdor vazirliklar va idoralar hamda ularning hududiy boʻlinmalarining, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Oʻzbekiston Respublikasi Moliya vazirligi huzuridagi Taʼlim muassasalarini rekonstruksiya qilish, mukammal taʼmirlash va jihozlash jamgʻarmasi (keyingi oʻrinlarda Jamgʻarma deb ataladi) mablagʻlari hisobiga taʼlim muassasalarini rekonstruksiya qilish, mukammal taʼmirlash va jihozlashning har yilgi dasturlarini ishlab chiqish va tasdiqlash borasidagi asosiy vazifalarini belgilaydi.

2. Tumanlar (shaharlar) xalq taʼlimi muassasalari faoliyatini metodik taʼminlash va tashkil etish boʻlimlari:

taʼlim muassasalari binolari, infratuzilma obyektlarining texnik holati va jihozlanganligini muntazam ravishda doimiy oʻrganib boradilar;

kelgusi yilda rekonstruksiya qilinishi, mukammal taʼmirlanishi va jihozlanishi (toʻliq jihozlanishi) kerak boʻlgan taʼlim muassasalari roʻyxatini har yili 1-aprelgacha aniqlaydilar va Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalariga kiritadilar.

3. Qoraqalpogʻiston Respublikasi Xalq taʼlimi vazirligi (tumanlar (shaharlar) xalq taʼlimi muassasalari faoliyatini metodik taʼminlash va tashkil etish boʻlimlari tomonidan taqdim etilgan obyektlar roʻyxati asosida) hamda Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hududiy boshqarmalari kelgusi yilda rekonstruksiya qilinishi, mukammal taʼmirlanishi va jihozlanishi (toʻliq jihozlanishi) kerak boʻlgan taʼlim muassasalarining taxminiy roʻyxatini har yili 1-maygacha aniqlaydilar hamda Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga kiritadilar.

4. Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari qarorlari bilan har yili 5-maygacha, taʼlim muassasalarining taqdim etilgan taxminiy roʻyxati asosida Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash) dasturlarini shakllantirish boʻyicha ishchi guruhlar tuziladi.

Ishchi guruhlar tarkibiga Qoraqalpogʻiston Respublikasi Xalq taʼlimi vazirligining, viloyatlar va Toshkent shahar xalq taʼlimi boshqarmalarining, shuningdek Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazi hududiy boshqarmalarining, “Davarxitektqurilish” qoʻmitasi Davlat arxitektura-qurilish nazorati inspeksiyalarining, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlarining, Qoraqalpogʻiston Respublikasi Iqtisodiyot vazirligi hamda viloyatlar va Toshkent shahar iqtisodiyot boshqarmalarining, shuningdek moliya organlarining rahbarlari va masʼul xodimlari kiritiladi.

5. Ishchi guruhlar Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yilgi dasturlarini shakllantirishda har bir taʼlim muassasasi binolarining amaldagi texnik holatini va ularning moddiy-texnika jihatidan taʼminlanganligini, shuningdek oʻquv korpuslarining oʻquv ustaxonalari va laboratoriyalari bilan kengaytirishga boʻlgan ehtiyojini, sport zallari va maydonchalari, boshqa infratuzilma obyektlari tashkil etilishini hamda ularning tegishli asbob-uskunalar va anjomlar bilan jihozlanishini hisobga oladilar.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari har yili 1-iyulgacha Oʻzbekiston Respublikasi Xalq taʼlimi vazirligiga hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning taxminiy dasturlarini taqdim etadilar.

7. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Oʻzbekiston Respublikasi Iqtisodiyot vazirligi, “Davarxitektqurilish” qoʻmitasi, Moliya vazirligi bilan birgalikda Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning taqdim etilgan taxminiy dasturlarini oʻrganadilar, zarurat boʻlganda, joyiga borgan holda ularni aniqlashtiradilar hamda har yili 1-avgustgacha Jamgʻarmaning ijro etuvchi direksiyasiga viloyatlar va tumanlar (shaharlar) boʻyicha taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning keyingi yil uchun dasturini taqdim etadilar.

8. Taʼlim muassasalarini rekonstruksiya qilish, mukammal taʼmirlash va jihozlash (toʻliq jihozlash)ning har yilgi dasturlarini shakllantirishda har bir taʼlim muassasasining texnik holati, moddiy-texnika jihatidan amalda taʼminlanganligi, smenaliligi va oʻquvchilari soni hisobga olinadi hamda oʻquv- laboratoriya va ishlab chiqarish asbob-uskunalari, mebellar, sport anjomlari, oʻqitishning multimediy vositalari, kompyuter texnikasi va boshqa asbob-uskunalarning asossiz ravishda roʻyxatdan chiqarilishiga yoʻl qoʻyilmaydi.

9. Jamgʻarmaning ijro etuvchi direksiyasi Jamgʻarmaga tushayotgan mablagʻlar doirasida, Oʻzbekiston Respublikasi Iqtisodiyot vazirligi bilan birgalikda Taʼlim muassasalarini rekonstruksiya qilish, mukammal taʼmirlash va jihozlash dasturining yakuniy parametrlarini shakllantiradi hamda Oʻzbekiston Respublikasi Investitsiya dasturi loyihasi kiritilishi bilan bogʻlangan muddatlarda Jamgʻarmani boshqarish kengashiga koʻrib chiqish va tasdiqlash uchun kiritadi.