O‘zbekiston Respublikasi Vazirlar Mahkamasining 2009-yil 18-avgustdagi 233-sonli “Ilmiy xodimlar mehnatini yanada rag‘batlantirish chora-tadbirlari to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-y. 34-son, 370-modda) muvofiq O‘zbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qo‘mitasi, Moliya vazirligi va Mehnat va aholini ijtimoiy muhofaza qilish vazirligi qaror qiladilar:

1. Ilmiy xodimlarni moddiy rag‘batlantirish jamg‘armasini shakllantirish va uning mablag‘laridan foydalanish tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgach kuchga kiradi.

Ushbu Nizom O‘zbekiston Respublikasi Vazirlar Mahkamasining 2009-yil 18-avgustdagi 233-sonli “Ilmiy xodimlar mehnatini yanada rag‘batlantirish bo‘yicha chora-tadbirlar to‘g‘risida”gi qaroriga (O‘zbekiston Respublikasi qonun hujjatlari to‘plami, 2009-y., 34-son, 370-modda) muvofiq, ilmiy xodimlarni moddiy rag‘batlantirish jamg‘armasi (bundan keyingi o‘rinlarda jamg‘arma deb yuritiladi) mablag‘larini shakllantirish va foydalanish tartibini belgilaydi.

1. Jamg‘arma fundamental, amaliy tadqiqotlar va innovatsiya ishlari ilmiy-texnik dasturlari loyihalarini budjet mablag‘lari hisobiga amalga oshirish uchun kalendar yilda moliyalashtirishga erishgan ilmiy-tadqiqot, ta’lim muassasalari hamda ilmiy-texnik dasturlarni bajaruvchi-tashkilotlarda (bundan keyingi o‘rinlarda — bajaruvchi-tashkilotlar deb yuritiladi) tashkil qilinadi.

2. Jamg‘arma mablag‘lari ilmiy-texnik dasturlar bo‘yicha loyihalarni amalga oshirishga aniq mehnat va ilmiy hissasini qo‘shgan alohida farqlangan ilmiy xodimlarni ularga bir martalik mukofot belgilash yo‘li bilan moddiy rag‘batlantirishga yo‘naltiriladi.

3. Jamg‘arma mablag‘lari hisobidan tayinlangan bir martalik mukofotlarning summasi ularga qonunchilik tomonidan o‘rnatilgan tartibda yagona ijtimoiy to‘lovni hisoblash yo‘li bilan bajaruvchi-tashkilotlarning mehnatga haq to‘lash umumiy fondiga kiritiladi.

Jismoniy shaxslarning jamg‘arma mablag‘lari hisobidan olgan daromadlarini soliqqa tortish o‘rnatilgan tartibda amalga oshiriladi.

4. Fundamental, amaliy tadqiqotlar va innovatsiya ishlarining ilmiy-texnik dasturlarini amalga oshirishda qatnashuvchi bajaruvchi-tashkilotlar uchun kalendar yilda ko‘zda tutilgan mehnatga haq to‘lash jamg‘armasining 5 foizi miqdoridagi budjet mablag‘lari Jamg‘arma mablag‘larini shakllantirish manbaalari hisoblanadi. Shu bilan birga faqat ilmiy-texnik dasturlarni amalga oshirish uchun ajratiladigan budjet mablag‘lari hisobidan shakllantiriladigan mehnatga haq to‘lash fondi hisobga olinadi.

5. Xodimlarga bir martalik mukofotlarni tayinlash va to‘lash yillik ish natijalari bo‘yicha, odatda joriy yilning dekabr oyida amalga oshiriladi.

6. Bir martalik mukofotlarni tayinlash va to‘lash kalendar yil uchun Jamg‘armada ko‘zda tutilgan mablag‘lar chegarasida amalga oshiriladi.

7. Hisobot yilining oxirgi ish kuni yakunida foydalanilmagan jamg‘arma mablag‘lari Respublika budjetiga qaytarilishi shart.

