Oʻzbekiston Respublikasi bilan Bolgariya Respublikasi, bundan keyin “Ahdlashuvchi Tomonlar” deb ataluvchilar,

jinoyatchilikning oldini olish va sudda jinoiy ishni odillik bilan koʻrib chiqishni amalga oshirish sohasida xalqaro huquq normalariga amal qilib,

jinoiy-huquqiy sohadagi hamkorlikni rivojlantirishga intilib,

Ahdlashuvchi Tomonlar ushbu Shartnomada koʻzda tutilgan shartlarga muvofiq, ularning hududida boʻlib turgan tutib topshirishni taqozo etuvchi jinoyatlari uchun jinoiy javobgarlikka tortish yoki bunday jinoyatlar munosabati bilan hukmni ijro etishi maqsadida, shaxslarning iltimosnomalariga koʻra bir-birlariga tutib topshirishni oʻz zimmalariga oladilar.

Ushbu Shartnoma maqsadlarida soʻralayotgan va soʻrayotgan Ahdlashuvchi Tomonlarning qonunchiliklariga muvofiq kamida bir yil ozodlikdan mahrum etish orqali yoki yanada jiddiyroq tarzda jazolanadigan jinoyatlar tutib topshirishni taqozo etuvchi jinoyatlar hisoblanadi.

Ushbu moddaning birinchi qismida koʻzda tutilgan jinoyatlarga nisbatan chiqarilgan hukmni ijro etish uchun tutib topshirish amalga oshiriladi, agar ozodlikdan mahrum etish koʻrinishidagi jazo muddatining tugashiga olti oydan kam boʻlmagan vaqt qolsa.

Agar tutib topshirish toʻgʻrisidagi iltimosnoma bir necha alohida jinoyatlarga taalluqli boʻlsa va ularning hammasi ushbu moddaning birinchi qismida koʻzda tutilgan shartlarga muvofiq boʻlmasa, bu jinoyatlarning hech boʻlmaganda bittasi tutib topshirishga olib kelishi mumkin boʻlsa, talab qilinayotgan shaxsning tutib topshirishga ruxsat etilishi mumkin.

Tutib topshirish amalga oshirilmaydi, agar:

1) tutib topshirilishi talab qilinayotgan shaxs soʻralayotgan Ahdlashuvchi Tomonning fuqarosi boʻlsa yoki shaxsga bu davlatda boshpana berilgan boʻlsa;

2) iltimosnoma qabul qilingan paytda soʻralayotgan Ahdlashuvchi Tomon qonunchiligiga muvofiq har qanday qonuniy asos boʻyicha jinoiy ish qoʻzgʻatilishi yoki hukm ijro etilishi mumkin boʻlmasa, bunga kuchini yoʻqotish muddati yoki afv etish ham kiradi;

3) tutib topshirilishi talab qilinayotgan shaxsga nisbatan oʻsha jinoyat uchun soʻralayotgan Ahdlashuvchi Tomonning hududida hukm chiqarilgan yoki ish boʻyicha tergovni toʻxtatish toʻgʻrisidagi qabul qilingan qaror qonuniy kuchga kirgan boʻlsa;

4) tutib topshirish toʻgʻrisida keladigan iltimosnoma bilan bogʻliq jinoyat soʻralayotgan Ahdlashuvchi Tomon hududida butunlay yoki qisman yoxud shu mamlakatning qonuniga koʻra uning hududi hisoblanadigan yerda sodir etilgan boʻlsa;

5) tutib topshirilishi talab qilinayotgan shaxs soʻrayotgan davlatning favqulodda sudi tomonidan sudlangan yoki sudlanishi lozim boʻlsa;

6) tutib topshirish toʻgʻrisida iltimosnoma yuborishga asos boʻlgan xatti-harakatlar, soʻralayotgan Ahdlashuvchi Tomon tarafidan siyosiy jinoyat bilan bogʻliq xatti-harakat, siyosiy yoki harbiy jinoyat deb hisoblansa;

7) tutib topshirish toʻgʻrisida iltimosnoma predmeti hisoblangan jinoyat, qonunlari oʻz chegarasining tashqarisida sodir etilgan jinoyatlarni jazolashni koʻzda tutmagan davlatning tashqarisida sodir etilgan boʻlsa.

