LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
G‘o‘zani o‘z vaqtida va sifatli defoliatsiya qilish, dalalarni paxta hosilini erta muddatlarda yig‘ishtirib olishga tayyorlash va paxta terish mashinalaridan samarali foydalanish maqsadida:
1. O‘zbekiston Respublikasi Qishloq va suv xo‘jaligi vazirligining Qoraqalpog‘iston Respublikasi Vazirlar Kengashi va viloyatlar hokimliklari bilan kelishilgan 2008-yilda g‘o‘za defoliatsiya qilinadigan 1-ilovaga* muvofiq maydonlar va uning maqbul muddatlari to‘g‘risidagi taklifi qabul qilinsin.
* 1-ilova rus tilidagi matnda berilgan.
2. Qoraqalpog‘iston Respublikasi Vazirlar Kengashi, viloyatlar va tumanlar hokimliklari g‘o‘zaning yetilish davri, navi va joylardagi ob-havo-iqlim sharoitlarini hisobga olgan holda g‘o‘za ekilgan muddatlari, paxta ochilishi jadalligini hamda tumanlar va fermer xo‘jaliklari bo‘yicha g‘o‘zani 1-ilovada belgilangan maydonlar va muddatlarda defoliatsiya qilish yuzasidan tegishli qarorlar qabul qilsinlar.
G‘o‘za belgilangan muddatlarda sifatli defoliatsiya qilinishi va defoliantlarni ishlatish normalari hamda tavsiyalariga qat’iy rioya etilishi uchun shaxsiy javobgarlik Qoraqalpog‘iston Respublikasi Vazirlar Kengashi Raisi, viloyatlar va tumanlar hokimlari, O‘zbekiston Respublikasi qishloq va suv xo‘jaligi vaziri zimmalariga yuklansin.
O‘zbekiston Respublikasi Bosh prokuraturasi defoliatsiya o‘tkazilishi, eng avvalo defoliantlarni ishlatish muddatlari va belgilangan normalariga rioya etilishi ustidan qat’iy nazorat o‘rnatsin.
joriy yilning 15-avgustigacha defoliatsiyaga tayyorgarlik ko‘rish va olib borish ishlarini muvofiqlashtiruvchi respublika ishchi ekspert komissiyasini, shuningdek Qoraqalpog‘iston Respublikasi, viloyatlar va tumanlarda ekspert ishchi komissiyalarini tashkil qilsin, ularning tarkibiga O‘zbekiston Respublikasi Qishloq va suv xo‘jaligi vazirligi, Respublika o‘simliklarni himoya qilish va agrokimyo markazi, “O‘zpaxtasanoat” uyushmasi, O‘zbekiston “Sifat” markazi, “Qishloqxo‘jalikkimyo” hududiy aksiyadorlik jamiyatlari mutaxassislarini kiritsin;
ishchi komissiyalar bilan birgalikda defoliatsiya ishlari o‘tkazilishi ustidan qat’iy va doimiy nazoratni ta’minlasin hamda agrotexnika tadbirlarini o‘tkazish borasida belgilangan muddatlar va normalarga rioya etishni ta’minlamayotgan mansabdor shaxslarga nisbatan qattiq shaxsiy javobgarlik choralarini ko‘rsin.
4. Qoraqalpog‘iston Respublikasi Vazirlar Kengashi, viloyatlar hokimliklari, O‘zbekiston Respublikasi Qishloq va suv xo‘jaligi vazirligi, “O‘zkimyosanoat” davlat aksiyadorlik kompaniyasi, “O‘zagromashservis” uyushmasi, “Qishloqxo‘jalikkimyo” hududiy aksiyadorlik jamiyatlari joriy yilning 20-avgustigacha:
fermer xo‘jaliklari bo‘yicha defoliatsiya o‘tkazish maydonlarini aniqlasinlar va har bir tuman bo‘yicha defoliantlar bilan ta’minlash hamda ularni alohida ajratilgan joylarda tayyorlash uchun tegishli shart-sharoitlar yaratish, defoliatsiyani maqbul muddatlarda tashkil etish va o‘tkazish tadbirlarini ishlab chiqsinlar. G‘o‘za defoliatsiya qilinadigan maydonlarni aniqlashda urug‘lik chigit maydonlari hisobga olinmasin;
defoliatsiyani yerda bajariladigan usullar bilan o‘tkazish uchun texnik vositalar va apparatlar tayyorlanishini tugallasinlar;
maydonchalarni tayyorlashni taxt qilib qo‘ysinlar va ularda defoliantlar eritmasini tayyorlash uchun zarur idishlar va boshqa texnik vositalar mavjud bo‘lishini ta’minlasinlar.
5. “O‘zbekiston havo yo‘llari” milliy aviakompaniyasi “O‘zkimyosanoat” DAK buyurtmanomalari bo‘yicha g‘o‘za defoliatsiyasini o‘tkazish uchun samolyotlar ajratsin va ular 2-ilovaga* muvofiq taqsimlab berilgan holda mintaqalarga 2008-yil 15-avgustgacha yetib borishini ta’minlasin.
* 2-ilova rus tilidagi matnda berilgan.
Viloyatlar hokimliklari joriy yilning 15-avgustiga qadar maxsus aerodromlar tayyorlanishini, shu jumladan uchuvchilar uchun zarur maishiy sharoitlar yaratilishini tugallasinlar.
6. “O‘zneftmahsulot” kompaniyasi yonilg‘i-moylash materiallarining zarur zaxirasini yaratsin hamda purkagichlar va samolyotlar ishini ta’minlash uchun g‘o‘zani defoliatsiya qilish davrida ularning belgilangan tartibda uzluksiz yetkazib berilishini tashkil etsin.
7. O‘zbekiston Respublikasi Moliya vazirligi, Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi bir hafta muddatda, asosli buyurtmanomalarga binoan tijorat banklariga fermer xo‘jaliklari uchun g‘o‘za defoliatsiyasini o‘tkazishga zarur kredit mablag‘larini, kelgusida ulardan defoliantlar xarid qilish hamda “Qishloqxo‘jalikkimyo” hududiy aksiyadorlik jamiyatlari va “SAR” aviakompaniyasi xizmatlariga haq to‘lash uchun foydalanish maqsadida, belgilangan tartibda ajratib bersin.
8. Mazkur Qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.