O‘zbekiston Respublikasi Prezidentining 2010-yil 27-yanvardagi PQ-1271-son qarori bilan tasdiqlangan “Barkamol avlod yili” Davlat dasturining ijrosini ta’minlash hamda ta’lim muassasalari tarbiyalanuvchilari, o‘quvchi-talabalarining sog‘lom ovqatlanishi tizimini tubdan yaxshilash, oshxona va bufetlarda sanitariya-gigiyena talablariga javob beradigan shart-sharoitlarni takomillashtirish maqsadida Vazirlar Mahkamasi qaror qiladi:

1. Ta’lim muassasalarida sog‘lom ovqatlanishni tashkil etish tizimini yaxshilash chora-tadbirlari rejasi 1-ilovaga muvofiq tasdiqlansin.

2. O‘zbekiston Respublikasi Sog‘liqni saqlash vazirligi:

bir oy muddatda “Umumiy o‘rta ta’lim, o‘rta maxsus va oliy ta’lim muassasalari ta’lim oluvchilarining xavfsiz ovqatlanishini tashkil etishga doir sanitariya-epidemiologiya talablari”ni ishlab chiqsin va tasdiqlasin;

ta’lim muassasalarining oshxona va bufetlari uchun xarid etilayotgan mahsulotlarning sifati, xavfsizligi, yetkazib berilishi, saqlanishi, ovqatlarning tayyorlanishi borasida sanitariya-gigiyena qoidalari va me’yorlariga rioya etilishi ustidan davlat sanitariya nazoratini yanada kuchaytirsin.

3. 2010-yil sentyabr oyidan boshlab ta’lim muassasalarida (oliy ta’lim muassasalari bundan mustasno) ovqatlanishni tashkil etish borasidagi faoliyat faqat tanlov asosida saralab olinadigan yuridik shaxs maqomiga ega bo‘lgan tadbirkorlik subyektlari tomonidan amalga oshirilish tartibi joriy etilsin.

Ta’lim muassasalarida sog‘lom ovqatlanishni tashkil etish to‘g‘risidagi nizom 2-ilovaga muvofiq tasdiqlansin.

4. Ta’lim muassasalarida sog‘lom ovqatlanishni tashkil etish va tarbiyalanuvchilar, o‘quvchilar va talabalarning sifatli va xavfsiz ovqatlanishini ta’minlash uchun Qoraqalpog‘iston Respublikasi Vazirlar Kengashi Raisi, Toshkent shahar va viloyatlar hokimlari shaxsan javobgar ekanliklari belgilab qo‘yilsin.

5. O‘zbekiston milliy teleradiokompaniyasi, O‘zbekiston Milliy axborot agentligi, ommaviy axborot vositalari ta’lim muassasalarida sanitariya-gigiyena talablari asosida ratsional va xavfsiz ovqatlanishni tashkil etish, shuningdek sog‘liq uchun zararli bo‘lgan oziq-ovqat mahsulotlarini iste’mol qilishning salbiy oqibatlari haqida keng targ‘ibot-tashviqot ishlarini olib borsinlar.

6. Manfaatdor vazirliklar va idoralar bir oy muddatda o‘z normativ-huquqiy hujjatlarini ushbu qarorga muvofiqlashtirsinlar.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.

1. Mazkur Nizom umumta’lim maktablari, akademik litseylar, kasb-hunar kollejlari va oliy ta’lim muassasalarida (keyingi o‘rinlarda “ta’lim muassasalari” deb yuritiladi) sog‘lom ovqatlanishni tashkil etish tartibini belgilaydi.

2. Ta’lim muassasalarida ovqatlanishni tashkil etish oshxona, bufet, kafeteriy, kafe (yozgi kafe), choyxona va kichik oshxonalarda (keyingi o‘rinlarda “oshxonalar” deb yuritiladi) belgilangan sanitariya-gigiyena talablariga ko‘ra ovqatlanishni tashkil etish uchun shart-sharoitlar yaratilgan holda amalga oshiriladi.

Mazkur Nizom ta’lim muassasalari hududlari doirasida faoliyat yurituvchi oshxonalarga tatbiq etiladi.

