“Yoshlar yili” Davlat dasturining ijrosi yuzasidan hamda mamlakatning real iqtisodiyot tarmoqlari va sohalarida talab etiladigan yo‘nalishlar va mutaxassisliklar bo‘yicha oliy ma’lumotli mutaxassislarni maqsadli hamda sifatli tayyorlash, shuningdek ijtimoiy-iqtisodiy rivojlanish va iqtisodiyotning tarkibiy qayta tuzilishi istiqbollarini hisobga olgan holda yuqori malakali mutaxassislarni tayyorlash tizimini yanada takomillashtirish maqsadida:

1. Ma’lumot uchun qabul qilinsinki, O‘zbekiston Respublikasi Prezidentining “Real iqtisodiyot tarmoqlari va sohalarida talab etiladigan professional kadrlar tayyorlashni ta’minlash chora-tadbirlari to‘g‘risida” 2008-yil 1-apreldagi R-2961-sonli Farmoyishi bilan tuzilgan maxsus Respublika komissiyasi tomonidan:

real iqtisodiyot tarmoqlari va sohalarining yo‘nalishlari hamda aniq mutaxassisliklar bo‘yicha tayyorlanadigan oliy o‘quv yurtlari bitiruvchilariga bo‘lgan muayyan talab tanqidiy o‘rganilgan;

2012-yilgacha bo‘lgan davrda tarmoqlar va mintaqalar doirasida bakalavrlar va magistrlar soni hamda ularni tayyorlash yo‘nalishlari bo‘yicha makroiqtisodiy rivojlanish va iqtisodiyotning tarkibiy qayta tuzilishi yuzasidan mo‘ljallangan istiqbollarni hisobga olgan holda oliy ma’lumotli mutaxassislarga talab belgilangan;

oliy ma’lumotli mutaxassislarni tayyorlash amalga oshiriladigan yo‘nalishlar va mutaxassisliklar muvofiqligini tanqidiy tahlil qilish, real iqtisodiyot tarmoqlari va sohalarining ularga nisbatan potensial talabi asosida oliy o‘quv yurtlari mutaxassisliklari ro‘yxatiga o‘zgartishlar kiritish bo‘yicha aniq takliflar tayyorlangan;

vazirliklar, idoralar, xo‘jalik birlashmalari va yirik korxonalar, oliy o‘quv yurtlari bitiruvchilarining potensial iste’molchilari ishtirokida oliy ma’lumotli mutaxassislarga bo‘lgan talabni o‘rganish bo‘yicha olib borilgan ishlar asosida 2008/2009 o‘quv yiliga bakalavriat va magistratura mutaxassislarini tayyorlash yo‘nalishlari doirasida respublika oliy ta’lim muassasalariga qabul qilish kvotalari bo‘yicha takliflar tayyorlangan.

2. Respublika komissiyasining 2008/2009 o‘quv yilida:

bakalavrlar tayyorlash bo‘yicha umumiy qabul soni 58000 nafar, shu jumladan, 19945 nafar davlat grantlari va 38055 nafar to‘lov-kontrakt asosida ularni oliy ta’lim muassasalari va ta’lim yo‘nalishlari bo‘yicha 1-ilovaga* muvofiq taqsimlash;

magistrlar tayyorlash bo‘yicha umumiy qabul soni 5500 nafar, shu jumladan, 1510 nafar davlat grantlari va 3990 nafar to‘lov-kontrakt asosida ularni oliy ta’lim muassasalari va mutaxassisliklar bo‘yicha 2-ilovaga* muvofiq taqsimlash;

oliy ta’lim muassasalari tarkibida tashkil etilgan maxsus sirtqi bo‘limlarga o‘rta maxsus ma’lumot va tegishli ta’lim turi bo‘yicha kamida uch yil amaliy ish stajiga ega bo‘lgan pedagog kadrlardan, shuningdek, bolalar sporti murabbiylaridan bakalavrlar tayyorlash uchun umumiy qabul soni 5605 nafar, shu jumladan, 1265 nafar davlat grantlari va 4340 nafar to‘lov-kontrakt asosida ularni oliy ta’lim muassasalari va ta’lim yo‘nalishlari bo‘yicha 3-ilovaga* muvofiq taqsimlash orqali belgilash bo‘yicha taklifi ma’qullansin.

3. 2008/2009 o‘quv yilida O‘zbekiston Respublikasi ta’lim muassasalariga qabul qilish va real iqtisodiyot tarmoqlari va sohalarini yuqori malakali mutaxassislar bilan ta’minlash bo‘yicha Davlat komissiyasining tarkibi 4-ilovaga* muvofiq tasdiqlansin, uning zimmasiga oliy o‘quv yurti bitiruvchilarining real iqtisodiyot tarmoqlari va sohalarida talab etilishini tahlil qilish asosida yo‘nalishlar va mutaxassisliklar bo‘yicha oliy o‘quv yurtiga qabul qilish yuzasidan aniq takliflar tayyorlash vazifalari yuklansin.

