Vazirlar Mahkamasi qaror qiladi:

1. Oborot soligʻi toʻgʻrisidagi ilova qilinayotgan Nizom tasdiqlansin.

2. OʻzSSJ Moliya vazirligi OʻzSSJ Adliya vazirligi bilan birgalikda 2 oy muddat ichida Oʻzbekiston SSJ Hukumatining qarorlarini mazkur qaror bilan muvofiqlashtirish toʻgʻrisida Vazirlar Mahkamasiga takliflar tayyorlasin.

1. Oborot soligʻi olinadigan tovar (mahsulot)lar ishlab chiqaradigan va sotadigan korxonalar, birlashmalar va tashkilotlar (shu jumladan, ishlab chiqarish kooperativlari — bunga kolxozlar ham kiradi, shuningdek, sovet yuridik shaxslari va xorijiy yuridik shaxslar hamda fuqarolar ishtirokidagi qoʻshma korxonalar va ularning filiallari (bundan keyin korxonalar deb ataladi) oborot soligʻi toʻlovchilar hisoblanadilar.

2. Oborot soligʻi quyidagicha hisoblanadi:

a) savdo va ulgurji-savdo chegirmalarini (transport xarajatlari) chiqarib tashlagan holda davlat chakana narxlari yoki sanoat ulgurji narxlari va korxonalarning ulgurji narxlari oʻrtasidagi tafovut tarzida;

b) savdo va ulgurji-savdo chegirmalarini (transport xarajatlarini) chiqarib tashlagan holda davlat chakana narxlaridan kelib chiqqan holda belgilanadigan yoki korxonalar tomonidan mustaqil ravishda yoxud shartnoma asosida belgilanadigan narxlardan kelib chiqqan holda oborotga nisbatan protsentlar hisobidagi guruhli stavkalar boʻyicha;

v) tovar (mahsulot) birligidan qatʼiy soʻmlarda.

3. Oborot soligʻi jumhuriyat budjetiga oʻtkaziladi. Oʻzbekiston SSJ Oliy Kengashi tasdiqlaydigan normativlar boʻyicha Qoraqalpogʻiston MSSJ budjetiga va mahalliy budjetlarga ajratiladigan qismi bundan mustasnodir.

4. Davlat chakana narxlari boʻyicha sotiladigan tovarlar (mahsulotlar)ga oborot soligʻining guruhli stavkalarini tasdiqlash quyidagicha amalga oshiriladi:

a) chakana narxlarini SSJI Davlat narxlar qoʻmitasi tasdiqlaydigan tovarlar nomenklaturasi boʻyicha — SSJI Moliya vazirligi tomonidan;

b) chakana narxlarini Oʻzbekiston SSJ Davlat narxlar qoʻmitasi, shuningdek, vazirliklar (idoralar) oʻzlariga berilgan huquqlarga muvofiq tasdiqlaydigan tovarlar nomenklaturasi boʻyicha — OʻzSSJ Moliya vazirligi tomonidan;

v) chakana narxlarini Qoraqalpogʻiston MSSJ Vazirlar Mahkamasining, viloyat ijroiya qoʻmitalari va Toshkent shahar ijroiya qoʻmitasining narx-navo organlari tasdiqlaydigan tovarlar nomenklaturasi boʻyicha — davlat moliya-soliq xizmatining tegishli organlari tomonidan.

Davlat chakana narxlari boʻyicha sotiladigan tovarlarga oborot soligʻining guruhli stavkalarini tasdiqlashda, qoidaga koʻra, bu tovarlarni ishlab chiqarishning rentabelliligi (tannarxga nisbatan foiz hisobidagi foyda) koʻpi bilan 25 foiz miqdorida qabul qilinadi.

Narxlar va tariflar belgilangan tartibda oʻzgargan hollarda oborot soligʻining stavkalari qayta koʻrib chiqiladi.

