Namangan viloyati sanoatining salohiyatini, birinchi navbatda, tayyor mahsulot ishlab chiqarish uchun qishloq xoʻjaligi xomashyosi va mineral xomashyoni sanoat yoʻli bilan chuqur qayta ishlash, zamonaviy yuqori texnologiyali ishlab chiqarishlarni jadal rivojlantirish negizida yanada rivojlantirish, shu asosda aholining ish bilan bandligini va daromadlarini oshirish maqsadida Vazirlar Mahkamasi qaror qiladi:

1. Quyidagilar Namangan viloyati sanoatini istiqbolli rivojlantirishning eng muhim yoʻnalishlari hisoblansin:

neft-gaz, avtomobil, elektrotexnika sanoati va temir yoʻllar uchun materiallar, xomashyo, butlovchi buyumlar va asbob-uskunalarning yuqori texnologiyali, shu jumladan mahalliylashtiradigan ishlab chiqarishlarini tashkil etish;

birinchi navbatda tayyor ip-gazlama, trikotaj polotno, tayyor tikuv va trikotaj buyumlari ishlab chiqaradigan toʻqimachilik va tikuvchilik sanoati korxonalarini rivojlantirish;

pillani yetishtirish va dastlabki qayta ishlashdan boshlab zamonaviy ipak va aralash matolar, shuningdek tayyor mahsulot ishlab chiqarishni oʻz ichiga oladigan ipakchilik sanoatini keng rivojlantirish;

qishloq xoʻjaligi mahsulotlarini, shu jumladan meva-sabzavot va goʻsht, sut mahsulotlarini sanoat yoʻli bilan qayta ishlash, qoramollar va qoʻy-echkilar terisi va junini qayta ishlash;

birinchi navbatda, mahalliy xomashyo bazasida qurilish materiallari, shuningdek zamonaviy tom yopish va pardozlash qurilish materiallari ishlab chiqarish.

2. Oʻzbekiston Respublikasi Prezidentining 2009-yil 6-iyuldagi F-3215-son farmoyishiga muvofiq tashkil etilgan Ishchi komissiya tomonidan Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi, Namangan viloyati hokimligi, boshqa manfaatdor vazirliklar va idoralar bilan birgalikda ishlab chiqilgan 2009 — 2012-yillarda Namangan viloyatida sanoatni rivojlantirish va ishlab chiqarishni modernizatsiya qilish dasturi maʼqullansin. Dastur quyidagilarni oʻz ichiga oladi:

2009 — 2012-yillarda Namangan viloyatida sanoat mahsuloti ishlab chiqarishni koʻpaytirish dasturi 1-ilovaga* muvofiq;

nooziq-ovqat tovarlari ishlab chiqarish boʻyicha ishlayotgan quvvatlarni kengaytirish va yangi quvvatlar tashkil etishning aniq yoʻnaltirilgan dasturi 2-ilovaga* muvofiq;

qishloq xoʻjaligi mahsulotlari yetishtirish, ularni qayta ishlash va saqlash boʻyicha ishlayotgan quvvatlarni kengaytirish va yangi quvvatlar tashkil etishning aniq yoʻnaltirilgan dasturi 3-ilovaga* muvofiq;

ularning bazasida qurilish materiallari ishlab chiqarish tashkil etiladigan mineral xomashyo konlari roʻyxati 4-ilovaga* muvofiq;

yangi loyihalarni tashkil etishning aniq yoʻnaltirilgan dasturi va xorijiy investitsiyalarni jalb etgan holda yangi korxonalar tashkil etish topshiriqlari 5 va 5.1-ilovalarga* muvofiq;

istiqbolli sanoat korxonalarini texnik jihatdan modernizatsiya qilish va moliyaviy sogʻlomlashtirish tadbirlari 6-ilovaga* muvofiq;

kooperatsiyalashgan yetkazib berishlar asosida ishlab chiqarish hajmini kengaytirgan holda yirik sanoat korxonalarida xomashyo, materiallar, butlovchi buyumlar va asbob-uskunalar ishlab chiqarishni mahalliylashtirish parametrlari 7-ilovaga* muvofiq;

2009 — 2012-yillarda tarmoqlar va tumanlar boʻyicha yangi ish oʻrinlari tashkil etish parametrlari 8, 8.1 — 8.4-ilovalarga* muvofiq;

2009 — 2012-yillarda ish bilan band boʻlmagan aholini jalb etishning asosiy yoʻnalishlari boʻyicha yangi ish oʻrinlari tashkil qilish parametrlari 9, 9.1 — 9.4-ilovalarga* muvofiq.

