Fuqarolik holati dalolatnomalarini yozish organlari faoliyatini takomillashtirish, ish sifatini yaxshilash maqsadida hamda O‘zbekiston Respublikasi Prezidentining 2011-yil 23-avgustdagi PQ-1602-son qarori bilan tasdiqlangan O‘zbekiston Respublikasi Adliya vazirligi to‘g‘risida nizomga asosan buyuraman:

1. Quyidagilar:

“Tug‘ilganlik haqida dalolatnoma yozuvining shakli” 1-ilovaga muvofiq;

“Nikoh tuzilganligi haqida dalolatnoma yozuvining shakli” 2-ilovaga muvofiq;

“Nikohdan ajralganlik haqida dalolatnoma yozuvining shakli” 3-ilovaga muvofiq;

“O‘lim haqida dalolatnoma yozuvining shakli” 4-ilovaga muvofiq;

“Fuqarolik holati dalolatnoma yozuvlarini to‘ldirish qoidalari” 5-ilovaga muvofiq tasdiqlansin.

2. Mazkur buyruq davlat ro‘yxatiga olinsin va bu haqda O‘zbekiston Respublikasi vazirliklari, davlat qo‘mitalari va idoralari normativ-huquqiy hujjatlarining Davlat reyestriga tegishli yozuv kiritilsin.

3. Qonun hujjatlarini turkumlash va huquqiy axborot boshqarmasi (D. Sa’dullayev) hamda Notariat, FHDY va advokatura boshqarmasi (D. Yakubova) ushbu normativ-huquqiy hujjatni 10 kun muddat ichida barcha manfaatdor shaxslarga yetkazilishini va “O‘zbekiston Respublikasi qonun hujjatlari to‘plami” — “Sobraniye zakonodatelstva Respubliki Uzbekistan”da nashr etilishini ta’minlasin.

4. Notariat, FHDY va advokatura boshqarmasi (D. Yakubova) 2009-yil noyabr-dekabr oylarida FHDY organlari xodimlari bilan dalolatnoma yozuvlarini to‘g‘ri to‘ldirish masalasida seminar o‘tkazsin.

5. Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalari 2009-yil yakuniga qadar tegishli shaharcha, qishloq va ovullardagi fuqarolar yig‘inlari raislari (oqsoqollari) bilan dalolatnoma yozuvlarini to‘g‘ri to‘ldirish masalasida seminar mashg‘ulotlari o‘tkazsin.

6. Ushbu buyruq 2010-yil 1-yanvardan kuchga kiradi.

7. Mazkur buyruq ijrosini nazorat qilish vazir o‘rinbosari E. Kanyazov zimmasiga yuklatilsin.

Mazkur Qoidalar fuqarolik holati dalolatnoma yozuvlarini (bundan keyingi o‘rinlarda dalolatnoma yozuvlari deb yuritiladi) to‘ldirish tartibini belgilaydi.

1. Dalolatnoma yozuvlari ikki nusxada tuziladi.

Dalolatnoma yozuvlarining har bir turi har yilning 1-yanvaridan 31-dekabrigacha tartib bilan ketma-ket raqamlanadi.

2. Dalolatnoma yozuvlari davlat tilida tushunarli va chiroyli dastxat bilan yoki kompyuter orqali to‘ldiriladi. Dalolatnoma yozuvlari standart varaqda (A4 formatdagi qog‘oz) har bir bet hoshiyasi: yuqoridan va pastdan 2 sm, chapdan va o‘ngdan 3 sm bo‘lishi lozim.

3. Dalolatnoma yozuvlarining barcha ustunlari qisqartirishlarsiz va to‘liq (umumiy qabul qilinganlaridan tashqari) to‘ldirilishi kerak. Dalolatnoma yozuvlarini dastxat bilan to‘ldirishda siyoh rang ishlatilishi lozim.

Dalolatnoma yozuvlari xatosiz to‘ldiriladi. Ulardagi so‘zlarni bo‘yash, o‘chirish va chizish yo‘li bilan tuzatish man etiladi.

