Yangi 2010-2011 oʻquv yiliga oʻz vaqtida tayyorgarlik koʻrish, umumtaʼlim maktablari, akademik litseylar va kasb-hunar kollejlari oʻquvchilarini maktab anjomlari, oʻquv-metodik qoʻllanmalar hamda maktab kiyimi va poyabzali bilan taʼminlash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Oʻzbekiston matbuot va axborot agentligi, boshqa manfaatdor tuzilmalar bilan birgalikda shu yil 1-avgust — 10-sentabr kunlari barcha aholi punktlarida asosan mamlakatimizda ishlab chiqarilgan maktab tovarlarining keng turlarini (maktab-yozuv anjomlari, darsliklar, oʻquv-metodik qoʻllanmalar, oʻquvchilar formasi va hokazolarni) sotish boʻyicha maxsus maktab bozorlari va yarmarkalarini oʻtkazsinlar.

Maxsus maktab bozorlari va yarmarkalarini yuqori darajada oʻtkazishni tashkil etish uchun shaxsiy masʼuliyat Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari zimmasiga yuklansin.

2. Maxsus maktab bozorlari va yarmarkalarini oʻtkazish ishlarini muvofiqlashtirish uchun 1-ilovaga* muvofiq tarkibda Ishchi guruh tuzilsin.

Ishchi guruh (Sh.M.Mirziyoyev) Oʻzbekiston Respublikasi Xalq taʼlimi vazirligi, Oʻrta maxsus, kasb-hunar taʼlimi markazi, boshqa vazirliklar, idoralar va xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

shu yil 28-iyulgacha boʻlgan muddatda tumanlar va shaharlar boʻyicha maxsus maktab bozorlari va yarmarkalari umumtaʼlim maktablari, akademik litseylar, kasb-hunar kollejlari oʻquvchilari va aholi uchun qulay joylashuvini tasdiqlasin, ularni yuqori saviyada va qulay vaqtda oʻtkazish uchun zarur shart-sharoitlar yaratsin;

bir hafta muddatda har bir mintaqa boʻyicha umumtaʼlim maktablari, akademik litseylar, kasb-hunar kollejlari oʻquvchilarining maktab-yozuv anjomlari, maktab kiyimi va poyabzaliga boʻlgan ehtiyojini aniqlasin, ularni ishlab chiqarishni tashkil etish, sotish va maktab bozorlari va yarmarkalari oʻtkaziladigan joylarga yetkazib berish yuzasidan kompleks tadbirlarni ishlab chiqsin;

maktab bozorlari va yarmarkalarida barcha zarur maktab-yozuv anjomlari, maktab kiyimi va poyabzali qulay narxlarda mavjud boʻlishi yuzasidan taʼsirchan nazoratni taʼminlasin;

maktab bozorlari va yarmarkalari oʻtkaziladigan joylarda umumiy ovqatlanish, chanqovbosdi ichimliklar va muzqaymoq sotish shoxobchalari tashkil etsin.

3. Oʻzbekiston Respublikasi Xalq taʼlimi vazirligi Oʻrta maxsus, kasb-hunar taʼlimi markazi, “Oʻzulgurjisavdoinvest” uyushmasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2010-yil 25-iyulgacha maxsus maktab bozorlari va yarmarkalarini oʻtkazish jadvalini ularning aniq muddatlari va joylarini, shuningdek ularning samarali tashkil etilishi uchun masʼul shaxslarni koʻrsatgan holda ishlab chiqsin va Vazirlar Mahkamasiga taqdim etsin.

Har 10 kunda Vazirlar Mahkamasiga maktab bozorlari va yarmarkalarini zarur miqdorda va turda maktab-yozuv anjomlari, maktab kiyimi va poyabzali bilan taʼminlash boʻyicha bajarilgan ishlar, shuningdek maktab bozorlari va yarmarkalari ishi samarali tashkil etilishi toʻgʻrisida tahliliy axborot taqdim etilsin.

