Yangi ishlab chiqarishlar tashkil etish, ishlab turgan sanoat korxonalarini modernizatsiyalash va texnologik jihatdan qayta jihozlash, ishlab chiqarilayotgan raqobatbardosh mahsulotlarni mahalliylashtirishni chuqurlashtirish hisobiga Qoʻqon shahrining sanoat salohiyatini yanada rivojlantirish, shuningdek shu asosda aholining bandligini va daromadlarini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Qoʻqon shahrini sanoat jihatidan rivojlantirish hamda uni obodonlashtirish va infratuzilmasini yaxshilashga doir qoʻshimcha chora-tadbirlar toʻgʻrisida” 2009-yil 19-oktabrdagi F-3283-son farmoyishiga muvofiq tashkil etilgan Ishchi komissiya tomonidan Oʻzbekiston Respublikasi Iqtisodiyot vazirligi va Moliya vazirligi, Fargʻona viloyati va Qoʻqon shahri hokimliklari, boshqa manfaatdor vazirliklar, idoralar, xoʻjalik birlashmalari, tijorat banklari ishtirokida ishlab chiqilgan 2010 — 2012-yillarda Qoʻqon shahrining sanoat salohiyatini rivojlantirish, ishlab chiqarishni modernizatsiyalash va mahalliylashtirish loyihalarini amalga oshirish chora-tadbirlari dasturi maʼqullansin. Dastur quyidagilarni oʻz ichiga oladi:

2010 — 2012-yillarda Qoʻqon shahri korxonalarini modernizatsiyalash va texnologik jihatdan qayta jihozlash, sanoat mahsulotlarini mahalliylashtirishni chuqurlashtirishning aniq dasturini 1-ilovaga* muvofiq;

Qoʻqon shahri sanoat korxonalarini moliyaviy sogʻlomlashtirish dasturini 2-ilovaga* muvofiq;

Qoʻqon shahrining istiqbolsiz sanoat korxonalarini yangi mulkdorlarga jadal sotish tadbirlarini 3-ilovaga* muvofiq.

2. Ishchi komissiya (R.S. Azimov)ga belgilangan muddatlarga muvofiq ushbu qaror bilan tasdiqlangan Chora-tadbirlar dasturida nazarda tutilgan tadbirlar samarali amalga oshirilishi bilan bogʻliq masalalar boʻyicha davlat va xoʻjalik boshqaruvi organlari, tijorat banklari, mahalliy davlat hokimiyati organlari faoliyatini muvofiqlashtirish funksiyasi yuklansin.

3. Dasturda nazarda tutilgan chora-tadbirlar amalga oshirilishi uchun masʼul boʻlgan Fargʻona viloyati va Qoʻqon shahri hokimliklari, vazirliklar, idoralar va xoʻjalik birlashmalari, tijorat banklari:

oʻn kun muddatda Chora-tadbirlar dasturiga kiritilgan investitsiya loyihalarining loyiha hujjatlarini ishlab chiqish va investitsiya loyihalarini amalga oshirish tarmoq jadvallarini belgilangan tartibda tasdiqlasinlar;

tasdiqlangan Chora-tadbirlar dasturida nazarda tutilgan parametrlarga va muddatlarga muvofiq korxonalarni moliyaviy sogʻlomlashtirish va bankrot korxonalarni yangi mulkdorlarga jadal sotish chora-tadbirlari soʻzsiz bajarilishini taʼminlasinlar;

har oyda Chora-tadbirlar dasturiga kiritilgan tadbirlar bajarilishi monitoringini olib borsinlar, tadbirlarni soʻzsiz hal etish yuzasidan zarur tezkor va amaliy chora-tadbirlar koʻrsinlar;

har chorakda Ishchi komissiyaga Chora-tadbirlar dasturiga kiritilgan tadbirlar bajarilishi toʻgʻrisida axborot bersinlar.

4. Oʻzbekiston Respublikasi Iqtisodiyot vazirligi, Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi amalga oshirilishini taʼminlash boʻyicha maxsus idoralararo komissiya ushbu qarorga 1-ilovada koʻrsatilgan loyihalarni belgilangan tartibda tegishli yilning Investitsiya dasturiga va Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga kiritsinlar.

5. Oʻzbekiston Respublikasi Davlat soliq qoʻmitasi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bir hafta muddatda 3-ilovaga kiritilgan iqtisodiy nochor korxonalarga nisbatan belgilangan tartibda bankrotlik tartibotini qoʻllash tashabbusi bilan chiqsinlar.

Oliy xoʻjalik sudiga qarzdor korxonalarni bankrot deb eʼtirof etish toʻgʻrisidagi daʼvo arizalarini koʻrib chiqishni hamda 3-ilovada koʻrsatilgan ishlamayotgan, iqtisodiy nochor va eskirgan asbob-uskunalardan foydalanayotgan sanoat korxonalari boʻyicha tugatish ishini boshlashni jadallashtirish tavsiya qilinsin.

6. Belgilab qoʻyilsinki, istisno tariqasida:

3-ilovaga kiritilgan sanoat korxonalari bankrot deb eʼlon qilingandan keyin ularni mulkiy komplekslar shaklida tijorat banklari va investorlarga sotish, ishlab chiqarish tiklangandan hamda korxonalar yangi mulkdorlarga sotilgandan keyin, keyinchalik qarzlarni kreditorlarga qaytargan holda, savdo oʻtkazilmasdan investitsiya majburiyati ostida bepul berish shartlarida amalga oshiriladi;

inventarizatsiya, mol-mulk qiymatini baholash hamda bankrot korxonalarning mol-mulkini sotib oluvchi tijorat banklari va investorlar bilan shartnomalar tuzish tugatish ishi boshlangan paytdan boshlab uch hafta mobaynida amalga oshiriladi.

7. Ishchi komissiya (R.S. Azimov)ga ushbu qaror bilan tasdiqlangan 2010 — 2012-yillarda Qoʻqon shahrining sanoat salohiyatini rivojlantirish, ishlab chiqarishni modernizatsiyalash va mahalliylashtirish loyihalarini amalga oshirish chora-tadbirlari dasturiga, zaruriyat boʻlganda, Oʻzbekiston Respublikasi Iqtisodiyot vazirligi hamda boshqa manfaatdor vazirliklar va idoralarning xulosalari hisobga olingan holda tuzatish kiritish huquqi berilsin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.