Oʻzbekiston Respublikasi Prezidentining 2008-yil 15-iyuldagi PQ-916-sonli “Innovatsion loyihalar va texnologiyalarni ishlab chiqarishga tatbiq etishni ragʻbatlantirish borasidagi qoʻshimcha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 29-30-son, 280-modda) muvofiq qaror qilamiz:

1. Har yili oʻtkaziladigan Innovatsion gʻoyalar, texnologiyalar va loyihalar Respublika yarmarkasida tuzilgan shartnomalar va kelishuv bayonnomalarining amalga oshirish monitoringi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Ushbu Nizom Oʻzbekiston Respublikasi Prezidentining 2008-yil 15-iyuldagi PQ-916-sonli “Innovatsion loyihalar va texnologiyalarni ishlab chiqarishga tatbiq etishni ragʻbatlantirish borasidagi qoʻshimcha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 29-30-son, 280-modda) muvofiq har yili oʻtkaziladigan Innovatsion gʻoyalar, texnologiyalar va loyihalar Respublika yarmarkasida (bundan keyingi oʻrinlarda — Yarmarka deb yuritiladi) tuzilgan shartnomalar va kelishuv bayonnomalarining (bundan keyingi oʻrinlarda — kelishuv deb yuritiladi) amalga oshirilishini monitoring (bundan keyingi oʻrinlarda monitoring deb yuritiladi) qilish tartibini belgilaydi.

1. Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi (bundan keyingi oʻrinlarda Qoʻmita deb yuritiladi) va Oʻzbekiston Respublikasi Iqtisodiyot vazirligi bilan hamkorlikda tashkil etiladigan Ishchi guruh tomonidan Yarmarkada tuziladigan shartnomalar va kelishuvlarning amalga oshirilishi masalasi boʻyicha monitoring olib boriladi.

2. Ishchi guruh tarkibi Oʻzbekiston Respublikasi Iqtisodiyot vazirligi va Qoʻmitaning qoʻshma qarori bilan tasdiqlanadi.

3. Monitoring obyekti — Yarmarka doirasida tuzilgan shartnomalar va kelishuv bayonnomalari hisoblanadi.

4. Ishchi guruhning asosiy vazifalari quyidagilardan iborat:

Yarmarkada ishtirok etayotgan innovatsion gʻoyalar, loyihalar va texnologiyalar (bundan keyingi oʻrinlarda — innovatsion loyihalar deb yuritiladi) boʻyicha maʼlumotlar bankini shakllantirish;

davlat va xoʻjalik boshqaruv organlariga kelishuvlarning oʻz vaqtida va samarali amalga oshirilishini taʼminlashda koʻmaklashish;

innovatsion loyihalarni amalga oshirishning barcha bosqichlarida toʻsqinlik qilayotgan omillarini aniqlash, oʻrganish va ularni bartaraf etish boʻyicha tezkor choralar koʻrish;

innovatsiya jarayonlarini takomillashtirish borasida takliflar ishlab chiqish.

5. Tasarrufida oliy taʼlim va ilmiy-tadqiqot muassasalari, loyiha-konstruktorlik tashkilotlari boʻlgan idoralar (bundan keyingi oʻrinlarda — vazirlik va idoralar deb yuritiladi) har yili fevral oyida oʻz yoʻnalishlariga muvofiq holda Yarmarkada ishtirok etadigan innnovatsion loyihalar boʻyicha maʼlumotlar bankini shakllantirib boradi.

Ilmiy-tadqiqot va tajriba-konstruktorlik ishlari bilan shugʻullanadigan mustaqil idora va tashkilotlar (bundan keyingi oʻrinlarda — boshqa tashkilotlar deb yuritiladi) hamda jismoniy shaxslar Yarmarkada ishtirok etuvchi loyihalar toʻgʻrisidagi maʼlumotlarni Ishchi guruhga taqdim etadilar.

Ushbu Nizomning 1-ilovasiga muvofiq maʼlumotlar banki va axborotlar har yili fevral oyining oʻninchi sanasigacha Ishchi guruhga taqdim etiladi.