4. “Oʻzulgurjisavdoinvest” uyushmasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Oʻzbekiston Respublikasi Xalq taʼlimi vazirligi va Oʻrta maxsus, kasb-hunar taʼlimi markazi tomonidan taqdim etilgan buyurtmanomalar asosida joylarda tashkil etilgan maxsus maktab bozorlari va yarmarkalariga 2-ilovaga muvofiq roʻyxat boʻyicha maktab-yozuv anjomlari, maktab kiyimi va poyabzali muntazam yetkazib berilishini taʼminlasin.

5. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi:

2010-yil 25-iyulgacha mavjud ehtiyojdan kelib chiqqan holda chakana savdoda erkin sotish uchun qoʻshimcha ravishda nashr etish talab qilinadigan darsliklar va oʻquv-metodik qoʻllanmalar roʻyxati va miqdorini belgilasinlar hamda Ishchi guruh bilan kelishgan holda Oʻzbekiston matbuot va axborot agentligiga taqdim etsinlar;

umumtaʼlim maktablari, akademik litseylar va kasb-hunar kollejlarida tashkil etiladigan maxsus maktab bozorlari va yarmarkalari faoliyatini amalga oshirish uchun zarur shart-sharoitlar yaratsinlar.

6. Oʻzbekiston matbuot va axborot agentligi nashriyot-matbaa ijodiy uylari, “Sharq” kompaniyasi bilan birgalikda erkin sotish uchun nashr etiladigan darsliklar va oʻquv-metodik qoʻllanmalarning nashr etilishi va joylarga yetkazib berilishini taʼminlasin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston matbuot va axborot agentligi, “Sharq” kompaniyasi, “Oʻzkitobsavdo” aksiyadorlik kompaniyasi bilan birgalikda 2010-2011 oʻquv yili uchun nashr etilgan darsliklar va oʻquv-metodik qoʻllanmalarning maxsus maktab bozorlari va yarmarkalari orqali sotilishini tashkil etsinlar.

7. “Oʻzbekyengilsanoat” davlat-aksiyadorlik kompaniyasi, “Oʻzbekcharmpoyabzali” uyushmasi Oʻzbekiston Respublikasi Xalq taʼlimi vazirligi, Oʻrta maxsus, kasb-hunar taʼlimi markazining buyurtmanomalariga binoan oʻquvchilar uchun yuqori sifatli maktab kiyimi va poyabzali ishlab chiqarilishini taʼminlasinlar hamda ularning maxsus maktab bozorlari va yarmarkalarini oʻtkazishda qatnashadigan savdo tashkilotlariga shartnoma asosida, belgilangan muddatlarda yetkazib berilishini taʼminlash chora-tadbirlarini koʻrsinlar.

8. Oʻzbekiston milliy teleradiokompaniyasi ommaviy axborot vositalari orqali joylarda maktab bozorlari va yarmarkalari faoliyati tashkil etilishi toʻgʻrisida keng reklama-axborot ishlari olib borsin, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan ahdlashuv boʻyicha maxsus videoroliklar tayyorlanishini taʼminlasin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.

1. Yozuv daftari

2. Umumiy daftar

3. Kundalik daftar

4. Bloknot

5. Rasm daftari

6. Nota daftari

7. Kanselyariya daftari

8. Vatman qogʻoz

9. Sharikli ruchka

10. Rangli va oddiy qalamlar

11. Flomaster

12. Qalam ochgich

13. Oʻchirgich

14. Oʻquvchilar penali

15. Sanoq choʻplari

16. Akvarel boʻyoqlar

17. Plastilin

18. Elim

19. Tush

20. Sirkul

21. Lineyka, burchakli lineyka, transportir

22. Yozuv qogʻozi

23. Rangli qogʻoz

24. Silliq qogʻoz

25. Oddiy va rangli boʻr

26. Portfellar, ranetslar

27. Maktab kiyimi va poyabzali