Oʻzbekiston Standartlashtirish, metrologiya va sertifikatlashtirish agentligi bilan Misr Arab Respublikasi Standartlashtirish va sifat tashkiloti, bundan keyin “Tomonlar” deb ataluvchilar,

xalqaro huquq normalariga asoslanib, standartlashtirish, metrologiya va sertifikatlashtirish sohasida hamkorlikni rivojlantirish istagida, savdo hamda sanoatdagi toʻsiqlarni bartaraf etish maqsadida;

atrof-muhitni muhofaza qilish, inson hayoti va sogʻligʻi uchun xavfsizlikning muhimligini anglab;

ikki Tomonning iqtisodiy manfaatlariga amal qilib;

ikki mamlakatning qonun hujjatlari doirasida;

Tomonlar, mazkur Anglashuv Memorandumi va oʻz davlatlari qonun hujjatlariga asosan, quyidagilar nazarda tutiladigan qoʻshimcha bitim, bayonnoma va dasturlardan kelib chiqib standartlashtirish, metrologiya, muvofiqlikni baholash hamda akkreditatsiya sohasida hamkorlik qilishga ahdlashib oldilar:

— milliy standartlarni, savdodagi toʻsiqlarni bartaraf etishga koʻmaklashish, shuningdek ilmiy va texnikaviy hamkorlikni rivojlantirish maqsadiga moʻljallangan xalqaro normalar bilan uygʻunlashtirish;

— Tomonlarning standartlashtirish, metrologiya va sertifikatlashtirish boʻyicha ilmiy va tadqiqot institutlari oʻrtasida toʻgʻridan toʻgʻri aloqalarni oʻrnatish va rivojlantirishga koʻmaklashish;

— davlatlararo yetkazib berilayotgan mahsulotga meʼyoriy hujjatlarni uygʻunlashtirish boʻyicha birgalikda faoliyat koʻrsatish;

— metrologiya boʻyicha Milliy idora tomonidan bajarilgan oʻlchov vositalarining sinov natijalari va akkreditatsiya qilingan kalibrlash laboratoriyalarda bajarilgan kalibrlash natijalarini oʻzaro eʼtirof etish;

— fizik kattaliklar uchun milliy va ishchi etalonlarni ishlab chiqish, takomillashtirish va solishtirish boʻyicha birgalikda faoliyat koʻrsatish;

— muvofiqlikni baholash natijalarini oʻzaro tan olish boʻyicha faoliyatni amalga oshirish.

Tomonlar, meʼyoriy hujjatlar, davriy nashrlar, milliy standartlar idoralari tomonidan nashr etilgan axborotlarni,

milliy standartlar kataloglari va milliy standartlarni ishlab chiqish meʼyorlarini va uslublarini,

sertifikatlashtirish va akkreditatsiyalash boʻyicha umumiy axborot va nashrlarni,

standartlashtirish, metrologiya va sertifikatlashtirish sohasida mutaxassislarni oʻqitish va malakasini oshirish dasturi boʻyicha maʼlumot hamda materiallarni oʻzaro almashishga ahdlashib oldilar.

Mahsulotni sertifikatlashtirish va sifat tizimini joriy etish boʻyicha birgalikda faoliyat koʻrsatish maqsadida, Tomonlar tarafidan oʻzaro tan olingan protseduralarga asosan ularning mamlakatlarida amal qilayotgan, majburiy sertifikatlashtirish lozim boʻlgan mahsulotlar roʻyxati toʻgʻrisida, Tomonlar bir-birlarini oʻz vaqtida xabardor qiladilar.

Tomonlarning import mahsulotlariga sertifikatlar berishga asos boʻladigan sinov ishlari Tomonlarning milliy akkreditatsiyalash tizimlarida xalqaro standartlar talablariga muvofiq akkreditatsiya qilingan sinov laboratoriyalarida oʻtkaziladi.

Agar maʼlumot berayotgan Tomon, hujjat va maʼlumot maxfiyligi toʻgʻrisida ogohlantirsa, ushbu Anglashuv Memorandumi doirasida Tomonlar olinayotgan hujjat hamda maʼlumotlarning maxfiyligini taʼminlaydilar.

Agar maxfiylik boshqa Tomondan belgilanmagan boʻlsa, har bir Tomon hamkorlik qilish natijasida olinayotgan ilmiy va texnikaviy maʼlumotdan erkin foydalanishi mumkin. Ushbu maʼlumot faqat uni berayotgan Tomonning roziligi bilan uchinchi tomonga berilishi mumkin.

Maxfiy maʼlumot, Tomonlarning qonun hujjatlarida nazarda tutilgan hollarda Tomonlarning huquqni muhofaza qilish organlariga taqdim etiladi.

Tomonlar standartlashtirish, metrologiya va sertifikatlashtirish boʻyicha turli xalqaro tashkilotlar bilan hamkorlik qiladilar, Tomonlardan biri aʼzosi hisoblanadigan xalqaro tashkilotlarda qatnashish yoki ularga aʼzo boʻlishda bir-birlarini qoʻllab-quvvatlaydilar.

Tomonlar, standartlashtirish sohasida oʻzlarining vaziyatlarini birlashtirish va ikkala Tomonning xalqaro faoliyatdagi rolini oshirish uchun ISO va IEC xalqaro tashkilotlar doirasida yaqin munosabatda ishlashga ahdlashib oldilar.

Tomonlar standartlashtirish, metrologiya va sertifikatlashtirish sohasida tajriba almashish maqsadida maslahat berish va oʻqitish boʻyicha mutaxassislardan iborat delegatsiyalar hamda mutaxassislar almashinuvini tashkil qiladilar.

Mazkur Anglashuv Memorandumida ifodalanganlarni qoʻllash va talqin qilishda kelishmovchiliklar oʻzaro maslahatlashuv va muzokaralar orqali hal qilinadi.

Tomonlarning oʻzaro kelishuvlariga koʻra mazkur Anglashuv Memorandumiga, alohida bayonnomalar bilan rasmiylashtiriladigan oʻzgartirish va toʻldirishlar kiritilishi mumkin.

Ushbu bayonnomalar Anglashuv Memorandumining ajralmas qismi hisoblanadi va uning 13-moddasiga asosan kuchga kiradi.

Mazkur Anglashuv Memorandumi, uchinchi mamlakatlarning Tomonlari imzolagan standartlashtirish, metrologiya va sertifikatlashtirish sohasidagi boshqa bitimlarga daxl qilmaydi.

Mazkur Anglashuv Memorandumini bajarishning moliyaviy shartlari, Tomonlarning oʻzaro kelishuvlariga koʻra amalga oshiriladi.

Mazkur Anglashuv Memorandumi imzolagan kundan boshlab kuchga kiradi. Ushbu Anglashuv Memorandumi besh yil muddatga tuziladi va Tomonlardan biri yozma ravishda uning amal qilishini toʻxtatish toʻgʻrisida oʻz niyati haqida boshqa Tomonni xabardor qilmaguniga qadar oʻz-oʻzidan keyingi bir yillik muddatga uzayaveradi. Bunday xabarnoma mazkur Anglashuv Memorandumining amal qilish muddati tugashidan kamida 6 (olti) oy ilgari yuboriladi.

Qohira shahrida 2007-yil 18-aprelda, ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Anglashuv Memorandumi qoidalarini talqin qilishda kelishmovchiliklar yuzaga kelganda, ingliz tilidagi matn asos sifatida qabul qilinadi.