Qish davrida Fargʻona vodiysi aholisini va xalq xoʻjaligi obyektlarini tabiiy gaz bilan yanada toʻlaroq va ishonchli taʼminlash maqsadida Andijon viloyatidagi “xoʻjaobod” konida yer osti gaz ombori qurilishini jadallashtirish uchun Vazirlar Mahkamasi qaror qiladi:

1. “Oʻzbekneftgaz” Milliy korporatsiyasining “BSI Industries, Inc.” (AQSH) firmasi bilan ushbu loyiha boʻyicha injiniring, asbob-uskunalar yetkazib berish, shef-montaj va qurilish ustidan nazorat yuzasidan, mablagʻ bilan taʼminlash xarajatlaridan tashqari, 69136 mln AQSH dollariga teng summaga kontrakt tuzish toʻgʻrisidagi taklifiga rozilik berilsin.

Xoʻjaobod yer osti gaz ombori qurilishi loyihasi boʻyicha “Oʻztransgaz” davlat birlashmasi buyurtmachi etib belgilansin, unga “Oʻzbekneftgaz” Milliy korporatsiyasi va “BSI Industries, Inc.” firmasi oʻrtasidagi kontraktni bajarishga oid majburiyatlar yuklansin.

2. Ushbu loyihani moliyaviy taʼminlash:

kontrakt bahosining 85 foizini — 58,7 mln AQSH dollarini va AQSH Eksport-import bankining sugʻurta mukofotini — 4,5 mln AQSH dollarini oʻz ichiga oluvchi AQSH Eksport-import bankining 63,2 mln AQSH dollari summasidagi krediti;

“Oʻztransgaz” davlat birlashmasining 15,79 mln AQSH dollari summasidagi oʻz mablagʻlari hisobiga amalga oshirilishi maʼlumot uchun qabul qilinsin.

Kreditni toʻlash “Oʻztransgaz” davlat birlashmasi mablagʻlari hisobidan ilovaga muvofiq amalga oshiriladi.

3. “Oʻzbekneftgaz” korporatsiyasi AQSH Eksport-import banki krediti boʻyicha qarz oluvchi etib belgilansin, keyinchalik kredit “Oʻztransgaz” davlat birlashmasiga qayta moliyalashtiriladi.

4. “Oʻzbekneftgaz” Milliy korporatsiyasi Moliya vazirligi bilan birgalikda ikki oy muddatda AQSH Eksport-import banki bilan kredit bitimini ishlab chiqishni tugallasin va bitim tuzsin.

5. Oʻzbekiston Respublikasi Moliya vaziriga AQSH Eksport-import bankiga ushbu loyiha uchun jalb qilinayotgan kredit boʻyicha Oʻzbekiston Respublikasi Hukumati kafolatini berish vakolati berilsin.

6. Oʻzbekiston Respublikasi Adliya vazirligi Oʻzbekiston Respublikasi Hukumati kafolati yuzasidan yuridik xulosani belgilangan tartibda rasmiylashtirsin.

7. Tashqi iqtisodiy aloqalar vazirligi, “Oʻzsanoatqurilishbank”, Davlat soliq qoʻmitasi bir hafta muddatda kontraktni roʻyxatdan oʻtkazsin.

9. “BSI Industries, Inc.” firmasi va uning ushbu loyiha boʻyicha xorijiy subpudratchilari kontraktni amalga oshirishning butun davrida:

bojxona poshlinalaridan, shu jumladan, kontraktni amalga oshirish bilan bogʻliq qurilish uchun asbob-uskunalar va materiallarni olib kelish va qayta olib ketish poshlinalaridan;

“Oʻzbekneftgaz” korporatsiyasi buyurtmanomalari boʻyicha yakka tartibda va guruh boʻlib keluvchi xodimlar uchun viza hujjatlarini rasmiylashtirganlik uchun konsullik yigʻimlaridan;

Oʻzbekiston Respublikasida yashash joyida roʻyxatdan oʻtkazganlik uchun yigʻimlar toʻlashdan ozod qilinsin.

10. Davlat soliq qoʻmitasi, “Oʻzbekiston temir yoʻllari” kompaniyasi va “Oʻzavtotrans” davlat korporatsiyasi “Oʻzbekneftgaz” korporatsiyasi, “BSI Industries, Inc.” firmasi yoki uning ushbu loyiha boʻyicha subpudratchilarining buyurtmanomalari boʻyicha kelayotgan asbob-uskunalar va materiallarga, shu jumladan, qurilish uchun asbob-uskunalar va materiallarga bojxona hujjatlari oʻz vaqtida (koʻpi bilan uch kunda) rasmiylashtirilishi va ularning belgilangan joyga toʻsiqlarsiz yetkazib berilishini taʼminlasinlar.

11. Oʻzbekiston Respublikasi rezidentlari tomonidan “BSI Industries, Inc.” firmasi, ushbu loyiha boʻyicha uning xorijiy pudratchilari va subpudratchilari bilan toʻgʻridan-toʻgʻri kontraktlar boʻyicha erkin almashtiriladigan valyutada haq toʻlanadigan mahsulot yetkazib berish, bajariladigan ishlar va koʻrsatiladigan xizmatlarni, qoʻshimcha qiymat soligʻiga tortishdan ozod etgan holda, eksportga mahsulot yetkazib berish, ishlar bajarish va xizmatlar koʻrsatish sifatida hisobga olinsin.

12. “Oʻzbekneftgaz” Milliy korporatsiyasi sugʻurta kompaniyasini tender asosida tanlagan holda obyektni sugʻurtalashni taʼminlasin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.