4. Dalolatnoma yozuvlari raqami katakchalariga dalolatnoma yozuvining raqami yoziladi. Uni qayd etish kuni, yili raqam bilan oyi esa, so‘zlar bilan to‘ldiriladi va fuqarolik holati dalolatnomalarini yozish organining (bundan keyingi o‘rinlarda FHDY organi deb yuritiladi) shtampi qo‘yiladi.

5. Dalolatnoma yozuvlarining “Tug‘ilgan joyi”, “Doimiy yashash joyi”, “O‘lgan joyi” ustunlaridagi “davlat”, “viloyat, shahar”, “tuman, shahar”, “shaharcha, qishloq, ovul” nomlari to‘liq yoziladi.

Tegishliligiga qarab “viloyat, shahar”, “tuman, shahar” va “shaharcha, qishloq, ovul” so‘zlaridan birining tagi chiziladi.

6. Dalolatnoma yozuvlaridagi “Tug‘ilgan sanasi” ustuni fuqarolarning shaxsini tasdiqlovchi hujjatlari asosida to‘ldiriladi. Kun, oy va yil raqam bilan yoziladi.

7. Dalolatnoma yozuvlarining “Millati” ustuni shaxsni tasdiqlovchi hujjatlar asosida to‘ldiriladi.

Chet el fuqarolariga nisbatan dalolatnoma yozuvlari qayd etilayotganda millatidan tashqari qaysi davlat fuqarosi ekanligi ham ko‘rsatiladi. Millati haqida ma’lumot bo‘lmagan taqdirda fuqaroligi to‘g‘risidagi ma’lumot yoziladi.

8. Dalolatnoma yozuvlarining “Fuqaroligi” ustuniga qaysi davlat fuqaroligiga mansubligi ko‘rsatiladi. Shaxsning fuqaroligi bo‘lmasa, mazkur ustunga “fuqaroligi yo‘q” deb yozib qo‘yiladi.

9. Dalolatnoma yozuvlarining “Qayerda va kim bo‘lib ishlaydi” ustunida korxona, muassasa va tashkilotning to‘liq nomi hamda lavozimi ko‘rsatiladi.

Yoshga doir pensiyada bo‘lgan shaxslarga nisbatan “pensioner”, harbiy xizmatchilarga nisbatan “harbiy xizmatchi” deb yozib qo‘yiladi. Nogironlik pensiyasidagi shaxslarga nisbatan “pensioner” deb, qaysi guruh nogironligi ko‘rsatiladi.

10. Dalolatnoma yozuvlaridagi “Ma’lumoti” ustuni ariza beruvchining ko‘rsatmasi asosida to‘ldiriladi.

Oliy ta’lim muassasasini tugatgan shaxslar uchun “oliy”, oliy ta’lim muassasasini tugatmagan shaxslar uchun “to‘liqsiz oliy”, akademik litsey yoki kasb-hunar kollejini tugatgan shaxslar uchun “o‘rta maxsus, kasb-hunar”, umumiy o‘rta ta’lim muassasasini (I — IX sinflar) tugatgan shaxslar uchun “umumiy o‘rta”, umumiy o‘rta ta’lim muassasasini tugatmagan shaxslar uchun “to‘liqsiz o‘rta” va ma’lumoti bo‘lmagan shaxslar uchun “ma’lumotsiz” so‘zlarining tagi chiziladi.

11. Dalolatnoma yozuvlaridagi “Berilgan guvohnoma” ustuniga berilgan gerbli guvohnomaning seriyasi va raqami yoziladi.

12. Dalolatnoma yozuvlaridagi “Belgilar uchun” ustuniga takroriy berilgan guvohnomaning seriyasi, raqami, berilgan kun, oy va yil hamda guvohnoma bergan FHDY organi xodimining familiyasi yozilib, imzolanadi.

13. Agar dalolatnoma yozuviga o‘zgartirish, tuzatish, qo‘shimchalar kiritilganda kun, oy, yil yoziladi hamda dalolatnoma yozuvining qaysi ustunlariga va qanday asosga ko‘ra kiritilganligi izohlanib, berilgan guvohnomaning seriyasi va raqami ko‘rsatiladi.

O‘zgartirish, tuzatish, qo‘shimcha kiritgan FHDY organi xodimining familiyasi yozilib, imzolanadi va muhrlanadi.

