LexUZ sharhi
Mazkur qaror O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
O‘zbekiston Respublikasining “Faoliyatning ayrim turlarini litsenziyalash to‘g‘risida”gi Qonuniga muvofiq hamda farmatsevtika va tibbiyot faoliyatiga litsenziya berish tartibini yanada takomillashtirish, shuningdek aholiga ko‘rsatilayotgan xizmatlar sifati ustidan nazoratni kuchaytirish maqsadida:
1. Shunday tartib o‘rnatilsinki, unga muvofiq farmatsevtika faoliyatini amalga oshirish huquqini beruvchi litsenziya yuridik va jismoniy shaxslarga 5 yil muddatga beriladi.
O‘zbekiston Respublikasi Vazirlar Mahkamasi bir oy muddatda farmatsevtika faoliyatiga litsenziya berish tartibi to‘g‘risidagi yangi Nizomni tasdiqlasin.
2. O‘zbekiston Respublikasi Prezidentining “Tadbirkorlik faoliyati yuritish uchun ruxsatnoma turlarini qisqartirish va ularni berish tartib-qoidalarini soddalashtirish to‘g‘risida” 2005-yil 21-sentabrdagi PQ-186-son qarori 1-ilovasining 3 va 4-bandlari o‘z kuchini yo‘qotgan deb hisoblansin.
3. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.