“Oʻzbekiston Respublikasining davlat mustaqilligi asoslari toʻgʻrisida”gi Qonunga, “Mustaqil Davlatlar Hamdoʻstligi haqida 1991-yil 21-dekabrdagi Shartnomaga muvofiq Oʻzbekiston Respublikasida jamoat xavfsizligini taʼminlash maqsadida:

1. SSSR Ichki ishlar vazirligi ichki qoʻshinlarining Oʻzbekiston Respublikasi hududida joylashgan qoʻshilmalari, alohida qismlari va boʻlinmalari Oʻzbekiston Respublikasining yurisdiksiyasiga olinsin va respublika Ichki ishlar vazirligi qaramogʻiga oʻtkazilsin. Ular negizida Oʻzbekiston Respublikasi Ichki ishlar vazirligi ichki qoʻshinlari qoʻshilmasi ilovaga* muvofiq tashkil etilsin.

Respublika hududida joylashgan ichki qoʻshinlarga rahbarlik qilish Oʻzbekiston Respublikasi Ichki ishlar vaziri zimmasiga yuklatilsin.

2. SSSR Ichki ishlar vazirligining Toshkentdagi oliy maktabi va SSSR Ichki ishlar vazirligi ichki qoʻshinlarining Toshkentdagi oliy harbiy-texnika bilim yurti Oʻzbekiston Respublikasi Ichki ishlar vazirligi qaramogʻiga oʻtkazilsin.

3. Oʻzbekiston Respublikasi Ichki ishlar vazirligi (oʻrtoq Z.A. Almatov) SSSR Ichki ishlar vazirligi ichki qoʻshinlari qoʻshilmalari, qismlari va alohida boʻlinmalarini, oʻquv yurtlarini 1992-yil 1-yanvargacha boʻlgan holatda barcha shaxsiy tarkibi, qurollari, moddiy-texnikaviy va boshqa mulki bilan qabul qilib olsin.

Bir oy muddat ichida ichki qoʻshinlar tuzilmasi, nizomi, shtatlariga, uning tarkibiga kirgan oʻquv yurtlariga oid takliflar tayyorlansin va Oʻzbekiston Respublikasining hukumati koʻrib chiqishi uchun taqdim etilsin.

4. SSSR Ichki ishlar vazirligining Oʻzbekiston Respublikasi yurisdiksiyasiga oʻtadigan harbiy tuzilmalari va oʻquv yurtlarining komandirlar tarkibi Oʻzbekiston Respublikasi barcha harbiy xizmatchilarni va ularning oila aʼzolarini ijtimoiy va huquqiy jihatdan himoya qilishni kafolatlashini nazarda tutib, shaxsiy tarkib oʻziga yuklatilgan vazifalarni ogʻishmay bajarishini taʼminlasin.

5. Oʻzbekiston Respublikasi Ichki ishlar vazirligi, Moliya vazirligi, Iqtisodiyot komiteti Oʻzbekiston Respublikasi Ichki ishlar vazirligining tarkibi oʻzgarganligi munosabati bilan uni mablagʻ va moddiy-texnikaviy jihatdan taʼminlash masalalarini birgalikda koʻrib chiqsinlar.