Yoshlarni respublika oliy o‘quv yurtlarida o‘qishga tanlashda yagona davlat siyosatini o‘tkazish, jamiyatning intellektual quvvatini oshirish uchun zarur shart-sharoitlarini yaratish hamda ijtimoiy adolat qoidalarini ro‘yobga chiqarish maqsadida, shuningdek jamoatchilikning istaklarini e’tiborga olib:

1. Belgilab qo‘yilsinki, 1992/93 o‘quv yilidan boshlab tajriba tariqasida O‘zbekiston Respublikasi Xalq ta’limi vazirligiga qarashli pedagogika institutlarining hamda O‘zbekiston Respublikasi Oliy va o‘rta maxsus ta’lim vazirligiga qarashli universitetlar tegishli soha ( o‘qituvchi kadrlar tayyorlash bilan band bo‘lgan) fakultetlarning kunduzgi bo‘limlariga mazkur faoliyat turiga moyil bo‘lgan maktab o‘quvchilari hamda boshqa toifadagi yoshlardan iborat abituriyentlarni sinab ko‘rish asosida kirish imtihonlarsiz qabul qilinadi.

2. O‘zbekiston Respublikasining Oliy va o‘rta maxsus ta’lim vazirligi, Melioratsiya va Suv xo‘jaligi vazirligi, Aloqa vazirligi mazkur tajribani Toshkent davlat texnika universitetida, Toshkent to‘qimachilik va yengil sanoat institutida, Toshkent avtomobil-yo‘l institutida, Farg‘ona davlat universitetida, Toshkent irrigatsiya va qishloq xo‘jaligini mexanizatsiyalash muhandislari institutida, Toshkent elektr texnik aloqa institutida o‘tkazsinlar.

3. O‘zbekiston Respublikasi Prezidenti huzuridagi Vazirlar Mahkamasi:

10 kun muddat ichida ushbu Farmonni ro‘yobga chiqarishga oid tashkiliy chora-tadbirlarni ko‘zda tutuvchi tegishli qaror qabul qilsin:

bir oy muddat ichida Farmonning 1 va 2-bandlarida ko‘rsatilgan respublika oliy o‘quv yurtlarining kunduzgi bo‘limlariga abituriyentlarni tanlash va qabul qilish Respublika markazini tashkil etsin.