Vazirlar Mahkamasining “Mahalliylashtirish dasturiga tuzatishlar kiritish mexanizmini soddalashtirishga doir qoʻshimcha chora-tadbirlar toʻgʻrisida” 2009-yil 2-apreldagi 94-son qaroriga muvofiq hamda raqobatbardosh eksportga yoʻnaltirilgan va importning oʻrnini bosadigan mahsulotlar ishlab chiqarishni yanada ragʻbatlantirish, tarmoq ichidagi va tarmoqlararo sanoat kooperatsiyasini, shu jumladan kichik biznes subyektlari bilan respublikaning yirik korxonalari oʻrtasidagi kooperatsiyani mustahkamlash maqsadida Vazirlar Mahkamasi qaror qiladi:

1. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirishni taʼminlash boʻyicha Maxsus komissiyaning Oʻzbekiston Respublikasi Prezidentining 2009-yil 27-yanvardagi PQ-1048-son qarori bilan maʼqullangan 2009-yilda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga (keyingi oʻrinlarda Mahalliylashtirish dasturi deb yuritiladi) tuzatishlar kiritish toʻgʻrisidagi qarori maʼqullansin, unda quyidagilar nazarda tutiladi:

Mahalliylashtirish dasturiga 2a-ilovaga butlovchi uzellar va detallar ishlab chiqarishni mahalliylashtirishning 1-ilovaga* muvofiq yangi loyihalarini kiritish;

Mahalliylashtirish dasturiga 3a-ilovaga mahsulotlarning tayyor turlarini, xomashyo va materiallarni ishlab chiqarishni mahalliylashtirishning 2-ilovaga* muvofiq yangi loyihalarini kiritish;

Mahalliylashtirish dasturidan korxonalar tugatilganligi, mahalliylashtirishning prognoz darajasi taʼminlanmaganligi, shuningdek ishlab chiqarilayotgan mahsulotning narxi va sifati boʻyicha raqobatbardoshli emasligi munosabati bilan 3-ilovaga* muvofiq loyihalarni chiqarish.

2. Belgilansinki, ushbu qarorga muvofiq Mahalliylashtirish dasturiga kiritilgan korxonalarga Oʻzbekiston Respublikasi Prezidentining “2009-yilda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi toʻgʻrisida” 2009-yil 27-yanvardagi PQ-1048-son qarorining 3-bandida nazarda tutilgan imtiyozlar bojxona toʻlovlari boʻyicha — ushbu qaror qabul qilingan paytdan boshlab, soliqlar boʻyicha esa — 2009-yil 1-sentabrdan boshlab qoʻllaniladi.

3. Oʻzbekiston Respublikasi Iqtisodiyot vazirligi yangi loyihalarning tashabbuskorlari bilan birgalikda ikki hafta muddatda 1 va 2-ilovalarga muvofiq mahalliylashtiriladigan mahsulotlar ishlab chiqarishni tashkil etish va ularni ishlab chiqarishning prognoz hajmlarini bajarish jadvallarini tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.