Oʻzbekiston Respublikasining “Qimmatli qogʻozlar bozori toʻgʻrisida”gi Qonuniga (Oʻzbekiston Respublikasining qonun hujjatlari toʻplami, 2008-y., 29-30-son, 278-modda), Oʻzbekiston Respublikasi Vazirlar Mahkamasining 2008-yil 28-iyul 160-sonli “Qimmatli qogʻozlar bozori infratuzilmasini rivojlantirishga oid qoʻshimcha chora-tadbirlar toʻgʻrisida”gi qaroriga (Oʻzbekiston Respublikasining qonun hujjatlari toʻplami, 2008-y., 31-32-son, 298-modda), shuningdek Oʻzbekiston Respublikasi Vazirlar Mahkamasining 1996-yil 30-martdagi 126-sonli qarori bilan tasdiqlangan “Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi toʻgʻrisida”gi nizomga muvofiq (Oʻzbekiston Respublikasi Hukumatining qarorlari toʻplami, 1996-y., 3-son, 11-modda) buyuraman:

1. Qimmatli qogʻozlar bozorida professional faoliyatni birga qoʻshib olib borishga doir cheklashlar va birga qoʻshib olib borish tartibi, qimmatli qogʻozlar bozori professional ishtirokchilarining majburiy normativlar tizimi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish Markazi Bosh direktorining 2003-yil 11-sentabrdagi 2003-15-sonli “Investitsiya institutlari faoliyatining iqtisodiy normativlari toʻgʻrisidagi nizomni tasdiqlash haqida”gi buyrugʻi (2003-yil 30-sentabr, roʻyxat raqami 1280 — Meʼyoriy hujjatlar axborotnomasi, 2003-y., 17-18-son) oʻz kuchini yoʻqotgan deb topilsin.

3. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiritilsin.

Mazkur Nizom Oʻzbekiston Respublikasining “Qimmatli qogʻozlar bozori toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2008-y., 29-30-son, 278-modda), Oʻzbekiston Respublikasi Vazirlar Mahkamasining 2008-y. 28-iyuldagi 160-sonli “Qimmatli qogʻozlar bozori infratuzilmasini rivojlantirishga oid qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami 2008-y., 31-32-son, 298-modda) qarori va boshqa qonun hujjatlariga muvofiq qimmatli qogʻozlar bozorida professional faoliyatni birga qoʻshib olib borishga doir cheklashlar va birga qoʻshib olib borish tartibi, qimmatli qogʻozlar bozori professional ishtirokchilarining majburiy normativlar tizimini oʻrnatadi.

1. Mazkur Nizomda quyidagi asosiy tushunchalar qoʻllaniladi:

qimmatli qogʻozlar bozori professional ishtirokchilarining majburiy normativlar tizimi (keyingi oʻrinlarda — majburiy normativlar tizimi) — qimmatli qogʻozlar bozori professional ishtirokchisi tomonidan qimmatli qogʻozlar bozorida professional faoliyatni birga qoʻshib olib borishda rioya etish uchun majburiy boʻlgan oʻz mablagʻlarining miqdori;

qimmatli qogʻozlar bozorida professional faoliyat (keyingi oʻrinlarda — professional faoliyat) — qimmatli qogʻozlarni chiqarish, joylashtirish va ularning muomalasi bilan bogʻliq xizmatlar koʻrsatish boʻyicha litsenziyalanadigan faoliyat turi;

qimmatli qogʻozlar bozorining professional ishtirokchisi (keyingi oʻrinlarda — professional ishtirokchi) — qimmatli qogʻozlar bozorida professional faoliyatni amalga oshiruvchi yuridik shaxs;

vakolatli davlat organi — Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi.

2. Mazkur Nizomning majburiy normativlar tizimiga rioya etish va oʻz mablagʻlarining miqdori toʻgʻrisidagi maʼlumotlarni taqdim etish boʻyicha talablari Qimmatli qogʻozlar markaziy depozitariysi, fond birjalari va fond boʻlimlarini tashkil etgan boshqa birjalar, shuningdek tijorat banklari va sugʻurtalovchilar boʻlgan professional ishtirokchilarga tatbiq qilinmaydi.

3. Professional faoliyatning har bir qismi uchun oʻz mablagʻlarining eng kam miqdori qonun hujjatlarida belgilanadi.

4. Majburiy normativlar tizimi professional faoliyatning qismlarini birga qoʻshib olib borish uchun oʻrnatilgan oʻz mablagʻlarining eng kam miqdoriga talablarning eng koʻpi belgilanadi.

Professional faoliyatning bir qismini amalga oshirish niyatidagi shaxsning (litsenziya talabgorining) oʻz mablagʻlari miqdori litsenziyani olishga ariza berish paytida oʻz mablagʻlarining muvofiq eng kam miqdoriga, professional faoliyatni birga qoʻshib olib borish niyati boʻlgan taqdirda — majburiy normativlar tizimiga muvofiq boʻlishi kerak.

