Strategik ahamiyatga ega boʻlgan A-373 “Toshkent — Oʻsh” avtomobil yoʻlining “Qamchiq” dovonida joylashgan “Qamchiq” va “Rezak” tunnellari, shuningdek ularga tutash aholi punktlari xavfsizligini kuchaytirish maqsadida Vazirlar Mahkamasi qaror qiladi:

1. 2003-yil 1-yanvardan boshlab A-373 “Toshkent — Oʻsh” avtomobil yoʻlining “Qamchiq” va “Rezak” tunnellarida yongʻin xavfsizligini taʼminlash boʻyicha harbiylashtirilgan qism tashkil etish uchun Ichki ishlar vazirligiga ilovaga muvofiq 33 nafar qoʻshimcha shtat birligi ajratsin.

2. Moliya vazirligi (M. Nurmuratov) Ichki ishlar vazirligiga qoʻshimcha xodimlar taʼminoti uchun budjet mablagʻlari ajratilishini nazarda tutsin.

3. “Oʻzavtoyoʻl” davlat-aksionerlik konserni (R. Yunusov) “Oʻzbekneftgaz” milliy xolding kompaniyasi (I. Saidaxmedov) bilan teng ulushli ishtirok etish hisobiga Ichki ishlar vazirligi (Z. Almatov) bilan birgalikda 2003-yil 1-sentabrgacha A-373 “Toshkent — Oʻsh” avtomobil yoʻlining 163-kilometrida yangidan tashkil etilayotgan harbiylashtirilgan yongʻin oʻchirish qismi uchun oʻt oʻchirish deposi qurilishini taʼminlasin.

4. Mazkur qarorning ijrosini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.