Oʻzbekiston Respublikasi Prezidentining 2008-yil 25-noyabrdagi PF-4056-sonli “Jahon chempionatlarida yuqori natijalarga erishganligi uchun Oʻzbekiston Respublikasi sportchilarini mukofotlash tartibini takomillashtirish toʻgʻrisida”gi Farmoniga asosan Oʻzbekiston Respublikasi Moliya vazirligi va Madaniyat va sport ishlari vazirligi qaror qiladi:

1. Jahon chempionatlarida yuqori natijalarga erishganligi uchun Oʻzbekiston Respublikasi sportchilariga bir martalik pul mukofotlarini toʻlash tartibi toʻgʻrisidagi nizom ilovaga muvofiq tasdiqlansin.

2. Respublika pul-kredit siyosati komissiyasi tomonidan 1999-yil 11-dekabrda 120-son va Oʻzbekiston Respublikasi Moliya vazirligi tomonidan 1999-yil 8-sentabrda 74-son bilan tasdiqlangan “Jahon birinchiliklarida yuqori natijalarga erishganligi uchun Oʻzbekiston Respublikasi sportchilariga pul mukofotlarini toʻlash tartibi” (2000-yil 6-yanvar, roʻyxat raqami 868 — Meʼyoriy hujjatlar axborotnomasi, 2000-yil, 1-son) oʻz kuchini yoʻqotgan deb topilsin.

3. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgandan oʻn kundan soʻng kuchga kiradi.

Ushbu Nizom Oʻzbekiston Respublikasi Prezidentining 2008-yil 25-noyabrdagi PF-4056-sonli “Jahon chempionatlarida yuqori natijalarga erishgani uchun Oʻzbekiston Respublikasi sportchilarini mukofotlash tartibini takomillashtirish toʻgʻrisida”gi Farmoniga muvofiq, Olimpiya oʻyinlari dasturlariga kiruvchi sport turlari boʻyicha jahon chempionatlarida yuqori natijalarga erishganligi uchun Oʻzbekiston Respublikasi sportchilarini bir martalik pul mukofotlari bilan taqdirlash tartibini belgilaydi.

1. Bir martalik pul mukofotlari Olimpiya oʻyinlari dasturlariga kiruvchi sport turlari boʻyicha jahon chempionatlari gʻoliblari va sovrindorlari boʻlgan Oʻzbekiston Respublikasi sportchilariga toʻlanadi.

2. Jahon chempionatlarida oltin, kumush va bronza medallarini qoʻlga kiritgan Oʻzbekiston Respublikasi sportchilari jahon chempionatlari gʻoliblari va sovrindorlari hisoblanadi.

3. Jahon chempionatlari gʻoliblari va sovrindorlari boʻlgan Oʻzbekiston Respublikasi sportchilari quyidagi miqdorda bir martalik pul mukofoti bilan taqdirlanadi:

oltin medal — 12 000 AQSH dollari;

kumush medal — 6 000 AQSH dollari;

bronza medal — 3 000 AQSH dollari.

4. Jahon chempionatlarida oltin, kumush va bronza medallarini qoʻlga kiritgan sportchilarni bir martalik pul mukofoti bilan taqdirlash xarajatlari Oʻzbekiston Respublikasi Madaniyat va sport ishlari vazirligining tegishli yil uchun ommaviy-sport tadbirlari taqvim rejasida ushbu maqsadlar uchun koʻzda tutilgan mablagʻlar hisobidan amalga oshiriladi.

5. Oʻzbekiston Respublikasi Soliq kodeksiga muvofiq jahon chempionatlarida sovrinli oʻrinlarni egallagan sportchilar olgan bir martalik toʻlanadigan pul mukofotlari jismoniy shaxslardan olinadigan daromad soligʻiga tortilmaydi, shuningdek yagona ijtimoiy toʻlov va sugʻurta badallari boʻyicha soliqqa solish obyekti hisoblanmaydi.

6. Koʻrsatilgan xarajatlarni moliyalashtirish uchun zarur boʻlgan mablagʻlar Oʻzbekiston Respublikasi Moliya vazirligi tomonidan keyingi moliyaviy yil uchun Davlat budjeti xarajatlarini shakllantirish jarayonida koʻzda tutiladi.

7. Budjet mablagʻlarini ajratish, ularni erkin muomaladagi valyutaga ayirboshlash va bir martalik toʻlanadigan pul mukofotlarini toʻlash, sportchilarni jahon birinchiliklariga yuboruvchi Madaniyat va sport ishlari vazirligi va boshqa vakolatli tashkilotlar taqdimnomasiga muvofiq Oʻzbekiston Respublikasi Vazirlar Mahkamasining farmoyishiga asosan amalga oshiriladi.

8. Vakolatli tashkilotlar tomonidan Oʻzbekiston Respublikasi Vazirlar Mahkamasi farmoyishining nusxasi taqdim etilgandan soʻng Oʻzbekiston Respublikasi Moliya vazirligi Gʻaznachiligi Oʻzbekiston Respublikasi valyuta birjasida erkin muomaladagi valyutani xarid qilish uchun milliy valyutadagi mablagʻlarni vakolatli bankka oʻtkazib beradi.

9. Vakolatli bank qonunchilik hujjatlarida belgilangan tartibda gʻolib sportchiga AQSH dollarida talab qilib olguncha omonat (depozit) hisob-varagʻini ochib beradi.

10. Vakolatli bank oʻrnatilgan tartibda belgilangan mablagʻni vakolatli tashkilotlar taqdim etgan tegishli hujjatlarga asosan AQSH dollarida jahon chempionatlarida oltin, kumush va bronza medallarini qoʻlga kiritgan Oʻzbekiston Respublikasi sportchilarining talab qilib olguncha omonat (depozit) hisobvaragʻiga oʻtkazib beradi va omonat daftarchasini rasmiylashtirib beradi.

11. Ushbu Nizom talablarini buzilishida aybdor boʻlgan shaxslar qonunchilik hujjatlarida belgilangan tartibda javob beradi.

12. Ushbu Nizom Oʻzbekiston Respublikasi Markaziy banki bilan kelishilgan.