Mamlakatimizda tikuvchilik va parfyumeriya-kosmetika mahsulotlari ishlab chiqarishni ragʻbatlantirish, ularning turlarini kengaytirish, shuningdek raqobatdoshligini oshirish va ular bilan ichki isteʼmol bozorlarini yanada toʻliq toʻldirish maqsadida Vazirlar Mahkamasi qaror qiladi:

1. Iqtisodiyot vazirligi, “Oʻzbekyengilsanoat” davlat-aksiyadorlik kompaniyasi, Moliya vazirligi va Tashqi iqtisodiy aloqalar, investitsiyalar va savdo vazirligining Oʻzbekiston Respublikasi Vazirlar Mahkamasining “2009 — 2011-yillarda toʻqimachilik sanoati korxonalarini yanada rivojlantirish va modernizatsiya qilish hamda mahalliy nooziq-ovqat isteʼmol tovarlari ishlab chiqarishni kengaytirish chora-tadbirlari toʻgʻrisida” 2009-yil 20-avgustdagi 236-son qarori bilan tasdiqlangan Bojxona toʻlovlaridan ozod qilish boʻyicha imtiyozlarning amal qilishi tatbiq etiladigan (bojxona rasmiylashtiruvi yigʻimlari bundan mustasno) nooziq-ovqat isteʼmol tovarlari ishlab chiqarishga ixtisoslashtirilgan korxonalar tomonidan respublikada ishlab chiqarilmaydigan import qilinadigan butlovchi buyumlar, xomashyo va materiallar roʻyxatiga ilovaga muvofiq* qoʻshimcha va oʻzgartirishlar kiritish toʻgʻrisidagi taklifiga rozilik berilsin.

2. Belgilab qoʻyilsinki, Roʻyxatga muvofiq olib kiriladigan butlovchi buyumlar, xomashyo va materiallar maqsadsiz foydalanilgan taqdirda, qonun hujjatlarida nazarda tutilgan jarima sanksiyalarini qoʻllagan holda, boʻshab qoladigan mablagʻlar toʻliq miqdorda davlat budjetiga undiriladi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.