Oʻzbekiston Respublikasining “Aloqa toʻgʻrisida”gi Qonuni aloqa tarmoqlarini tashkil qilishning umumiy huquqiy, iqtisodiy asoslarini, aloqa shoxobchalarini barpo etish va ulardan foydalanishda, aloqa xizmati koʻrsatishda mulkchilik shaklidan qatʼi nazar korxonalar, muassasalar, tashkilotlarning va fuqarolarning aloqa vositalariga egalik qilish, ulardan foydalanish, ularni tasarruf etish va boshqarish sohasidagi huquqlari va vazifalarini, shuningdek berilgan huquqlarni buzganlik va vazifalarini bajarmaganlik uchun javobgarlik choralarini belgilaydi.

Aloqa Oʻzbekiston Respublikasi xoʻjalik va ijtimoiy infrastrukturasining tarkibiy qismi boʻlib, aholining, xoʻjalik subyektlarining, davlat idoralarining pochta, telefon, telegraf, radio va axborotning oʻzga turlarini uzatish va qabul qilish hamda aloqa tarmogʻi orqali joʻnatilayotgan ashyolarni yetkazib berishga boʻlgan ehtiyojlari qondirilishini taʼminlaydi.

Pochta va elektr aloqa tarmoqlari — aloqa sohasidagi munosabatlarning obyektlari boʻlib, ular pochta joʻnatmalarini qabul qilib olish, tashish va koʻrsatilgan joyga yetkazib berish, shuningdek axborotlarni elektr quvvati va elektromagnit nurlanishdan foydalanib tayyorlash, uzatish va qabul qilish vositalarining yigʻindisi hisoblanadi.

Oʻzbekiston Respublikasining yuridik va jismoniy shaxslari, ajnabiy yuridik shaxslar va fuqarolar aloqa sohasidagi munosabatlarning subyektlaridir.

Aloqa sohasidagi munosabatlar ushbu Qonun, Oʻzbekiston Respublikasining boshqa qonun hujjatlari bilan tartibga solib boriladi.

Aloqa sohasida Oʻzbekiston Respublikasi Oliy Kengashi ixtiyoriga:

aloqa sohasidagi qonunlar;

aloqa sohasidagi davlat siyosatining asosiy qoidalarini belgilash;

xalqaro shartnomalarni ratifikatsiyalash;

Oʻzbekiston Respublikasi Konstitutsiyasidan kelib chiqadigan boshqa vakolatlarni amalga oshirish kiradi.

Aloqa sohasidagi davlat boshqaruvi Oʻzbekiston Respublikasi Prezidenti huzuridagi Vazirlar Mahkamasi tomonidan, shuningdek u vakolat bergan idora (Oʻzbekiston pochta va telekommunikatsiyalar agentligi) tomonidan amalga oshiriladi.

Oʻzbekiston pochta va telekommunikatsiyalar agentligi oʻziga boʻysunadigan aloqa vositalariga rahbarlik qiladi, korxonalar, muassasalar, tashkilotlar va jismoniy shaxslarga tegishli boʻlgan aloqa vositalari faoliyatini muvofiqlashtirib boradi, aloqa vositalari ustidan davlat texnikaviy nazoratini amalga oshiradi, mulkchilik shaklidan, kimning tasarrufida ekanligidan qatʼi nazar aloqa korxonalari, tashkilotlari va muassasalari koʻrsatayotgan xizmat sifatini tekshirib boradi.

Pochta toʻlovi belgilarini nashr etish mutlaq huquqi Oʻzbekiston pochta va telekommunikatsiyalar agentligiga tegishlidir.

Oʻzbekiston Respublikasi hududida mulkchilikning yakka tartibdagi, jamoa, davlat va aralash shakllariga asoslangan, shuningdek xorijiy yuridik shaxslar va fuqarolar egaligida boʻlgan aholiga aloqa xizmati koʻrsatuvchi korxonalar faoliyat koʻrsatishi mumkin.

Idoraviy, jamoa aloqa tarmoqlari va vositalari, alohida shaxslarga qarashli aloqa tarmoqlari va vositalari ishlab turgan umumdavlat aloqa tarmogʻiga shartnoma asosida, aloqa korxonalarining belgilab qoʻyilgan texnikaviy va texnologik talablariga rioya qilgan holda kiritilishi mumkin.

Idoraviy tarmoqlar belgilangan tartibda Oʻzbekiston pochta va telekommunikatsiyalar agentligi korxonalarining balansiga va ular tomonidan foydalanish va xizmat koʻrsatishga topshirilishi mumkin.

Davlat aloqa vositalarini rivojlantirish va qayta qurish davlat idoralarining mablagʻlari, oʻz mablagʻlari, banklarning kreditlari, jalb qilingan mablagʻlar va Oʻzbekiston Respublikasi qonunlarida man etilmagan boshqa manbalar hisobiga amalga oshiriladi.

Boshqa aloqa vositalarini rivojlantirish, qayta qurish ularning egalari tomonidan oʻz mablagʻlari va Oʻzbekiston Respublikasi qonunlarida man etilmagan boshqa manbalar hisobiga amalga oshiriladi.

