Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzurida Ijtimoiy tadqiqotlar institutini tashkil etish toʻgʻrisida” 2008-yil 30-iyuldagi PQ-930-son qarorini bajarish yuzasidan va Ijtimoiy tadqiqotlar instituti faoliyatini samarali tashkil etish uchun zarur shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Davlat mulki qoʻmitasi, “Gʻalla-bank” aksiyadorlik-tijorat banki va “Oʻzbekyengilsanoat” davlat-aksiyadorlik kompaniyasining:

Toshkent shahar, Yakkasaroy tumani, U.Nosir koʻchasi, 53 “b” manzilidagi binoni (keyingi oʻrinlarda olinayotgan bino deb ataladi), ushbu binoga mulkchilik huquqini “Gʻalla-bank” aksiyadorlik-tijorat bankiga rasmiylashtirgan holda tutash hudud bilan birga “Oʻzbekyengilsanoat” davlat-aksiyadorlik kompaniyasi balansidan “Gʻalla-bank” aksiyadorlik-tijorat banki balansiga berish toʻgʻrisidagi takliflariga rozilik berilsin.

2. Toshkent shahar hokimligi ikki hafta muddatda:

bank rejim talablarini taʼminlash uchun yer qoʻshib berilishi hisobga olingan holda olinayotgan binoga tutash hudud bilan birga yer uchastkasi chegaralarini belgilasin va “Gʻalla-bank” aksiyadorlik-tijorat bankiga ajratib bersin;

olinayotgan bino boʻyicha tarmoqlarni rivojlantirishda ulushli qatnashishsiz “Gʻalla-bank” aksiyadorlik-tijorat bankining loyiha ehtiyojlariga muvofiq shahar muhandislik kommunikatsiyalariga ulanishga texnik shartlar berilishini taʼminlasin;

olinayotgan binoga joylashgan Oʻzbekiston Respublikasi jangchi-faxriy-baynalmilalchilar respublika birlashmasi qayta joylashtirilishini taʼminlasin.

3. Amaldagi qonun hujjatlariga muvofiq “Gʻalla-bank” aksiyadorlik-tijorat banki olinayotgan binodagi xonalarga “Oʻzbekyengilsanoat” davlat-aksiyadorlik kompaniyasi bilan “Riter” servis va oʻquv markazi firmasi (Shveysariya) oʻrtasida tuzilgan ijara shartnomasi boʻyicha huquqiy voris hisoblanishi maʼlumot uchun qabul qilinsin.

4. Institut ikki hafta muddatda:

Institutning shtat jadvalini Oʻzbekiston Respublikasi Moliya vazirligi bilan kelishsin;

Institut binosini joriy taʼmirlashni loyihalashtirishga shartnoma tuzsin va bir oy muddatda belgilangan tartibda pudrat tashkilotni tanlash boʻyicha tanlov oʻtkazsin.

5. Oʻzbekiston Respublikasi Moliya vazirligi Institut faoliyatini tashkil etish bilan bogʻliq boʻlgan mebel, tashkiliy texnika, aloqa vositalari bilan jihozlashga, ikkita yengil avtomobil sotib olish va ularni saqlashga, axborot bosma nashrlariga, shu jumladan xorijiy nashriyotlarning bosma nashrlariga obuna boʻlishni tashkil etishga, Institutning binosini joriy taʼmirlash boʻyicha xarajatlarga Institutning asoslangan hisob-kitoblari boʻyicha Oʻzbekiston Respublikasi Vazirlar Mahkamasining zaxira jamgʻarmasidan mablagʻ ajratsin.

6. “Oʻzavtosanoat” aksiyadorlik kompaniyasi 2008-yil oxirigacha Institut uchun bittadan “Neksiya” markali va “Damas” markali avtomobil ajratsin.

7. “Fayz” xolding kompaniyasi Institut buyurtmasi olingandan keyin bir oy muddatda ofis mebeli, shuningdek inventar tayyorlanishi va yetkazib berilishini taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.