Oʻzbekiston Respublikasi Hukumati bilan Pokiston Islom Respublikasi Hukumati, bundan keyin alohida “Tomon”, birgalikda “Tomonlar” deb ataluvchilar,

BMT Nizomining maqsad va prinsiplariga, jumladan, xalqaro tinchlik va xavfsizlikni taʼminlash, davlatlar oʻrtasida doʻstona munosabatlar hamda hamkorlikning rivojlanishiga amal qilib,

davlatlarning suvereniteti, tengligi va hududiy yaxlitligini, oʻzaro hurmat prinsiplarini qayta taʼkidlab,

xalqaro terrorizm davlatlarning hududiy yaxlitligi hamda xavfsizligi, shuningdek siyosiy, iqtisodiy va ijtimoiy barqarorligiga tahdid solishini anglab,

xalqaro terrorizm ushbu Bitimda qanday belgilangan boʻlsa, ularning maqsadidan qatʼi nazar, har qanday sharoitlarda ham oqlanishi mumkin emasligi, xalqaro terrorizmni sodir etgan aybdor shaxslar esa javobgarlikka tortilishi lozim ekanligiga ishonib,

Oʻzbekiston Respublikasi va Pokiston Islom Respublikasi qoʻshilgan xalqaro terrorizmning har qanday koʻrinishlarining oldini olish va unga qarshi kurashish sohasida xalqaro hamkorlikka doir xalqaro konvensiyalarni eʼtiborga olib,

xalqaro terrorizm, noqonuniy migratsiya va odamlar savdosini qoʻllab-quvvatlovchi harakatlarning oldini olish sohasida hamkorlikdan manfaatdor boʻlib,

Tomonlarning ushbu Bitim qoidalari doirasida birgalikdagi saʼy-harakatlari terrorizmga qarshi kurashning samarali shakllaridan hisoblanishiga amin boʻlib,

Tomonlar davlatlarining tegishli qonun-qoidalari asosida ushbu Bitim doirasida hamkorlik qiladilar va oʻzaro koʻmaklashadilar.

1. Ushbu Bitim maqsadlarida “terrorizm” atamasi quyidagilarni anglatadi:

a) ushbu Bitimning Ilovasida sanab oʻtilgan xalqaro aktlardan birida jinoyat deb tan olingan harakatlar;

b) tinch aholining yoki qurolli mojaro davrida harbiy harakatlarda faol ishtirok etmayotgan har qanday shaxslarning oʻlimiga sabab boʻladigan yoki ogʻir tan jarohati yetkazadigan, yoki mol-mulkka katta zarar yetishiga olib keladigan oʻqotar qurollar, portlovchi moddalar yoki har qanday boshqa qurollardan foydalanish orqali amalga oshiriladigan harakatlar hamda oʻz xarakteri yoki koʻrinishiga koʻra tinch aholini xavf ostiga qoʻyadigan, unga zarar yetkazadigan, jamoat xavfsizligiga putur yetkazadigan yoki davlat muassasalarini maʼlum bir harakatlarni amalga oshirishga majburlaydigan va Tomonlar davlatlarining qonunlariga binoan jinoyat hisoblanadigan, harakatlarni tashkil etish, rejalashtirish, undash yoki tajovuz qilish;

2. Ushbu moddaning qoidalari unda belgilangan atamalarning boshqacha yoki kengroq taʼriflanishi boshqa xalqaro bitimlar qoidalari yoki milliy qonunlariga taʼsir qilmaydi.

3. Tomonlar oʻzaro munosabatlarda ushbu moddada qayd etilgan harakatlarni jinoyatlar sifatida qaraydilar.

4. Ushbu Bitimni amalga oshirishda ekstraditsiya bilan bogʻliq masalalarda Tomonlar Oʻzbekiston Respublikasi bilan Pokiston Islom Respublikasi oʻrtasida ekstraditsiya toʻgʻrisida (Islomobod, 2001-yil 25-yanvar) Shartnoma qoidalariga muvofiq hamkorlikni amalga oshiradilar.

