Oʻzbekiston Respublikasi Hukumati va Birlashgan Arab Amirliklari Hukumati, keyinchalik “Tomonlar” deb ataluvchilar,

ikki tomonlama munosabatlarni rivojlantirish, doʻstlik aloqalarini mustahkamlash va samarali hamkorlikni kengaytirish yoʻlida,

keng miqyosda atrof-muhit muammolarini hal etish yoʻllarini izlab topishni anglagan holda atrof-muhit boshqaruvini taʼminlash, ikkala davlatning oʻzaro hamkorligi orqali koʻp qirrali hamkorlikni talab qiluvchi ikki Tomonning turli va umumiy koʻrinishga ega boʻlgan ekologik muammolarini anglagan holda va ushbu muammolarni bartaraf etishda Tomonlarning saʼy-harakatlari talab qilinishidan kelib chiqqan holda,

shuningdek, atrof-muhitni muhofaza qilish hamda uning sifatini yaxshilashga qaratilgan faoliyatni yuritishni hamda Oʻzbekiston Respublikasi Tabiatni muhofaza qilish davlat qoʻmitasi va Birlashgan Arab Amirliklari Atrof-muhit va suv xoʻjaligi vazirligi oʻrtasida atrof-muhit sohasiga yoʻnaltirilgan oʻzaro manfaatli hamkorlikni mustahkamlashni tan olib, Tomonlarning atrof-muhitni oʻzaro muhofaza qilish sohasida Anglashuv memorandumini qabul qilish istagida,

Ushbu Memorandum Muqaddimasi uning barcha moddalarini ajralmas qismi sifatida qabul qilinadi.

Tomonlar atrof-muhit muhofazasi va tabiiy resurslardan oqilona foydalanish sohalaridagi mahalliy, mintaqaviy va xalqaro miqyoslarda oʻzaro hurmat, tenglik va manfaatdorlik hamda ikkala mamlakatning atrof-muhitni muhofaza qilish va iqtisodiyot sohalaridagi siyosatlarining farqlanishini inobatga olgan holda hamkorlikni rivojlantirishda ishtirok etadilar. Ushbu hamkorlik atrof-muhit muhofazasi va tabiiy resurslardan samarali foydalanishning oʻzaro manfaatli yoʻnalishlarini kuchaytirishga qaratilgan.

Ushbu Anglashuv memorandumi doirasida amalga oshiriladigan hamkorlik quyidagi yoʻnalishlarni qamrab oladi.

1. Biologik resurslarni muhofaza qilish va boshqarish.

2. Yoʻrgʻa tuvaloq, lochin va shu kabi boshqa noyob va yoʻq boʻlib ketish xavfi ostida boʻlgan hayvonlarning turlarini muhofaza qilish.

3. Ilmiy izlanish va atrof-muhitni muhofaza qilish maqsadlarida tabiiy parvarishxonalar, buyurtmaxonalar yoki boshqa turdagi muhofaza etiladigan hududlar tashkil qilish.

4. “Yoʻq boʻlib ketish xavfi ostidagi yovvoyi fauna va flora turlarining xalqaro savdosi toʻgʻrisida”gi Konvensiya (SITES) qoidalarini qoʻllash va ularga amal qilish.

5. Ekologik toza muqobil energiya manbaalaridan foydalanish.

6. Ekologik turizmni rivojlantirish.

7. Ekologik taʼlim-tarbiya va tashviqot tadbirlari.

8. Atrof-muhitni yaxshilash va muhofaza qilishga qaratilgan boshqa yoʻnalishlardagi kelishilgan hamkorlik.

Ushbu Memorandumning 3-moddasidan kelib chiqqan holda hamkorlik quyidagi shakllarda amalga oshiriladi:

1. Ushbu Memorandumning 3-moddasida koʻrsatib oʻtilgan yoʻnalishlar boʻyicha qoʻshma dasturlar va loyihalarni rivojlantirish.

2. Davlatlarning maxfiy boʻlmagan maʼlumotlari, materiallari va izlanishlar natijalari bilan oʻrnatilgan tartibda oʻzaro almashish.

3. Oʻzaro maslahatlashuvlar, ekspertlar uchrashuvlari, maʼruza va maqolalarni nashr etish, tadqiqot ishlar hamda delegatsiyalar va mutaxassislar tashriflarini almashish orqali atrof-muhitni muhofaza qilish sohasida oʻzaro tajriba almashish.

4. Malaka oshirish va oʻquv kurslari bilan shugʻullanuvchi qoʻshma ishchi guruhlar tashkil qilish.

5. Atrof-muhitni muhofaza qilish sohasidagi qonunchilik bazasini takomillashtirish.

Tomonlar ushbu Memorandumning asosiy yoʻnalishlarini belgilaydilar va birgalikda mazkur Memorandum asosida faoliyatlarini muvofiqlashtiradilar hamda natijalarni umumlashtiradilar.

Ushbu Memorandum kuchga kirgan kundan boshlab, Tomonlarning masʼul organlari mazkur Memorandum vazifalarini bajarish maqsadida, hamkorlikning qoʻshma Dasturini va uni bajarish yuzasidan tadbirlar rejasini ishlab chiqadilar.

Mazkur Memorandumning har bir moddasini talqin qilishda yuzaga keladigan kelishmovchiliklar Tomonlar oʻrtasida muzokaralar va uchrashuvlar orqali hal etiladi va bunda ingliz tilidagi matn asos sifatida qaraladi.

Ushbu Anglashuv memorandumi maqsadlarini bajarishda har bir Tomonning moddiy holatidan kelib chiqqan holda birgalikdagi faoliyatlari natijasiga qarab, transport va yashash xarajatlarini har bir Tomon oʻz zimmasiga oladi.

Mazkur Anglashuv memorandumi Tomonlarning boshqa davlatlar bilan imzolagan xalqaro shartnomalari va anglashuv memorandumlaridan kelib chiqadigan huquq va majburiyatlariga daxl qilmaydi.

Ushbu Anglashuv memorandumi Tomonlar davlatlarining amaldagi barcha qonunchiligi, meʼyoriy hujjatlari, qarorlari va tizimlariga muvofiq tarzda amalga oshiriladi.

Mazkur Anglashuv memorandumiga har qanday oʻzgartish va qoʻshimchalar Tomonlarning yozma roziligi asosida kiritiladi va ushbu Memorandumning ajralmas qismi hisoblanadi.

Ushbu Anglashuv memorandumi imzolangan kundan boshlab kuchga kiradi va besh yil mobaynida amal qiladi. Tomonlardan biri amaldagi muddat tugashidan kamida olti oy ilgari boshqa Tomonni mazkur Memorandumni amal qilish muddatini toʻxtatish niyati toʻgʻrisida yozma ravishda xabardor qilmasa, uning amal qilish muddati oʻz-oʻzidan uzaytirilaveradi.

Mazkur Memorandum amal qilish muddatining toʻxtatilishi, agar Tomonlar boshqacha kelishmagan boʻlsalar, ushbu Memorandumning amal qilish davrida boshlangan qoʻshma dasturlarga taʼsir qilmaydi.

Abu Dabi shahrida 2008-yil 17-martda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega. Ushbu Memorandum qoidalarini talqin etishda kelishmovchiliklar yuzaga kelgan holda, Tomonlar uchun ingliz tilidagi matn ustuvor hisoblanadi.