Oʻzbekiston Respublikasi Havo kodeksining (Oʻzbekiston Respublikasi Oliy Kengashi Axborotnomasi, 1993-y., 6-son, 247-modda) 74-moddasiga muvofiq buyuraman:

1. Muntazam xalqaro parvozlarni bajarish uchun Oʻzbekiston Respublikasi fuqaro aviatsiyasi tashuvchilarini tayinlash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Havo kodeksining 74-moddasiga muvofiq muntazam xalqaro parvozlarni bajarish uchun Oʻzbekiston Respublikasi fuqaro aviatsiyasi tashuvchilarini tayinlash tartibini belgilaydi.

1. Mazkur Nizomda quyidagi asosiy tushunchalardan foydalaniladi:

tayinlash — kelishilgan qatnovdan foydalanish va maʼlum yoʻnalishda yoʻlovchilarning (yuklarning) muntazam xalqaro havo tashuvlarini bajarish uchun ruxsatnoma;

tayinlangan tashuvchi — Oʻzbekiston Respublikasi havo qatnovi toʻgʻrisidagi xalqaro shartnoma (keyingi oʻrinlarda xalqaro shartnoma deb yuritiladi) shartlariga muvofiq muntazam xalqaro havo tashuvlarini amalga oshirish uchun Oʻzbekiston Respublikasi tomonidan tayinlangan tashuvchi.

2. Oʻzbekiston Respublikasi fuqaro aviatsiyasi tashuvchisining maʼlum yoʻnalishdagi muntazam xalqaro parvozlari Oʻzbekiston Respublikasi Transport vazirligi huzuridagi Fuqaro aviatsiyasi agentligi (keyingi oʻrinlarda “Oʻzaviatsiya” agentligi deb yuritiladi) tomonidan tayinlangandan soʻng amalga oshiriladi.

3. Tayinlash majburiy shart hisoblanib, tegishli shartnoma kuchga kirgandan soʻng amalga oshiriladi.

4. Tayinlash tashuvchiga ustun egalik qilish va uning faoliyati ustidan haqiqiy nazorat olib borish Oʻzbekiston Respublikasining jismoniy yoki yuridik shaxslariga tegishli boʻlgan holdagina koʻrib chiqiladi.

5. Tayinlash uchun tashuvchi “Oʻzaviatsiya” agentligiga mazkur Nizomning ilovasida keltirilgan shakl boʻyicha arizani quyidagi hujjatlarni ilova qilgan holda taqdim etadi:

ekspluatant sertifikati nusxasi ilovalari bilan;

havo kemasiga va uchinchi shaxslar oldidagi javobgarligiga sugʻurta polislari nusxalari;

xalqaro havo yoʻnalishlari boʻyicha yoʻlovchilarni (yuklarni) tashish faoliyatini amalga oshirish huquqi uchun litsenziya nusxasi.

6. “Oʻzaviatsiya” agentligi taqdim etilgan hujjatlarni koʻrib chiqadi, ularning ishonchliligini tekshirishni amalga oshiradi, shuningdek tayinlashni maqsadga muvofiqligi yuzasidan manfaatdor vazirlik va idoralar bilan kelishadi.

7. Oʻzbekiston Respublikasining asosiy tashuvchisi foydalanayotgan yoʻnalishlarda boshqa tashuvchilarning xalqaro parvozlarni bajarishi shu tashuvchi bilan oldindan kelishilgandan soʻng “Oʻzaviatsiya” agentligi tomonidan koʻrib chiqiladi.

8. Tashuvlarga yetarli darajada talab boʻlganda bir qatnovdan bir qancha tayinlangan tashuvchilar, agar bu xalqaro shartnomalarga zid boʻlmasa foydalanishlari mumkin.

9. Bir qatnovga tayinlashni berish toʻgʻrisida bir necha tashuvchilardan ariza tushgan hollarda afzallik quyidagi tashuvchilarga beriladi:

nomuntazam (charter) xalqaro tashuvlarni amalga oshirish sohasida ish tajribasiga ega boʻlganlarga;

Fuqaro aviatsiyasi xalqaro tashkiloti (IKAO) tavsiyalariga maksimal mos boʻlgan havo kemalaridan foydalanuvchilarga.

10. Tayinlash uchun ariza kelib tushgan kundan boshlab “Oʻzaviatsiya” agentligi tomonidan 20 ish kuni davomida koʻrib chiqiladi.

11. Tayinlash toʻgʻrisida ijobiy qaror qabul qilingan taqdirda “Oʻzaviatsiya” agentligi xorijiy davlatni tayinlangan tashuvchi toʻgʻrisida xabardor qilish uchun Oʻzbekiston Respublikasi Tashqi ishlar vazirligiga xat yuboradi. Tayinlashni berish rad etilgan taqdirda “Oʻzaviatsiya” agentligi ariza beruvchiga asoslangan javobni joʻnatadi.

12. Tayinlash muddatsiz amal qiladi.

13. Tayinlash:

tashuvchi tomonidan xalqaro shartnomalar, Oʻzbekiston Respublikasi Havo kodeksi va Oʻzbekiston Respublikasi fuqaro aviatsiyasi faoliyatini tartibga soluvchi boshqa normativ-huquqiy hujjatlari qoidalari buzilganda olti oygacha boʻlgan muddatga toʻxtatiladi;

tashuvchi tomonidan xalqaro shartnomalar, Oʻzbekiston Respublikasi Havo kodeksi va Oʻzbekiston Respublikasi fuqaro aviatsiyasi faoliyatini tartibga soluvchi boshqa normativ-huquqiy hujjatlari qoidalari muntazam ravishda yoki bir marotaba qoʻpol ravishda buzilganda, tayinlash uchun taqdim etilgan hujjatlarning amal qilish muddati tugaganda, shuningdek tayinlash toʻxtatilgan muddat davomida tashuvchi aniqlangan qoidabuzilishlarni bartaraf qilmasa tugatiladi;

soxta hujjatlardan foydalanilgan holda olinganligi fakti aniqlangan holatda bekor qilinadi.

14. Tashuvchi tayinlashning toʻxtatilishi, tugatilishi yoki bekor qilinishi toʻgʻrisidagi qabul qilingan qarorga Oʻzbekiston Respublikasi qonunchiligiga muvofiq shikoyat qilish huquqiga ega.

15. Mazkur Nizom Oʻzbekiston Respublikasi Tashqi ishlar vazirligi, Milliy xavfsizlik xizmati, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi va “Oʻzbekiston havo yoʻllari” Milliy aviakompaniyasi bilan kelishilgan.