3. 2009 — 2012-yillarda Namangan viloyatida sanoatni rivojlantirish dasturini ishlab chiqish boʻyicha Ishchi komissiyaga (R.S. Azimov) vazirliklar, idoralar, xoʻjalik birlashmalari, mahalliy davlat hokimiyati organlarining ushbu qaror bilan tasdiqlangan Dasturda nazarda tutilgan tadbirlarning belgilangan muddatlarga muvofiq amalga oshirilishi bilan bogʻliq faoliyatini muvofiqlashtirish funksiyasi yuklansin.

4. Namangan viloyati hokimligi, 2009 — 2012-yillarda Namangan viloyatida sanoatni rivojlantirish va ishlab chiqarishni modernizatsiya qilish dasturi amalga oshirilishi uchun masʼul boʻlgan vazirliklar, idoralar, xoʻjalik birlashmalari, tijorat banklari:

oʻn kun muddatda — Dastur parametrlarining viloyatdagi barcha tumanlarga va Namangan shahriga, shuningdek manfaatdor tashkilotlar va korxonalarga aniq tarzda yetkazilishini taʼminlasinlar;

Investitsiya loyihalarini amalga oshirish, ishlab chiqarishning moʻljallangan hajmlari oʻzlashtirilishi va ish oʻrinlari tashkil etilishi boʻyicha Dastur parametrlari soʻzsiz bajarilishini taʼminlasinlar;

barcha parametrlar boʻyicha Dastur parametrlari bajarilishi monitoringi olib borilishini tashkil etsinlar va ijro etuvchilar sifatida Dasturga kiritilgan korxonalarning muammoli masalalarini har oʻn kunda koʻrib chiqsinlar, ularni hal etish yuzasidan zarur tezkor va amaliy chora-tadbirlar koʻrsinlar;

Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Davlat mulki qoʻmitasi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan birgalikda samarasiz foydalanilayotgan va faoliyat koʻrsatmayotgan quvvatlar, bankrot korxonalar, shuningdek foydalanilmayotgan ishlab chiqarish hududlari negizida, shu jumladan xorijiy investitsiyalarni jalb etgan holda, yangi ishlab chiqarishlar tashkil etish ishlarini davom ettirsinlar;

har chorakda Ishchi komissiyaga Dasturning bajarilishi toʻgʻrisida axborot taqdim etsinlar.

5. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirishni taʼminlash boʻyicha Idoralararo maxsus komissiya (R.S. Azimov) 7-ilovada koʻrsatilgan loyihalarni Mahalliylashtirish dasturiga belgilangan tartibda kiritsin.

6. “Oʻzbekneftgaz” milliy xolding kompaniyasi, “Oʻzavtosanoat” aksiyadorlik kompaniyasi, “Oʻzbekiston temir yoʻllari” davlat-aksiyadorlik kompaniyasi, “Oʻzeltexsanoat” uyushmasi, Oʻzbekiston Respublikasi Tashqi iqtisodiy faoliyat milliy banki, boshqa manfaatdor vazirliklar va idoralar Namangan viloyati hokimligi bilan birgalikda bir oy muddatda 2009 — 2012-yillarda Namangan viloyatida sanoatni rivojlantirish va ishlab chiqarishni modernizatsiya qilish dasturiga kiritilgan loyihalarning loyiha hujjatlarini ishlab chiqish va amalga oshirishning tarmoq jadvallarini belgilangan tartibda tasdiqlasinlar.

