Oʻzbekiston Respublikasi Vazirlar Mahkamasi qayd etadiki, Markaziy bank, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, tijorat banklari, soliq organlari hamda pulli xizmatlar koʻrsatuvchi boshqa vazirliklar va idoralar tomonidan Oʻzbekiston Respublikasi Vazirlar Mahkamasining “Naqd pul mablagʻlari emissiyasini qisqartirish chora-tadbirlari toʻgʻrisida” 1996-yil 2-iyuldagi 230-son qarori bilan belgilangan parametrlarni bajarishga oid izchil chora-tadbirlar amalga oshirildi. Umuman respublika va Toshkent shahri boʻyicha naqd pul mablagʻlari emissiyasi darajasini pasaytirishning prognoz koʻrsatkichlarini bajarishga erishildi.

Shu bilan birga, Qoraqalpogʻiston Respublikasi va koʻpgina viloyatlar hokimliklari naqd pul mablagʻlari emissiyasi darajasini pasaytirishga doir belgilangan prognozlarning bajarilishini taʼminlay olmadilar.

Koʻrsatib oʻtilgan qarorning 4-bandiga va “Respublika mintaqalarida naqd pul mablagʻlari emissiyasi darajasini pasaytirish prognozlari va kassa rejalari bajarilishi uchun rahbarlar va mansabdor shaxslarning javobgarligini oshirish va ularni ragʻbatlantirish tartibi toʻgʻrisida Nizom”ga muvofiq kassa prognozlarining 1996-yil iyul oyidagi bajarilish natijalari yuzasidan Vazirlar Mahkamasi qaror qiladi:

1. Oʻzbekiston Respublikasi Markaziy banki, tijorat banklari va Davlat soliq qoʻmitasining oʻz mintaqaviy boʻlinmalari mansabdor shaxslariga nisbatan koʻrsatib oʻtilgan Nizomga muvofiq tegishli choralar koʻrish toʻgʻrisidagi qarorlari maʼlumot uchun qabul qilinsin.

2. Toshkent shahar hokimi K.N. Toʻlaganov, uning oʻrinbosarlari — R.F. Fayzullayev va R.M. Shoabdurahmonov 1996-yilning iyul oyidagi kassa rejasi hamda naqd pul emissiyasi darajasini pasaytirish prognozlarini oshirib bajarganliklari uchun oylik lavozim maoshining 30 foizi miqdorida mukofotlansinlar.

3. Qoraqalpogʻiston Respublikasi Vazirlar Kengashining Raisi va uning oʻrinbosarlariga, shuningdek viloyatlarning hokimlari va ularning oʻrinbosarlariga naqd pul mablagʻlari emissiyasi darajasining hamda kassa rejalarining belgilangan prognozlarini bajarmaganliklari uchun oylik lavozim maoshiga nisbatan ilovaga muvofiq miqdorlarda jarima solinsin.

4. Qoraqalpogʻiston Respublikasi Vazirlar Kengashi Raisining, viloyatlar, shaharlar va tumanlar hokimlarining, shuningdek “Oʻzbeksavdo”, “Oʻzmaishiyxizmat”, Oʻzbekbirlashuv uyushmalari, “Oʻzavtotrans” korporatsiyasi, Aloqa vazirligi, Kommunal xizmat koʻrsatish vazirligi, “Toshshaharyoʻlovchitrans” uyushmasi hamda Oʻzbekiston Respublikasi boshqa vazirliklari va idoralari rahbarlarining eʼtibori joylardagi isteʼmol bozorini kundalik ehtiyoj tovarlari bilan toʻldirish, pulli xizmatlar koʻrsatish sohasini kengaytirish va naqd pullarning aylanishini jadallashtirish hisobiga aholiga joriy toʻlovlarni taʼminlash boʻyicha ishlarning qoniqarsizligiga qaratilsin.

5. Pul-kredit siyosati boʻyicha respublika komissiyasi (F.M. Mullajonov) va Davlat soliq qoʻmitasi (Sh.K. Gataulin) viloyatlar, shaharlar va tumanlarda emissiya darajasini pasaytirish prognozlarining izchil bajarilishi ustidan nazoratni kuchaytirsinlar. Naqd pullarning bankdan tashqari muomalada boʻlishini keskin kamaytirish, xoʻjalik yurituvchi subyektlarga tushumlarni toʻliq va oʻz vaqtida inkassatsiya qilish boʻyicha qoʻshimcha ragʻbatlar yaratish yuzasidan aniq chora-tadbirlarni oʻn kun muddatda ishlab chiqsinlar.

6. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi T.A. Alimov zimmasiga yuklansin.