Oʻzbekiston Respublikasi Prezidentining 2008-yil 24-noyabrdagi PQ-1005-son “Oʻzbekiston Respublikasi Moliya vazirligining insonparvarlik yordami hamda texnik koʻmaklashish vositalaridan maqsadli foydalanishni muvofiqlashtirish, hisobga olish va nazorat qilish Departamentini tashkil etish toʻgʻrisida”gi qarorining (Oʻzbekiston Respublikasi qonun hujjatlari toʻplami, 2008-y., 48-son, 472-modda) 5-bandiga asosan va insonparvarlik yordami hamda texnik koʻmaklashish vositalari boʻyicha maʼlumotlarni tizimlashtirish maqsadida buyuraman:

1. Oʻzbekiston Respublikasi Moliya vazirligi Gʻaznachiligiga insonparvarlik yordami hamda texnik koʻmaklashish vositalarini oluvchilar tomonidan bank hisobvaraqlaridan koʻchirmalar va insonparvarlik yordami hamda texnik koʻmaklashish vositalari toʻgʻrisidagi maʼlumotlarni taqdim etish Qoidalari ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur qoidalar Oʻzbekiston Respublikasining “Davlat budjetining gʻazna ijrosi toʻgʻrisida”gi Qonuni hamda Oʻzbekiston Respublikasi Prezidentining 2008-yil 24-noyabrdagi PQ-1005-son “Oʻzbekiston Respublikasi Moliya vazirligining insonparvarlik yordami hamda texnik koʻmaklashish vositalaridan maqsadli foydalanishni muvofiqlashtirish, hisobga olish va nazorat qilish Departamentini tashkil etish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 48-son, 472-modda) muvofiq Oʻzbekiston Respublikasi Moliya vazirligi Gʻaznachiligiga insonparvarlik yordami va texnik koʻmaklashish vositalarini oluvchilar tomonidan bank hisobvaraqlaridan koʻchirmalar va insonparvarlik yordami hamda texnik koʻmaklashish vositalari toʻgʻrisidagi maʼlumotlarni taqdim etish tartibini belgilaydi.

1. Insonparvarlik yordami hamda texnik koʻmaklashish vositalari oluvchilar (keyingi oʻrinlarda — grant oluvchilar) Oʻzbekiston Respublikasi Moliya vazirligi Gʻaznachiligiga ushbu Qoidalarning 1, 2 hamda 3-ilovalarida keltirilgan shakllarga muvofiq bank hisobvaraqlaridan koʻchirmalar va insonparvarlik yordami hamda texnik koʻmaklashish vositalari toʻgʻrisidagi maʼlumotlarni (keyingi oʻrinlarda — maʼlumotlar) majburiy tartibda taqdim etadilar.

2. Oʻzbekiston Respublikasi Moliya vazirligi Gʻaznachiligiga maʼlumotlarni, bevosita chet el davlatlari, ularning federal yoki munitsipal tashkiliy tuzilmalari, xalqaro va chet el tashkilotlari, shuningdek, boshqa jismoniy va yuridik shaxslarning (keyingi oʻrinlarda — donorlar) dastur hamda kelishuvlarida yoki Oʻzbekiston Respublikasi Vazirlar Mahkamasining insonparvarlik yordamlari bilan bogʻliq boʻlgan tadbirlarni oʻzaro muvofiqlashtirilishiga masʼul hisoblangan, taʼlim, sogʻliqni saqlash va ijtimoiy himoya masalalari boʻyicha Kompleks rahbarining qarorlarida belgilangan insonparvarlik yordami oluvchilar, texnik koʻmaklashish vositalari boʻyicha esa xalqaro moliyaviy va iqtisodiy institutlar hamda chet el hukumati tashkilotlarining texnik koʻmaklashishni taqdim etish toʻgʻrisidagi qarorlarida koʻrsatilgan, texnik koʻmaklashish vositalarini oluvchilar taqdim etadilar.

3. Maʼlumotda barcha ustun, qator va rekvizitlar toʻldirilishi shart. Agar grant oluvchida tegishli maʼlumotlarning yoʻqligi sababli u yoki bu qator (ustun) toʻldirilmay qolgan hollarda, ushbu qator (ustun) ustiga toʻgʻri chiziq tortiladi. Maʼlumotdagi yozuvlar, yozuv mashinalari, mexanizatsiyalashtirish vositalari yoki axborot texnologiyalari yordamida amalga oshirilishi lozim.

4. Maʼlumot grant oluvchi tashkilotning rahbari va bosh hisobchisi tomonidan imzolanadi va muhri bilan tasdiqlanadi.

5. Maʼlumotda oʻchirishlar va tuzatib yozishlar boʻlmasligi lozim. Xatolar tuzatilgan taqdirda, grant oluvchining rahbari tomonidan tasdiqlangan, tegishli izohlar koʻrsatiladi.