7. Vazirlar Mahkamasi komplekslarining rahbarlari, Namangan viloyati hokimligi, manfaatdor xoʻjalik birlashmalari Dasturga kiritilgan investitsiya loyihalarini amalga oshirishda qatnashuvchi korxonalarga rahbarlik lavozimlarini kasb boʻyicha tayyorlangan, tajribali, birinchi navbatda, qoʻyilgan vazifalarning bajarilishini taʼminlashga qodir boʻlgan mahalliy kadrlar bilan taʼminlashda, shuningdek ularning malakasini oshirishni tizimli asosda tashkil etishda koʻmaklashsinlar.

8. Namangan viloyati hokimligi:

bir oy muddatda — Oʻzbekiston Respublikasi Davlat geologiya qoʻmitasiga mahalliy xomashyo negizida qurilish materiallari ishlab chiqarishni tashkil etuvchi korxonalar tomonidan 4-ilovaga muvofiq konlarda foydali qazilmalarni qazib chiqarish uchun yer osti uchastkalaridan foydalanish hamda 10-ilovaga* muvofiq uchastkalarda geologiya-qidiruv ishlarini oʻtkazish huquqiga litsenziyalar olish uchun zarur boʻlgan hujjatlar paketlarining taqdim etilishini va litsenziyalar olingan taqdirda yer uchastkalarining oʻz vaqtida ajratilishini taʼminlasin;

ikki oy muddatda — parrandalar oʻstirish hamda parranda goʻshti va tuxum yetishtiruvchi korxonalarga chorva ozuqasi yetishtirish uchun zarur yer uchastkalarini belgilangan tartibda ajratsin;

uch oy muddatda — “Vodiy ipagi” masʼuliyati cheklangan jamiyatga pilla yetkazib beruvchilar uchun xomashyo bazasi yaratish maqsadida tut koʻchatlari ekish uchun 10 gektardan kam boʻlmagan yer uchastkasi ajratsin;

Oʻzbekiston Respublikasi Davlat geologiya qoʻmitasi va “Oʻzqurilishmateriallari” aksiyadorlik kompaniyasi bilan birgalikda uch oy muddatda Vazirlar Mahkamasiga konlar va istiqbolli maydonlarning xomashyo negizida qurilish materiallarining yangi korxonalarini tashkil etish boʻyicha takliflar taqdim etsin.

9. “Oʻzulgurjisavdoinvest” uyushmasi aholini va meva-sabzavot mahsulotlarini qayta ishlovchi korxonalarni barqaror taʼminlash uchun xomashyo bazasi yaratish maqsadida:

2010-yilning 1-iyuligacha boʻlgan muddatda — mahsulot saqlash quvvatini 6100 tonnagacha yetkazgan holda “Namangan goʻsht sut savdo” aksiyadorlik jamiyatining sovitiladigan omborlaridagi meva-sabzavot saqlash joylarini bosqichma-bosqich rekonstruksiya qilishni;

2011-yilning 1-iyuligacha boʻlgan muddatda — Yangiqoʻrgʻon tumanidagi “J. Oxunov — Sh. Yulduzi” hamda “Tiklanish — Nanay bogʻbonlari” agrofirmalari binolari negizida mahsulot saqlash quvvati 4000 tonnagacha boʻlgan meva-sabzavot saqlash ombori qurilishini va foydalanishga topshirilishini taʼminlasin.

“Agrobank” aksiyadorlik-tijorat banki “Oʻzulgurjisavdoinvest” uyushmasiga — ishlayotgan meva-sabzavot saqlash omborlarini rekonstruksiya qilish va yangi omborlar tashkil etish uchun, shuningdek “Mevasabzavottayyorlovsavdo” masʼuliyati cheklangan jamiyatga — meva-sabzavot omborlarini rekonstruksiya qilish va zamonaviy sovitish uskunalari bilan jihozlash uchun Oʻzbekiston Respublikasi Markaziy bankining qayta moliyalashtirish stavkasidan oshmaydigan stavka boʻyicha kredit berishda belgilangan tartibda koʻmaklashsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

2009 — 2012-yillarda Namangan viloyatida sanoatni rivojlantirish va ishlab chiqarishni modernizatsiya qilish dasturining amalga oshirilishi har chorakda Vazirlar Mahkamasi Prezidiumi majlisida koʻrib chiqilsin.