LexUZ sharhi
Mazkur qaror O‘zbekiston Respublikasi Prezidentining 2010-yil 21-dekabrdagi PQ-1446-sonli “2011—2015-yillarda infratuzilmani, transport va kommunikatsiya qurilishini rivojlantirishni jadallashtirish to‘g‘risida”gi qaroriga muvofiq o‘z kuchini yo‘qotgan.
Respublika temir yo‘l sohasini yanada rivojlantirish va modernizatsiya qilish, shu asosda yuksak xalqaro talablar va standartlarga javob beradigan ko‘p maqsadli samarali infratuzilmaga ega bo‘lgan zamonaviy temir yo‘llarning yaxlit keng tarmog‘ini izchil shakllantirish, mahalliy mahsulotlarni mintaqaviy hamda jahon bozorlariga yetkazib berishning istiqboldagi ehtiyojlarini hisobga olgan holda ularning xalqaro transport kommunikatsiyalari tizimiga keng integratsiyalashuvini ta’minlash maqsadida:
1. “O‘zbekiston temir yo‘llari” DAK, O‘zbekiston Respublikasi Iqtisodiyot vazirligi, Moliya vazirligi tomonidan boshqa manfaatdor tuzilmalar bilan birgalikda ishlab chiqilgan 2009 — 2013-yillarda Temir yo‘l sohasini rivojlantirish va modernizatsiya qilishning kompleks Dasturi tasdiqlansin. U quyidagilarni o‘z ichiga oladi:
2009 — 2013-yillar mobaynida “O‘zbekiston temir yo‘llari” DAK ishlab chiqarish faoliyatini rivojlantirish va modernizatsiya qilish kompleks dasturining asosiy maqsadli parametrlari 1 va 2-ilovalarga* muvofiq;
2009 — 2013-yillar mobaynida “O‘zbekiston temir yo‘llari” DAK qurilishi, uni modernizatsiya qilish, texnik va texnologik qayta jihozlash investitsiya loyihalari ro‘yxati 3-ilovaga* muvofiq;
2009 — 2013-yillar mobaynida “O‘zbekiston temir yo‘llari” DAK qurilishi, uni modernizatsiya qilish, texnik va texnologik qayta jihozlash loyihalari bo‘yicha investitsiyalarning texnologik tarkibi 4-ilovaga* muvofiq.
* 1-4-ilovalar rus tilidagi matnda berilgan.
2. “O‘zbekiston temir yo‘llari” DAK raisi zimmasiga 2009 — 2013-yillarda Temir yo‘l sohasini rivojlantirish va modernizatsiya qilish kompleks dasturining tasdiqlangan dasturiy chora-tadbirlari to‘liq hajmda va belgilangan muddatlarda amalga oshirilishini hamda maqsadli parametrlariga erishishni ta’minlash yuzasidan shaxsiy mas’uliyat yuklansin.
3. “O‘zbekiston temir yo‘llari” DAK manfaatdor vazirliklar, idoralar va tijorat banklari bilan birgalikda mazkur Qarorning 3-ilovasiga kiritilgan investitsiya loyihalari bo‘yicha belgilangan tartibda loyiha hujjatlarining o‘z vaqtida ishlab chiqilishi, kelishib olinishi hamda tasdiqlanishini, shuningdek ularning amalga oshirilishini ta’minlasin.
4. Balansida temir yo‘l transporti obyektlari bo‘lgan idoralar, xo‘jalik birlashmalari va korxonalar rahbarlari ikki oy muddatda tegishli temir yo‘l tutash yo‘laklarini, ombor xo‘jaliklari, yuk ortish-tushirish frontlarini rivojlantirish va modernizatsiya qilishni hamda vagonlar va lokomotivlarning idoraviy parkini yangilashni nazarda tutgan holda ayni shunday dasturlarni belgilangan tartibda ishlab chiqsin hamda tasdiqlasin.
5. Vazirlar Mahkamasiga zarur hollarda, O‘zbekiston Respublikasi Iqtisodiyot vazirligi, Moliya vazirligi, “O‘zbekiston temir yo‘llari” DAK taqdimnomalariga ko‘ra bozor konyunkturasi o‘zgarishi ehtimoli va temir yo‘l tarmog‘ining rivojlanishini nazarda tutgan holda, 2009 — 2013-yillarda Temir yo‘l sohasini rivojlantirish va modernizatsiya qilish kompleks dasturining tasdiqlangan parametrlariga aniqlik hamda qo‘shimchalar kiritish huquqi berilsin.
6. O‘zbekiston Respublikasi Vazirlar Mahkamasi tomonidan tasdiqlanadigan ro‘yxatlarga binoan temir yo‘l sohasini rivojlantirish va modernizatsiya qilishning kompleks dasturini amalga oshirish doirasida “O‘zbekiston temir yo‘llari” DAK chetdan olib keladigan, respublikada ishlab chiqarilmaydigan uskunalar, materiallar, ehtiyot qismlar, butlovchi buyum va uzellar, texnologik hujjatlar hamda asbob-anjomlar 2014-yilning 1-yanvarigacha bojxona to‘lovlari to‘lashdan (bojxona rasmiylashtiruvi yig‘imlaridan tashqari) ozod etilsin.
7. O‘zbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi har yili Investitsiya dasturini shakllantirishda 2009 — 2013-yillarda temir yo‘l sohasini rivojlantirish va modernizatsiya qilishning kompleks dasturida ko‘zda tutilgan investitsiya loyihalarining belgilangan tartibda unga kiritilishini nazarda tutsin.
8. O‘zbekiston Respublikasi Prezidentining “2007 — 2010-yillarda xususiylashtirish jarayonlarini yanada chuqurlashtirish va xorijiy investitsiyalarni faol jalb qilish chora-tadbirlari to‘g‘risida” 2007-yil 20-iyuldagi PQ-672-sonli Qarori 2-ilovasidagi 80 — 83-pozitsiyalar chiqarib tashlansin.
9. Ushbu Qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.