3. Umumta’lim maktablari va akademik litseylar, kasb-hunar kollejlarining o‘quvchilari hamda oliy ta’lim muassasalarining talabalari (keyingi o‘rinlarda “o‘quvchilar” deb yuritiladi) sog‘lig‘ini himoya qilish, tarkibida zararli moddalar bo‘lgan oziq-ovqat mahsulotlari bilan savdo qilishning oldini olish ta’lim muassasalarida sog‘lom ovqatlanishni tashkil etishning asosiy maqsadi hisoblanadi.

4. Ta’lim muassasalarida sog‘lom ovqatlanishni tashkil etishning asosiy vazifalari quyidagilardan iborat:

o‘quvchilarning fiziologik yoshiga, mavsumga (yoz, qish davrlari) qarab oziq-ovqat mahsulotlariga bo‘lgan talablarni inobatga olgan holda ularning ratsional ovqatlanishini ta’minlash;

oziq-ovqat mahsulotlarining xavfsizligi va sifatini kafolatlash;

o‘quvchilar o‘rtasida ovqatlanish bilan bog‘liq yuqumli kasalliklarning ommaviy tarqalishiga yo‘l qo‘ymaslik;

o‘quvchilar o‘rtasida sog‘lom ovqatlanish ko‘nikmalarini shakllantirish;

ta’lim muassasalari oshxonalarida sotilishi taqiqlangan oziq-ovqat mahsulotlari bilan savdo qilishning oldini olish;

o‘quvchilar uchun sifatli oziq-ovqat mahsulotlarini tayyorlash hamda ularning arzon narxlarda sotilishini ta’minlash;

oziq-ovqat mahsulotlarini tayyorlash va saqlashda sanitariya-gigiyena normalari va qoidalariga qat’iy rioya etish.

5. Ta’lim muassasalari oshxonalarida O‘zbekiston Respublikasi Bosh Davlat sanitariya vrachi tomonidan tasdiqlangan ro‘yxatga muvofiq inson sog‘lig‘i uchun zararli moddalar bo‘lgan oziq-ovqat mahsulotlarini sotish qat’iy taqiqlanadi.

5¹. Oliy ta’lim muassasalarida ovqatlanishni tashkil etish mazkur muassasalar tomonidan amalga oshirilganda ularga nisbatan ushbu Nizomning 6 — 22-bandlari qoidalari tatbiq etilmaydi.

6. Ta’lim muassasalarida ovqatlanishni tashkil etish tanlov o‘tkazish yo‘li bilan yuridik shaxs maqomiga ega bo‘lgan tadbirkorlik subyektlari (keyingi o‘rinlarda “yuridik shaxslar” deb yuritiladi) tomonidan amalga oshiriladi.

7. Tanlovni tashkil etish, o‘tkazish va g‘oliblarni aniqlash ishlari umumta’lim muassasalarida Qoraqalpog‘iston Respublikasi Xalq ta’limi vazirligi, viloyatlar xalq ta’limi boshqarmalari va Toshkent shahar xalq ta’limi bosh boshqarmasi, akademik litseylar va kasb-hunar kollejlarida O‘rta maxsus, kasb-hunar ta’limi hududiy boshqarmasi, oliy ta’lim muassasalarida oliy ta’lim muassasasi rektorining buyrug‘i bilan tasdiqlanadigan tanlov komissiyalari tomonidan amalga oshiriladi.

8. Tanlov komissiyasi kamida besh kishidan iborat tarkibda umumta’lim muassasalarida xalq ta’limi muassasalari faoliyatini metodik ta’minlash va tashkil etish tuman (shahar) bo‘limi mudiri, akademik litsey va kasb-hunar kollejlarida akademik litsey va kasb-hunar kolleji direktori, oliy ta’lim muassasalarida oliy ta’lim muassasasi rektori, tuman (shahar) moliya bo‘limi, Davlat sanitariya epidemiologiya nazorati markazi va ta’lim muassasalarining vakillaridan shakllantiriladi.

Umumta’lim muassasalarida xalq ta’limi muassasalari faoliyatini metodik ta’minlash va tashkil etish tuman (shahar) bo‘limi mudiri, akademik litsey va kasb-hunar kollejlarida akademik litsey va kasb-hunar kollejlari direktori, oliy ta’lim muassasalarida oliy ta’lim muassasasi rektori tanlov komissiyasining raisi hisoblanadi.