Tomonlar milliy qonunlari va xalqaro huquq normalari doirasida oʻzlarining tegishli markaziy vakolatli organlari orqali ushbu Bitimning 2-moddasida sanab oʻtilgan jinoyatlarni sodir etishning oldini olish, aniqlash, bartaraf qilish va tergov olib borishda hamkorlik qiladilar.

1. Ushbu Bitim qoidalarini amalga oshirishda quyidagilar Tomonlarning markaziy vakolatli organlari (markaziy organ yoki markaziy organlar) etib tayinlanadilar:

Oʻzbekiston Respublikasi uchun:

Milliy xavfsizlik xizmati;

Pokiston Islom Respublikasi uchun:

Ichki ishlar vazirligi.

2. Tomonlar oʻzlarining markaziy vakolatli organlari roʻyxatiga kiritilgan har qanday oʻzgartishlar toʻgʻrisida bir-birlarini imkon qadar tez xabardor qiladilar.

3. Markaziy vakolatli organlar ushbu Bitim doirasida bevosita hamkorlik qiladilar.

4. Markaziy vakolatli organlar uchrashuvlarni oʻtkazish va hamkorlikni kengaytirish qoidalarini ishlab chiqadilar.

1. Tomonlar 2-modda qoidalariga muvofiq xalqaro terrorizmga qarshi kurashda, shu jumladan quyidagi yoʻnalishlar boʻyicha hamkorlik qiladilar:

a) terrorizmning jamoat xavfsizligiga tajovuz qiluvchi barcha koʻrinishlariga qarshi kurash;

b) bir Tomon davlati xavfsizligiga tahdid solishi mumkin boʻlgan terrorchilik tashkilotlar faoliyatini, terrorchilarni tayyorlash markazlari hamda shaxslarni aniqlash va bartaraf etish;

s) terrorchilik tashkilotlarni oʻqotar qurollar, oʻq-dorilar, koʻp maqsadli harbiy uskuna, portlovchi, zaharlovchi, biologik va kimyoviy moddalar bilan taʼminlash yoʻllarini aniqlash hamda oldini olish;

d) terrorchilik faoliyatini moliyalashtirish maqsadida giyohvandlik vositalar va psixotrop moddalar hamda prekursorlarning noqonuniy aylanmasi bilan shugʻullanuvchi terroristik tashkilotlar, guruhlar va shaxslarning faoliyatini oldini olish;

e) terrorizmni qoʻllab-quvvatlashda shubhalanayotgan terrorchilik tashkilotlar yoki shaxslarga moliyaviy aktivlarni va pul oʻtkazilishini amalga oshirishni oldini olish maqsadida saʼy-harakatlarni muvofiqlashtirish;

f) ularning davlatlari hududlarida terrorchilik faoliyatini amalga oshirish maqsadida foydalanishni, taʼminot bazalari, oʻquv lagerlari va markazlarining yaratilishi, terrorchilik harakatlarini tayyorlash yoki tashkil etishni oldini olish boʻyicha choralarni qoʻllash;

g) Tomonlar davlatlari fuqarolarini terrorchilik tashkilotlarga terrorchilik harakatlarini amalga oshirishda yordam berish maqsadida yollanishini bartaraf etish boʻyicha choralarni qoʻllash;

h) terrorchilik harakatlarining transportning barcha turlari, hayotni taʼminlash hamda aloqa obyektlariga, insonlar hayoti va salomatligi hamda atrof-muhit uchun xavf solinishiga qaratilgan har qanday shakli va koʻrinishlarini oldini olish;

i) Tomonlar davlatlarida roʻyxatga olingan havo kemalarining xavfsizligini Tomonlar davlatlari ishtirok etgan fuqaro aviatsiyasiga taalluqli xalqaro konvensiyalarning qoidalariga muvofiq taʼminlash;

