Oʻzbekiston Respublikasi Prezidentining 2009-yil 22-dekabrdagi PQ-1245-sonli “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qarorining (Oʻzbekiston Respublikasi qonun hujjatlari toʻplami, 2009-yil, 52-son, 560-modda) 5-bandi ijrosini taʼminlash maqsadida qaror qiladilar:

1. “Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan Respublika yoʻl jamgʻarmasiga, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasiga majburiy ajratmalar toʻlash tartibi haqidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

Mazkur Nizom Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7 moddasi, Oʻzbekiston Respublikasi Prezidentining 2009-yil 22-dekabrdagi PQ-1245-sonli “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga (“Oʻzbekiston Respublikasi qonun hujjatlari toʻplami”, 2009-yil, 52-son, 560-modda) muvofiq “Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan Respublika yoʻl jamgʻarmasi, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasiga majburiy ajratmalar toʻlash tartibini belgilaydi.

1. Oʻzbekiston Respublikasi Prezidentining 2009-yil 22-dekabrdagi PQ-1245-sonli “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qarorining 5-bandiga muvofiq 2010-yil 1-yanvardan boshlab “Oʻzbekneftgaz” MXK korxonalari uchun tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan Respublika yoʻl jamgʻarmasi, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasiga majburiy ajratmalar (keyingi oʻrinlarda maqsadli jamgʻarmalarga tabiiy gazni sotishdan majburiy ajratmalar deb yuritiladi) toʻlash tartibi joriy etilgan.

2. Mazkur Nizom tizim ichida tabiiy gazni yetkazib berishni amalga oshiruvchi mazkur Nizomning ilovasida koʻrsatilgan “Oʻzbekneftgaz” MXK korxonalariga tatbiq etiladi.

3. Mazkur Nizomning ilovasida koʻrsatilgan korxonalar oʻrtasida tabiiy gazni yetkazib berish tizim ichida hisoblanadi, shu jumladan neft va gazni qazib oluvchi korxonalardan gazni qayta ishlovchi va gaz transporti korxonalarigacha, shuningdek gazni qayta ishlovchi korxonalardan gaz transporti korxonalarigacha yetkazish.

4. “Oʻzbekneftgaz” MXK korxonalari maqsadli jamgʻarmalarga majburiy ajratmalarni pirovard isteʼmolchiga yetkazib berilgan tabiiy gaz hajmidan, qoʻshilgan qiymat soligʻi va aksiz soligʻini chegirib tashlagan holda hisoblaydi va toʻlaydi. Bunda pirovard isteʼmolchi boʻlib mazkur Nizomning ilovasida koʻrsatib oʻtilmagan shaxs hisoblanadi.

5. “Oʻztransgaz” AK orqali tabiiy gaz transportirovkasi boʻyicha xizmat koʻrsatish shartnomalariga asosan tabiiy gaz transportirovkasini amalga oshiradigan korxonalar ushbu tabiiy gazni sotish hajmidan majburiy ajratmalarni Respublika yoʻl jamgʻarmasiga, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasiga qonunchilikda belgilangan tartibda toʻlaydi.

6. “Oʻzbekneftgaz” MXK korxonalari soliq hisoboti shakllarida Respublika yoʻl jamgʻarmasiga, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasiga majburiy ajratmalar boʻyicha soliq solish bazasidan chiqariladigan tizim ichida yetkazib berilgan tabiiy gaz hajmini alohida satrda koʻrsatadi.

7. Mazkur Nizom talablariga rioya etish boʻyicha javobgarlik “Oʻzbekneftgaz” MXK korxonalari rahbarlari va bosh buxgalterlari zimmasiga yuklatiladi.

8. Mazkur Nizomga rioya etish ustidan nazorat Davlat soliq xizmati organlari tomonidan amalga oshiriladi.

9. Mazkur Nizom “Oʻzbekneftgaz” MXK bilan kelishilgan.