Oʻzbekiston Respublikasi Prezidentining “Navoiy viloyatida erkin industrial-iqtisodiy zona tashkil etish toʻgʻrisida” 2008-yil 2-dekabrdagi PF-4059-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

“Navoiy” erkin industrial-iqtisodiy zonasining maʼmuriy kengashi toʻgʻrisidagi nizom 1-ilovaga muvofiq;

“Navoiy” erkin industrial-iqtisodiy zonasida joylashtirish uchun investorlarni tanlash tartibi toʻgʻrisidagi nizom 2-ilovaga muvofiq;

xoʻjalik yurituvchi subyektlarni “Navoiy” erkin industrial-iqtisodiy zonasining xoʻjalik faoliyati qatnashchilari sifatida roʻyxatdan oʻtkazish va ular tomonidan tadbirkorlik faoliyati amalga oshirilishi tartibi toʻgʻrisidagi nizom 3-ilovaga muvofiq tasdiqlansin.

2. Navoiy viloyati hokimligi “Davarxitektqurilish” qoʻmitasi bilan birgalikda “Navoiy” erkin industrial-iqtisodiy zonasining bosh rejasida turar joy va ijtimoiy infratuzilma obyektlari qurish uchun “Navoiy” erkin industrial-iqtisodiy zonasi hududiga tutashib ketgan 100 gektargacha maydondagi qoʻshimcha yer uchastkasini nazarda tutsin hamda yer uchastkasi zarur kadastr jihatdan rasmiylashtirilgan va foydalanish va boshqarish uchun “Navoiy” EIIZ direksiyasi” davlat unitar korxonasiga berilgan holda belgilangan tartibda ajratilishini amalga oshirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Navoiy” erkin industrial-iqtisodiy zonasining maʼmuriy kengashi (keyingi oʻrinlarda Maʼmuriy kengash deb ataladi) faoliyat koʻrsatishi tartibini belgilaydi.

2. Maʼmuriy kengash Oʻzbekiston Respublikasi Vazirlar Mahkamasi tomonidan davlat organlari vakillaridan tashkil etiladigan kollegial organ hisoblanadi.

Maʼmuriy kengashning oʻz vakolatlari doirasida qabul qilgan qarorlari Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, shuningdek davlat va xoʻjalik boshqaruvi organlari tomonidan bajarilishi majburiy hisoblanadi.

3. Maʼmuriy kengash oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasining boshqa normativ-huquqiy hujjatlariga, shuningdek ushbu Nizomga amal qiladi.

4. Quyidagilar Maʼmuriy kengashning asosiy vazifalari hisoblanadi:

“Navoiy” erkin industrial-iqtisodiy zonasi (keyingi oʻrinlarda “Navoiy” EIIZ deb ataladi) faoliyatini muvofiqlashtirish va tartibga solish;

yuqori texnologik, jahon bozorlarida raqobatbardoshli mahsulotlarning keng doirasini ishlab chiqarish uchun zamonaviy yuqori unumli asbob-uskunalar va texnika, texnologik liniyalar va modullar, innovatsiya texnologiyalari joriy etilishini nazarda tutadigan “Navoiy” EIIZni oʻrtacha muddatli va uzoq muddatli rivojlantirishning strategik yoʻnalishlarini belgilash;

“Navoiy” EIIZ faoliyat koʻrsatishi bilan bogʻliq masalalar boʻyicha davlat va xoʻjalik boshqaruvi organlari, mahalliy davlat hokimiyati organlari faoliyatini muvofiqlashtirish;

Direksiyaning “Navoiy” EIIZni rivojlantirish boʻyicha asosiy vazifalari va yoʻnalishlarini belgilash hamda uning faoliyati ustidan nazorat qilish;

tasdiqlangan mezonlar asosida “Navoiy” EIIZ hududida ishlab chiqarishni joylashtirishda investorlarning investitsiya buyurtmanomalarini koʻrib chiqish va tegishli qarorlar qabul qilish;

“Navoiy” EIIZning samarali faoliyat koʻrsatishi bilan bogʻliq boshqa vazifalar.

5. Yuklangan vazifalarga muvofiq Maʼmuriy kengash quyidagi funksiyalarni amalga oshiradi:

“Navoiy” EIIZni oʻrtacha muddatli va uzoq muddatli rivojlantirish hamda uning faoliyat koʻrsatishi samaradorligini oshirishning strategik yoʻnalishi boʻyicha takliflarni Oʻzbekiston Respublikasi Vazirlar Mahkamasiga kiritadi;

“Navoiy” EIIZning samarali faoliyatini taʼminlash uchun zarur boʻlgan yillik investitsiya dasturlari va boshqa tashkiliy-texnik tadbirlarni tasdiqlaydi, shuningdek ularning bajarilishi toʻgʻrisidagi hisobotlarni koʻrib chiqadi;

