Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Slovakiya Respublikasi Iqtisodiyot vazirligi, bundan buyon “Tomonlar” deb ataluvchilar,

1996-yil 21-iyunda imzolangan Oʻzbekiston Respublikasi, bir tomondan, Yevropa Hamjamiyatlari hamda ularga aʼzo davlatlar, ikkinchi tomondan, oʻrtasida sherikchilik taʼsis etuvchi Sherikchilik va Hamkorlik toʻgʻrisidagi Bitimning va keyingi barcha oʻzgartirish va qoʻshimchalarining qoidalariga asoslanib,

uzoq yillik anʼanaviy iqtisodiy munosabatlarni inobatga olib,

tenglik va oʻzaro manfaat asosida hamkorlikni mustahkamlashga va qoʻllab-quvvatlashga intilib,

iqtisodiy munosabatlar sohasida, jumladan oʻzaro tovar ayirboshlashni va taqdim etilayotgan xizmatlar koʻlamini koʻtarish uchun yoʻnaltirilgan oʻzaro manfaatli hamkorlikni eʼtirof etib,

xalqaro huquqning umumeʼtirof etgan normalari va prinsiplariga amal qilib,

Tomonlar ikki mamlakat manfaatlari yoʻlida iqtisodiy hamkorlikni rivojlantirish va mustahkamlashga intiladilar.

Uzoq yillik ikki tomonlama munosabatlar va erishilgan iqtisodiy munosabatlar darajasini eʼtiborga olib, Tomonlar uzoq muddatlik asosida xususan quyidagi sohalarda hamkorlik qilishga kelishib oldilar:

yengil sanoat;

energetika, shu jumladan uchinchi mamlakatlar bozorida hamkorlik;

transport, shu jumladan transport vositalari;

sogʻliqni saqlash va farmatsevtika sanoati;

ximiya va neft ximiyasi sanoati;

gaz sanoati;

elektrotexnika sanoati;

qishloq xoʻjalik mashinasozligi;

oziq-ovqat sanoati uchun asbob-uskunalar, shu jumladan qayta ishlash sanoati uchun asbob-uskunalar;

togʻ-kon sanoati;

qurilish materiallari ishlab chiqarish;

elektrostansiyalarni zamonaviylashtirish va rekonstruksiya qilish, shu jumladan elektr oʻtkazish setlarini;

sanoatda qurilish ishlari sohasida hamkorlik;

turizm, investitsiya, innovatsiya va iqtisodiy loyihalarni moliyalashtirish;

yarmarkalar, koʻrgazmalar va seminarlarda taqdimotlar qilish va savdo missiyalari va tadbirkorlar biznes forumlarini tashkil etish.

Mazkur Memorandumning 2-moddasida belgilangan sohalarda hamkorlikni taʼminlash maqsadida Tomonlar davlatlarining tegishli vazirliklari, tashkilotlari va ishbilarmon vakillaridan tashkil topadigan Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Slovakiya Respublikasi Iqtisodiyot vazirligi oʻrtasida iqtisodiy hamkorlik boʻyicha Idoralararo Komissiya (kelgusida — “Komissiya”) tuziladi.

Komissiya yigʻilishlari lozim boʻlganda, navbatma-navbat Oʻzbekiston Respublikasi va Slovakiya Respublikasida oʻtkaziladi. Komissiya oʻzining ish reglamentini belgilaydi.

Komissiya faoliyati bilan bogʻliq masalalar Tomonlar tomonidan tayinlangan rahbarlar yoxud ularni topshirigʻi bilan tayinlangan vakolatli oʻrinbosarlari tomonidan ish davomida koʻrib chiqiladi.

Komissiya faoliyati bilan bogʻliq xarajatlar Tomonlarning oʻzlari tomonidan qoplanadi.

1. Komissiya faoliyatining asosiy vazifalari quyidagilar hisoblanadi:

oʻzaro manfaatlarni aks ettiruvchi sohalarda Tomonlarning iqtisodiy hamkorlik dasturlarini muhokama qilish;

kredit berish hamda iqtisodiy hamkorlikni moliyalashtirishni taʼminlash uchun qulay sharoitlar yaratish;

kichik va oʻrta tadbirkorlikni qoʻllab-quvvatlash boʻyicha qabul qilingan dasturlarni tayyorlash va amalga oshirish;

ikki mamlakat subyektlarining Tomonlar hududlarida oʻtkaziladigan xalqaro koʻrgazmalar va yarmarkalarda ishtirok etishi uchun, shuningdek ikki Tomon mamlakatlarining Savdo-sanoat palatalari hamkorlik qilishi uchun tegishli sharoitlarni yaratish;

Tomonlar oʻrtasida iqtisodiy hamkorlikni kengaytirish va chuqurlashtirishga va ikki mamlakatlar ilmiy-texnikaviy sohadagi yutuqlari toʻgʻrisida tegishli maʼlumotlar almashinuviga yoʻnaltirilgan takliflarni ishlab chiqish.

2. Komissiya kooperatsiya munosabatlari va ishlab chiqarish hamkorligining boshqa shakllarini rivojlanishiga koʻmaklashadi.

Tomonlar davlatlari xoʻjalik subyektlari majburiyatlari yuzasidan, agar ushbu majburiyatlar kafolatlanmagan boʻlsa, javobgar boʻlmaydilar.

Mazkur Memorandum qoidalari Oʻzbekiston Respublikasi yoki Slovakiya Respublikasi ishtirokchilar boʻlgan xalqaro shartnomalardan hamda xalqaro tashkilotlarga aʼzoligidan kelib chiquvchi Tomonlarning huquq va majburiyatlariga taʼsir etmaydi.

Tomonlarning oʻzaro kelishuvlariga asosan, mazkur Memorandumga uning ajralmas qismi hisoblanadigan, alohida bayonnomalar bilan rasmiylashtiriladigan qoʻshimcha va oʻzgartirishlar kiritilishi mumkin.

Mazkur Memorandumning qoidalarini qoʻllash va talqin qilish bilan bogʻliq barcha masalalar, Tomonlar oʻrtasida Komissiya doirasida doʻstona muzokaralar va konsultatsiyalar yoʻli bilan hal etiladi.

Mazkur Memorandum uni imzolagan kundan boshlab kuchga kiradi va besh yil davomida amal qiladi.

Tomonlarning biri mazkur Memorandumni muddati tugashidan olti oy oldin, bekor qilish niyati borligi haqida ikkinchi Tomonga yozma ravishda xabar bermasa, ushbu Memorandum har safar bir yillik muddatlarga uzaytiriladi.

Mazkur Memorandum Bratislava shahrida 2009-yil 3-iyul kuni ikki asl nusxada, har biri oʻzbek, slovak va rus tillarida tuzildi, bunda barcha matnlar bir xil kuchga ega.

Mazkur Memorandum qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga amal qiladilar.