14. Dalolatnoma yozuvi to‘ldirilgandan so‘ng FHDY organi mudiri va inspektor tomonidan ularning familiyalari yozilib imzolanadi va gerbli muhr bilan tasdiqlanadi.

15. 1-3-ustunlarda tug‘ilgan bolaning familiyasi, ismi, ota ismi yoziladi.

16. “4. Jinsi” ustunida tegishliligiga qarab “erkak”, “ayol” yoki “noma’lum” so‘zlaridan birining tagi chiziladi.

17. “5. Tug‘ilgan sanasi, vaqti, vazni va bo‘yi” ustunida bolaning tug‘ilgan kuni, oyi, yili, soati va daqiqasi raqam bilan yoziladi, vazni va bo‘yi tibbiyot ma’lumotnomasi asosida to‘ldiriladi.

6-ustunning “Doimiy ro‘yxatga quyiladigan joyi” qatori mazkur Qoidalarning 5-bandiga muvofiq (ota yoki onaning og‘zaki ko‘rsatmasiga asosan) to‘ldiriladi.

18. “7. Nechta bola tug‘ildi” ustunida tug‘ilgan bolaning (bolalarning) soni raqam bilan yoziladi. Agar ona ko‘p homilali bo‘lsa, unda tirik tug‘ilgan bolalarning soni yoziladi.

19. 8-ustunda “tirik” yoki “o‘lik” so‘zlaridan birining tagi chiziladi. Bittadan ortiq tug‘ilgan bolalardan biri o‘lik, qolgani tirik bo‘lsa, har bir bolaga alohida dalolatnoma yozuvi qayd etiladi va dalolatnoma yozuvi raqami chiziqcha orqali, ya’ni quyidagi tartibda ko‘rsatiladi.

20. “9. Onaning nechanchi bolasi” ustunida onaning ilgari tug‘ilgan bolalari va vafot etgan bolalari ham hisobga kiritilib, raqam bilan yoziladi. O‘lik tug‘ilganlar hisobga kiritilmaydi. Ikkita yoki undan ortiq bolalar tug‘ilganda dalolatnoma yozuvlari tartib bilan ro‘yxatga olinadi.

21. “10. Tibbiy ma’lumotnoma” ustunida tibbiy ma’lumotnomaning raqami, berilgan kuni, oy va yili raqam bilan yoziladi.

Tibbiy ma’lumotnoma bergan tibbiyot muassasasining nomi to‘liq yoziladi.

22. 11 — 17, 20-ustunlar qonuniy nikohda turgan ota-onadan tug‘ilgan bola ota-onasining shaxsini tasdiqlovchi hujjatlar (pasport, harbiy guvohnoma) va nikoh tuzilganligi to‘g‘risidagi guvohnoma asosida, nikoh tuzilganligi haqidagi guvohnoma taqdim etilmaganda avvalgi bolalarining tug‘ilganligi to‘g‘risidagi dalolatnoma yozuvlari asosida to‘ldiriladi.

Ota-onalardan birining shaxsini tasdiqlovchi hujjati bo‘lmagan hollarda FHDY organi tug‘ilganlikni qayd etishni rad qilishi mumkin emas.

23. Bola yolg‘iz (nikohda bo‘lmagan) onadan tug‘ilganida ota ustuni onaning ko‘rsatmasiga asosan to‘ldiriladi.

Agar ota-onalari o‘rtasida nikoh qayd etilmagan bo‘lsa (tug‘ilganlikni qayd etishda otasi ishtirok etmagan taqdirda) bolaning otasi haqidagi yozuv onaning notarial yoki tibbiy muassasa tomonidan tasdiqlangan arizasi bo‘yicha amalga oshiriladi.

24. “20. Otasi haqida ma’lumotni yozish uchun asos” ustunining:

“a) nikoh qachon va qayerda qayd etilgan” bandida ota-onaning nikoh tuzilganligi to‘g‘risidagi guvohnomasiga asosan nikoh tuzilganligi to‘g‘risidagi dalolatnoma yozuvining raqami, qayd etilgan kuni, oy va yili raqam bilan hamda FHDY organining nomi to‘liq yoziladi;

Nikoh boshqa davlatda qayd etilgan bo‘lsa, uni qayd etgan organning nomi yoziladi.