Tutib topshirilishi talab qilinayotgan shaxsga nisbatan quyidagilar qoʻllanadi deb hisoblashga asosli sabablar mavjud boʻlgan hollarda tutib topshirishga ham yoʻl qoʻyilmaydi:

1) ish sudda muhokama qilinayotganda eng kam himoya huquqlariga rioya qilinmaydi. Agar soʻrayotgan Ahdlashuvchi Tomon ushbu shaxs ishtirokida yangi jinoiy ishini olib borish majburiyatini oʻz zimmasiga olsa, tutib topshirilishi talab qilinayotgan shaxsning ishtirokisiz sud jarayonining olib borilishi, oʻz-oʻzidan jinoyatchini tutib topshirishni rad etish uchun asos boʻlolmaydi;

2) irqi, dini, millati, siyosiy qarashi, ijtimoiy va shaxsiy ahvoli bilan bogʻliq taʼqib choralari qoʻllanilsa yoki kamsitilsa, yoki u shafqatsiz, gʻayriinsoniy munosabat yoxud insonning asosiy huquqlarini buzuvchi xatti-harakatlarga duch kelsa.

Tutib topshirilishi toʻgʻrisida berilgan iltimosnomadagi xatti-harakati uchun soʻrayotgan Ahdlashuvchi Tomonning qonuniga koʻra oʻlim jazosi koʻzda tutilayotgan boʻlsa va soʻralayotgan Ahdlashuvchi Tomon yetarli deb hisoblanadigan mazkur Ahdlashuvchi Tomon jazoning bunday chorasi qoʻllanilmasligi yoki tayinlab boʻlingan chora ijro etilmasligi haqida tegishli kafolatni bersa tutib topshirishga yoʻl qoʻyiladi.

Ushbu Shartnomaga muvofiq tutib topshirishning barcha masalalari boʻyicha quyidagilar Ahdlashuvchi Tomonlarning markaziy organlari hisoblanadilar:

Oʻzbekiston Respublikasi uchun — Oʻzbekiston Respublikasi Bosh prokuraturasi,

Bolgariya Respublikasi uchun — Bolgariya Respublikasi Adliya vazirligi.

Markaziy organlar ushbu Shartnomani bajarishda bir-birlari bilan bevosita yoki Shartnomada koʻzda tutilgan boshqa tartibda munosabatda boʻladilar.

Ahdlashuvchi Tomonlardan birining hududida muassasa yoxud buning uchun maxsus vakolatlangan shaxs tomonidan ularning vakolati doirasida oʻrnatilgan shaklda tayyorlangan yoki tasdiqlangan va rasmiy muhr bilan tasdiqlangan hujjatlar boshqa Ahdlashuvchi Tomon hududida hech qanday boshqa maxsus guvohnomasiz qabul qilinadi.

Ahdlashuvchi Tomonlardan birining hududida rasmiy hujjatlar sifatida koʻriladigan hujjatlar boshqa Ahdlashuvchi Tomonning hududida ham rasmiy hujjatlarni isbotlovchi kuchi bilan foydalanadi.

Ahdlashuvchi Tomonlar ushbu Shartnomani bajarish doirasida bir-birlari bilan munosabatlarda rus tilidan yoki boshqa Ahdlashuvchi Tomon davlat tilidan foydalanadilar.

Ahdlashuvchi Tomonlarning davlat tillarida yoki boshqa tillarda joʻnatiladigan hujjatlar rus tilidagi tarjimasi bilan ilova qilinishlari lozim. Shuningdek, Ahdlashuvchi Tomonlar zarur boʻlgan boshqa hollarda ham rus tiliga yozma va ogʻzaki tarjimani taʼminlaydilar.

Hujjatlarning yozma tarjimasini toʻgʻriligini tasdiqlash Ahdlashuvchi Tomonning qonunchiligiga va ushbu Shartnoma qoidalariga muvofiq amalga oshiriladi.