j) Tomonlar tashuvni amalga oshirishni oʻzaro kelishgan holda qimmatbaho va maxsus yuklarni tashishda xavfsizlikni taʼminlash;

k) terrorchilik harakatlarini amalga oshirishda foydalanilishi mumkin boʻlgan harbiy aslahalar va ikki yoqlama maqsaddagi tovarlarni eksport qilishni nazorat qilish;

l) terrorchilik harakatlarining oldini olish, aniqlash, bartaraf qilish va tergov olib borish, shuningdek ularga daxldor shaxslarni javobgarlikka tortish boʻyicha oʻzaro kelishilgan choralarni ishlab chiqish.

1. Ushbu Bitim qoidalariga muvofiq Tomonlar xalqaro terrorizmga qarshi kurashda quyidagi shakllarda hamkorlik qiladilar:

a) terrorchilik harakatlariga taalluqli jinoyatlarning oldini olish, aniqlash va tergovni olib borishga koʻmak boʻla oladigan axborot almashish;

b) shaxslarni, tashkilotlarni, muassasalarni va firmalar faoliyatini tekshirish orqali terrorchilik harakatlarni aniqlashga koʻmaklashish;

c) terrorchilik tashkilotlari, guruhlar hamda shaxslarning faoliyatini nazorat qilish va bartaraf etishga qaratilgan oʻzaro kelishilgan choralarni amalga oshirish;

d) zarur hollarda aksilterror operatsiyalarni oʻtkazishda texnik koʻmak koʻrsatish;

e) xalqaro terrorizmni bartaraf etish masalalari boʻyicha qonunlar va sud qarorlariga oid axborot va hujjatlarni almashish;

f) maxsus moslamalar va aloqa vositalaridan foydalanish orqali xalqaro terrorizmni bartaraf etish boʻyicha rejalarni ishlab chiqish.

Markaziy vakolatli organlar oʻzaro qiziqish uygʻotuvchi masalalar boʻyicha axborot almashadilar, xususan:

a) ushbu Bitimning 2-moddasida koʻrsatilgan harakatlarni rejalashtirish va sodir etish;

b) ushbu Bitimning 2-moddasida qayd etilgan Tomonlar davlatlarining davlat rahbarlari, hukumat rahbarlari, elchixonalar, konsullik muassasalari, shuningdek, ularning davlatlariga tashrif buyurayotgan shaxslarga nisbatan harakatlarni rejalashtirish va sodir etish;

c) ushbu Bitimning 2-moddasida koʻrsatilgan harakatlarni rejalashtirishda va sodir etishda ishtirok etayotgan tashkilotlar, guruhlar va shaxslar;

d) ushbu Bitimning 2-moddasida koʻrsatilgan harakatlarni sodir etish uchun kuchli taʼsir qiluvchi zaharli, zaharlovchi, portlovchi moddalar, oʻqotar qurollar, portlatish uskunalari, qurollar, oʻq-dori, kimyoviy va biologik qurollarni noqonuniy tayyorlash, sotib olish, saqlash, yetkazib berish va foydalanish;

e) ushbu Bitimning 2-moddasida koʻrsatilgan harakatlarni sodir etish shakli, usuli va vositalari;

f) markaziy vakolatli organlar oʻzaro kelishib olishi mumkin boʻlgan boshqa masalalar.

Ushbu Bitim doirasidagi hamkorlik bir markaziy vakolatli organning boshqa markaziy vakolatli organga yuborgan koʻmaklashish toʻgʻrisidagi soʻrovnomalari asosida amalga oshiriladi.

1. Koʻmaklashish toʻgʻrisidagi soʻrovnoma soʻrayotgan markaziy vakolatli organ tegishli tartibda vakolat berilgan shaxsi tomonidan imzolanadi va rasmiy gerbli muhr bilan tasdiqlanadi. Soʻrovnoma soʻrayotgan markaziy vakolatli organ tomonidan soʻralayotgan markaziy vakolatli organga toʻgʻridan toʻgʻriyuboriladi.

