Oʻzbekiston Respublikasi Prezidentining 2008-yil 21-maydagi “Sugʻurta xizmatlari bozorini yanada isloh qilish va rivojlantirishga oid qoʻshimcha chora-tadbirlar toʻgʻrisida”gi PQ-872-son qarori (Oʻzbekiston Respublikasi qonun hujjatlari toʻplami, 2008-y., 20-21-son, 172-modda) ijrosini taʼminlash maqsadida Oʻzbekiston Respublikasi Moliya vazirligi va Davlat raqobat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markazi qaror qiladilar:

1. Ilova qilinayotgan Sugʻurtalovchilar tomonidan qimmatli qogʻozlar bozorida investitsiya vositachisi sifatida professional faoliyatning amalga oshirilish tartibi toʻgʻrisidagi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

Mazkur Nizom Oʻzbekiston Respublikasi Prezidentining 2008-yil 21-maydagi “Sugʻurta xizmatlari bozorini yanada isloh qilish va rivojlantirishga oid qoʻshimcha chora-tadbirlar toʻgʻrisida”gi PQ-872-son qaroriga (Oʻzbekiston Respublikasi qonun hujjatlari toʻplami, 2008-y., 20-21-son, 172-modda) muvofiq sugʻurtalovchilar tomonidan qimmatli qogʻozlar bozorida investitsiya vositachisi sifatida professional faoliyatini amalga oshirish tartibini belgilaydi.

1. Sugʻurtalovchi qimmatli qogʻozlar bozorida investitsiya vositachisi sifatida professional faoliyatni Oʻzbekiston Respublikasi Istiqbolli loyihalar milliy agentligida sugʻurta faoliyatini amalga oshirish uchun litsenziya olingan vaqtdan boshlab amalga oshirish huquqiga ega. Bunda, sugʻurtalovchilar tomonidan qimmatli qogʻozlar bozorida investitsiya vositachisi sifatida professional faoliyatni amalga oshirish uchun litsenziya olinishi talab qilinmaydi.

2. Sugʻurtalovchi qimmatli qogʻozlar bozorida investitsiya vositachisi sifatida professional faoliyatni qonunchilik hujjatlari va mazkur Nizom bilan oʻrnatilgan talablarga rioya qilgan holda amalga oshiradi.

3. Sugʻurtalovchi oʻzining tizimida sugʻurtalovchi tomonidan faqat qimmatli qogʻozlar bozorida investitsiya vositachisi sifatida professional faoliyatni amalga oshirish bilan bogʻliq operatsiyalarni amalga oshirish vazifalari yuklatilgan boʻlinmaga ega boʻlishi lozim.

4. Yuqorida koʻrsatilgan boʻlinmaning xodimlari Istiqbolli loyihalar milliy agentligi (bundan buyon matnda qimmatli qogʻozlar bozorini tartibga soluvchi vakolatli davlat organi) tomonidan qonunchilik hujjatlarida belgilangan tartibda berilgan qimmatli qogʻozlar bilan operatsiyalarni amalga oshirish huquqini beruvchi malaka attestatiga ega boʻlishi lozim. Bunda, ushbu boʻlinma rahbari boʻlgan xodim qimmatli qogʻozlar bilan operatsiyalarni amalga oshirish huquqini beruvchi I toifali malaka attestatiga ega boʻlishi lozim.

5. Sugʻurtalovchining qimmatli qogʻozlar bozorida investitsiya vositachisi sifatida professional faoliyatni amalga oshirish bilan bogʻliq hujjatlari yuqorida koʻrsatilgan boʻlinma rahbari tomonidan imzolangan (viza qoʻyilgan) boʻlishi lozim.

6. Qimmatli qogʻozlar bozorida investitsiya vositachisi sifatida professional faoliyatni amalga oshiruvchi sugʻurtalovchi tomonidan axborotning oshkor qilinishi qonunchilik hujjatlarida oʻrnatilgan tartibda amalga oshiriladi.

7. Sugʻurtalovchilar qimmatli qogʻozlar bozorida investitsiya vositachisi sifatida professional faoliyatni amalga oshirishda sugʻurta siri toʻgʻrisidagi qonunchilik hujjatlari talablariga rioya qilishlari lozim, shuningdek qimmatli qogʻozlar bozori toʻgʻrisidagi qonunchilik hujjatlariga muvofiq maxfiy boʻlgan axborotga ega boʻlgan holda, ushbu axborotdan bitimlar tuzish uchun foydalanish va ushbu axborotni bitimlar tuzish uchun uchinchi shaxslarga berish huquqiga ega emaslar.

8. Qimmatli qogʻozlar bozorini tartibga soluvchi vakolatli davlat organi qimmatli qogʻozlar bozorida investitsiya vositachisi sifatida professional faoliyatni amalga oshiruvchi sugʻurtalovchidan u tomonidan amalga oshirilgan qimmatli qogʻozlar bilan bogʻliq operatsiyalar va bitimlar boʻyicha axborotni qonunchilik hujjatlarida belgilangan tartibda soʻrash va olish huquqiga ega.

9. Qimmatli qogʻozlar bozorida investitsiya vositachisi sifatida professional faoliyatni amalga oshiruvchi sugʻurtalovchilarning faoliyatini tartibga solish va nazorat qilish, qimmatli qogʻozlar bozori faoliyatini tartibga soluvchi vakolatli davlat organi tomonidan amalga oshiriladi.

10. Qimmatli qogʻozlar bozorida investitsiya vositachisi sifatida professional faoliyatni amalga oshiruvchi sugʻurtalovchi tomonidan qimmatli qogʻozlar bozori toʻgʻrisidagi qonunchilik hujjatlari buzilgan taqdirda, qimmatli qogʻozlar bozorini tartibga soluvchi vakolatli davlat organi sugʻurtalovchiga nisbatan qonunchilik hujjatlarida nazarda tutilgan choralarni qoʻllash huquqiga ega.

11. Mazkur Nizom talablarining bajarilishini nazorat qilish qimmatli qogʻozlar bozorini tartibga soluvchi vakolatli davlat organi tomonidan amalga oshiriladi.

12. Mazkur Nizom talablarini buzganlikda aybdor boʻlgan shaxslar qonunchilik hujjatlariga muvofiq javobgar boʻladi.