Kichik biznes va xususiy tadbirkorlikni yanada rivojlantirish, Namangan viloyatining ishlab chiqarish va mehnat salohiyatidan yanada toʻliq foydalanish, yangi ish oʻrinlari tashkil etish, ichki bozorni mahalliy tovarlar va xizmatlar bilan toʻldirish, shu asosda aholi bandligi va daromadini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2009-yil 6-iyuldagi F-3215-son farmoyishiga muvofiq tashkil etilgan Ishchi komissiya tomonidan Oʻzbekiston Respublikasi Iqtisodiyot vazirligi, Moliya vazirligi, Namangan viloyati hokimligi, boshqa manfaatdor vazirliklar va idoralar ishtirokida ishlab chiqilgan 2009 — 2012-yillarda Namangan viloyatida kichik biznes, tadbirkorlik va kasanachilikni rivojlantirish dasturi maʼqullansin. Dastur quyidagilarni oʻz ichiga oladi:

tarmoqlar, shaharlar va tumanlar boʻyicha sanoat ishlab chiqarishi sohasida kichik biznesning yangi korxonalarini tashkil etish parametrlari 1 va 1a-ilovalarga* muvofiq;

xizmatlar turlari, shaharlar va tumanlar boʻyicha xizmatlar sohasida kichik biznes korxonalari tashkil etish parametrlari 2 va 2a-ilovalarga* muvofiq;

shaharlar va tumanlar boʻyicha kasanachilik sohasida ish oʻrinlari tashkil etish parametrlari 3-ilovaga* muvofiq.

2. Quyidagilarga:

Oʻzbekiston Respublikasi Prezidentining 2009-yil 6-iyuldagi F-3215-son farmoyishiga muvofiq tashkil etilgan Ishchi komissiyaga (R.S. Azimov) vazirliklar, idoralar, xoʻjalik birlashmalari, mahalliy hokimiyat organlarining ushbu qaror bilan tasdiqlangan Dasturda nazarda tutilgan tadbirlarni belgilangan muddatlarga muvofiq amalga oshirish bilan bogʻliq faoliyatini muvofiqlashtirish funksiyasi;

Namangan viloyati hokimi vazifasini bajaruvchiga (B.T. Yusupov), viloyatning shaharlari va tumanlari hokimlariga Dasturda belgilangan parametrlar sifatli va oʻz vaqtida bajarilishini taʼminlash uchun shaxsiy masʼuliyat yuklansin.

3. Namangan viloyati hokimligi:

bir hafta muddatda Dastur parametrlari yil choraklariga boʻlib chiqilgan holda barcha shaharlar va tumanlarga aniq yetkazib berilishini taʼminlasin;

kichik biznes korxonalari tashkil etish boʻyicha loyihalarning tashabbuskorlariga zarur yer uchastkalari, noturar joy obyektlari ajratilishida, shuningdek biznesni tashkil etish va yuritish uchun zarur boʻlgan roʻyxatga olish tartib-qoidalaridan oʻtishda har tomonlama koʻmaklashsin;

Dastur parametrlari bajarilishi monitoringini tashkil etsin hamda korxonalar va hududlar boʻyicha kichik biznes va kasanachilikni rivojlantirishning muammoli masalalarini muntazam ravishda koʻrib chiqsin, ularni hal etish yuzasidan zarur shoshilinch amaliy chora-tadbirlar koʻrsin;

Dasturning bajarilishi toʻgʻrisida har chorakda Oʻzbekiston Respublikasi Vazirlar Mahkamasiga axborot taqdim etsin.

4. Namangan viloyati hokimligiga Namangan viloyati tumanlari va shaharlari hokimlariga va hokimlarning iqtisodiy va ijtimoiy rivojlantirish masalalari boʻyicha oʻrinbosarlariga, shuningdek Kichik biznes, tadbirkorlik va kasanachilikni rivojlantirish dasturi topshiriqlari toʻliq darajada bajarilishini taʼminlayotgan xoʻjalik yurituvchi subyektlarni roʻyxatdan oʻtkazish xizmatlari xodimlariga xoʻjalik yurituvchi subyektlarni roʻyxatdan oʻtkazish paytida davlat boji sifatida olingan mablagʻlar va mahalliy budjetlar parametrlari ortigʻi bilan bajarilishidan olingan mablagʻlar hisobiga har chorak yakunlari boʻyicha ularning lavozim maoshiga 30 foizgacha miqdorida mukofot belgilash huquqi berilsin.

Oʻzbekiston Respublikasi Moliya vazirligi Namangan viloyati hokimligi bilan birgalikda bir oy muddatda viloyat tumanlari va shaharlari hokimliklarining, shuningdek vazirliklar va idoralar hududiy boʻlinmalarining kichik biznes va tadbirkorlikni rivojlantirish uchun masʼul boʻlgan rahbarlari va xodimlarini mukofotlash tartibini ishlab chiqsin va tasdiqlasin.

5. Tijorat banklariga Namangan viloyati kichik biznes va xususiy tadbirkorlik subyektlariga, eng avvalo dastlabki (boshlangʻich) sarmoyani shakllantirish, ular faoliyatini rivojlantirish va kengaytirish, zamonaviy asbob-uskunalar va mini-texnologiyalar sotib olish, aylanma mablagʻlarni toʻldirish uchun qonun hujjatlarida belgilangan tartibda kreditlar ajratilishini taʼminlash tavsiya qilinsin.

6. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.