2. Koʻmaklashish toʻgʻrisidagi soʻrovnoma yozma ravishda yuboriladi va qayd etilgan muddatlarda amalga oshiriladi. Koʻmaklashish toʻgʻrisidagi soʻrovnoma qayd etilgan muddatlarda bajarish imkoniyati yoʻq boʻlganda, soʻrayotgan markaziy vakolatli organ buning sabablari va soʻrovnomani bajarishga soʻralayotgan muddatlar toʻgʻrisida yozma ravishda xabardor qilinadi. Soʻrovnomaning mazmuni va mohiyati noaniq boʻlgan taqdirda soʻralayotgan markaziy vakolatli organ aniqlik kiritishi mumkin;

3. Koʻmaklashish toʻgʻrisidagi soʻrovnomada inter-alia quyidagi axborot boʻlishi lozim:

a) soʻrovnomani imzolagan mansabdor shaxsning nomi va maqomi;

b) soʻrovnoma mazmuni;

c) ishga aloqador shaxslarning ismi va familiyasi, fuqaroligi, tugʻilgan sanasi va joyi hamda turar joyi, tashkilotning yuridik nomi va manzili;

d) soʻrayotgan markaziy vakolatli organ davlatining milliy qonunlariga muvofiq harakat yoki ishning tafsilotlari, jinoyatning huquqiy tavsifi va qoʻllaniladigan qonun matni;

e) soʻrovnomaning maqsadi va sabablari;

f) javob olish zarur boʻlgan muhim savollar roʻyxati;

g) soʻrovnomani bajarish muddatlari;

h) soʻrovnomani bajarishda foydali boʻlishi mumkin boʻlgan har qanday boshqa axborot.

1. Soʻrayotgan markaziy vakolatli organ soʻralayotgan yordamni tez bajarish uchun barcha zarur choralarni koʻradi. Agar soʻrovnomani bajarish markaziy vakolatli organning vakolatiga taalluqli boʻlmasa, ushbu organ soʻrovnomani tegishli organga taqdim qiladi va soʻrayotgan markaziy vakolatli organni bu haqda xabardor qiladi. Soʻralayotgan markaziy vakolatli organ soʻrovnomani bajarish uchun zarur boʻlgan qoʻshimcha maʼlumot va muddatlarni soʻrab olishi mumkin.

2. Soʻrovnomani bajarishda soʻralayotgan markaziy vakolatli organ davlatining qonunlari qoʻllaniladi. Agar soʻrovnomaning bajarilishi soʻralayotgan markaziy vakolatli organning davlatida amalga oshirilayotgan tergovga xalal bersa, uning bajarilishi keyinga qoldirilishi mumkin.

3. Markaziy vakolatli organlar oʻz vakolatlari doirasida bir-birlariga koʻmaklashadilar.

Ushbu Bitim doirasida koʻmaklashish toʻgʻrisidagi soʻrovnoma quyidagi hollarda qisman yoki butunlay rad etilishi mumkin:

a) agar soʻrovnomani bajarish soʻralayotgan markaziy vakolatli organ davlatining suvereniteti, milliy xavfsizligi va boshqa manfaatlariga zarar yetkazishi yoki mamlakatning qonunlari yoxud xalqaro majburiyatlariga zid boʻlsa;

b) agar koʻmaklashish toʻgʻrisidagi soʻrovnomada qayd etilgan holat va harakatlar soʻralayotgan markaziy vakolatli organ davlatining milliy qonunlariga muvofiq jinoyat deb hisoblanmasa. Agar koʻmaklashish toʻgʻrisidagi soʻrovnoma rad etilsa, soʻralayotgan markaziy vakolatli organ soʻrayotgan markaziy vakolatli organni rad etishning sabablari xususida yozma ravishda xabardor qiladi.