Davlat komissiyasiga, test sinovlari natijalaridan kelib chiqib, belgilangan umumiy qabul kvotalari doirasida oliy ta’lim muassasalari bakalavriati va magistraturasi qabul ko‘rsatkichlariga zarur o‘zgartirishlar kiritishga ruxsat berilsin.

4. Oliy ta’lim muassasalariga ega bo‘lgan vazirlik va idoralar Davlat test markazi bilan birgalikda bir hafta muddat ichida o‘zlariga qarashli oliy ta’lim muassasalarida davlat grantlari va to‘lov-kontrakt asosidagi bakalavriat va magistratura bo‘yicha o‘rinlar kvotasini ta’lim tillariga qarab taqsimlashga oid takliflarni O‘zbekiston Respublikasi ta’lim muassasalariga qabul qilish bo‘yicha Davlat komissiyasiga tasdiqlash uchun kiritsin.

5. O‘zbekiston Respublikasi Davlat statistika qo‘mitasi doimiy asosda:

korxonalar, tashkilotlar, muassasalarni oliy ma’lumotli kadrlar bilan ta’minlash to‘g‘risida ma’lumotlarni to‘plash, umumlashtirish va tahlil qilingani hamda iqtisodiyotning real sektorlari va tarmoqlari hamda hududlarining oliy ta’lim yo‘nalishlari va mutaxassisliklari bo‘yicha bakalavr va magistrlarga bo‘lgan aniq talabini belgilashni amalga oshirsin;

har yili 15-yanvargacha bo‘lgan muddatda O‘zbekiston Respublikasi Iqtisodiyot vazirligiga oliy ta’lim yo‘nalishlari, mutaxassisliklari va hududlar bo‘yicha mamlakatning oliy ta’lim muassasalarida ularni tayyorlashdagi vaqtinchalik bo‘shliqni hisobga olgan holda iqtisodiyotning real sektorlarida bakalavr va magistrlarga bo‘lgan talab to‘g‘risida ma’lumotlar taqdim etsin.

6. O‘zbekiston Respublikasi Iqtisodiyot vazirligi Mehnat va aholini ijtimoiy muhofaza qilish vazirligi, Oliy va o‘rta maxsus ta’lim vazirligi, oliy ta’lim muassasalariga ega bo‘lgan boshqa vazirliklar va idoralar bilan birgalikda:

doimiy asosda yo‘nalishlar, mutaxassisliklar va aniq kasblar bo‘yicha iqtisodiyotning real tarmoqlari va sohalarida, respublika mintaqalari doirasida oliy o‘quv yurtlari bitiruvchilariga bo‘lgan talab bo‘yicha monitoring olib borsin;

iqtisodiyot tarmoqlari va sektorlarini oliy ma’lumotli kadrlar bilan ta’minlanishini hamda iqtisodiyot tarmoqlari va hududlarda aniqlangan oliy ta’lim yo‘nalishi va mutaxassisliklari bo‘yicha bakalavr va magistrlarga bo‘lgan talabning ekspert baholanishini amalga oshirsin;

iqtisodiyot tarmoqlari hamda hududlarning oliy ta’lim yo‘nalishlari va mutaxassisliklari bo‘yicha bakalavr va magistrlarga bo‘lgan real talab asosida grant va shartnoma to‘lovi bilan qabul qilish bo‘yicha kvotalarni belgilagan holda kelayotgan o‘quv yiliga bakalavr va magistrlarni qabul qilish tizimi parametrlarini belgilasin;

har yili 1-aprelgacha bo‘lgan muddatda O‘zbekiston Respublikasi Vazirlar Mahkamasi huzuridagi Davlat komissiyasiga oliy ta’lim yo‘nalishlari va mutaxassisliklari bo‘yicha oliy ta’lim muassasalariga bakalavr va magistrlarni qabul qilish bo‘yicha asoslangan kelishilgan takliflarni ko‘rib chiqish uchun taqdim etsin.

7. O‘zbekiston Respublikasi Moliya vazirligi 2008/2009 o‘quv yilida davlat grantlari asosida bakalavriat, magistratura hamda maxsus sirtqi bo‘limlarga belgilangan qabul kvotalarini hisobga olgan holda budjetdan zarur mablag‘lar ajratilishini ta’minlasin.

8. Mazkur Qarorning ijrosini nazorat qilish O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.