“Navoiy” EIIZning bosh rejasini koʻrib chiqadi va markazlashtirilgan manbalar hisobiga moliyalashtiriladigan “Navoiy” EIIZning ishlab chiqarish infratuzilmasini qurish loyihalarini tasdiqlaydi;

“Navoiy” EIIZni rivojlantirish jamgʻarmasi toʻgʻrisidagi nizomni, “Navoiy” EIIZni rivojlantirish jamgʻarmasi mablagʻlarini shakllantirish manbalarini va mablagʻlardan foydalanish tartibini tasdiqlaydi;

davlat mulki boʻlgan yer uchastkalari, binolar va inshootlarning ijara qiymatini belgilash yoʻli bilan “Navoiy” EIIZ faoliyatining butun davri mobaynida “Navoiy” EIIZ hududidan foydalanish va boshqarishni amalga oshiradi, yer uchastkalari, binolar va ishnootlarni ijaraga berish toʻgʻrisida qarorlar qabul qiladi;

davlat va xoʻjalik boshqaruvi organlari, mahalliy davlat hokimiyati organlari tomonidan “Navoiy” EIIZ faoliyat koʻrsatishining belgilangan tartibiga rioya qilinishi ustidan monitoring olib boradi;

tasdiqlangan investitsiya dasturlari va boshqa tashkiliy-texnik tadbirlar asosida “Navoiy” EIIZ direksiyasining amaliy saʼy-harakatlari rejasini tasdiqlaydi;

qabul qilingan qarorlar Direksiya tomonidan oʻz vaqtida ijro etilishi, shuningdek “Navoiy” EIIZning mustaqil budjeti va “Navoiy” EIIZni rivojlantirish jamgʻarmasi mablagʻlaridan maqsadli foydalanilishi ustidan nazorat qiladi va monitoring olib boradi;

“Navoiy” EIIZ direksiyasi direktorini tayinlaydi, u bilan mehnat shartnomasi tuzadi va uning faoliyati tartibini belgilaydigan hujjatlarni tasdiqlaydi;

“Navoiy” EIIZ direksiyasi shtat jadvalini va uning xarajatlari smetasini tasdiqlaydi;

“Navoiy” EIIZ direksiyasiga “Navoiy” EIIZ xoʻjalik faoliyati qatnashchilari bilan tegishli ijara shartnomasi tuzish vakolatini beradi;

har choraklik asosida direktorning “Navoiy” EIIZ direksiyasi moliya-xoʻjalik faoliyati toʻgʻrisidagi hisobotini eshitadi;

“Navoiy” EIIZda joylashtirish uchun investorlarni tanlaydi, investitsiyalash toʻgʻrisidagi bitimlarning asosiy shartlarini belgilaydi;

qabul qilingan majburiyatlar bajarilmagan taqdirda investitsiyalash toʻgʻrisidagi bitimlarni muddatidan oldin bekor qilish toʻgʻrisida qarorlar qabul qiladi.

Maʼmuriy kengash uning vakolatiga kiritilgan boshqa funksiyalarni ham amalga oshiradi.

6. Maʼmuriy kengash oʻziga yuklangan vazifalarni bajarish uchun:

vazirliklar, davlat qoʻmitalari va idoralardan, xoʻjalik boshqaruvi organlari, mahalliy davlat hokimiyati organlaridan Maʼmuriy kengashning vakolatiga tegishli boʻlgan maʼlumotlarni belgilangan tartibda soʻrash va olish;

vazirliklar, davlat qoʻmitalari va idoralar, xoʻjalik boshqaruvi organlari, mahalliy davlat hokimiyati organlari vakillarining, shuningdek Maʼmuriy kengash aʼzolarining Maʼmuriy kengash vakolatiga tegishli masalalar boʻyicha hisobotlari va maʼruzalarini majlislarda eshitish;

kengash faoliyatining eng muhim masalalari va unga yuklangan vazifalarni amalga oshirish boʻyicha takliflarni oʻrganish va tayyorlash uchun ishchi guruhlar tashkil etish;

xalqaro eʼtirof etilgan kompaniyaga “Navoiy” EIIZni boshqarish boʻyicha huquqlarni shartnoma asosida berish uchun bunday kompaniyani tanlovda tanlash tartibi va shartlarini belgilash;

vazirliklar, davlat qoʻmitalari va idoralardan, xoʻjalik boshqaruvi organlari, mahalliy davlat hokimiyati organlaridan, shuningdek “Navoiy” EIIZ hududida ishlab chiqarishni joylashtirish uchun investitsiya buyurtmanomalari beradigan investorlardan taklif etilayotgan loyiha bilan bogʻliq statistik maʼlumotlarni va boshqa maʼlumotlarni soʻrash huquqiga ega.

Maʼmuriy kengash qonun hujjatlariga muvofiq boshqa huquqlarga ham ega boʻlishi mumkin.