9. Tanlov o‘tkazilishi haqida tanlov o‘tkazilishidan kamida bir oy oldin viloyat yoki tuman (shahar) ommaviy axborot vositalarida e’lon beriladi.

Tanlovda davlat ro‘yxatidan o‘tgan, umumiy ovqatlanish bo‘yicha kamida olti oy davomida faoliyat yuritayotgan, maxsus moddiy-texnik bazasi va oziq-ovqat texnologiyasi bo‘yicha mutaxassislari mavjud bo‘lgan yuridik shaxslar ishtirok etishi mumkin.

10. Tanlov yangi o‘quv yili boshlangunga qadar o‘tkazilishi shart.

Tanlov har o‘quv yili uchun o‘tkaziladi.

11. Ijara shartnomasi va boshqa majburiyatlarni lozim darajada bajargan yuridik shaxslar bilan kelgusi yil uchun shartnoma muddati, tanlov komissiyasi qaroriga asosan tanlov o‘tkazmasdan uzaytirilishi mumkin.

Shartnoma muddatini uzaytirish qonun hujjatlarida belgilangan tartibda rasmiylashtiriladi.

12. Tanlovda ishtirok etish uchun talabgorlar Tanlov komissiyasiga ariza bilan murojaat qiladi.

Arizaga quyidagilar ilova qilinadi:

yuridik shaxsning davlat ro‘yxatidan o‘tganligi haqidagi guvohnoma nusxasi;

umumiy ovqatlanishni tashkil etish sohasidagi faoliyat, ish tajribasi to‘g‘risida ma’lumotnoma;

maxsus moddiy-texnik baza va oziq-ovqat texnologiyasi bo‘yicha malakali mutaxassislar mavjudligi haqida ma’lumotnoma.

13. Tanlov komissiyasi tomonidan arizalarni ko‘rib chiqish ariza taqdim etilgan sanadan boshlab bir oydan ortiq bo‘lmagan muddatda amalga oshiriladi.

14. Tanlov komissiyasi arizani ko‘rib chiqish natijalari bo‘yicha taklifni ma’qullash yoki rad etish haqida qaror qabul qiladi.

15. Tanlov komissiyasi tomonidan ma’qullangan talabgor bilan shartnoma tuzish haqida ta’lim muassasalariga xabar beriladi va komissiya qarori manfaatdor taraflarga o‘n kun muddatda taqdim etiladi (yoki aloqa vositalari orqali yuboriladi).

16. Ta’lim muassasalarida sog‘lom ovqatlanishni tashkil etishda Qoraqalpog‘iston Respublikasi Xalq ta’lim vazirligi, viloyatlar xalq ta’limi boshqarmalarining, O‘rta maxsus, kasb-hunar ta’limi hududiy boshqarmalarining, oliy ta’lim muassasalari rektorlarining vakolatlari quyidagilardan iborat:

ta’lim muassasalarida sog‘lom ovqatlanishni tashkil etish yuzasidan doimiy monitoring olib borish va natijalarini umumlashtirish;

tegishli mahalliy davlat hokimiyati organlariga ta’lim muassasalarida sifatli va xavfsiz ovqatlanishni tashkil etish haqida takliflar kiritish;

ta’lim muassasalarida umumiy ovqatlanish qoidalarining buzilishi holatlarini bartaraf etish choralarini ko‘rish;

o‘quvchilarning hayoti va sog‘lig‘iga salbiy ta’sir ko‘rsatuvchi oziq-ovqat mahsulotlari haqida keng tushuntirish ishlari olib borish.

17. Tanlov komissiyasi qaroriga muvofiq ovqatlanishni tashkil etish shartlari, taraflarning huquq va majburiyatlari ko‘rsatilgan ijara shartnomasi tuziladi.

18. Ijara shartnomasi ijaraga beruvchi (Qoraqalpog‘iston Respublikasi Davlat mulki qo‘mitasi, O‘zbekiston Respublikasi Davlat mulki qo‘mitasining viloyatlar va Toshkent shahridagi hududiy boshqarmalari huzuridagi Davlat mulkini ijaraga berish markazlari), ijaraga oluvchi va balansda saqlovchi o‘rtasida tuziladi.