Tutib topshirish bilan bogʻliq xarajatlarni hududida yuzaga kelgan Ahdlashuvchi Tomon qoplaydi.

Ushbu Shartnomaning 22-moddasida koʻzda tutilgan tranzit tashish bilan bogʻliq xarajatlarni soʻrayotgan Ahdlashuvchi Tomon qoplaydi.

Ushbu Shartnomada koʻzda tutilgan tutib topshirish yozma iltimosnomalarga muvofiq amalga oshiriladi. Ushbu iltimosnomalar Ahdlashuvchi Tomonlarning vakolatli organlari bir-birlariga bevosita yoki diplomatik kanallar orqali joʻnatilishi mumkin.

Tutib topshirish toʻgʻrisidagi iltimosnoma quyidagilarni oʻz ichiga olishi lozim:

1) tutib berilishi talab qilinayotgan shaxs toʻgʻrisida zarur boʻlgan axborotni, jumladan fuqarolik va yashash hamda boʻlish joyi toʻgʻrisida maʼlumotlar;

2) sodir etilgan jinoyatning daliliy jihatlari, jumladan uning sodir etilgan vaqti va joyi hamda yetkazilgan moddiy zarar tafsiloti;

3) ushbu jinoyat uchun qonun bilan belgilangan jazo, shuningdek, muddat oʻtganligi haqidagi moddalari bilan birga ushbu xatti-harakat jinoyat sifatida tan olinadigan soʻrayotgan Ahdlashuvchi Tomon qonunining tegishli moddalari matni.

Jinoiy ish qoʻzgʻatilishi uchun tutib topshirish toʻgʻrisida iltimosnomaga talab qilinayotgan shaxsni hibsga olish haqida qarorni (ajrimni) tasdiqlangan nusxasi ilova qilinadi.

Hukmni ijro etish uchun tutib topshirish toʻgʻrisidagi iltimosnomaga ushbu shaxsga nisbatan chiqarilgan kuchga kirgan hukmni tasdiqlangan nusxasi yoki undan ayblov qismi va hukmni mazmuni bilan tasdiqlangan koʻchirma ilova qilinadi. Agar jazoga hukm qilingan shaxs ozodlikdan mahrum etish koʻrinishidagi jazo muddatini qisman oʻtgan boʻlsa, ushbu toʻgʻrisida va jazo muddatining qolgan qismi haqida maʼlumot ham beriladi.

Tutib topshirish toʻgʻrisida iltimosnoma talab qilinayotgan shaxsning imkon boʻlgan aniq tavsifi, uning shaxsini aniqlashga yordam beradigan har qanday boshqa axborot, jumladan fotosuratlar yoki boshqa tasvirlari hamda mavjud boʻlgan barmoq izlari bilan ilova qilinishi lozim.

Iltimosnoma soʻrayotgan markaziy organning tegishli mansabdor shaxs tomonidan imzolangan va rasmiy muhr bilan tasdiqlagan boʻlishi lozim.

Tutib topshirish toʻgʻrisida iltimosnoma talab qilinayotgan shaxs soʻralayotgan Ahdlashuvchi Tomon hududida boʻlishi toʻgʻrisida aniq maʼlumotlar boʻlgan hollarida yuboriladi.

Soʻralayotgan Ahdlashuvchi Tomon tutib topshirish toʻgʻrisida iltimosnomani oʻz qonunchiligiga muvofiq koʻrib chiqadi va soʻrayotgan Ahdlashuvchi Tomonga oʻzining qarori toʻgʻrisida kechiktirmasdan xabar beradi.

Iltimosnomani qondirish toʻgʻrisida qaror qabul qilinsa, soʻralayotgan Ahdlashuvchi Tomon zudlik bilan tutib berilishi talab qilinayotgan shaxsni hibsga olish choralarini koʻradi. Soʻrayotgan Ahdlashuvchi Tomon ushbu shaxsni hibsga olinganligi toʻgʻrisida kechiktirmasdan xabardor qilinadi.