“b) otalikni belgilash to‘g‘risida ariza” bandida arizaning ro‘yxatga olingan (kirim) tartib raqami, kun, oy va yili raqam bilan to‘ldiriladi;

“v) onaning arizasi” bandida yolg‘iz ona arizasining ro‘yxatga olingan (kirim) raqami, kun, oy, yili va pasport ma’lumotlari raqam bilan to‘ldiriladi.

25. “21. Ariza bilan murojaat qilgan shaxsning F.I.O., manzili va imzosi (aloqadorligi)” ustunida tug‘ilganlikni qayd ettirish uchun murojaat etgan shaxsning familiyasi, ismi, otasining ismi va yashash manzili ariza muallifining og‘zaki ko‘rsatmasiga asosan to‘liq, qisqartirishlarsiz yoziladi va ariza muallifi tomonidan imzolanadi.

26. 1—3-ustunlarda nikohlanuvchilarning shaxsini tasdiqlovchi hujjat (pasport, harbiy guvohnoma) asosida nikohgacha va nikohdan keyingi familiyasi, ismi, otasining ismi qisqartirishlarsiz ko‘rsatiladi.

27. “Nikohdan keyingi familiyasi” qatori nikohlanuvchilarning o‘z xohishlariga ko‘ra nikohga kirish haqidagi arizalari asosida to‘ldiriladi.

28. “5. Yoshi” ustuniga nikohlanuvchilarning yoshi nikoh qayd etiladigan kun, oy va yilga qarab belgilangan holda to‘ldiriladi.

Agar nikoh qayd etiladigan oy nikohlanuvchilarning tug‘ilgan oyidan keyin bo‘lsa (tug‘ilgan oy bilan nikoh belgilangan oy bir bo‘lsa, kuniga qarab belgilanadi) ularning yoshi qayd etiladigan yil bilan tug‘ilgan yil o‘rtasidagi farqqa teng bo‘ladi.

Agar nikoh qayd etiladigan oy nikohlanuvchilarning tug‘ilgan oyidan oldin bo‘lsa, unda ularning yoshi nikoh qayd etiladigan yil bilan tug‘ilgan yil o‘rtasidagi farqdan bir yilga kam bo‘ladi.

29. “11. Oilaviy ahvoli” ustunida “nikohda bo‘lmagan”, “beva”, “tul” yoxud “ajrashgan” so‘zlaridan birining tagi chiziladi.

30. “12. Umumiy farzandlar to‘g‘risida ma’lumot” ustunida nikohlanuvchilarning umumiy farzandi bo‘lsa, tug‘ilganlik to‘g‘risidagi guvohnoma asosida farzandining familiyasi, ismi, tug‘ilgan sanasi, tug‘ilganligini qayd etgan FHDY organining nomi, qayd etilgan sanasi, dalolatnoma yozuvining raqami yoziladi.

Umumiy farzandlari ikki yoki undan ortiq bo‘lgan hollarda, ulardan faqat birining ma’lumotlari ko‘rsatilib, qolganlarining soni yoziladi.

Umumiy farzandlari bo‘lmasa “yo‘q” deb yoziladi.

31. “13. Doimiy yashash joyi” ustuni nikohlanuvchi shaxslarning shaxsini tasdiqlovchi hujjatlari asosida to‘ldiriladi.

32. “14. Taqdim etilgan hujjatlar” ustuni nikohlanuvchilarning shaxsini tasdiqlovchi hujjatlari bo‘yicha to‘ldiriladi va ularning seriyasi, raqami, qachon va kim tomonidan berilganligi ko‘rsatiladi.

33. 15-ustun bilan nikohlanuvchilar tanishtiriladi.

34. “16. Nikohga kiruvchilarning nikohgacha familiyasi va imzosi” ustunida nikohlanuvchilarning nikohgacha bo‘lgan familiyalari yoziladi va nikohlanuvchilar tomonidan imzolanadi.