7. Maʼmuriy kengashga rais boshchilik qiladi, uning vakolatiga quyidagilar kiradi:

Maʼmuriy kengash majlislari kun tartibini belgilash va ularni chaqirish;

Maʼmuriy kengash tomonidan qabul qilingan qarorlar bajarilishi nazorat qilinishini tashkil etish;

yuklangan vazifalar boʻyicha Maʼmuriy kengash aʼzolarining ishini muvofiqlashtirish;

Maʼmuriy kengashning samarali ishlashini taʼminlash yuzasidan boshqa saʼy-harakatlarni bajarish.

8. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Maʼmuriy kengashning ishchi organi (keyingi oʻrinlarda ishchi organ deb ataladi) hisoblanadi.

9. Maʼmuriy kengashning ishchi organi:

Maʼmuriy kengashning navbatdagi majlisiga barcha zarur materiallar oʻz vaqtida tayyorlanishini taʼminlaydi hamda unga “Navoiy” EIIZ direksiyasidan, vazirliklar, davlat qoʻmitalari va idoralardan, xoʻjalik boshqaruvi organlari, mahalliy davlat hokimiyati organlaridan va Maʼmuriy kengash aʼzolaridan zarur materiallar va ekspert xulosalarni olish huquqi beriladi;

kun tartibi masalalari boʻyicha tahliliy materiallar tayyorlanishini tashkil etadi va koʻrib chiqish uchun ularni Maʼmuriy kengashga taqdim etadi;

Maʼmuriy kengashning qarorlariga muvofiq boshqa materiallarni Maʼmuriy kengashning koʻrib chiqishi uchun taqdim etadi.

10. Maʼmuriy kengash oʻz majlisini zaruriyatga koʻra, biroq yil choragida kamida bir marta oʻtkazadi.

11. Majlisni Maʼmuriy kengash raisi oʻtkazadi, u boʻlmaganda esa — u tomonidan vakolat berilgan Maʼmuriy kengash raisining oʻrinbosari oʻtkazadi.

Maʼmuriy kengash majlisi, agar roʻyxatdan oʻtkazish tamom boʻlish paytida majlisda qatnashish uchun kengash aʼzolarining kamida uchdan ikki qismi roʻyxatdan oʻtgan boʻlsa huquqiy vakolatli boʻladi (kvorumga ega boʻladi).

12. Maʼmuriy kengashning qarori majlisda qatnashayotgan aʼzolarning oddiy koʻpchilik ovozi bilan qabul qilinadi. Ovozlar teng boʻlib qolgan taqdirda Maʼmuriy kengash raisining ovozi hal qiluvchi hisoblanadi.

Maʼmuriy kengashning har bir aʼzosi qabul qilinayotgan qarorlar boʻyicha oʻz fikrini yozma ifodalash huquqiga ega.

Maʼmuriy kengash raisi qarorlar tezkor qabul qilinishi maqsadida komissiya aʼzolari bilan kelishilgan ayrim masalalar boʻyicha soʻrov oʻtkazish yoʻli bilan kengashning qarorini tasdiqlashi mumkin.

13. Maʼmuriy kengash qarorlari Maʼmuriy kengash majlisining bayonnomasi bilan rasmiylashtiriladi. Maʼmuriy kengash majlisining bayonnomasiga uning barcha aʼzolari viza qoʻyadi, kotib tomonidan imzolanadi, Maʼmuriy kengash raisi tomonidan tasdiqlanadi va bir hafta muddatda Maʼmuriy kengash aʼzolariga va manfaatdor tashkilotlarga yuboriladi.

Maʼmuriy kengash bayonnomasining asl nusxasi va unga oid materiallar ishchi organda saqlanadi.

14. Maʼmuriy kengash qarorlari bajarilishini nazorat qilish ishchi organ tomonidan amalga oshiriladi.

15. Ishchi organ Maʼmuriy kengash qarorlari bajarilishini muntazam ravishda oʻrganadi va koʻrib chiqadi, zaruriyat boʻlsa Maʼmuriy kengash raisiga tegishli takliflarni kiritadi.

16. Maʼmuriy kengash aʼzolaridan birining tashabbusi bilan navbatdan tashqari majlis oʻtkazilishi mumkin. Maʼmuriy kengashning navbatdan tashqari majlisini oʻtkazish toʻgʻrisidagi asoslangan talab yozma shaklda ishchi organga yuboriladi.

17. Navbatdagi majlisda koʻrib chiqish uchun Maʼmuriy kengash kun tartibiga kiritilgan masalalar ishchi organ tomonidan majlis oʻtkazilishidan oldin 5 kundan kechikmay Maʼmuriy kengashning har bir aʼzosiga yuboriladi.

18. Kun tartibi oʻzgargan taqdirda ishchi organ Maʼmuriy kengashning har bir aʼzosini majlis boshlanishidan oldin uch kundan kechikmay bundan oʻzgarishlar toʻgʻrisida xabardor qiladi.