6. Har yili 1-mart kunigacha Ishchi guruh tomonidan Yarmarkada ishtirok etuvchi innovatsiya loyihalari boʻyicha maʼlumotlar banki shakllantiriladi.

7. Vazirlik va idoralar, oʻz idoralari doirasida tuzilgan kelishuvlarning amaliyoti boʻyicha monitoring oʻtkazadilar va yigʻma maʼlumotlarni Ishchi guruhga taqdim etadilar.

Boshqa tashkilotlar ham kelishuvlar boʻyicha maʼlumotlarni Ishchi guruhga taqdim etadilar.

8. Ishchi guruh tuzilgan kelishuvlarni roʻyxatga oladi, iqtisodiyot tarmoqlari, ishlanmalar mualliflari va buyurtmachilar boʻyicha tahliliy maʼlumotnomalarni tayyorlaydi.

Ushbu Nizomning 2-ilovasiga muvofiq monitoring natijalari har chorakning oxirgi oyining yigirmanchi sanasiga qadar vazirlik va idoralar tomonidan Ishchi guruhga taqdim etiladi.

9. Kelishuvlarni bajarish monitoringi quyidagi tartibda amalga oshiriladi:

a) buyurtmachilar tomonidan shartnomalarning bajarilayotganligi, shartnomalarni amalga oshirish borasida bajarilishi lozim boʻlgan ishlar majmui reja boʻyicha amalga oshayotganligi tahlil qilib boriladi;

b) buyurtmachilar tomonidan moliyalashtirish oʻz vaqtida amalga oshirilayotganligi va ijrochilarning mablagʻlardan samarali foydalanayotganliklari tahlil qilinadi;

v) vazirlik va idoralar hamda boshqa tashkilotlar tomonidan amalga oshirilgan monitoring yakunlari tahlil qilinadi.

10. Ishchi guruh tomonidan monitoring natijalariga muvofiq quyidagilar tayyorlanadi:

a) iqtisodiyot tarmoqlari, vazirliklar, idoralar, xoʻjalik subyektlari va viloyatlar boʻyicha tahliliy materiallar;

b) innovatsiya loyihalarining tashabbuskorlari tomonidan taqdim etiladigan, tasdiqlangan rejalar va kelishuvlar bajarilishining borishi haqida tahliliy maʼlumotlar;

v) innovatsiya loyihalarini amalga oshirish ishlarining borishi haqidagi umumlashtirilgan statistik maʼlumotlar;

g) loyihalarning oʻz vaqtida moliyalashtirilayotganligi haqidagi maʼlumotlar.

11. Ishchi guruh kelgusi chorakning birinchi oyining oʻninchi sanasiga qadar vazirlik va idoralar hamda boshqa tashkilotlardan olingan maʼlumotlar asosida kelishuvlarning amalga oshirilishining borishi haqida umumlashtirilgan maʼlumotlar tayyorlaydi.

12. Ishchi guruh kelishuvlarning amalga oshirilishi borasidagi umumlashtirilgan tahliliy maʼlumotlar asosida:

a) mavjud innovatsiya loyihalarining amalga oshirilishi bosqichlarini oʻrganib boradi, yuzaga kelayotgan toʻsiqlarni aniqlaydi, qabul qilingan qarorlarning samaradorligini tahlil qiladi;

b) innovatsiya jarayonining samaradorligini oshirish yoʻlida tegishli qarorlarni tayyorlash borasida tegishli ishlarni tashkil qiladi;

v) vazirliklar, idoralar, tashkilotlar va mahalliy davlat boshqaruvi organlari bilan hamkorlikda kelishuvlarning amalga oshirilishi yoʻlidagi mavjud muammolarni echish boʻyicha takliflar tayyorlaydi.

13. Monitoring natijalari Yarmarkani oʻtkazish boʻyicha Muvofiqlashtiruvchi ishchi guruhga har chorakda taqdim etiladi.

14. Ushbu Nizom Oʻzbekiston Respublikasi Fanlar akademiyasi va Oʻzbekiston Respublikasi Davlat statistika qoʻmitasi bilan kelishilgan.