1. Tomonlar ushbu Bitim doirasida bir-biridan olgan axborotning maxfiyligini taʼminlaydilar, agar Tomonlar boshqacha kelishuvga erishmagan boʻlsalar. Bir Tomon bunday axborotni uchinchi tomonga bunday axborotni bergan boshqa Tomonning yozma roziligisiz taqdim etmaydi.

2. Ushbu Bitim doirasida almashilgan axborotdan faqat koʻrsatilgan maqsadlarda foydalaniladi va vakolatli organlarga taqdim etiladi. Tomonlar bunday axborotdan oʻzga shaxslarning foydalanmasligi, ruxsatsiz oʻzgartirilishi, uning yoʻq qilinishi va oshkor etilishiga qarshi himoyani taʼminlaydilar.

Ushbu Bitim doirasidagi hamkorlik ingliz tilida amalga oshiriladi.

1. Agar oʻzgacha kelishib olinmagan boʻlsa, har bir Tomon ushbu Bitim qoidalarini amalga oshirishda yuzaga keladigan xarajatlarni qoplaydi.

2. Tomonlar xalqaro terrorizmga qarshi kurashda zarurat yuzaga kelganda bir-birlariga zarur vositalar, uskuna va lozim boʻlgan materiallarni ushbu Bitim doirasida bepul taʼminlaydilar.

Markaziy vakolatli organlar ushbu Bitimni bajarish uchun zarur boʻlgan boshqa ahdlashuvlarni tuzishlari mumkin.

Ushbu Bitimning samarali bajarilishini taʼminlash maqsadida markaziy vakolatli organlarning vakillari amaliy uchrashuvlar, maslahatlashuvlar va muzokaralarni oʻzaro kelishgan holda oʻtkazishlari mumkin.

Ushbu Bitim qoidalari Tomonlarning ular ishtirok etgan boshqa xalqaro bitimlardan kelib chiqadigan huquq va majburiyatlarga daxl qilmaydi.

Ushbu Bitimni talqin qilish va qoʻllash bilan bogʻliq boʻlgan barcha nizolar Tomonlar oʻrtasida maslahatlashuvlar va muzokaralar orqali hal etiladi.

Ushbu Bitimga qoʻshimcha bayonnomalar bilan rasmiylashtiriladigan va ushbu Bitimning ajralmas qismi hisoblanadigan oʻzgartish va qoʻshimchalar istalgan vaqtda kiritilishi mumkin.

1. Ushbu Bitim ratifikatsiya qilinishi lozim va ratifikatsiya yorliqlari almashingan kundan kuchga kiradi. U bekor qilinmagunga qadar nomuayyan muddat amal qiladi. Har bir Tomon istalgan vaqtda olti oy ilgari ushbu Bitimning amal qilishini toʻxtatish istagi toʻgʻrisida xabarnomani boshqa Tomonga yuborish orqali amal qilishini toʻxtatishi mumkin.

2. Agar Tomonlar oʻzgacha ahdlashib olmagan boʻlsalar, ushbu Bitim amal qilishining toʻxtatilgan kuni bajarilmagan yoki amalga oshirilmay qolgan ushbu Bitim qoidalariga muvofiq boshlangan harakatlar va yuborilgan soʻrovnomaga nisbatan ushbu Bitim qoidalarining amal qilishi davom etadi.

3. Ushbu Bitim kuchga kirishi bilan Oʻzbekiston Respublikasi Hukumati bilan Pokiston Islom Respublikasi Hukumati oʻrtasida terrorizmga qarshi kurash toʻgʻrisida 1996-yil 19-oktabrda imzolangan Bitim amal qilishni toʻxtatadi.

Toshkent shahrida 2005-yil 6-martda ikki asl nusxada oʻzbek va ingliz tillarida tuzildi, bunda ikkala matn bir xilda autentikdir. Matnda yoki talqin qilishda kelishmovchiliklar yuzaga kelgan hollarda, ingliz tilidagi matndan foydalaniladi.