19. Maʼmuriy kengash “Navoiy” EIIZ tugatilgandan keyin belgilangan tartibda yoki Oʻzbekiston Respublikasi Vazirlar Mahkamasining qarori bilan muddatidan oldin oʻz faoliyatini toʻxtatadi.

1. Ushbu Nizom “Navoiy” erkin industrial-iqtisodiy zonasi (keyingi oʻrinlarda “Navoiy” EIIZ deb ataladi) hududida tadbirkorlik faoliyatini amalga oshirish uchun unda joylashtirish uchun investorlarni tanlash tartibini tartibga soladi.

2. “Navoiy” EIIZda joylashtirish uchun investorlarni tanlash boʻyicha tashkiliy masalalarni hal etish Maʼmuriy kengashning ishchi organiga va “Navoiy” EIIZ direksiyasiga yuklanadi.

3. “Navoiy” EIIZda joylashtirish uchun investorlarni tanlash ikki bosqichda amalga oshiriladi.

4. Tanlashning birinchi bosqichida investor “Navoiy” EIIZ direksiyasiga Maʼmuriy kengash tomonidan tasdiqlanadigan shakl boʻyicha “Navoiy” EIIZ hududida ishlab chiqarishni joylashtirishga toʻldirilgan investitsiya buyurtmanomasini (keyingi oʻrinlarda investitsiya buyurtmanomasi deb ataladi) taqdim etadi. Investitsiya buyurtmanomasiga quyidagilar ilova qilinadi:

investor davlat roʻyxatidan oʻtkazganligi toʻgʻrisidagi guvohnomaning nusxasi yoki Oʻzbekiston Respublikasi konsullik muassasasi tomonidan belgilangan tartibda legalizatsiya qilingan yuridik shaxs roʻyxatdan oʻtkazilgan joydagi savdo reyestridan koʻchirma;

taklif etilayotgan loyihaning biznes-rejasi;

yuridik shaxsning tegishli sohadagi ish tajribasining tasdiqnomasi, tegishli sohada amalga oshirilgan shunga oʻxshash loyihalar toʻgʻrisidagi maʼlumotlar;

yuridik shaxs mavjud boʻlgan davr, biroq kamida oxirgi uch yil uchun moliyaviy hisobot boʻyicha auditorlik tashkilotining xulosasi;

investorning vakolatli shaxslari imzolari namunalarini tasdiqlaydigan hujjat.

Barcha hujjatlar investor tomonidan “Navoiy” EIIZ direksiyasiga davlat tiliga yoki rus tiliga oʻgirilgan tarjima belgilangan tartibda ilova qilingan holda taqdim etiladi.

5. “Navoiy” EIIZ direksiyasiga taqdim etiladigan biznes-rejada quyidagi asosiy holatlar aks ettirilishi kerak:

ishlab chiqarish rejalashtirilayotgan mahsulotning nomi, hajmi va turi;

ishlab chiqariladigan mahsulotning moʻljallanayotgan narxi va sotish bozorlari, eksportga yoʻnaltirilgan mahsulot ishlab chiqarish hajmi;

taklif etilayotgan loyihani amalga oshirish uchun zarur boʻlgan infratuzilmaviy va muhandislik inshootlari;

ishlab chiqarishni oqilona joylashtirish uchun “Navoiy” EIIZ hududi uchastkasining moʻljallanayotgan oʻlchamlari;

xom ashyo bazasi mavjudligi hamda loyihani amalga oshirish davrida xom ashyo va materiallar bilan taʼminlashning kafolatlangan imkoniyatlari;

ekologik talablar hisobga olingan holda moʻljallanayotgan ishlab chiqarishning texnologiyasi tavsifi;

foydalanish moʻljallanayotgan savdo markasi toʻgʻrisidagi maʼlumotlar;

iqtisodiy samaradorlik hisob-kitobi, shuningdek loyihani amalga oshirishning eng samarali texnik, tashkiliy va iqtisodiy yechimi;

ishlab chiqarishda foydalanish moʻljallanayotgan texnologik asbob-uskunalarning xususiyati;

moʻljallanayotgan kapital qoʻyilmalar miqdori, moliyalashtirish manbalari va qarz mablagʻlari jalb etilgan taqdirda moʻljallanayotgan garov taʼminoti;

tashkil etiladigan ish oʻrinlari soni.

6. “Navoiy” EIIZ direksiyasi 5 ish kuni mobaynida taqdim etilgan hujjatlar ushbu Nizomning 4 va 5-bandlarida belgilangan talablarga muvofiqligini koʻrib chiqadi.

