Oʻzbekiston Respublikasi Hukumati va Koreya Respublikasi Hukumati, bundan keyin “Tomonlar” deb ataluvchilar,

1992-yil 17-iyunda imzolangan Oʻzbekiston Respublikasi Hukumati bilan Koreya Respublikasi Hukumati oʻrtasida “Ilmiy-texnikaviy hamkorlik toʻgʻrisida”gi Bitimning 3-moddasiga muvofiq,

shuningdek, hamkorlikdagi texnikaviy loyihalarning tizimli va samarali bajarilishini taʼminlash yoʻli bilan ikki mamlakat oʻrtasida ilmiy-texnikaviy hamkorlikni yanada mustahkamlash maqsadida,

1. “Oʻzbekistonda ilmiy-texnikaviy adabiyotlarning kompleks elektron kutubxona tizimini yaratish” loyihasini (bundan keyin — “Loyiha”) amalga oshirish maqsadida, Koreya Respublikasi Hukumati Koreya Respublikasi qonunchiligiga muvofiq, shuningdek, cheklangan budjet mablagʻlari doirasida Oʻzbekiston Respublikasi Hukumatiga 2 million AQSH dollariga teng miqdorda grant taqdim etadi (bundan keyin — “Grant”).

2. Oʻzbekiston Respublikasi Hukumati Grantdan aynan Oʻzbekistonda ilmiy-texnikaviy adabiyotlarning kompleks elektron kutubxona tizimini yaratish maqsadida foydalanadi.

3. Koreya Respublikasi Hukumati Koreya Xalqaro Hamkorlik Agentligini (bundan keyin — “KOISA”) Loyihani amalga oshirishga koʻmaklashishga oid zaruriy ishlarni bajaruvchi masʼul tashkilot sifatida tayinlaydi.

Oʻzbekiston Respublikasi Hukumati Oʻzbekiston Aloqa va axborotlashtirish agentligini (bundan keyin — “Agentlik”) Grantdan maqsadli foydalanishni amalga oshiruvchi masʼul tashkilot sifatida tayinlaydi.

KOISA va Agentlik Loyiha bajarilishi tafsilotlari toʻgʻrisida mazkur Bitimning ajralmas qismi hisoblanadigan Muzokaralar bayonnomasini imzolaydilar.

4. (1) Oʻzbekiston Respublikasi Hukumati quyidagi zarur chora-tadbirlarni koʻradi:

a) Grant doirasida keltirilayotgan asbob-uskunalar va materiallarni oʻz vaqtida bojxona rasmiylashtiruvidan oʻtkazish va Oʻzbekiston Respublikasi ichida transport orqali tashuvni taʼminlash;

b) Loyihani amalga oshirish doirasida Grant hisobidan keltirilayotgan asbob-uskunalar va materiallarni bojxona toʻlovlaridan (bojxona rasmiylashtiruvi yigʻimlaridan tashqari) hamda Oʻzbekiston hududida sotib olinadigan tovar, ish va xizmatlarga qoʻshilgan qiymat soligʻidan (QQS) oʻrnatilgan tartibda ozod etish;

v) KOISA bilan imzolangan shartnomalarga muvofiq loyihani amalga oshirishda ishtirok etuvchi Koreya fuqarolarini Oʻzbekiston Respublikasida ularning daromadlari va mol-mulkiga nisbatan qoʻllanilishi mumkin boʻlgan bojxona toʻlovlari, ichki soliqlar va boshqa toʻlovlardan ozod etish;

g) (v) bandda qayd etilgan Koreya fuqarolariga loyiha doirasida KOISA bilan tuzilgan shartnomalarga muvofiq ishlarni bajarish uchun Oʻzbekiston Respublikasiga kirish va unda boʻlish uchun lozim boʻlgan shart-sharoitlarni yaratib berish;

d) Loyihani samarali amalga oshirish uchun Grant doirasida keltirilgan asbob-uskunalar va materiallar butligini taʼminlash, ulardan maqsadli va samarali foydalanishini kafolatlash; shuningdek,

e) Grant asosida qoplanadigan xarajatlardan tashqari, Loyihani amalga oshirish uchun zarur boʻlgan barcha xarajatlarni qoplash.

(2) Grant doirasida taqdim etilgan asbob-uskunalar va materiallar Oʻzbekiston Respublikasidan reeksport qilinishi mumkin emas.

5. Tomonlar mazkur Bitim bilan bogʻliq yoki Loyihani amalga oshirish jarayonida vujudga keladigan har qanday masalalar boʻyicha maslahatlashuvlar oʻtkazadilar.

6. (a) Mazkur Bitim imzolangan kundan boshlab kuchga kiradi;

(b) Bitim, agar Tomonlardan biri navbatdagi muddat tugashidan olti (6) oy oldin ikkinchi Tomonni yozma ravishda diplomatik kanallar orqali Bitimni toʻxtatish toʻgʻrisida ogohlantirmasa, 2009-yil 31-dekabrgacha amal qiladi;

(v) Bitimning muddatidan oldin toʻxtatilishi Loyihani tugallanishiga olib kelmaydi, shuningdek, Bitim muddatining tugashi oxiriga yetmagan Loyihani tugallanishiga taʼsir etmaydi;

(g) Tomonlarning oʻzaro roziligi bilan mazkur Bitimga diplomatik kanallar orqali almashuv notalari shaklida rasmiylashtirilgan oʻzgartish va qoʻshimchalar kiritilishi mumkin.

Yuqoridagilarni tasdiqlab, oʻz Hukumatlari tomonidan tegishli vakolat olgan quyidagi imzo chekuvchilar mazkur Bitimni imzoladilar.

2009-yil 27-aprelda Toshkent shahrida ikki asl nusxada, har biri oʻzbek, koreys va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelsa, ingliz tilidagi matn ustuvor hisoblanadi.