Oʻzbekiston Respublikasi Prezidentining “Xorijiy investitsiyalar va kreditlarni jalb etish hamda oʻzlashtirish jarayonini takomillashtirish chora-tadbirlari toʻgʻrisida” 2008-yil 24-iyuldagi PQ-927-son qaroriga muvofiq Oʻzbekiston Respublikasi Vazirlar Mahkamasi qaror qiladi:

Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

1. Vazirlar Mahkamasining 1992-yil 23-noyabrdagi 553-son qarori (Oʻzbekiston Respublikasi QT, 1992-y., 12-son, 37-modda) bilan tasdiqlangan Oʻzbekiston Respublikasi Moliya vazirligi toʻgʻrisidagi Nizomning 9-bandiga quyidagi mazmundagi xatboshi qoʻshilsin:

“vazirlikka yuklangan boshqa funksiyalarni belgilangan tartibda amalga oshiradi”.

2. Vazirlar Mahkamasining 2003-yil 22-yanvardagi 37-son qarori (Oʻzbekiston Respublikasi QT, 2003-y., 1-son, 10-modda) bilan tasdiqlangan Oʻzbekiston Respublikasi Iqtisodiyot vazirligi toʻgʻrisidagi Nizomda:

a) 9-bandga quyidagi mazmundagi xatboshi qoʻshilsin:

“xorijiy investitsiyalar va kreditlarni jalb etish va oʻzlashtirish jarayonida idoraviy boʻysunishidan qatʼi nazar, barcha xoʻjalik yurituvchi subyektlar faoliyatini muvofiqlashtirish”;

b) 10-bandda:

uchinchi xatboshi quyidagi tahrirda bayon qilinsin:

“mamlakat iqtisodiyotini rivojlantirishning muvozanatliligini, mamlakatda mavjud boʻlgan tabiiy, mineral-xomashyo, ishlab chiqarish, ilmiy-texnik va mehnat salohiyatidan, shuningdek tegishli infratuzilmadan samarali foydalanishni taʼminlashni hisobga olgan holda mamlakatni ijtimoiy-iqtisodiy rivojlantirishning mintaqalar, iqtisodiyot tarmoqlari va sektorlari boʻyicha qisqa muddatli va oʻrta muddatli prognozlari va dasturlarini ishlab chiqishni tashkil etadi va muvofiqlashtiradi”;

yigirma ikkinchi xatboshi quyidagi tahrirda bayon qilinsin:

“uzoq muddatli prognozlar, rivojlantirish ustuvorliklari, tarkibiy oʻzgartirishlar, shuningdek ishlab chiqarish va ijtimoiy infratuzilmani rivojlantirish yoʻnalishlari asosida xalqaro moliya tuzilmalari, xorijiy moliya va sugʻurta tashkilotlari hamda donor mamlakatlar bilan birgalikda amalga oshirish taklif qilinayotgan ustuvor investitsiya loyihalarini puxta ishlab chiqadi va ularning portfelini shakllantiradi”;

quyidagi mazmundagi xatboshi qoʻshilsin:

“vazirlikka yuklangan boshqa funksiyalarni belgilangan tartibda amalga oshiradi”.