6. Maʼlumot milliy valyuta va AQSh dollarida toʻldiriladi. Boshqa chet el valyutasida rasmiylashtirilgan insonparvarlik yordami (texnik koʻmaklashish) grant oluvchi tomonidan ushbu insonparvarlik yordami (texnik koʻmaklashish) olingan kunda amalda boʻlgan, Markaziy bankning kursi boʻyicha AQSh dollarida qayta hisoblanadi.

7. Jalb etilayotgan insonparvarlik yordami va texnik koʻmaklashish vositalari, shu jumladan, natura koʻrinishidagi insonparvarlik yordami va texnik koʻmaklashish vositalari toʻgʻrisidagi maʼlumot (mazkur Qoidalarga 1-ilova) donorlar tomonidan dasturlar va bitimlar tasdiqlangan yoki Oʻzbekiston Respublikasi Vazirlar Mahkamasining insonparvarlik yordamlari bilan bogʻliq boʻlgan tadbirlarni oʻzaro muvofiqlashtirilishiga masʼul hisoblangan, taʼlim, sogʻliqni saqlash va ijtimoiy himoya masalalari boʻyicha Kompleks rahbarining qarorlari, shuningdek, xalqaro moliyaviy va iqtisodiy institutlar hamda chet el hukumati tashkilotlarining texnik koʻmaklashishni taqdim etish toʻgʻrisidagi qarorlari tasdiqlangan kunning ertasi kuni grant oluvchining joylashgan joyidan kelib chiqqan holda, Oʻzbekiston Respublikasi Moliya vazirligi Gʻaznachiligining tegishli boʻlinmalariga pochta orqali yoki qoʻlda taqdim etiladi.

8. Jalb etilayotgan insonparvarlik yordami va texnik koʻmaklashish vositalari toʻgʻrisidagi maʼlumotning ustunlari quyidagicha toʻldiriladi:

A ustunida — tartib raqami koʻrsatiladi;

B ustunida — donor mamlakat va donor nomi koʻrsatiladi;

V ustunida — loyiha nomi koʻrsatiladi;

G ustunida — insonparvarlik yordami va texnik koʻmaklashish vositalarini jalb etish maqsadi koʻrsatiladi;

D ustunida — Oʻzbekiston Respublikasi Prezidenti yoki Oʻzbekiston Respublikasi hukumati tomonidan insonparvarlik yordami va texnik koʻmaklashish vositalarining olinishi maʼqullangan hujjat raqami va sanasi koʻrsatiladi;

E ustunida — dastur, bitim yoki tegishli qaror boʻyicha insonparvarlik yordami va texnik koʻmaklashish vositalarining milliy valyutadagi umumiy summasi koʻrsatiladi;

J ustunida — dastur, bitim yoki tegishli qaror boʻyicha insonparvarlik yordami va texnik koʻmaklashish vositalarining AQSh dollaridagi umumiy summasi koʻrsatiladi.

9. Kelib tushgan insonparvarlik yordami va texnik koʻmaklashish vositalari, shu jumladan, natura koʻrinishidagi insonparvarlik yordami va texnik koʻmaklashish vositalarining kelib tushganligi toʻgʻrisidagi maʼlumot (mazkur Qoidalarga 2-ilova) boʻyicha operatsiyalar amalga oshirilgan kunning ertasi kuni grant oluvchining joylashgan joyi boʻyicha, Oʻzbekiston Respublikasi Moliya vazirligi Gʻaznachiligining tegishli boʻlinmalariga pochta orqali yoki qoʻlda taqdim etiladi.

10. Kelib tushgan insonparvarlik yordami va texnik koʻmaklashish vositalari toʻgʻrisidagi maʼlumotda, “erkin muomalaga chiqarish” bojxona rejimida rasmiylashtirilgan yuklar koʻrsatiladi.

11. Maʼlumotning manzil qismi quyidagi tartibda toʻldiriladi:

“Oluvchi” ustunida — grant oluvchining oʻrnatilgan tartibda roʻyxatdan oʻtkazilgan taʼsis hujjatlariga muvofiq toʻliq nomi koʻrsatiladi;

“Mamlakatlar/donorlar” ustunida — donorning mamlakati va donor koʻrsatiladi;

“Loyiha nomi” ustunida — loyihaning toʻliq nomi koʻrsatiladi;

“Loyihani maʼqullash toʻgʻrisidagi hujjatning nomi” ustunida — Oʻzbekiston Respublikasi Prezidenti yoki Hukumatining loyihani maʼqullash toʻgʻrisidagi qarorining nomi koʻrsatiladi.

