I. Investitsiya dasturini shakllantirish bosqichida oʻzaro hamkorlik qilish

Loyiha tashabbuskorlari (vazirliklar, idoralar, xoʻjalik birlashmalari, xoʻjalik yurituvchi subyektlar, mahalliy hokimiyat organlari)

1. Tarmoqlar va hududlar korxonalarini rivojlantirish, modernizatsiya qilish, texnik va texnologik qayta jihozlash dasturlarini ishlab chiqish.

2. Tashabbus qilinadigan investitsiya loyihalari boʻyicha investitsiya takliflari va zarur hujjatlarni oʻz vaqtida va sifatli tayyorlash.

3. Investitsiya loyihalarini Investitsiya dasturiga kiritish uchun zarur hujjatlarni Iqtisodiyot vazirligiga taqdim etish.

Iqtisodiyot vazirligi

1. Investorlarning investitsiya takliflarini koʻrib chiqish va Investitsiya dasturi ishlab chiqilishini tashkillashtirish.

2. XMII va XHMTlar ishtirokida amalga oshirilishi taklif etilayotgan investitsiya loyihalari portfelini shakllantirish.

3. Davlat investitsiya qoʻmitasiga xorijiy investitsiya va kreditlarni jalb qilish boʻyicha takliflarni taqdim etish.

4. Investitsiya dasturini tasdiqlash uchun Vazirlar Mahkamasiga kiritish.

Oʻzbekiston Respublikasi Davlat investitsiya qoʻmitasi

1. Xorijiy investitsiya va kreditlarni jalb qilish uchun investitsiya takliflarining yagona bazasini shakllantirish va doimiy yangilab borish.

2. Loyihalar tashabbuskorlari va davlat organlariga xorijiy investitsiyalar va kreditlarni jalb qilish va oʻzlashtirish, erishilgan kelishuvlarni rasmiylashtirish boʻyicha koʻmaklashish va faoliyatini muvofiqlashtirish.

Vazirlar Mahkamasining axborot-tahliliy departamentlari (ATD)

1. Investitsiya dasturi, rivojlantirish tarmoq dasturlari, korxonalarni modernizatsiya qilish, texnik va texnologik jihatdan qayta jihozlash dasturlarining kiritiladigan loyihalarini har tomonlama tahlil qilish va ekspertizadan oʻtkazish.

2. XMII va XHMTlar bilan xorijiy investitsiya va kreditlarni jalb qilish masalalari boʻyicha hamkorlik qilish dasturlari ishlab chiqilishini muvofiqlashtirish.

Vazirlar Mahkamasi

Investitsiya dasturi, tarmoq va mintaqalarni rivojlantirishning oʻrta muddatli dasturlari, korxonalarni modernizatsiya qilish, texnik va texnologik jihatdan qayta jihozlash dasturlarini tasdiqlash.

II. Investitsiya dasturini amalga oshirish bosqichida oʻzaro hamkorlik

Davlat investitsiya qoʻmitasi

1. Salohiyatli xorijiy investorlar va kreditorlarga amalga oshirilishi taklif etilayotgan investitsiya takliflari haqidagi maʼlumotlarni yetkazish.

2. Xorijiy investorlar va kreditorlarning takliflarini umumlashtirish va tahlil qilish, ularni tashabbuskorga, Iqtisodiyot vazirligiga, Moliya vazirligiga, Tiklanish va taraqqiyot jamgʻarmasiga yuborish.

3. Qonunchilikda belgilangan holatlarda xorijiy investor bilan Hukumat nomidan investitsiya shartnomalarini tuzish.

Loyiha tashabbuskorlari

1. Xorijiy investor va kreditorlar bilan erishilgan kelishuvlarni rasmiylashtirish va imzolash.

2. Loyihani amalga oshirishning tarmoq jadvalini ishlab chiqish, Iqtisodiyot vazirligi va Davlat investitsiya qoʻmitasi bilan kelishish.

3. Loyihalarni samarali va oʻz vaqtida amalga oshirishni taʼminlash, jalb qilinadigan investitsiyalar va kreditlarni maqsadli ishlatish, tashqi qarzlar boʻyicha majburiyatlarni oʻz vaqtida qaytarish.

Vazirlar Mahkamasi ATD

Loyihalarni amalga oshirishning tarmoq jadvallarini tasdiqlash.

Moliya vazirligi

Hukumatning tegishli qarorlari asosida Oʻzbekiston Respublikasi nomidan moliyaviy bitimlarni rasmiylashtirish yoki Oʻzbekiston Respublikasi kafolatlarini berish.

Vazirlar Mahkamasi

Investitsiya loyihalarining DTIA/DTIH va TIA/TIHlarini tasdiqlash.

III. Xorijiy investitsiyalar va kreditlar jalb qilingan loyihalar amalga oshirilishini nazorat qilish

Iqtisodiyot vazirligi

Investitsiya dasturiga kiritilgan loyihalar amalga oshirilishi, oʻz vaqtida ishga tushirilishi, amalga oshirilgan loyihalar boʻyicha TIA koʻrsatkichlariga va ishlab chiqarish quvvatlaridan foydalanish darajasiga erishilishini monitoring qilib borish.

Moliya vazirligi

Oʻzbekiston Respublikasi nomidan yoki kafolati ostida jalb qilinadigan mablagʻlarni oʻzlashtirishning hisobini yuritish, Oʻzbekiston Respublikasi nomidan berilgan kafolatlar boʻyicha majburiyatlar oʻz vaqtida bajarilishini monitoring qilish.

Davlat investitsiya qoʻmitasi

Xorijiy investorlar va kreditorlar tomonidan qabul qilingan majburiyatlar oʻz vaqtida ijro etilishi va moliyalashtirish ochilishi, xorijiy investitsiya va kreditlar oʻzlashtirilishini monitoring qilish.

Vazirlar Mahkamasi

Xorijiy investitsiyalar va kreditlar jalb qilingan, Investitsiya dasturiga kiritilgan loyihalarning amalga oshirilishini har oyda Rayosat majlislarida koʻrib chiqish.