Muayyan egalikdagi yer hududlari, koʻpriklar, tonnellar orqali, koʻchalardan, inshootlardan, kollektorlardan, man etilgan hududlardan, oʻrmonlardan aloqa kommunikatsiyalari oʻtkazishda bunday kommunikatsiyalarni oʻtkazish shartlari yer egalari va yerdan foydalanuvchilar hamda yuqorida qayd etilgan obyektlarning egalari bilan kelishiladi.

Inshootlar, yoʻllar, koʻpriklar va boshqa obyektlar barpo etilayotganda yoki qayta qurilayotganda aloqa tarmoqlarini qayta joylashtirish va koʻchirish ishlari qurilish buyurtmachilari tomonidan oʻz mablagʻi hisobidan va aloqa kommunikatsiyalarining egalari taqdim etgan texnik shartlarga muvofiq bajariladi.

Daha ichkarisidagi aloqa kommunikatsiyalari qurilish buyurtmachilari tomonidan loyihalanadi va barpo etiladi.

Aloqa liniyalari boʻylab, radiotelevizion uzatish stansiyalariga, radiorele liniyalariga, boshqa aloqa obyektlariga tutash yerlardan ajratib berilgan yerlar aloqa vositalari va tarmoqlarining muhofaza mintaqasini tashkil qiladi.

Elektr aloqa vositalari va tarmoqlarining saqlanishini taʼminlash tartibi Oʻzbekiston Respublikasi qonunlari bilan tartibga solib turiladi.

Oʻzbekiston Respublikasi Konstitutsiyasiga muvofiq yozishma, telefon soʻzlashuvlari, telegraf xabarlarining sir saqlanishi qonun bilan muhofaza etiladi.

Yozishmalarni ochib oʻqishga va ushbu moddaning birinchi qismida qayd etilgan qoidalar boshqacha tarzda buzilishiga yoʻl qoʻygan aloqa xodimlari maʼmuriy va jinoiy javobgarlikka tortiladilar, Oʻzbekiston Respublikasi qonunlarida koʻzda tutilgan hollar bundan mustasno.

Oʻzbekiston Respublikasining davlat aloqa korxonalari koʻrsatadigan xizmatlarga Oʻzbekiston Respublikasi normativ hujjatlarida belgilangan narxlar va tariflarga muvofiq haq toʻlanadi.

Aloqa vositalariga mulkchilik huquqi asosida egalik qiluvchi davlatga qarashli boʻlmagan korxonalar va tashkilotlar, shuningdek jismoniy shaxslar oʻzlari koʻrsatgan xizmatlarga narxlar va tariflarni mustaqil ravishda belgilashlari mumkin.

Radiochastotalarni korxonalar, muassasalar, tashkilotlar va fuqarolar oʻrtasida taqsimlash Oʻzbekiston pochta va telekommunikatsiyalar agentligi tomonidan xalqaro bitimlar asosida amalga oshiriladi va elektromagnit toʻlqinlarini tarqatuvchi inshootlar va vositalarni sotib olish, qurish va foydalanish uchun ruxsatnomalar beriladi, shuningdek ushbu inshootlar va vositalar ishi nazorat qilinadi.

Oʻzbekiston Respublikasi hududida tezkor boshqaruv va dispetcherlik aloqa tizimida xizmatga oid muomala, shuningdek pochta va telegraf yozishmalarini yoʻllash “Oʻzbekiston Respublikasining davlat tili haqida”gi Qonunning qoidalariga muvofiq amalga oshiriladi.

Xalqaro axborot va joʻnatmalar pochta va elektr aloqa orqali ikki tomonlama bitimlarda, shuningdek xalqaro kelishuv va bitimlarning qoidalarida belgilangan tillarda joʻnatiladi.

Maʼlumotlarni uzatishning texnologik jarayonlarida Oʻzbekiston Respublikasi hududida hisobga olish va hisobotga oid yagona vaqt — mahalliy vaqt belgilanadi.

Maʼlumotlarni uzatishning xalqaro texnologik jarayonlarida axborotlar uzatish va pochta joʻnatmalarini yuborishda hisobga olish va hisobotga oid vaqt xalqaro kelishuv va bitimlarga muvofiq belgilanadi.

Aloqa korxonalari Oʻzbekiston Respublikasining aloqa Ustavida, xalqaro konvensiyalar va bitimlarda koʻzda tutilgan hollarda koʻrsatilayotgan xizmat sifati uchun mijozlar oldida moddiy javobgar boʻladilar.

Ushbu Qonunning talablarini buzishda aybdor boʻlgan shaxslar Oʻzbekiston Respublikasi qonunlariga muvofiq maʼmuriy yoki jinoiy javobgar boʻladilar.

Oʻzbekiston Respublikasi aloqa jabhasida faoliyat koʻrsatayotgan davlatlararo va xalqaro tashkilotlar bilan xalqaro shartnomalar va bitimlarga muvofiq huquqiy, texnologik hamda moliyaviy munosabatlar oʻrnatadi.