Ayrim hollarda tanlovda qatnashish uchun berilgan investitsiya buyurtmanomasini koʻrib chiqishda loyiha boʻyicha qoʻshimcha maʼlumotlar/hujjatlar soʻralishi mumkin. Bunday holda taqdim etilgan hujjatlar “Navoiy” EIIZ direksiyasi tomonidan qoʻshimcha soʻralgan maʼlumotlar/hujjatlar taqdim etilgan paytdan boshlab 5 ish kuni mobaynida koʻrib chiqiladi.

7. Tanlovda qatnashish uchun berilgan investitsiya buyurtmanomasini koʻrib chiqish quyidagi hollarda rad etilishi mumkin, agar:

investitsiya buyurtmanomasi belgilangan talablar buzilgan holda berilgan boʻlsa;

investor tomonidan taqdim etilgan hujjatlarda:

ishonchli boʻlmagan yoki buzilgan maʼlumotlar mavjud boʻlsa;

investor taklif etilayotgan loyihani amalga oshirish uchun zarur moliyaviy mablagʻlarga va texnik vositalarga ega ekanligi yoki ega boʻlishining isboti mavjud boʻlmasa.

8. Ikkinchi bosqichda investor tomonidan taqdim etilgan investitsiya buyurtmanomalari, hujjatlar Direksiya direktori tomonidan imzolangan tegishli xulosa ilova qilingan holda “Navoiy” EIIZ direksiyasi tomonidan Maʼmuriy kengashning ishchi organiga beriladi.

9. Ishchi organ “Navoiy” EIIZ direksiyasi tomonidan taqdim etilgan investitsiya buyurtmanomalarini koʻrib chiqish uchun belgilangan tartibda Maʼmuriy kengashga kiritadi.

10. “Navoiy” EIIZ hududida ishlab chiqarishni joylashtirish uchun investorni tanlash boʻyicha qaror qabul qilishda Maʼmuriy kengash:

investorning moliyaviy va texnologik qurbini;

loyihaning umumiy iqtisodiy samaradorligi va uni amalga oshirishning maqsadga muvofiqligini (ishlab chiqarish quvvatlarini oqilona joylashtirish, tashkil etiladigan ish oʻrinlari, tarmoqdagi tarkibiy oʻzgartirishlarga taʼsiri, ishlab turgan quvvatlardan foydalanish, zarur xom ashyo, materiallar va infratuzilma mavjudligini);

ham ichki, ham tashqi bozorlarda tayyor mahsulotni sotish imkoniyati va istiqbollarini;

dastlabki 4 raqamdan biri darajasida birlamchi xom ashyo bilan taqqoslaganda TIF TN kodi boʻyicha ishlab chiqarishni mahalliylashtirish darajasi va pirovard mahsulotning tovar pozitsiyasi oʻzgarishini;

texnologik asbob-uskunalar darajasining zamonaviy sifat standartlariga (ISO 9001 va ISO 14001) muvofiqligi, loyihada xalqaro standartlarga muvofiq boʻlgan sifatni boshqarish tizimi mavjudligini;

tashkil etilayotgan korxona xodimlari shtatini jalb etilgan xodimlar umumiy sonining kamida 80 foizi miqdorida Oʻzbekiston Respublikasi fuqarolaridan butlash, ularga stajirovkadan oʻtish va malaka oshirish imkoniyatini berishni;

toʻgʻridan-toʻgʻri investitsiyalar hajmini;

Maʼmuriy kengashning qarori bilan belgilanadigan boshqa omillarni koʻrib chiqadi.

Investitsiya buyurtmanomalarini koʻrib chiqishda tayyor mahsulot ishlab chiqarishda xom ashyo va yarim tayyor mahsulotlarni izchil texnologik qayta ishlashda oʻzaro hamkorlik qiladigan yuridik shaxslar tashkil etish orqali “Navoiy” EIIZ hududida ishlab chiqarishning toʻliq siklini taʼminlashni nazarda tutadigan loyihalarga ustunlik beriladi.

11. Maʼmuriy kengash investitsiya buyurtmanomalarini 10 ish kuni mobaynida koʻrib chiqadi va:

“Navoiy” EIIZ hududida ishlab chiqarishni joylashtirish mumkinligi;

aniq va asoslangan mulohazalar va kamchiliklarni koʻrsatgan holda taqdim etilgan hujjatlar puxta ishlanishi zarurligi;

ishlab chiqarishni joylashtirish maqsadga muvofiq emasligi toʻgʻrisida qaror qabul qiladi.

12. Agar koʻrib chiqish jarayonida Maʼmuriy kengash tomonidan investor oʻzi toʻgʻrisida notoʻgʻri maʼlumotlarni taqdim etganligidan dalolat beradigan holatlar aniqlansa, uni koʻrib chiqish toʻxtatiladi va investorga asoslangan xulosa yuboriladi.

13. Ushbu Nizomning 11-bandi uchinchi xatboshiga muvofiq puxta ishlangan investitsiya buyurtmanomalari koʻrib chiqish uchun takroran bevosita Maʼmuriy kengashga kiritiladi.