Tutib topshirish toʻgʻrisidagi iltimosnomani qondirishini butunlay yoki qisman har qanday rad etilishi tegishli sabablar bilan asoslangan boʻlishi lozim.

Agar soʻralayotgan Ahdlashuvchi Tomon tutib topshirish toʻgʻrisidagi iltimosnomani daliliga taqdim etilgan axborotni yetarli deb hisoblasa, u qoʻshimcha axborotni talab qilishi mumkin. Shuning bilan birga soʻralayotgan Ahdlashuvchi Tomon tutib berilishi talab qilinayotgan shaxsni kuzatishni taʼminlaydigan zarur choralarni qoʻllashi mumkin, oʻz davlati tashqarisiga uning chiqib ketish imkoniyatini oldini olish uchun.

Ushbu moddaning birinchi qismida koʻzda tutilgan holda, tutib topshirishni talab qilgan Ahdlashuvchi Tomon boshqa Ahdlashuvchi Tomonga eng qisqa muddat ichida qoʻshimcha axborotni berish uchun zarur choralarni koʻradi.

Kechiktirib boʻlmaydigan vaziyatlarda va tutib topshirilishi talab qilinayotgan shaxs yashirinishi mumkinligi haqida asoslar boʻlsa, soʻrayotgan Ahdlashuvchi Tomon soʻralayotgan Ahdlashuvchi Tomonga talab qilinayotgan shaxsni tutib topshirish toʻgʻrisida iltimosnomani olingunicha tutib olish toʻgʻrisida murojaat etishi mumkin. Bunday iltimosnoma markaziy organning tegishli mansabdor shaxsi tomonidan imzolanadi va Xalqaro jinoiy politsiya tashkiloti — Interpol orqali yoki bevosita, maʼlumotlarni elektron uzatgich vositalardan foydalangan holda berilishi mumkin.

Ushbu iltimosnoma quyidagilarni oʻz ichiga olishi lozim:

1) tutib olinishi talab qilinayotgan shaxs toʻgʻrisida zarur boʻlgan axborotni, shuningdek fuqarolik va boʻlish joyi toʻgʻrisida maʼlumotlar, jumladan uning koʻrinish tasviri;

2) sodir etilgan jinoyatning daliliy jihatlarini qisqa tavsifi, unda ayblanuvchi shaxs yoki uning uchun u jazoga hukm etilgan, jumladan uning sodir etilgan vaqti va joyi hamda yetkazilgan moddiy zarar tafsiloti;

3) ushbu shaxsni hibsga olish haqida qarorni (ajrimni) yoki unga nisbatan chiqarilgan kuchga kirgan hukmni tasdiqlangan nusxasi yoxud undan ayblov qismi va hukmni mazmuni bilan tasdiqlangan koʻchirma;

4) ushbu jinoyat uchun belgilanishi mumkin boʻlgan yoki belgilangan jazo toʻgʻrisida axborot, jumladan ozodlikdan mahrum etish koʻrinishidagi jazo muddatining qismi oʻtib boʻlgan;

5) ushbu shaxsni tutib topshirish toʻgʻrisida iltimosnoma va zarur boʻlgan hujjatlar zudlik bilan yuborilishi toʻgʻrisidagi bayonot.

Soʻralayotgan Ahdlashuvchi Tomon ushbu iltimosnoma boʻyicha kechiktirmasdan oʻz qonunchiligiga muvofiq qaror qabul qiladi va ushbu haqida darhol soʻrayotgan Ahdlashuvchi Tomonga xabar beradi.

Ushbu iltimosnomaga muvofiq tutib olingan shaxs hibsda saqlanishi hamda hibsga olingan sanadan oʻttiz kun oʻtgach ozod qilinishi lozim, agar tutib topshirish toʻgʻrisida iltimosnoma kelmagan boʻlsa.

Ushbu moddaning toʻrtinchi qismiga binoan shaxsni ozod qilinishi, tutib topshirish toʻgʻrisida iltimosnomani va zarur hujjatlarni olgandan soʻng uni takroriy tutib turish hamda hibsga olishga toʻsqinlik qilmaydi.

