Oʻzbekiston Respublikasi Vazirlar Mahkamasining 2008-yil 16-sentabrdagi 209-sonli “Qashqadaryo viloyatida gʻallachilik va paxtachilikning ilmiy bazasini yanada mustahkamlash va rivojlantirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2008-yil, 37-38-son, 379-modda) qaroriga muvofiq, respublikada urugʻlik boshoqli don tayyorlashda qatnashayotgan subyektlar manfaatini oshirish va urugʻlik don sifatini yaxshilash maqsadida qaror qilamiz:

1. Boshoqli don ekinlari urugʻini yetishtiruvchi xoʻjaliklarni, shuningdek ilmiy muassasalar — navlar originatorlarini, seleksiya va urugʻchilik sohasi olimlarini ragʻbatlantirish toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatiga olingandan soʻng oʻn kundan keyin kuchga kiradi.

Mazkur Nizom Oʻzbekiston Respublikasining “Urugʻchilik toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 9-son, 130-modda), “Seleksiya yutuqlari toʻgʻrisida”gi (Oʻzbekiston Respublikasi Oliy Majlisining Axborotnomasi, 2002-y., 9-son, 156-modda) qonunlariga hamda Oʻzbekiston Respublikasi Prezidentining 2009-yil 26-yanvardagi PQ-1046-son qarori (Oʻzbekiston Respublikasi qonun hujjatlari toʻplami, 2009-y., 5-son, 33-modda) bilan tasdiqlangan “Qishloq taraqqiyoti va farovonligi yili” Davlat dasturi va Oʻzbekiston Respublikasi Vazirlar Mahkamasining 2008-yil 16-sentabrdagi 209-son “Qashqadaryo viloyatida gʻallachilik va paxtachilikning ilmiy bazasini yanada mustahkamlash va rivojlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 37-38-son, 379-modda) muvofiq boshoqli don ekinlari urugʻini yetishtiruvchi xoʻjaliklarni, shuningdek ilmiy muassasalar — navlar originatorlarini, seleksiya va urugʻchilik sohasi olimlarini ragʻbatlantirish tartibini belgilaydi.

1. Mazkur Nizom qoidalari boshoqli don ekinlarining mahalliy nav urugʻlarini (keyingi oʻrinlarda boshoqli don ekinlari urugʻi deb yuritiladi) yetishtiruvchi xoʻjaliklarni, shuningdek ilmiy muassasalar — navlar originatorlarini, seleksiya va urugʻchilik sohasi olimlarini (keyingi oʻrinlarda boshoqli don ekinlari urugʻini yetishtiruvchilar deb yuritiladi) ragʻbatlantirishga tatbiq etiladi.

2. Boshoqli don ekinlari urugʻini yetishtiruvchilarni ragʻbatlantirish urugʻchilik xoʻjaliklari tomonidan yetishtirilgan va boshoqli don ekinlari urugʻlarini qabul qiladigan, saqlaydigan va sotadigan ixtisoslashtirilgan don qabul qilish korxonalariga (keyingi oʻrinlarda don korxonalari deb yuritiladi) aprobatsiya dalolatnomasi asosida topshirilgan boshoqli don ekinlari urugʻlarining hajmidan kelib chiqqan holda amalga oshiriladi.

3. Etishtirilgan boshoqli don ekinlari urugʻlarining hajmini aniqlash va ularni xarid qilish, shuningdek ular boʻyicha hisob-kitoblarni amalga oshirish Urugʻchilik fermer xoʻjaliklarida yetishtirilgan boshoqli don ekinlarining superelita va elita urugʻlarini toʻliq hajmda xarid qilish tartibi toʻgʻrisidagi nizomga (roʻyxat raqami 1789, 2008-yil 11-aprel) (Oʻzbekiston Respublikasi qonun hujjatlari toʻplami, 2008-y., 14-15-son, 115-modda) muvofiq amalga oshiriladi.

4. Boshoqli don ekinlari urugʻlarining don korxonalariga qabul qilish Urugʻlik donni qabul qilish, tayyorlash, dorilash, tarqatish va sifatini nazorat qilish tartibi toʻgʻrisidagi yoʻriqnomaga (roʻyxat raqami 1499, 2005-yil 29-iyul) (Oʻzbekiston Respublikasi qonun hujjatlari toʻplami, 2005-y., 30-31-son, 237-modda) muvofiq amalga oshiriladi.

5. Oʻzbekiston Respublikasi hududida ekish uchun tavsiya etilgan va istiqbolli navlar roʻyxatiga kiritilgan hamda don korxonalari tomonidan qabul qilib olingan boshoqli don ekinlari urugʻlarining tovar holatidagi xarid narxiga ustamalar qonun hujjatlarida belgilangan miqdorda oʻrnatiladi.

6. Boshoqli don ekinlari urugʻlarining davlat standarti talablariga mos kelishi haqida Oʻzbekiston Respublikasi Qishloq va suv xoʻjaligi vazirligi huzuridagi “Oʻzdavurugʻnazoratmarkaz” tomonidan sertifikat berilganidan soʻng, urugʻlik uchun hisoblangan ustamaning 5 foizi tayyorlanadigan urugʻlik sifatini yaxshilash tadbirlari uchun “Oʻzdonmahsulot” aksiyadorlik kompaniyasi tizimiga kiradigan don korxonalarining ixtiyorida qoldiriladi, 80 foizi boshoqli don ekinlari urugʻlari yetishtirilgan urugʻchilik xoʻjaliklarining hisobvaraqlariga va qolgan 15 foizi ilmiy muassasalar — navlar originatorlarini, seleksiya va urugʻchilik sohasi olimlarini ragʻbatlantirish uchun Oʻzbekiston qishloq xoʻjaligi ilmiy-ishlab chiqarish markazining hisobvaragʻiga oʻtkaziladi.

7. Oʻzbekiston qishloq xoʻjaligi ilmiy-ishlab chiqarish markazining hisob raqamiga oʻtkazilgan 15 foiz ustama mablagʻ — 100 foiz deb hisoblanib, ushbu mablagʻlar don korxonalariga topshirilgan boshoqli don ekinlarining tayyorlangan urugʻlikdagi ulushiga mutanosib ravishda ilmiy muassasalar — navlar originatorlarini ragʻbatlantirishga yoʻnaltiriladi va quyidagicha taqsimlanadi:

15 foizi — nav mualliflarini ragʻbatlantirishga;

40 foizi — ilmiy muassasalarni moddiy-texnika bazasini mustahkamlashga;

45 foizi — ilmiy muassasalarda boshoqli don ekinlarining yuqori hosilli, qurgʻoqchilikka chidamli va yuqori sifatli yangi istiqbolli navlarini yaratish xarajatlariga.

8. “Oʻzdonmahsulot” aksiyadorlik kompaniyasi tizimidagi don korxonalarining rahbarlari va bosh hisobchilari don korxonalariga topshirilgan boshoqli don ekinlari urugʻlari uchun hisob-kitoblarni oʻz vaqtida va toʻgʻri amalga oshirilishi uchun qonun hujjatlariga muvofiq javobgar hisoblanadi.

9. Mazkur Nizom “Oʻzdonmahsulot” aksiyadorlik kompaniyasi va Oʻzbekiston qishloq xoʻjaligi ilmiy-ishlab chiqarish markazi bilan kelishilgan.