14. Investitsiya buyurtmanomasi boʻyicha Maʼmuriy kengashning ijobiy qarori Maʼmuriy kengash majlisining bayonnomasi bilan rasmiylashtiriladi hamda “Navoiy” EIIZ direksiyasi va investor oʻrtasida “Navoiy” EIIZ hududida Investitsiyalash toʻgʻrisida bitim tuzish uchun asos hisoblanadi.

15. Majlis bayonnomasi nusxasi Maʼmuriy kengashning qarori bilan birgalikda Maʼmuriy kengash bayonnomasi tasdiqlangan kundan boshlab 3 ish kuni mobaynida ishchi organ tomonidan investorga yoki uning vakolatli shaxsiga yuboriladi.

16. Investor taqdim etiladigan maʼlumotlar va hujjatlarning ishonchliligi, oʻz majburiyatlarining qonun hujjatlarida belgilangan tartibda oʻz vaqtida, toʻliq va zarur tarzda bajarilishi uchun javob beradi.

17. Maʼmuriy kengash aʼzolari, ishchi organ va “Navoiy” EIIZ direksiyasi maxfiy maʼlumotlar oshkor qilinganligi, investitsiya buyurtmanomalari va unga ilova qilingan materiallar oʻz vaqtida koʻrib chiqilmaganligi va sifatsiz koʻrib chiqilganligi uchun qonun hujjatlariga muvofiq javob beradilar.

1. Ushbu Nizom “Navoiy” erkin industrial-iqtisodiy zonasi hududida xoʻjalik yurituvchi subyektlarni xoʻjalik faoliyati qatnashchilari (keyingi oʻrinlarda “Navoiy” EIIZ qatnashchisi deb ataladi) sifatida roʻyxatga olish tartibi va muddatlarini belgilaydi.

2. “Navoiy” erkin industrial-iqtisodiy zonasi (keyingi oʻrinlarda “Navoiy” EIIZ deb ataladi) qatnashchilarini roʻyxatdan oʻtkazish uch bosqichda amalga oshiriladi:

I bosqich — “Navoiy” EIIZ maʼmuriy kengashi (keyingi oʻrinlarda Maʼmuriy kengash deb ataladi) tomonidan “Navoiy” EIIZ hududida joylashtirishga investorlarni tanlash;

II bosqich — “Navoiy” EIIZ direksiyasi bilan “Navoiy” EIIZda joylashtirishga tanlovdan oʻtgan investor oʻrtasida “Navoiy” EIIZ hududida investitsiyalash toʻgʻrisidagi bitimni (keyingi oʻrinlarda investitsiyalash toʻgʻrisidagi bitim deb ataladi) kelishish va tuzish;

III bosqich — qonun hujjatlarida nazarda tutilgan hollarda davlat roʻyxatidan oʻtkazish, xoʻjalik yurituvchi subyektlarni “Navoiy” EIIZ qatnashchilari reyestriga kiritish.

3. “Navoiy” EIIZ hududida joylashtirish uchun investorlarni tanlash qonun hujjatlarida belgilangan tartibda Maʼmuriy kengash tomonidan amalga oshiriladi.

4. Oʻtkazilgan tanlov natijalari boʻyicha “Navoiy” EIIZ hududida joylashtirish uchun Maʼmuriy kengashning ijobiy qarorini olgan investorlar investitsiyalash toʻgʻrisidagi bitimni kelishish va tuzish uchun “Navoiy” EIIZ direksiyasiga murojaat qiladilar.

5. Investitsiyalash toʻgʻrisidagi bitim “Navoiy” EIIZ direksiyasi va investor (investorlar) oʻrtasida tuziladi hamda:

investitsiyalar obyekti va hajmi, “Navoiy” EIIZ hududida amalga oshiriladigan faoliyat turlari;

investitsiyalash toʻgʻrisidagi bitimning amal qilish muddatlari va shartlari;

investorning quyidagilar:

investitsiyalash hajmi, ishlab chiqarishning muayyan hajmini taʼminlash, ishlab chiqarishni mahalliylashtirishning kafolatlangan darajasi va mahsulot sifati, oʻzi ishlab chiqargan tovarlarni va ishlar (xizmatlarni) eksport qilish hajmi, atrof muhitni muhofaza qilish sohasida qonun hujjatlariga rioya qilish, tabiiy resurslardan oqilona foydalanish, mehnat haqidagi qonunlar va texnika xavfsizligi, mol-mulkni sugʻurta qilish va javobgarlik, ishlab chiqarish faoliyatining boshqa jihatlari boʻyicha huquq va majburiyatlari;

