Oʻzbekiston Respublikasi Hukumati va Misr Arab Respublikasi Hukumati, bundan keyin “Tomonlar” deb ataluvchilar,

jinoiy faoliyatning barcha shakllariga, xususan, terrorizm, transmilliy va uyushgan jinoyatchilikka qarshi kurashda hamkorlik qilishga intilib,

mazkur jinoyatlar va harakatlarning tinchlikka, barqarorlikka, xavfsizlikka tahdid solayotganidan tashvishlanib,

yuqorida koʻrsatilgan jinoyatlarga qarshi taʼsirchan chora-tadbirlar koʻrish zarurligiga ishonch hosil qilib,

Tomonlar qoʻshilgan tegishli Xalqaro konvensiyalarni eʼtiborga olib,

teng huquqlilik va oʻzaro manfaatdorlik tamoyillardan va shuningdek jinoyatchilikka qarshi samarali kurash olib borish oʻzaro xohishlaridan kelib chiqib,

1. Tomonlar oʻzlarining vakolatli organlari orqali, ushbu Bitim qoidalariga muvofiq oʻz davlatlarining milliy qonunchiligi va xalqaro majburiyatlariga rioya qilib, uyushgan jinoyatchilik va terrorizmga qarshi kurashishda hamkorlik qiladilar.

2. Ushbu Bitimning maqsadlarini amalga oshirish uchun quyidagilar vakolatli organlar hisoblanadi:

Oʻzbekiston Respublikasi uchun:

Ichki ishlar vazirligi;

Milliy xavfsizlik xizmati;

Bosh Prokuratura;

Davlat soliq qoʻmitasi;

Davlat bojxona qoʻmitasi.

Misr Arab Respublikasi uchun:

Ichki ishlar vazirligi.

3. Ushbu Bitimni bajarish maqsadida vakolatli organlar bir-birlari bilan bevosita aloqa bogʻlaydilar.

Tomonlar oʻz vakolatli organlari orqali ushbu Bitim doirasida, oʻz vakolatlari, oʻz davlatlari milliy qonunchiligi va qoidalari doirasida quyidagi sohalarda hamkorlik qilish toʻgʻrisida kelishib oldilar:

1. Terroristlar guruhlarining faoliyati va jinoyatlari, ularning oʻzaro aloqalari, rahbarlari, aʼzolari, maxfiy tashkilotlari tuzilishi, ishlatayotgan qurollari va ularning moliyaviy taʼminlayotgan manbalari toʻgʻrisida axborot almashish.

2. Oʻz vakolatli organlarining aksilterror faoliyatlarida qoʻllayotgan turli usullari va texnikasi toʻgʻrisida axborot almashish.

3. Kuchayib borayotgan terrorizm tahdidi bilan kurashish uchun aeroportlar, temir yoʻl stansiyalari, metropolitenlar va boshqa jamoat joylarining xavfsizligi va himoya qilish chora-tadbirlarini takomillashtirish maqsadida havo va temir yoʻl transporti himoyasi va xavfsizligi sohasida ilmiy va texnikaviy tajriba almashish.

1. Transmilliy va uyushgan jinoyatchilik, ularning rahbarlari, aʼzolari, tuzilishi, faoliyati va aloqalari toʻgʻrisida axborot va maʼlumot almashish.

2. Oʻz vakolatli organlari faoliyatining hozirgi zamon usullari va texnikasi toʻgʻrisida axborot va tajriba almashish.

3. Jinoyatchilikka, xususan odam oʻgʻirlash, jinsiy va boshqa yoʻsinda majburlash uchun odamlarni yollash, pullarni kontrabanda qilish va jinoiy faoliyatdan olingan daromadlarni oshkoralashtirish (legallashtirish), hujjatlarni qalbakilashtirish, noyob buyumlar va sanʼat asarlarini kontrabanda qilish, transport vositalarining noqonuniy savdosiga qarshi kurashishda axborot va tajriba almashish, shuningdek birgalikda chora-tadbirlar koʻrish va ikkala davlat fuqarolarini oʻz ichiga olgan, amaldagi va qonuniy faoliyat koʻrsatayotgan investitsiya muassasalari toʻgʻrisida axborot bilan taʼminlash.

1. Narkotiklar va psixotrop moddalarni noqonuniy ishlab chiqarish, aylantirish va suiisteʼmol qilish bilan bogʻliq jinoyatlar va boshqa ularga taalluqli jinoyatlar toʻgʻrisida axborot va maʼlumot almashish.

2. Narkotik vositalari, psixotrop moddalar va prekursorlarning yangi turlari toʻgʻrisida axborot almashish va shuningdek, bundan moddalarni qidirish, topish va namunalarini almashish bilan bogʻliq boʻlgan zamonaviy texnologiyalar va usullar boʻyicha tajriba almashish.

3. Tezkorlik masalalari boʻyicha, shu jumladan alohida ishlarda Tomonlar oʻrtasida kelishilgan holda “Nazorat ostida yetkazib berish” kabi masalalarni tergov qilish usuli boʻyicha oʻzaro yordam koʻrsatish.

4. Ushbu sohada ichki qonunchilik va huquqiy tartiblarga oid adabiyotlar va matnlar bilan almashish.

1. Tomonlar oʻzlarining vakolatli organlari orqali va oʻz davlatlarining qonunchiligi va qoidalariga muvofiq hamkorlikni mustahkamlaydilar hamda yuqorida koʻrsatilgan jinoyatlarga aloqador jinoyatchilarni qidirishda va qamoqqa olishda koʻmaklashadilar.