35. “17. Guvohlarning familiyasi va imzosi” ustuni nikohlanuvchilarning istaklariga binoan guvohlar ishtirokida nikoh qayd etilganda guvohlarning familiyalari yozilib imzolanadi.

36. “19. Belgilar uchun” ustunida quyidagilardan biri ko‘rsatiladi:

ilgari nikohda bo‘lgan shaxsning avvalgi nikohi bekor qilinganligini tasdiqlovchi hujjat;

nikohdan ajralganlik haqidagi guvohnoma;

sudning nikohdan ajratish haqidagi hal qiluv qarori;

nikohni haqiqiy emas deb topish to‘g‘risidagi hal qiluv qarori;

er (xotin)ning o‘limi haqidagi guvohnoma.

Shuningdek, mazkur ustunda nikohdan ajralganlik va o‘lim haqidagi guvohnomalar qayd etilgan sana, dalolatnoma yozuvining raqami va qaysi FHDY organida ro‘yxatga olinganligi ko‘rsatiladi. Sudning qonuniy kuchga kirgan qarorining sanasi va qaysi sud tomonidan chiqarilganligi ko‘rsatiladi.

37. 1—3-ustunlarda nikohdan ajralish to‘g‘risidagi ariza bilan murojaat qilgan shaxslarning shaxsini tasdiqlovchi hujjatlar (pasport, harbiy guvohnoma) asosida familiyasi, ismi, ota ismlari qisqartirishlarsiz ko‘rsatiladi.

38. “Nikohdan ajralgandan keyingi familiyasi” qatori er yoki xotindan birining nikohgacha bo‘lgan familiyasiga qaytish to‘g‘risida nikohdan ajralish haqidagi arizasida ko‘rsatilishi bo‘yicha to‘ldiriladi.

Sudning 1998-yil 1-sentabrigacha qonuniy kuchga kirgan qarori bo‘yicha nikohdan ajralishni qayd etish haqida er-xotindan biri FHDY bo‘limiga murojaat qilgan paytda FHDY organiga kelmagan er yoki xotinning “Nikohdan ajralgandan keyingi familiyasi” qatori to‘ldirilmaydi.

39. “5. Yoshi” ustuniga nikohdan ajralayotganlarning yoshi (nikohdan ajralganlik qayd etilayotgan kun, oy va yilga qarab) yoziladi.

Agar nikohdan ajralishni qayd etiladigan oy nikohdan ajraluvchilarning tug‘ilgan oyidan keyin bo‘lsa (tug‘ilgan oy bilan nikohdan ajratilishi belgilangan oy bir bo‘lsa, kuniga qarab belgilanadi), ularning yoshi qayd etiladigan yil bilan tug‘ilgan yil o‘rtasidagi farqqa teng bo‘ladi.

Agar nikohdan ajralganlik qayd etiladigan oy nikohdan ajraluvchilarning tug‘ilgan oyidan oldin bo‘lsa, ularning yoshi nikohdan ajralish qayd etiladigan yil bilan tug‘ilgan yil o‘rtasidagi farqdan bir yilga kam bo‘ladi.

40. “11. Nechanchi nikohi” ustunida nikohdan ajraluvchilarning nechanchi nikohi ekanligiga qarab “birinchi”, “ikkinchi”, “uchinchi va undan ortiq” so‘zlaridan birining tagi chiziladi.

41. “12. Ajratilayotgan nikoh” ustunida nikoh tuzilganligi to‘g‘risidagi dalolatnoma yozuvining raqami, kuni, oyi, yili raqam bilan to‘ldiriladi. Nikoh qaysi FHDY organida va qayerda qayd etilganligi to‘liq yoziladi.

42. “13. Dalolatnoma yozuvi uchun asos” ustunining:

“a” bandida er-xotinning birgalikda bergan arizasi, uning berilgan kuni, oy, yili va kirim raqami yoziladi;

“b” bandida nikohdan ajratish to‘g‘risida qaror chiqargan sudning to‘liq nomi, qaror chiqqan kun, oy, yil yoziladi;

“v” bandida fuqaroni bedarak yo‘qolgan yoki muomalaga layoqatsiz deb topgan sudning nomi va fuqaroning familiyasi, ismi va ota ismi, qaror chiqqan kun, oy, yili yoziladi;

“g” bandida fuqaroni ozodlikdan mahrum qilish to‘g‘risida hukm chiqargan sudning to‘liq nomi va fuqaroning familiyasi, ismi, ota ismi, hukm chiqqan kun, oy, yil yoziladi.

