Oʻzbekiston Respublikasi Prezidentining “Shaxsiy yordamchi, dehqon va fermer xoʻjaliklarida chorva mollar koʻpaytirishni ragʻbatlantirishni kuchaytirish hamda chorvachilik mahsulotlari ishlab chiqarishni kengaytirish borasidagi qoʻshimcha chora-tadbirlar toʻgʻrisida” 2008-yil 21-apreldagi PQ-842-son va “Oziq-ovqat mahsulotlari ishlab chiqarishni kengaytirish va ichki bozorni toʻldirish yuzasidan qoʻshimcha chora-tadbirlar toʻgʻrisida” 2009-yil 26-yanvardagi PQ-1047-son qarorlarini amalga oshirish, shuningdek Jizzax va Sirdaryo viloyatlarida zamonaviy chorvachilik komplekslari qurish yoʻli bilan chorva mollari bosh sonini va sut mahsulotlari yetishtirish hajmini yanada koʻpaytirish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Tashqi iqtisodiy aloqalar investitsiyalar va savdo vazirligining tashqi savdo kompaniyalari tomonidan Jizzax va Sirdaryo viloyatlarida chorvachilik komplekslari qurish (500 bosh molga) loyihalarini amalga oshirish uchun qishloq xoʻjaligi uchun III xalqaro mini texnologiyalar va ixcham asbob-uskunalarning “Uzbekistan Agrominitech Expo — 2008” ixtisoslashtirilgan koʻrgazma-sotuvida oʻtkazilgan tanlash asosida “Van der Pioeg International B.V.” (Gollandiya), “DELAVAL EXPORT SERVICE AB” (Shvetsiya) va “CONEXX” Sp.z o.o. (Polsha) kompaniyalari bilan yigʻma metall konstruksiyalari va maxsus asbob-uskunalar yetkazib berishga Doiraviy bitimlar imzolanganligi;

b) imzolangan Doiraviy bitimlarni bajarish yuzasidan:

“Uzprommashimpeks” davlat-aksiyadorlik kompaniyasi bilan “Van der Pioeg International B.V.” kompaniyasi (Gollandiya) oʻrtasida yigʻma metall konstruksiyalari va maxsus asbob-uskunalar yetkazib berishga 2008-yil 19-sentabrda 1283-200/2008 IM-1107-son kontrakt imzolanganligi (Sirdaryo viloyatida chorvachilik kompleksi qurilishi uchun);

“DELAVAL EXPORT SERVICE AB” kompaniyasi (Shvetsiya) bilan “Markazsanoateksport” davlat-aksiyadorlik tashqi savdo kompaniyasi oʻrtasida maxsus asbob-uskunalar yetkazib berishga 2008-yil 13-oktabrda 310842-son va “CONEXX” Sp.z o.o. kompaniyasi (Polsha) bilan — yigʻma metall konstruksiyalari yetkazib berishga 2008-yil 13-avgustda 0015-son kontraktlar imzolanganligi (Jizzax viloyatida chorvachilik kompleksi qurilishi uchun) maʼlumot uchun qabul qilinsin.

2. Oʻzbekiston Respublikasi Tashqi iqtisodiy aloqalar, investitsiyalar va savdo vazirligining chorvachilik komplekslari qurilishi va ularni jihozlash uchun maxsus asbob-uskunalar va yigʻma metall konstruksiyalari oʻtkazilgan tanlov asosida tashqi savdo kompaniyalari tomonidan sotib olinishi hamda xaridlarni maqsadli qarz berish haqida tashqi savdo kompaniyalari bilan tuzilgan shartnomalar asosida Tashqi iqtisodiy aloqalar, investitsiyalar va savdo vazirligining maxsus hisob raqamida jamlanadigan “KfV” bankining (Germaniya) notijorat valyuta kreditlari mablagʻlari hisobiga moliyalashtirish toʻgʻrisidagi taklifiga rozilik berilsin.

3. Quyidagilar:

a) chorvachilik komplekslari qurish boʻyicha:

Jizzax viloyatida — Oʻzbekiston Respublikasi Tashqi iqtisodiy aloqalar, investitsiyalar va savdo vazirligining “O'zmarkazimpeks” davlat-aksiyadorlik tashqi savdo kompaniyasi va “Markazsanoateksport” davlat-aksiyadorlik tashqi savdo kompaniyasi tomonidan tashkil etilgan “Milkfoods” masʼuliyati cheklangan jamiyat;

Sirdaryo viloyatida — Oʻzbekiston Respublikasi Tashqi iqtisodiy aloqalar, investitsiyalar va savdo vazirligining “Uzinterimpeks” davlat-aksiyadorlik tashqi savdo kompaniyasi va “Uzprommashimpeks” davlat-aksiyadorlik tashqi savdo kompaniyasi tomonidan tashkil etilgan “Inter Milk” masʼuliyati cheklangan jamiyat buyurtmachilar etib;

b) chorvachilik komplekslari qurish boʻyicha bosh pudratchi etib — “Kamol” koʻp tarmoqli qurilish korxonasi;

v) loyiha-smeta hujjatlarini ishlab chiqish boʻyicha bosh loyihalovchi etib — “Oʻzqishloqqurilishloyiha” masʼuliyati cheklangan jamiyat belgilansin.

4. Oʻzbekiston Respublikasi Davlat arxitektura va qurilish qoʻmitasi loyiha-smeta hujjatlarining belgilangan tartibda davlat ekspertizasidan oʻtkazilishini hamda loyiha va qurilish-montaj ishlarining sifati, shuningdek davlat standartlari talablariga qurilish normalari va qoidalariga rioya qilinishi ustidan doimiy davlat arxitektura-qurilish nazorati olib borilishini taʼminlasin.

5. Jizzax va Sirdaryo viloyatlari hokimliklari:

bir oy muddatda chorvachilik komplekslari qurilishi va ularning ozuqa bazasi tashkil etilishi uchun belgilangan tartibda yer uchastkalari ajratsinlar;

hududlarni obodonlashtirish, irrigatsiya, koʻkalamzorlashtirish, mavjud muhandislik kommunikatsiyalarini rekonstruksiya qilish va Yangi muhandislik kommunikatsiyalari qurish yoʻllari bajarilishida amaliy yordam koʻrsatsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.