2. Ushbu Bitim jinoiy ishlar boʻyicha huquqiy yordam koʻrsatish va ekstraditsiya masalalariga daxl qilmaydi.

Tomonlar barcha shakllardagi terroristik harakatlar, transmilliy va uyushgan jinoyatchilikning oldini olish va ularga barham berish uchun va shuningdek oʻz hududlaridan bunday jinoyatlarni rejalashtirish, uyushtirish yoki sodir qilish uchun foydalanmaslik boʻyicha, shu jumladan ularning mamlakatlariga terroristik va jinoiy unsurlar guruh boʻlib yoki yakka holda kirishining yoki turishining, moliyaviy yordam olishining, jismoniy yoki harbiy tayyorlanishining oldini olish boʻyicha qattiq va taʼsirchan chora-tadbirlar koʻradilar.

Tomonlar quyidagi sohalarda hamkorlik qiladilar:

1. Ekspertlar va mutaxassislar bilan almashish va shuningdek uyushgan jinoyatchilikka qarshi kurashda va ushbu Bitimning 2-moddasida koʻrsatilgan jinoyatlarni tergov qilishda qoʻllanadigan eng yangi usullarga oʻrgatish uchun ish tajribasini almashish.

2. Taʼlim va mutaxassislarni va texniklarni tayyorlash sohasida tajriba almashish, shuningdek maxsus institutlar oʻrtasida hamkorlikni kuchaytirish.

3. Jinoyatchilikka qarshi kurashning yuqorida koʻrsatilgan sohalarga va xavfsizlikning boshqa sohalariga oid nashrlar, tadqiqot ishlari va kitoblar bilan almashish, ikki mamlakat oʻrtasidagi hamkorlikni qoʻllab-quvvatlash maqsadida shu sohada oʻtkaziladigan seminarlar va konferensiyalarda ishtirok etish.

1. Terrorizm, uyushgan jinoyatchilik, narkotik vositalar va psixotrop moddalarining noqonuniy aylanishiga qarshi kurash boʻyicha hamkorlik qilish uchun Tomonlar Qoʻshma qoʻmita tuzadilar.

2. Qoʻshma qoʻmitaning huquqiy maqomi va ish tartibi alohida protokollar doirasida belgilanadi.

3. Bu majlislarning moliyaviy va moddiy xarajatlarini qabul qiluvchi Tomon toʻlaydi. Xalqaro transport yoʻl kirasini joʻnatuvchi Tomon toʻlaydi.

1. Ushbu Bitim doirasidagi hamkorlik Tomonlar vakolatli organlarining soʻrovlar asosida amalga oshiriladi.

2. Bunday soʻrovlarni Tomonlar vakolatli organlari yozma shaklda rasmiylashtirishlari kerak.

3. Koʻmaklashish toʻgʻrisidagi soʻrovda quyidagilar bor boʻlishi kerak:

a) soʻrayotgan organ nomi;

b) soʻralayotgan organ nomi;

v) masalaning mohiyati bayoni va uning asosliligi va shuningdek soʻrovni bajarish uchun zarur axborot.

4. Soʻrovni bajarishga rad javobi berish toʻgʻrisida qaror qabul qilingan taqdirda soʻrayotgan Tomon rad javobining sababi toʻgʻrisida yozma ravishda xabardor qilinadi.

Tomonlar maxfiy axborotni boshqa Tomonning ruxsatisiz oshkor qilmaydilar.

Ushbu Bitim doirasida olingan materiallar, axborot, ilgʻor texnika vositalari va uskunalar ularni bergan boshqa Tomonning dastlabki yozma roziligisiz uchinchi Tomonga taqdim etilmasligi va berilmasligi kerak.

Tomonlar ushbu Bitim doirasidagi hamkorlikni amalga oshirish uchun ingliz tilidan foydalanadilar.

Ushbu Bitim Tomonlarning oʻzlari ishtirok etayotgan boshqa xalqaro bitimlardan kelib chiqadigan majburiyatlariga daxl qilmaydi.

Tomonlarning oʻzaro yozma kelishuviga koʻra, ushbu Bitimga uning ajralmas qismi hisoblanadigan alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin.

Ushbu Bitimni talqin qilish va qoʻllash bilan bogʻliq boʻlgan barcha nizolar Tomonlar oʻrtasida maslahatlashuvlar va muzokaralar orqali hal etiladi.

Ushbu Bitimni bajarish maqsadida Tomonlarning vakolatli organlari idoralararo bayonnomalar tuzishlari mumkin.

Agar oʻzgacha kelishib olinmagan boʻlsa, har bir Tomon ushbu Bitim qoidalarini bajarishda yuzaga keladigan xarajatlarni mustaqil ravishda qoplaydilar.

Zarurat yuzaga kelganda Tomonlar bir-biriga begʻaraz yordam koʻrsatishlari mumkin, shu jumladan jinoyatchilikka qarshi kurashda aniq vazifalarni bajarish uchun zarur uskuna va materiallarni berishlari mumkin.

Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali oxirgi yozma xabarnoma olingan sanadan boshlab kuchga kiradi.

Ushbu Bitim besh yil muddatga tuziladi va Tomonlardan biri uning amal qilishini toʻxtatish niyati toʻgʻrisida yozma ravishda xabardor qilmasa, u keyingi besh yillik muddatlarga oʻz-oʻzidan uzayaveradi.

Mazkur Bitimning amal qilishi boshqa Tomon tegishli nota olgandan olti oy oʻtgandan keyin tugatiladi.

Qohira shahrida 2007-yil 18-aprelda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan holda, ingliz tilidagi matn asos sifatida qabul qilinadi.