Iqtisodiyotning real sektori aksiyadorlik jamiyatlarining moliyaviy barqarorligini taʼminlash, ishlab chiqarishni rivojlantirishga investitsiyalarni jalb etish maqsadida va Oʻzbekiston Respublikasi Prezidentining “Iqtisodiyot real sektori korxonalarining moliyaviy barqarorligini yanada oshirish chora-tadbirlari toʻgʻrisida” 2008-yil 18-noyabrdagi PF-4053-son Farmonini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, Iqtisodiyot vazirligi, Moliya vazirligi, Davlat soliq qoʻmitasi, “Oʻzpaxtasanoat” uyushmasi, “Oʻzagromashservis” uyushmasi va “Oʻzdonmahsulot” aksiyadorlik kompaniyasining:

1-ilovaga* muvofiq roʻyxat boʻyicha 2009-yil 1-yanvardagi holatiga koʻra “Oʻzpaxtasanoat” uyushmasi va “Oʻzdonmahsulot” aksiyadorlik kompaniyasi tarkibiga kiradigan aksiyadorlik jamiyatlarining soliqlar boʻyicha qarzlarining tegishli summalarini;

2-ilovaga* muvofiq roʻyxat boʻyicha “Oʻzagromashservis” uyushmasi korxonalarining Oʻzbekiston Respublikasi Moliya vazirligi tomonidan ajratilgan 24,9 mlrd soʻm miqdoridagi kreditlar boʻyicha qarzlarini ayni bir vaqtda hisoblab yozilgan penya boʻyicha qarzni hisobdan chiqargan holda, tarkibiy oʻzgartirish hisobiga aksiyadorlik jamiyatlarining ustav jamgʻarmalaridagi davlat ulushini saqlab qolish toʻgʻrisidagi taklifiga rozilik berilsin.

2. “Oʻzagromashservis” uyushmasining 2-ilovaga muvofiq aksiyadorlik jamiyatlari uchun 2010-yil 1-yanvardagi holatiga koʻra hisoblab yozilgan soliqlar boʻyicha qarzlari summasini toʻlash muddati 2012-yil 1-yanvargacha uzaytirilsin.

3. Ustav jamgʻarmasida davlat ulushi boʻlgan aksiyadorlik jamiyatlariga va davlat ulushi xoʻjalik birlashmalarining ustav jamgʻarmalariga berilgan aksiyadorlik jamiyatlariga Oʻzbekiston Respublikasi Markaziy bankining kursi boʻyicha ekvivalentda kamida 400 ming AQSh dollari summasigacha ustav jamgʻarmasining shakllantirilmagan qismini asosiy fondlarni qayta baholash natijasida hosil boʻlgan zaxira jamgʻarmasi hisobiga toʻldirishga istisno tariqasida ruxsat berilsin.

Asosiy fondlarni qayta baholash hisobiga hosil boʻlgan, ustav jamgʻarmasini shakllantirishga yoʻnaltirilgan zaxira jamgʻarmasi mablagʻlari summasining qayta baholangan tegishli asosiy fondlar chiqib ketganda soliq solinadigan bazaga kiritilmasligi maʼlumot uchun qabul qilinsin.

4. Oʻzbekiston Respublikasi Davlat mulki qoʻmitasi, Davlat soliq qoʻmitasi, “Oʻzpaxtasanoat” uyushmasi, “Oʻzagromashservis” uyushmasi va “Oʻzdonmahsulot” aksiyadorlik kompaniyasi 1-ilovaga kiritilgan aksiyadorlik jamiyatlarining ustav jamgʻarmalari 2010-yil 1-yanvargacha boʻlgan muddatda toʻliq shakllantirilmagan taqdirda ustav jamgʻarmasi yetishmagan qismining 2010-yil 15-fevralgacha 2009-yil 1-yanvardagi holatiga koʻra soliqlar boʻyicha qarzlarning tegishli summasi hisobiga davlat ulushini koʻpaytirish yoʻli bilan toʻldirilishini taʼminlasinlar.

5. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi 1 va 2-ilovalarga kiritilgan aksiyadorlik jamiyatlarining qimmatli qogʻozlar emissiyasini yigʻim undirmasdan davlat roʻyxatidan oʻtkazsin.

6. Oʻzbekiston Respublikasi Davlat mulki qoʻmitasi manfaatdor vazirliklar va idoralar bilan birgalikda ikki oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.