5. Professional ishtirokchining oʻz mablagʻlari miqdori butun professional faoliyat davomida oʻz mablagʻlarining muvofiq eng kam miqdoriga, professional faoliyatni birga qoʻshib olib borgan taqdirda — majburiy normativlar tizimiga muvofiq boʻlishi kerak.

6. Agarda professional ishtirokchining tashkiliy-huquqiy shakl uchun ustav kapitalining (fondi) eng kam miqdoriga talablar qonun hujjatlarida mazkur Nizomda belgilangan majburiy normativlar tizimi va oʻz mablagʻlari eng kam miqdorlariga boʻlgan talablardan farqli belgilangan boʻlsa, ulardan koʻprogʻi qoʻllaniladi.

7. Professional ishtirokchi har chorakda, hisobot davridan keyingi oyning oʻninchi sanasidan kechiktirmasdan vakolatli davlat organiga oʻz mablagʻlarining miqdori toʻgʻrisidagi maʼlumotlarni taqdim etadi.

Professional ishtirokchi tomonidan oʻz mablagʻlari miqdorining hisobi qonun hujjatlarida belgilangan tartibda amalga oshiriladi.

8. Vakolatli davlat organi belgilangan tartibda professional ishtirokchining oʻz mablagʻlarining hisoblangan miqdorini toʻgʻriligi va ular taqdim etgan maʼlumotlarning haqiqiyligini tekshirishga haqli.

9. Qonun hujjatlari va mazkur Nizomga muvofiq professional faoliyatning birga qoʻshib olib boriladigan (qoʻshimcha) qismi professional faoliyatning amalga oshirilayotgan qismi bilan birga qoʻshib olib borilishi kerak.

10. Qimmatli qogʻozlar bozorida professional faoliyatni mazkur Nizomning IV-boʻlimida belgilangan holatlardan tashqari:

a) investitsiya vositachisini (brokerni, dilerni) investitsiya maslahatchisi, investitsiya aktivlarini ishonchli boshqaruvchisi, depozitariy, transfer-agent professional faoliyati bilan;

b) investitsiya maslahatchisini investitsiya vositachisi, investitsiya aktivlarini ishonchli boshqaruvchisi, depozitariy, transfer-agent professional faoliyati bilan;

v) investitsiya aktivlarini ishonchli boshqaruvchisini investitsiya vositachisi, investitsiya maslahatchisi, depozitariy, transfer-agent professional faoliyati bilan;

g) depozitariyni investitsiya vositachisi, investitsiya maslahatchisi, investitsiya aktivlarini ishonchli boshqaruvchisi, transfer-agent professional faoliyati bilan;

d) hisob-kitob-kliring palatasini qimmatli qogʻozlarning birjadan tashqari savdosi tashkilotchisi professional faoliyati bilan;

e) transfer-agentni investitsiya vositachisi, investitsiya maslahatchisi, investitsiya aktivlarini ishonchli boshqaruvchisi, depozitariy professional faoliyati bilan;

j) qimmatli qogʻozlarning birjadan tashqari savdosi tashkilotchisini hisob-kitob-kliring palatasi professional faoliyatlarni birga qoʻshib olib borishga yoʻl qoʻyiladi.

11. Professional ishtirokchi professional faoliyatni birga qoʻshib olib borishda birga qoʻshib olib borilayotgan professional faoliyatning har bir qismi boʻyicha qimmatli qogʻozlar bilan operatsiyalarning yakka hisobini tashkil etishi, shuningdek u tomonidan amalga oshirilayotgan professional faoliyatni qonun hujjatlari talablariga muvofiqligi ustidan ichki nazoratni tashkil etishi va amalga oshirishi kerak.

12. Professional ishtirokchilar qonun hujjatlarida belgilangan tartibda professional faoliyatga taalluqli boʻlmagan tadbirkorlik faoliyatini amalga oshirishga haqli.

13. Professional ishtirokchilarga mazkur Nizomning 10-bandi bilan nazarda tutilmagan professional faoliyatni birga qoʻshib olib borish taqiqlanadi.

14. Transfer-agent va depozitariyning professional faoliyatlarini birga qoʻshib olib boruvchi professional ishtirokchi investitsiya vositachisining professional faoliyatini amalga oshirishga haqli emas.

15. Investitsiya fondining investitsiya aktivlarining ishonchli boshqaruvchisi depozitariy boʻla olmaydi.

16. Qimmatli qogʻozlar markaziy depozitariysi faqat trasfer-agent va (yoki) hisob-kitob-kliring palatasining professional faoliyatini birga qoʻshib olib borishi mumkin.

17. Professional ishtirokchining ushbu shaxslar nomidan qimmatli qogʻozlar bilan operatsiyalarni amalga oshiruvchi va xizmatlar koʻrsatuvchi va (yoki) qimmatli qogʻozlar bozorida ishlarni bajaruvchi rahbari va xodimlari boshqa professional ishtirokchilarda lavozimlarni egallashga haqli emas.

18. Mazkur Nizom talablarini buzilishida aybdor shaxslar qonun hujjatlariga muvofiq javobgar boʻladilar.

19. Mazkur Nizom talablariga rioya etilishi ustidan nazoratni vakolatli davlat organi amalga oshiradi.