Oʻzbekiston SSJ Prezidenti huzuridagi Vazirlar Mahkamasining “Chakana narxlarning isloh qilinishi munosabati bilan Oʻzbekiston SSJ aholisini ijtimoiy himoya qilish choralari haqida” 1991-yil 25-martdagi 65-son qaroriga muvofiq oyiga kamida 60 soʻm kompensatsiya toʻlovi belgilangan.

Shu bilan birga, xalq isteʼmoli mollarining, oziq-ovqat va xizmatlarning narxlari jadal oshib ketganligi munosabati bilan, shuningdek Oʻzbekiston SSJ Oliy Kengashi Rayosatining isteʼmol fondi boʻyicha cheklashlarni bekor qilish haqida 1991-yil 22-iyuldagi 322-XII-son qaroriga muvofiq koʻpgina vazirliklar va idoralar, korxonalar va tashkilotlar oʻz xodimlari uchun oylik kompensatsiya toʻlovlarining eng oz miqdorini qoʻshimcha ravishda oshirish yuzasidan kompleks chora-tadbirlarni amalga oshirdilar. Yoqilgʻi-energetika, mashinasozlik komplekslari va boshqa komplekslarning koʻpgina korxonalari va tashkilotlarida kompensatsiya miqdorlarini 100 soʻmgacha oshirish uchun mablagʻlar izlab topildi.

Yuqori unumli mehnat qilishga ragʻbatni kuchaytirish, mehnatkashlar turmush darajasining pasayishiga yoʻl qoʻymaslik, jumhuriyat aholisini ijtimoiy himoya qilish yuzasidan avvalroqdan aniq choralarni roʻyobga chiqarish maqsadlarida Vazirlar Mahkamasi qaror qiladi:

1. Xoʻjalik hisobidagi vazirliklar va idoralarning, birlashmalar va korxonalarning, ularning mulkchilik shaklidan qatʼi nazar, oʻz mablagʻlari hisobidan 1991-yilning avgust oyidan boshlab xodimlarga toʻlanadigan oylik kompensatsiya toʻlovlarining eng oz miqdorini kamida 100 soʻmgacha oshirish toʻgʻrisidagi takliflari qabul qilinsin.

2. Oʻzbekiston SSJ Moliya vazirligi mazkur qarorning 1-bandi talablarini hisobga olib, bir oy muddat ichida Vazirlar Mahkamasiga budjetda turuvchi tashkilotlarning xodimlariga toʻlanadigan qoʻshimcha kompensatsiya toʻlovlarini qoplash manbalari toʻgʻrisida taklif kiritsin.

3. Qarorning bajarilishini nazorat qilish Vazirlar Mahkamasi Raisining oʻrinbosari oʻrtoq B.S. Hamidovga yuklatilsin, unga shu yilning 15-sentabrida qarorning qanday bajarilayotganligi toʻgʻrisida axborot berish topshirilsin.