43. “14. 18 yoshga to‘lmagan umumiy bolalari soni” ustuni raqamlarda to‘ldiriladi. Agar bolalari bo‘lmasa, katakcha ichiga chiziq tortiladi va “yo‘q” deb yoziladi.

44. “15. Undirilgan davlat boji summasi va to‘langanligi to‘g‘risida belgi” ustunida to‘langan davlat bojining summasi, to‘lov qog‘ozining (patta) raqami va to‘langan kuni, oy, yili ko‘rsatiladi.

45. “16. Shaxsni tasdiqlovchi hujjatlar” ustuni nikohdan ajraluvchilarning shaxsini tasdiqlovchi hujjatlari (pasport yoki harbiy guvohnoma) bo‘yicha to‘ldiriladi.

46. “17. Ajraluvchilar imzosi” ustuni ajraluvchilar tomonidan imzolanadi.

47. 1—3-ustunlarda marhumning familiyasi, ismi, otasining ismi qisqartirishlarsiz yoziladi.

48. “4. Jinsi” ustunidagi “erkak” yoki “ayol” so‘zlaridan birining tagi chiziladi.

49. “5. Millati” ustuni marhumning shaxsini tasdiqlovchi hujjati bo‘yicha to‘ldiriladi.

Agar shaxsini tasdiqlovchi hujjati bo‘lmasa, chiziq tortiladi. Belgilar uchun ustuniga “pasport topshirilmadi” deb yozib qo‘yiladi.

50. “7. O‘lgan vaqti” ustunida o‘lim haqidagi tibbiy guvohnoma asosida marhumning vafot etgan sanasi (kun, oy va yil raqam bilan) ko‘rsatiladi.

51. “8. O‘lgan joyi” ustunida marhum vafot etgan joy nomi to‘liq yoziladi.

52. “9. O‘limning sababi” ustuni o‘lim haqidagi tibbiy guvohnoma asosida to‘ldiriladi.

53. “10. Tug‘ilgan sanasi va joyi” ustuni marhumning tug‘ilgan joyi va sanasi shaxsini tasdiqlovchi hujjati va(yoki) o‘lim haqidagi tibbiy guvohnoma asosida to‘ldiriladi. Bu ustunda davlat, viloyat, tuman, shahar, shaharcha, qishloq, ovul so‘zlarining tagi tegishligiga qarab chiziladi va nomlari to‘liq yoziladi.

54. “11. Yashagan joyi (manzili) va shaxsini tasdiqlovchi ma’lumotlar” ustunida vafot etgan shaxsning yashagan joyi shaxsini tasdiqlovchi hujjatlar bo‘yicha ko‘rsatiladi.

Pasport seriyasi, raqami, qachon va kim tomonidan berilganligi ko‘rsatiladi, agar pasport FHDY organiga taqdim etilmagan bo‘lsa, bu band to‘ldirilmasdan, chiziq tortiladi.

Shaxsni tasdiqlovchi hujjatlar taqdim etilmagan hollarda o‘lim haqidagi tibbiy guvohnoma asosida yoziladi.

16 yoshga to‘lmay vafot etganlarga nisbatan o‘limni qayd etish uning tug‘ilganlik haqidagi guvohnomasi asosida amalga oshiriladi, guvohnomaning seriyasi, raqami va dalolatnoma yozuvining raqami, qachon va qaysi FHDY organi tomonidan berilganligi yoziladi.

“Yoshi” katakchalarida marhumning yoshini to‘ldirishda marhumning vafot etgan oyi tug‘ilgan oyidan keyin bo‘lsa, yosh to‘liq hisoblanadi.

Agar marhumning vafot etgan oyi tug‘ilgan oyidan oldin bo‘lsa, unda marhumning yoshi (bir xil oylarda — kun), vafot etgan vaqti bilan tug‘ilgan vaqtidagi farq 1 (bir) yilga kam bo‘ladi.