5. Korxonalar tomonidan mustaqil ravishda yoki shartnoma asosida belgilanadigan narxlar boʻyicha sotiladigan tovarlar (mahsulotlar)ga oborot soligʻining guruhli stavkalarini tasdiqlash SSJI Moliya vazirligi tomonidan — SSJI Davlat narxlar qoʻmitasiga birkitilgan tovarlar nomenklaturasi boʻyicha, OʻzSSJ Moliya vazirligi tomonidan — jumhuriyat narx-navo organlariga birkitilgan tovarlar nomenklaturasi boʻyicha amalga oshiriladi. Stavkalar tegishli narx-navo organlari bilan kelishuvga muvofiq tasdiqlanadi, bunda tovarlar ishlab chiqarish rentabelliligi (tannarxga nisbatan foiz hisobidagi foyda), qoidaga koʻra, koʻpi bilan 25 foiz miqdorida qabul qilinadi.

Qoraqalpogʻiston MSSJ, viloyatlar va Toshkent shahar davlat moliya-soliq organlari korxonalar mustaqil yoki shartnoma asosida belgilaydigan narxlar boʻyicha sotiladigan barcha qolgan tovarlar (mahsulotlar)ga oborot soligʻining guruhli stavkalarini ana shu tartibda tasdiqlaydilar.

6. Sovet yuridik shaxslari va xorijiy yuridik shaxslar hamda fuqarolar ishtirokidagi qoʻshma korxonalar uchun oborot soligʻi stavkalarini Oʻzbekiston SSJ Prezidenti huzuridagi Vazirlar Mahkamasi belgilaydi.

7. Oborot soligʻi quyidagi tartibda toʻlanadi:

a) yetkazib beruvchilarning schyotlarida alohida ajratiladigan summada har bir hisob-kitob hujjati boʻyicha;

b) har kuni, oborot tugashining uchinchi kunida;

v) oʻtgan xar bir oʻn kunlik, oy yoki kvartal uchun SSJI Moliya vazirligi belgilaydigan muddatlarda, haqiqiy oborotdan kelib chiqqan holda.

Mazkur punktda nazarda tutilgan oborot soligʻini toʻlash tartibini qoʻllanish shartlarini SSJI Moliya vazirligi belgilaydi.

8. Oborot soligʻi toʻlovchilar tegishli soliq organlariga SSJI Moliya vazirligi belgilaydigan muddatlarda va shaklda oborot soligʻi boʻyicha hisob-kitoblarni taqdim etadilar.

9. Oborot soligʻini hisoblashning toʻgʻriligi va uning budjetga oʻz vaqtida toʻlanishi uchun masʼuliyat toʻlovchilarga va ularning mansabdor shaxslariga yuklatiladi.

10. Oborot soligʻining budjetga oʻtkazilishi yuzasidan soliq organlarini nazorat qilish Oʻzbekiston SSJ qonunchiligiga muvofiq amalga oshiriladi.

11. SSJ Ittifoqi, Oʻzbekiston SSJ qonunchiligiga muvofiq quyidagilar oborot soligʻi toʻlashdan ozod etiladilar:

a) ishga tushirilgan kundan boshlab ikki yil mobaynida:

mahalliy xomashyo va chiqindilardan tovarlar ishlab chiqaruvchi korxonalar (araq, vino-araq mahsulotlari, pivo, tamaki, tamaki mahsulotlari, plastmassa tovarlar va tarkibida spirt boʻlgan parfyumeriya-pardozlash buyumlaridan tashqari), bunda tovarlar ishlab chiqarish uchun foydalaniladigan toʻla qimmatli materiallar va xomashyolarning qiymati xomashyo va materiallar umumiy qiymatining 25 foizidan oshmasligi kerak;

oʻzlari ishlab chiqaradigan badiiy buyumlarni sotuvchi xalq badiiy hunarmandchiligi korxonalari. Oʻzbekiston SSJ va Qoraqalpogʻiston MSSJ qonunchiligi bilan bunday imtiyozlar Oʻzbekiston SSJ, Qoraqalpogʻiston MSSJ budjetlariga va mahalliy budjetlarga tushadigan oborot soligʻi summasi doirasida yanada uzoqroq muddatlarga berilishi mumkin;

b) nogironlar ishlovchilar umumiy sonining 50 foizidan koʻprogʻini tashkil etadigan korxonalar;

v) Oʻzbekiston Koʻrlar jamiyatining korxonalari va koʻrlar uchun oʻquv-ishlab chiqarish korxonalari — agar mehnat qilish layoqati cheklangan shaxslar bu korxonalardagi xodimlar umumiy sonining kamida 50 foizini tashkil etsa;