“Navoiy” EIIZ direksiyasining huquq va majburiyatlari:

loyiha-smeta hujjatlarini tayyorlash, pudrat ishlariga shartnomalar tuzish muddatlari, moliyalashtirish manbalari, loyihani amalga oshirish jadvallari, investitsiya loyihasini amalga oshirish ustidan texnik nazorat qilish tartibi toʻgʻrisidagi maʼlumotlar;

investor tomonidan oʻz majburiyatlari bajarilishi toʻgʻrisida hisobotlar taqdim etish tartibi va muddatlari;

joylashish joyi va ajratiladigan yer uchastkasi oʻlchami;

investitsiyalash toʻgʻrisidagi bitim shartlariga rioya qilinmaganligi uchun tomonlarning javobgarligi;

investitsiyalash toʻgʻrisidagi bitimga oʻzgartirishlar kiritish tartibi;

investitsiyalash toʻgʻrisidagi bitimni toʻxtatish tartibi;

investitsiyalash toʻgʻrisidagi bitimdan kelib chiqadigan nizolarni hal etish tartibi va koʻrib chiqish joyiga doir koʻrsatmalarni oʻz ichiga olishi kerak.

Investitsiyalash toʻgʻrisidagi bitimda investitsiya loyihasining oʻziga xosligiga qarab boshqa shartlar, shu jumladan quyidagi shartlar boʻlishi mumkin:

ishlab chiqarish, muhandislik infratuzilmasi va ijtimoiy infratuzilmani rivojlantirish boʻyicha tomonlarning oʻzaro majburiyatlari;

Oʻzbekiston Respublikasining jismoniy shaxslaridan boʻlgan xodimlarni yollash va oʻqitish boʻyicha investorning majburiyatlari, texnologiyalardan foydalanish shartlari, shuningdek tashkil etilgan xoʻjalik yurituvchi subyekt xodimlarini oʻqitish boʻyicha investorning majburiyatlari.

6. Investitsiyalash toʻgʻrisidagi bitimni tayyorlash uchun investor “Navoiy” EIIZ direksiyasiga quyidagi hujjatlarni taqdim etadi:

investitsiyalash toʻgʻrisidagi bitim loyihasi;

“Navoiy” EIIZ hududida joylashtirish uchun Maʼmuriy kengashning ijobiy qarori nusxasi;

loyihaning biznes-rejasi nusxasi.

7. Investordan ushbu Nizomning 6-bandida koʻrsatilmagan qoʻshimcha maʼlumotlarni talab qilish taqiqlanadi.

8. Investorlar Oʻzbekiston Respublikasi qonun hujjatlariga muvofiq taqdim etiladigan maʼlumotlar va hujjatlarning ishonchliligi va haqiqiyligi uchun javob beradilar.

9. Investitsiyalash toʻgʻrisidagi bitim loyihasi va boshqa materiallar “Navoiy” EIIZ direksiyasi tomonidan ular olingan kundan boshlab 10 ish kuni mobaynida koʻrib chiqiladi.

Zaruriyat boʻlganda “Navoiy” EIIZ direksiyasi investitsiyalash toʻgʻrisidagi bitimning ayrim qoidalari boʻyicha vakolatli davlat organlarining xulosasini soʻrashi mumkin. Bunda investitsiyalash toʻgʻrisidagi bitim loyihasini koʻrib chiqishning umumiy muddati ushbu bandning birinchi xatboshida koʻrsatilgan muddatdan ortiq boʻlmasligi kerak.

10. Zaruriyat boʻlgan taqdirda investitsiyalash toʻgʻrisidagi bitim qoidalarini kelishish maqsadida “Navoiy” EIIZ direksiyasi bilan investor (investorlar) oʻrtasida muzokaralar oʻtkazilishi mumkin.

11. Investitsiyalash toʻgʻrisidagi bitim investitsiyalash toʻgʻrisidagi bitimda belgilangan muddatga va “Navoiy” EIIZ direksiyasi faoliyat koʻrsatishidan ortiq boʻlmagan muddatga tuziladi.

12. Investor bilan “Navoiy” EIIZ direksiyasi oʻrtasida investitsiyalash toʻgʻrisidagi bitim investor tomonidan tashkil etilgan xoʻjalik yurituvchi subyektga “Navoiy” EIIZ qatnashchisining guvohnomasi berilgan sanadan boshlab kuchga kiradi.

13. Investitsiyalash toʻgʻrisidagi bitimning amal qilishi:

investitsiyalash toʻgʻrisidagi bitim tuzilgan muddat tamom boʻlgandan keyin;

shaxs “Navoiy” EIIZ qatnashchisi maqomidan mahrum etilgan taqdirda;

“Navoiy” EIIZ muddatidan oldin tugatilgan taqdirda;

qonun hujjatlarida nazarda tutilgan boshqa hollarda toʻxtatiladi.

14. Investor investitsiyalash toʻgʻrisidagi bitim imzolangan paytdan boshlab 10 ish kuni mobaynida qonun hujjatlarida nazarda tutilgan hollarda roʻyxatdan oʻtkazuvchi organga u tomonidan tashkil etilayotgan xoʻjalik yurituvchi subyektni davlat roʻyxatidan oʻtkazish uchun zarur boʻlgan tegishli hujjatlarni taqdim etadi.