Agar tug‘ilgan vaqti deb, tug‘ilgan kun va oyi ko‘rsatilmay, tasdiqlovchi hujjatlarda (pasport, harbiy guvohnoma) faqat yili ko‘rsatilgan bo‘lsa, tug‘ilgan vaqti bo‘lib, shu yilning 1-iyul kuni hisoblanadi.

Agar vafot etgan shaxsning tug‘ilgan kuni, oyi va yili noma’lum bo‘lsa yoki shaxsi aniqlanmaganlarning o‘limini qayd etishda tibbiy muassasaning xulosasida yoshi va tug‘ilgan joyi haqida ma’lumotlar bo‘lmasa 9-ustunga “noma’lum” deb yoziladi.

“Bir yoshgacha vafot etgan bola” katakchalariga tirik tug‘ilib, bir yoshga qadar vafot etgan bolalarning o‘limiga qadar necha oy, kun yashagani raqam bilan yoziladi.

“Nechanchi bolasi” katakchalarida tug‘ilgan bola (vafot etgan bolalari ham hisoblanadi, o‘lik tug‘ilganlari hisobga kirmaydi) nechanchi bolasi ekanligi raqam bilan ko‘rsatiladi.

“Onaning yoshi” katakchalarida yoshi raqam bilan to‘ldiriladi.

“Bir yoshgacha vafot etgan bola”, “Nechanchi bolasi”, “Onaning yoshi” katakchalari 1 yoshgacha vafot etgan bolalarga nisbatan to‘ldiriladi.

55. “12. Oilaviy ahvoli” ustunida “nikohda bo‘lmagan”, “beva”, “tul” yoxud “ajrashgan” so‘zlaridan birining tagi chiziladi.

56. “13. Ish joyi (qayerda va kim bo‘lib ishlagan)” ustunida vafot etgan shaxsning ish joyi va lavozimi yoziladi.

57. “15. O‘limni tasdiqlovchi hujjatlar” ustunida o‘lim haqidagi tibbiy guvohnomaning raqami, berilgan kuni, oyi va yili, kim tomonidan (tibbiyot muassasasining nomi) berilganligi to‘liq yoziladi.

“a” bandida o‘lim haqida tibbiy guvohnoma raqami va berilgan sanasi raqam bilan shifokorning familiyasi, ismi va ota ismi to‘liq yoziladi.

“b” bandida fuqaroni vafot etgan deb e’lon qilish haqida qaror chiqargan sudning nomi yoziladi va sanasi ko‘rsatiladi.

58. “16. Ariza bilan murojaat etgan shaxsning F.I.O, manzili yoki o‘lim haqida ariza bergan muassasaning nomi va manzili” ustunida murojaat etgan shaxsning familiyasi ismi va otasining ismi (muassasaning nomi), yashash manzili (joylashgan yeri), qarindoshligi (aloqadorligi) to‘liq yoziladi.

59. “18. Qabristonga va sug‘urta kassasiga topshirish uchun ma’lumotlarni olganligi to‘g‘risida belgi” ustuni o‘lim haqidagi guvohnomani, qabriston va sug‘urta kassasiga topshirish uchun ma’lumotnomalarni olgan shaxs tomonidan imzolanadi.

61. “19. Belgilar uchun” ustuniga noma’lum shaxs va shaxsi aniqlanmaganlarning o‘limi qayd etilganda “murdaning shaxsi aniqlanmagan”, “pasport” yoki “tug‘ilganlik haqidagi guvohnoma topshirilmadi”, tug‘ilib vafot etgan yoki 1 yoshgacha vafot etgan bolalarga “o‘lim haqidagi guvohnoma berilmagan”ligi haqida belgi quyiladi.

62. Dalolatnoma yozuvlari to‘ldirilgandan so‘ng ariza bilan murojaat qilgan shaxs tomonidan o‘qib chiqiladi va imzolanadi.

63. Mazkur Qoidalar O‘zbekiston Respublikasi Davlat statistika qo‘mitasi, Sog‘liqni saqlash vazirligi, Oliy va o‘rta maxsus ta’lim vazirligi va Xalq ta’limi vazirligi bilan kelishilgan.