8. Ilmiy xodimlarga bir martalik mukofotlar to‘lash to‘g‘risidagi qaror bajaruvchi-tashkilot qoshidagi ilmiy kengash yoki bunga mutasaddi bo‘lgan kollegial organ (bundan keyingi o‘rinlarda Ilmiy kengash deb yuritiladi) tomonidan qabul qilinadi.

9. Ilmiy kengashning bir martalik mukofotlar to‘lash to‘g‘risidagi qarori kengash a’zolari yig‘ilishidagi ishtirokchilar sonidan kelib chiqib, ochiq muhokama qilish sharoitida oddiy ko‘pchilik ovoz bilan qabul qilinadi. Agar uning qabul qilinishida ilmiy kengash a’zolarining kamida uchdan ikki qismi ishtirok etgan bo‘lsa, qaror kuchga ega hisoblanadi.

Ilmiy kengashning a’zosi hisoblanadigan ilmiy xodimni mukofotlash masalasini ko‘rib chiqishda u to‘g‘risidagi qaror o‘sha xodim ovozini hisobga olmagan holda qabul qilinadi.

Bajaruvchi-tashkilotdagi rahbar xodimlarni bir martalik mukofotlash agar ular ilmiy-texnik dasturni amalga oshirishda ilmiy xodim sifatida qatnashgan bo‘lsalargina amalga oshiriladi.

10. Ilmiy xodimlarga bir martalik mukofot bajaruvchi-tashkilotdagi rahbarning buyrug‘i bilan ilmiy kengashning qarori asosida belgilanadi.

11. Ilmiy xodimlarni mukofotlash uchun asosiy ko‘rsatkichlar bo‘lib ilmiy-texnik dasturlarni ishlab chiqish doirasida ular erishgan alohida natijalar va ularning aniq qo‘shgan hissasining darajasi hisoblanadi, shu qatorda:

yangi yirik ilmiy natijalarga erishishda (yangi qonuniyatlar, effektlar, hodisalarni kashf qilish va boshqalar);

yangi salmoqli amaliy natijalarga erishishda (yangi materiallar, texnologiyalar, uskunalar, mashinalar, qurilmalar va boshqalar);

yuqorida aytilgan tadqiqot natijalarini iqtisodiyot tarmog‘ida amalda joriy qilishda;

olingan ilmiy natijalar xalqaro tan olinganida (olingan ilmiy natijalarning tan olingani xalqaro nashriyotlarda chop etilishi, olingan ilmiy natijalar bo‘yicha xalqaro patentlarni olish).

12. Ilmiy-texnik dasturlarni amalga oshirishda qatnashadigan bajaruvchi-tashkilotlar sanab o‘tilgan asosiy ko‘rsatkichlar asosida va o‘z faoliyatining xususiyatlaridan kelib chiqib u yoki bu ko‘rsatkichlarning salmog‘ini aniqlash, ularni aniq detallashtirish va miqdoriy baholashda individual yondashuvga amal qilinishini ta’minlaydilar.

13. Bajaruvchi-tashkilotlarning ilmiy xodimlarini bir martalik mukofotlash mazkur Nizomning 11-bandida ko‘zda tutilgan ko‘rsatkichlarga mosligiga qarab 2 dan 5 gacha bazaviy lavozim maoshi miqdorida ularga mukofot to‘lash yo‘li bilan amalga oshiriladi.

14. Ilmiy xodimga to‘lanadigan mukofotning aniq miqdori bajaruvchi-tashkilotning ilmiy kengashi qarori bilan belgilanadi.

15. Jamg‘arma hisobidan bir martalik mukofotlar to‘lashni belgilashning obyektivligi va to‘g‘riligi uchun Ilmiy kengashlar raislari javobgar hisoblanadi.

16. Jamg‘arma mablag‘laridan maqsadli foydalanilishini tekshirish qonunchilik bilan o‘rnatilgan tartibda amalga oshiriladi.