15. “Navoiy” EIIZ hududida joylashtirish uchun investorlar tomonidan tashkil etilayotgan xoʻjalik yurituvchi subyektlarni davlat roʻyxatidan oʻtkazish yuridik shaxslarni davlat roʻyxatidan oʻtkazish uchun Oʻzbekiston Respublikasi qonun hujjatlarida belgilangan tartibda amalga oshiriladi.

16. Davlat roʻyxatidan oʻtkazish uchun zarur hujjatlarni tayyorlash investorning ixtiyoriga koʻra:

investorning oʻzi tomonidan;

shartnoma asosida — “Navoiy” EIIZ direksiyasi yoxud boshqa shaxslar tomonidan amalga oshiriladi.

17. Davlat roʻyxatidan oʻtkazish amalga oshirilgandan keyin investor tomonidan “Navoiy” EIIZ direksiyasiga quyidagi hujjatlar taqdim etiladi:

“Navoiy” EIIZ qatnashchisi reyestriga kiritishga ariza;

yuridik shaxs davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

“Navoiy” EIIZ qatnashchisi sifatida Maʼmuriy kengash tomonidan belgilangan miqdorda roʻyxatdan oʻtkazilganlik uchun toʻlov toʻlanganligini tasdiqlaydigan hujjatlar.

18. “Navoiy” EIIZ direksiyasi taqdim etilgan hujjatlar asosida ikki ish kuni mobaynida xoʻjalik yurituvchi subyektni “Navoiy” EIIZ qatnashchilari reyestriga kiritadi va “Navoiy” EIIZ qatnashchisi guvohnomasini beradi.

19. “Navoiy” EIIZ direksiyasi “Navoiy” EIIZ qatnashchilari reyestriga tegishli yozuv kiritilgan kundan boshlab bir kun muddatda oʻz hududida joylashgan davlat soliq va bojxona xizmati organlari boʻlinmalariga xoʻjalik yurituvchi subyekt “Navoiy” EIIZ qatnashchilari reyestriga kiritilganligi toʻgʻrisidagi maʼlumotlarni maʼlum qiladi.

20. “Navoiy” EIIZ direksiyasi tomonidan beriladigan “Navoiy” EIIZ qatnashchisi guvohnomasi xoʻjalik yurituvchi subyektlar “Navoiy” EIIZ qatnashchisi sifatida roʻyxatdan oʻtkazilganligini tasdiqlaydigan hujjat hisoblanadi.

21. Taʼsis hujjatlarida qayd etilgan “Navoiy” EIIZ qatnashchisining ustav fondi qonun hujjatlarida belgilangan muddatlarda shakllantirilishi kerak.

22. “Navoiy” EIIZ qatnashchilari ishlab chiqarish dasturlarini mustaqil shakllantiradilar va oʻzlari ishlab chiqargan oʻzlari toʻliq tasarruf qiladigan mahsulotlarni (ishlar, xizmatlarni) sotadilar, “Navoiy” EIIZ hududida ishlab chiqarilgan tovarlar, ishlar (xizmatlar) boʻyicha qonun hujjatlariga muvofiq har qanday tashqi iqtisodiy operatsiyalarni amalga oshirish huquqiga egadirlar.

23. Xoʻjalik yurituvchi subyektni “Navoiy” EIIZ qatnashchisi maqomidan mahrum qilishga faqat “Navoiy” EIIZ qatnashchisi tomonidan qonun hujjatlari va investitsiyalash toʻgʻrisidagi bitim buzilgan taqdirda “Navoiy” EIIZ direksiyasining arizasi boʻyicha yoʻl qoʻyiladi hamda bu investitsiyalash toʻgʻrisidagi bitimning amal qilishi toʻxtatilishiga olib keladi.

“Navoiy” EIIZ direksiyasi sudning xoʻjalik yurituvchi subyektni “Navoiy” EIIZ qatnashchisi maqomidan mahrum etish toʻgʻrisidagi qarori kuchga kirgan sanadan boshlab uch kun mobaynida “Navoiy” EIIZ qatnashchilari reyestriga xoʻjalik yurituvchi subyektlar “Navoiy” EIIZ qatnashchisi maqomidan mahrum etilganligi toʻgʻrisidagi yozuvni kiritadi.

24. “Navoiy” EIIZ direksiyasi “Navoiy” EIIZ qatnashchilari reyestriga tegishli yozuv kiritilgan kundan boshlab bir kun muddatda oʻz hududida joylashgan davlat soliq va bojxona organlariga xoʻjalik yurituvchi subyekt “Navoiy” EIIZ qatnashchisi maqomidan mahrum etilganligi toʻgʻrisidagi maʼlumotlarni maʼlum qiladi.