O‘zbekiston Respublikasi Prezidentining 2010-yil 8-iyundagi PP-1351-sonli “O‘zbekiston Respublikasining Surxondaryo viloyati Boysun investitsiya blogida geologiya-razvedka ishlarini olib borish va uglevodorod konlarini “PETRONAS Carigali Overseas Sdn. Bhd.” (Malayziya) kompaniyasi bilan mahsulotni taqsimlash shartnomasi asosida ishlab chiqish to‘g‘risida”gi qaroriga amal qilish maqsadida, Vazirlar Mahkamasi quyidagilarni qaror qiladi:

1. O‘zbekiston Respublikasi bilan “PETRONAS Carigali Overseas Sdn. Bhd.” (keyingi o‘rinlarda — Bitim) O‘zbekiston tomonidan ilovaga muvofiq tasdiqlansin.

2. “O‘zbekneftgaz” milliy xolding kompaniyasi, O‘zbekiston Respublikasi Davlat mulki qo‘mitasi xorijiy investor — “PETRONAS Carigali Overseas Sdn. Bhd.” ikki oy muddatda Bitimning amal qilish davrida xorijiy investorga (operatorga) bepul egalik qilish va foydalanishga (tasarruf etish huquqisiz) beriladigan mol-mulk ro‘yxatini aniqlasin.

3. Surxondaryo viloyati hokimligi Bitimni amalga oshirish uchun zarur bo‘lgan yer uchastkalarini xorijiy investorga belgilangan tartibda ajratsin.

4. O‘zbekiston Respublikasi Davlat bojxona qo‘mitasi Tashqi iqtisodiy aloqalar, investitsiyalar va savdo vazirligi hamda “O‘zbekneftgaz” milliy xolding kompaniyasi bilan birgalikda ikki oy muddatda Bitimni amalga oshirish doirasida tovarlarni olib kirish va olib chiqishni bojxonada rasmiylashtirish tartibini ishlab chiqsin va tasdiqlasin.

5. O‘zbekiston Respublikasi Suv xo‘jaligi vazirligi O‘zbekiston Respublikasi Davlat geologiya va mineral resurslar qo‘mitasi bilan birgalikda operatorga yer usti va yer osti manbalaridan suv olishning zarur limitini belgilangan tartibda ajratsin.

6. O‘zbekiston aloqa va axborotlashtirish agentligi Bitimni amalga oshirish doirasida operator, pudratchi va subpudratchilarga radioelektron vositalar va yuqori chastotali qurilmalardan foydalanishga belgilangan tartibda ruxsatnoma bersin.

7. O‘zbekiston Respublikasi Tashqi ishlar vazirligi operatorning “O‘zbekneftgaz” MXK tomonidan tasdiqlanadigan buyurtmanomalari bo‘yicha Bitimni amalga oshirishda ishtirok etuvchi xorijiy mutaxassislarga kirish vizalari, shu jumladan ko‘p martalik kirish vizalari belgilangan tartibda rasmiylashtirilishini ta’minlasin.

8. O‘zbekiston Respublikasi Ichki ishlar vazirligi “O‘zbekneftgaz” MXK tomonidan tasdiqlanadigan operatorning buyurtmanomalari bo‘yicha Bitimni amalga oshirishda ishtirok etadigan xorijiy mutaxassislarga ko‘p martalik vizalar berilishi va muddati uzaytirilishini, shuningdek O‘zbekiston Respublikasida yashash joyi bo‘yicha vaqtinchalik ro‘yxatdan o‘tkazilishini va uning muddati uzaytirilishini belgilangan tartibda ta’minlasin.

9. O‘zbekiston Respublikasi Mehnat va aholini ijtimoiy muhofaza qilish vazirligi operatorning “O‘zbekneftgaz” MXK tomonidan tasdiqlanadigan buyurtmanomalari bo‘yicha O‘zbekiston Respublikasiga yuqori malakali xorijiy ishchi kuchini jalb etishga belgilangan tartibda ruxsatnomalar berilishini, shuningdek xorijiy fuqarolarga O‘zbekiston Respublikasi hududida mehnat faoliyatini amalga oshirish huquqiga tasdiqnomalar berilishini va ularning muddati uzaytirilishini ta’minlasin.

10. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari E.R. Shoismatov zimmasiga yuklansin.