12. Kelib tushgan insonparvarlik yordami va texnik koʻmaklashish vositalari toʻgʻrisidagi ustunlar quyidagi tartibda toʻldiriladi:

A ustunida — tartib raqami koʻrsatiladi;

B ustunida — insonparvarlik yordami va texnik koʻmaklashish vositalarining kelib tushganligini tasdiqlovchi hujjatlar koʻrsatiladi;

V va G ustunlarida — hisobvaraq-fakturalar yoki boshqa insonparvarlik yordami va texnik koʻmaklashish vositalarining kelib tushganligini tasdiqlovchi hujjatlar raqami va sanasi koʻrsatiladi;

D ustunida — kelib tushgan insonparvarlik yordami yoki texnik koʻmaklashish vositalarining milliy valyutadagi summasi koʻrsatiladi;

E ustunida — kelib tushgan insonparvarlik yordami yoki texnik koʻmaklashish vositalarining AQSh dollaridagi summasi koʻrsatiladi;

J ustunida — insonparvarlik yordami yoki texnik koʻmaklashishning qisqacha tavsifi koʻrsatiladi. Ushbu ustun faqat natura koʻrinishidagi insonparvarlik yordami va texnik koʻmaklashish vositalari kelgandagina toʻldiriladi.

13. Insonparvarlik yordami va texnik koʻmaklashish vositalari, shu jumladan, natura koʻrinishidagi insonparvarlik yordami va texnik koʻmaklashish vositalarining ishlatilishi toʻgʻrisidagi maʼlumot (mazkur Qoidalarga 3-ilova) ishlatilish boʻyicha operatsiyalar amalga oshirilgan kunning ertasi kuni grant oluvchining joylashgan joyi boʻyicha, Oʻzbekiston Respublikasi Moliya vazirligi Gʻaznachiligining tegishli boʻlinmalariga qoʻlda taqdim etiladi.

14. Maʼlumotning manzil qismi quyidagi tartibda toʻldiriladi:

“Oluvchi” ustunida — grant oluvchining oʻrnatilgan tartibda roʻyxatdan oʻtkazilgan taʼsis hujjatlariga muvofiq toʻliq nomi koʻrsatiladi;

“Mamlakatlar/donorlar” ustunida — donorning mamlakati va donor koʻrsatiladi;

“Loyiha nomi” ustunida — loyihaning toʻliq nomi koʻrsatiladi;

“Loyihani maʼqullash toʻgʻrisidagi hujjatning nomi” ustunida — Oʻzbekiston Respublikasi Prezidenti yoki Hukumatining loyihani maʼqullash toʻgʻrisidagi qarorining nomi koʻrsatiladi.

15. Insonparvarlik yordami va texnik koʻmaklashish vositalarining ishlatilishi toʻgʻrisidagi ustunlar quyidagi tartibda toʻldiriladi:

A ustunida — tartib raqami koʻrsatiladi;

B ustunida — insonparvarlik yordami va texnik koʻmaklashish ishlatilganligini tasdiqlovchi hujjatlar koʻrsatiladi;

V va G ustunlarida — hisobvaraq-fakturalar yoki boshqa insonparvarlik yordami va texnik koʻmaklashish vositalarining ishlatilganligini tasdiqlovchi hujjatlar raqami va sanasi koʻrsatiladi;

D ustunida — insonparvarlik yordami yoki texnik koʻmaklashish vositalarning ishlatilgan summasi milliy valyutadagi summasi koʻrsatiladi.

Quyidagi shakllarda tushgan insonparvarlik yordami yoki texnik koʻmaklashish vositalaridan foydalanilganda:

pul shaklida — grant oluvchilar tomonidan chek va toʻlov hujjatlari asosida sarflangan summa koʻrsatiladi;

asosiy vosita koʻrinishidagi natural shaklda — hisobvaraq-faktura va boshqa hujjatlar (qabul qilish dalolatnomasi va h.k.) asosida asosiy vositaning qiymati koʻrsatiladi;

asosiy vosita boʻlmagan, natural shakldagi tovar-moddiy boyliklar koʻrinishida — hisobvaraq-faktura va isteʼmol qilinganligini (hisobdan chiqarilganligini) yoki ularni toʻgʻridan-toʻgʻri isteʼmolchilarga berilganligini tasdiqlovchi boshqa hujjatlar (hisobdan chiqarish dalolatnomasi, tarqatish vedomosti va h.k.) asosida tovar-moddiy boyliklar qiymati koʻrsatiladi;

E ustunida — insonparvarlik yordami yoki texnik koʻmaklashish vositalarining ishlatilgan summasi AQSh dollarida koʻrsatiladi.

16. Mazkur qoidalarga muvofiq, Oʻzbekiston Respublikasi Moliya vazirligi Gʻaznachiligiga taqdim etilayotgan maʼlumotlarning toʻliqligi va haqqoniyligi uchun grant oluvchilar rahbarlari va bosh hisobchilari javobgardirlar.