19. Ijara shartnomasida quyidagilar ko‘rsatiladi:

ijaraga berilayotgan davlat mulkining tarkibi va qiymati;

ijara muddati;

ijara to‘lovining stavkasi va umumiy miqdori, uni to‘lash shartlari va muddatlari;

davlat mulkining holati va ijaraga beruvchi uni ijaraga oluvchiga berishi kerak bo‘lgan muddat;

ijaraga oluvchi tomonidan davlat mulkidan foydalanish, shu jumladan kommunal to‘lovlarni va boshqa foydalanish to‘lovlarini to‘lash shartlari;

shartnoma to‘xtatilgandan keyin davlat mulkini qaytarish holati va tartibi;

ijaraga olingan davlat mulkini tiklash va ta’mirlash bo‘yicha majburiyatlar;

axborotlar hajmi va ularni ijaraga beruvchiga taqdim etish muddatlari;

ijara shartnomasini, shu jumladan ijara to‘lovlarini to‘lash muddatlari buzilishi munosabati bilan bekor qilish shartlari;

tomonlarning javobgarligi;

qonun hujjatlariga zid bo‘lmagan boshqa shartlar.

20. Ijara shartnomasini bekor qilish qonun hujjatlarida belgilangan tartibda amalga oshiriladi.

21. Ijaraga oluvchi quyidagi huquqlarga ega:

shartnoma imzolangan vaqtdan boshlab, ijaraga berilgan mulkni ijaraga beruvchidan talab qilishga;

ijaraga beruvchi bilan kelishgan holda, uning roziligi bilan ijaraga olingan mol-mulk tarkibiga uning qiymatini oshiradigan o‘zgartishlar kiritishga;

ijaraga olingan mol-mulkni rekonstruksiya qilish, kengaytirish, texnik jihatdan jihozlashga haqlidir.

22. Ijaraga oluvchining majburiyatlari:

ijaraga olingan mol-mulk (bino, xona)dan maqsadli foydalanish;

ijaraga olingan mol-mulk (bino, xona) tarkibiga o‘zgartirish kiritish, rekonstruksiya qilish va texnik jihozlashdan oldin ijaraga beruvchining yozma roziligini olish;

inson sog‘lig‘i uchun zararli moddalar bo‘lgan, sotish taqiqlangan oziq-ovqat mahsulotlarini sotmaslik;

o‘quvchilarning ovqatlanishini tashkil etishda belgilangan sanitariya qoidalari va me’yorlari bajarilishini to‘liq ta’minlash;

o‘quvchilar o‘rtasida ovqatlanish bilan bog‘liq yuqumli kasalliklar ommaviy tarqalishining oldini olish choralarini ko‘rish;

ijaraga olingan oshxonalarda ovqat tayyorlash texnologiyasi qoidalariga to‘liq amal qilgan holda taomlar tayyorlash hamda xomashyo va mahsulotlarning sifatli saqlanishini ta’minlash choralarini ko‘rish;

ijaraga olingan mol-mulk (bino, xona)dan foydalanishda sanitariya qoidalari va me’yorlariga rioya qilish;

ijara shartnomasi bo‘yicha olingan majburiyatlar bajarilishini ta’minlash;

ijara shartnomasi bo‘yicha barcha to‘lovlarni o‘z vaqtida amalga oshirish;

ijara muddati tugagandan keyin ijaraga beruvchining talabiga ko‘ra mol-mulk (bino, xona)ni ijaraga beruvchiga belgilangan tartibda topshirish;

mol-mulk (bino, xona)ni ijaraga beruvchining ruxsatisiz ikkilamchi ijaraga bermaslik.

Ijaraga oluvchi tomonidan ushbu majburiyatlarning buzilishi qonun hujjatlarida belgilangan tartibda ijara shartnomasi bekor qilinishiga asos bo‘ladi.

23. Mazkur Nizom talablariga rioya etilishini nazorat qilish ta’lim muassasasi ma’muriyati va tegishli davlat organlari tomonidan amalga oshiriladi.

24. Mazkur Nizom talablarini buzgan shaxslar qonun hujjatlarida belgilangan tartibda javob beradilar.