Qimmatli qogʻozlar bozori infratuzilmasini yanada rivojlantirish, uning subyektlarini institutsional jihatdan mustahkamlash, qimmatli qogʻozlar bozorining professional ishtirokchilari faoliyatiga zamonaviy axborot texnologiyalarini joriy etish hamda ularning faoliyatini tartibga solish tizimini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi va qimmatli qogʻozlar bozori ishtirokchilarining 2011-yildan boshlab:

qimmatli qogʻozlar bozori infratuzilmasi institutlari faoliyatini va ularning oʻzaro hamkorligini muvofiqlashtirishni kuchaytirishni, hisobga olish tizimini soddalashtirishni, shuningdek qimmatli qogʻozlarga oid bitishuvlarga hisob-kitob-kliring xizmati koʻrsatishni takomillashtirishni;

qimmatli qogʻozlar bozori ishtirokchilarining dasturiy-texnik taʼminotini birxillashtirish va standartlashtirishni, elektron hujjat aylanishini keng koʻlamda joriy etishni va undan foydalanishni;

jismoniy shaxslarning qimmatli qogʻozlarga oid operatsiyalarda, shu jumladan qimmatli qogʻozlarning plastik kartochkalardan foydalangan holda oldi-sotdi operatsiyalarida ishtirokini soddalashtirishni;

qimmatli qogʻozlar bozori maʼlumotlarning yagona axborot bazasini shakllantirish uchun shart-sharoitlar yaratishni taʼminlaydigan Qimmatli qogʻozlar bozorining Yagona dasturiy taʼminot kompleksini (keyingi oʻrinlarda matnda Yagona dasturiy taʼminot kompleksi deb yuritiladi) joriy etish toʻgʻrisidagi taklifiga rozilik berilsin.

2. Oʻzbekiston Respublikasi Davlat mulki qoʻmitasi, Oʻzbekiston aloqa va axborotlashtirish agentligi Qimmatli qogʻozlar markaziy davlat depozitariysi, “Toshkent” respublika fond birjasi va “Elsis-kliring” hisob-kitob-kliring palatasi bilan birgalikda bir oy muddatda, ishlab chiqish va joriy etishning bosqichliligini, uning sifat va xavfsizlik standartlariga muvofiqligini taʼminlash chora-tadbirlarini, shuningdek qimmatli qogʻozlar bozorida ilgʻor axborot texnologiyalarini qoʻllash sohasida mutaxassislar tayyorlashni nazarda tutuvchi Yagona dasturiy taʼminot kompleksini joriy etish chora-tadbirlari dasturini tasdiqlasinlar.

3. Belgilansinki:

Qimmatli qogʻozlar markaziy davlat depozitariysi Yagona dasturiy taʼminot kompleksini ishlab chiqish va joriy etishning muvofiqlashtiruvchisi va buyurtmachisi hisoblanadi;

Yagona dasturiy taʼminot kompleksi Qimmatli qogʻozlar markaziy davlat depozitariysi, “Toshkent” respublika fond birjasi, “Elsis-kliring” hisob-kitob-kliring palatasi, ikkinchi daraja depozitariylari hamda qimmatli qogʻozlar bozorining boshqa manfaatdor professional ishtirokchilarining oʻz mablagʻlari va jalb qilingan mablagʻlari hisobiga ishlab chiqiladi va joriy etiladi;

Yagona dasturiy taʼminot kompleksini ishlab chiqish va joriy etish uchun mablagʻlar qimmatli qogʻozlar bozorining manfaatdor tashkilotlari oʻrtasida tuziladigan oddiy shirkat shartnomasi doirasida Qimmatli qogʻozlar markaziy davlat depozitariysi tomonidan maxsus hisob raqamida jamlanadi.

Oʻzbekiston Respublikasi Davlat mulki qoʻmitasi va Qimmatli qogʻozlar bozori faoliyatini muvofiqlashtirish va nazorat qilish markazi Yagona dasturiy taʼminot kompleksining oʻz vaqtida joriy etilishi yuzasidan nazoratni taʼminlasinlar.

4. “Toshkent” respublika fond birjasi aksiyadorlarining uning ustav fondini 1 mlrd. soʻmgacha koʻpaytirish toʻgʻrisidagi taklifi qabul qilinsin.

Tijorat banklariga qoʻshimcha ravishda chiqarilgan aksiyalarni xarid qilish yoʻli orqali “Toshkent” respublika fond birjasi ustav fondini koʻpaytirishda belgilangan tartibda ishtirok etish tavsiya qilinsin.

Oʻzbekiston Respublikasi Davlat mulki qoʻmitasi, ushbu birjaning ustav fondidagi davlat ulushini 26 foizgacha yetkazgan holda, qoʻshimcha ravishda chiqarilgan aksiyalarni ishtirokchi aksiyadorlar uchun joylashtirish narxidan oshmaydigan narx boʻyicha xarid qilish yoʻli bilan “Toshkent” respublika fond birjasi ustav fondini koʻpaytirishda ishtirok etsin.

5. Qimmatli qogʻozlar bozori faoliyatini muvofiqlashtirish va nazorat qilish markazi investitsiya institutlari birlashmalari, “Toshkent” respublika fond birjasi hamda reyting agentlari bilan birgalikda qimmatli qogʻozlar bozori amaliyotiga qimmatli qogʻozlar va ularning emitentlarini reyting baholash hamda uni keng targʻib qilish chora-tadbirlarini koʻrsinlar.

6. Oʻzbekiston Respublikasi Oliy va oʻrta maxsus taʼlim vazirligi moliya-iqtisodiyot, huquqshunoslik ixtisosliklari boʻyicha mutaxassislar tayyorlaydigan oliy oʻquv yurtlarining oʻquv dasturlariga qimmatli qogʻozlar va korporativ boshqaruv boʻlimlari kiritilishini nazarda tutsin.

7. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi ikki oy muddatda:

Qimmatli qogʻozlar bozori professional ishtirokchilarining majburiy normativlari tizimi toʻgʻrisidagi;

Qimmatli qogʻozlar bozori professional ishtirokchilarini ichki nazorat qilish toʻgʻrisidagi nizomlarni ishlab chiqsin va belgilangan tartibda tasdiqlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.