Vazirlar Mahkamasining “Canoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini shakllantirish mexanizmini takomillashtirish va amalga oshirishga doir qoʻshimcha chora-tadbirlar toʻgʻrisida” 2010-yil 21-iyuldagi 154-son qaroriga muvofiq hamda eksportga yoʻnaltirilgan va import oʻrnini bosadigan mahsulotlar ishlab chiqarishni yanada ragʻbatlantirish, tarmoqlar ichida va tarmoqlararo, shu jumladan kichik biznes subyektlari bilan respublikaning yirik korxonalari oʻrtasidagi sanoat kooperatsiyasini mustahkamlash maqsadida Vazirlar Mahkamasi qaror qiladi:

1. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi amalga oshirilishini taʼminlash boʻyicha Maxsus idoralararo komissiyaning Oʻzbekiston Respublikasi Prezidentining 2010-yil 23-martdagi PQ-1306-son qarori bilan maʼqullangan 2010-yil uchun sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga (keyingi oʻrinlarda Mahalliylashtirish dasturi deb ataladi) tuzatishlar kiritish toʻgʻrisida:

Mahalliylashtirish dasturining 4-ilovasiga mahsulotlarning tayyor turlarini, xomashyo va materiallar, butlovchi uzellar va detallar ishlab chiqarishni mahalliylashtirishning yangi loyihalarini 1-ilovaga* muvofiq kiritishni;

Mahalliylashtirish dasturidan Mahalliylashtirish dasturining prognoz parametrlari bajarilmaganligi, ishlab chiqarilayotgan mahsulotlarga ehtiyojning yoʻqligi, shuningdek ularning narxi va sifati boʻyicha raqobatbardoshli emasligi munosabati bilan 2-ilovaga* muvofiq loyihalarni chiqarib tashlashni nazarda tutuvchi qarori maʼqullansin.

2. Belgilab qoʻyilsinki, ushbu qarorga muvofiq Mahalliylashtirish dasturiga kiritilgan korxonalarga Oʻzbekiston Respublikasi Prezidentining “2009-yil uchun sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi toʻgʻrisida” 2009-yil 27-yanvardagi PQ-1048-son qarorining 3-bandida nazarda tutilgan imtiyozlar bojxona toʻlovlari boʻyicha — ushbu qaror qabul qilingan vaqtdan boshlab, soliqlar boʻyicha esa — 2010-yil 1-noyabrdan boshlab qoʻllaniladi.

3. Oʻzbekiston Respublikasi Iqtisodiyot vazirligi loyihalar tashabbuskorlari bilan birgalikda bir hafta muddatda 1-ilovaga muvofiq mahalliylashtirilayotgan mahsulotlarni ishlab chiqarishni tashkil etish va ularning prognoz hajmlarini bajarish tarmoq jadvallarini tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.