g) togʻli va uzoq nohiyalarda joylashgan matlubot kooperatsiyasining tovarlar sotadigan korxonalari (uzum, meva-cheva vinolari, oʻtkir ichimliklar va pivodan tashqari) — 50 foizgacha miqdorda, nohiyaga boʻysunuvchi shaharlarda, shahar tipidagi posyolkalarda va qishloq joylardagi korxonalar esa oborot soligʻining 25 foizi miqdorida;

d) mahalliy xomashyodan va oʻzlarining xomashyosidan ishlab chiqargan mahsulotni sotadigan kolxozlar, sovxozlar va boshqa qishloq xoʻjaligi korxonalari — plastmassa tovarlar, oshlangan moʻyna terisi, moʻyna va zargarlik buyumlari, shuningdek, spirt qoʻllanib ishlab chiqarilgan vino-araq mahsulotlaridan tashqari.

Agar tovarlar ishlab chiqarishda foydalaniladigan mahalliy xomashyo va oʻzi ishlab chiqargan xomashyoning qiymati xomashyo va materiallar umumiy qiymatining kamida 75 foizini tashkil etgandagina mazkur imtiyoz beriladi.

Mazkur punktda koʻrsatilgan imtiyozlar agrofirmalarda, agrokombinatlarda va boshqa agrosanoat birlashmalarida faqat ularga kiruvchi kolxozlar, sovxozlarga va boshqa qishloq xoʻjaligi korxonalariga beriladi.

e) V. I. Lenin nomidagi Sovet bolalar fondi, Sovet tinchlik fondi, Sovet madaniyat fondi, Sovet mehr-shafqat va salomatlik fondi, Qizil Xoch va Qizil Yarim oy uyushmalari va jamiyatlari, Butunittifoq “Nogironlarni davolash” uyushmasining oʻz faoliyatlari sohasiga koʻra tovarlar va mahsulotlar ishlab chiqaradigan korxonalari va xoʻjalik tashkilotlari;

j) ijodiy uyushmalarning korxonalari va xoʻjalik tashkilotlari — mazkur uyushma tomonidan ularning ustav faoliyatini amalga oshirish uchun ajratiladigan oborot mablagʻi summasi doirasida;

z) urush va mehnat faxriylari kengashlari huzuridagi urush, mehnat va SSJI Qurolli Kuchlari faxriylarining kooperativlari (kooperativlar birlashmalari) — ulardagi ishlovchilarning kamida 50 foizi pensiya yoshiga yetgan shaxslar (pensionerlar) boʻlgan va ular mahalliy xomashyo va chiqindilardan tovarlar ishlab chiqargan taqdirda;

i) oʻzlari ishlab chiqaradigan tovarlarni sotadigan oʻquvchilar korxonalari va oʻquvchilar kooperativlari.

12. Xalq isteʼmoli mollari ishlab chiqarishni koʻpaytirishni (araq-vino mahsulotlaridan tashqari), shuningdek, oborot soligʻining oldingi yilga nisbatan koʻpayishini taʼminlayotgan korxonalar yillik ish natijalari boʻyicha oborot soligʻi oʻsishining 30 foizgachasini oʻz ixtiyorida qoldirish va bu mablagʻlarni ishlab chiqarish hamda ijtimoiy rivojlanish maqsadlariga yoʻnaltirish huquqiga egadirlar. Xalq isteʼmoli mollari ishlab chiqarishning koʻpayishi chakana narxlarda belgilanadi.

13. Jamgʻarma fondidagi mablagʻlar yetishmagan taqdirda korxonalar kredit berilgan tadbirlarni oʻtkazish natijasida qoʻshimcha ravishda ishlab chiqarilgan tovarlarni sotishdan olingan oborot soligʻining 50 foizgachasini ishlab chiqarishni koʻpaytirishga, xalq isteʼmoli mollarining sifatini yaxshilashga va assortimentni kengaytirish uchun berilgan bank kreditini qoplashga yoʻnaltirishlari mumkin.

14. Oborot soligʻi boʻyicha ayrim toʻlovchilar uchun qoʻshimcha imtiyozlar SSJI Moliya vazirligi tomonidan, shuningdek, Oʻzbekiston SSJ Prezidenti huzuridagi Vazirlar Mahkamasi tomonidan tegishli budjetlarga kelib tushadigan oborot mablagʻi summasi doirasida belgilanadi.