Tutib topshirish toʻgʻrisida iltimosnoma qanoatlantirilganligi haqidagi xabarni olgan Ahdlashuvchi Tomonlar iloji boricha qisqa vaqt ichida talab qilinayotgan shaxsni oʻtkazishning vaqti, joyi va tartibini belgilaydilar.

Talab qilinayotgan shaxsni oʻtkazish tartibi ikkala Ahdlashuvchi Tomonlar vakolatli organlari vakillari tomonidan imzolanadigan ikki nusxadagi oʻtkazish toʻgʻrisidagi bayonnoma tuzishni oʻz ichiga oladi. Soʻrayotgan Ahdlashuvchi Tomon vakillarining talab qilinayotgan shaxsni olish uchun vakolati zarur hollarda Ahdlashuvchi Tomonlar oʻrtasida oldindan tuzilgan ahdnomalarga muvofiq tegishli hujjatlar bilan tasdiqlanishi mumkin.

Shaxs soʻralayotgan Ahdlashuvchi Tomon hududidan ikkala Tomon oʻrtasida kelishib olingan belgilangan muddat qabul qilib olinadi. Agar shaxs kelishilgan muddat ichida qabul qilib olinmasa, soʻralayotgan Ahdlashuvchi Tomon uni ozod qilishi va uni tutib topshirishni rad qilishi mumkin.

Agar Ahdlashuvchi Tomonlardan birortasi tutib topshirilishi lozim boʻlgan shaxsni oʻziga bogʻliq boʻlmagan sabablarga koʻra bera olmasa yoki qabul qila olmasa, u bu toʻgʻrida boshqa Ahdlashuvchi Tomonga darhol xabar beradi. Ahdlashuvchi Tomonlar birgalikda oʻtkazishning yangi muddatini belgilaydilar va bu holda ushbu modda uchinchi qismining qoidalari qoʻllaniladi.

Tutib topshirilishi talab qilinayotgan shaxs soʻralayotgan Ahdlashuvchi Tomon hududida jinoiy javobgarlikka tortilgan yoki boshqa jinoyati uchun jazoga hukm etilgan boʻlsa, uni tutib topshirish jinoiy ish boʻyicha tadbirlar yakunlanishiga qadar, hukmni ijro etilishi yoki jazodan ozod qilinishiga qadar kechiktirilishi mumkin.

Ushbu moddaning birinchi qismida koʻzda tutilgan tutib topshirishning kechiktirilishi hukmni ijro etish muddatining oʻtib ketishiga sabab boʻlsa yoki tutib topshirilishi talab qilinayotgan shaxsning qilmishlarini tergoviga jiddiy ziyon yetkazadigan boʻlsa, soʻralayotgan Ahdlashuvchi Tomon talab qilinayotgan shaxsni tutib topshirishni kechiktirish oʻrniga uni soʻrayotgan Ahdlashuvchi Tomonga oʻzaro belgilanadigan shartlar asosida vaqtincha tutib berishi mumkin.

Vaqtincha tutib topshirish shaxs jinoiy ish boʻyicha u zarur tadbirlar tugaganidan soʻng, uzogʻi bilan ikki oy ichida qaytarilishi lozim.

Ahdlashuvchi Tomonlardan biri bir shaxsni tutib topshirish toʻgʻrisida bir vaqtning oʻzida boshqa Ahdlashuvchi Tomon hamda biron-bir uchinchi davlatdan soʻrov olsa, qaysi soʻrovni qanoatlantirishni uning oʻzi hal qiladi.

Ushbu Shartnoma 3-moddasining birinchi qismi 1-bandida koʻzda tutilgan shaxsni tutib topshirishni rad qilgan holda, soʻralayotgan Ahdlashuvchi Tomon soʻrayotgan Ahdlashuvchi Tomonning iltimosnomasiga koʻra ushbu shaxsni jinoiy javobgarlikka tortish masalasini hal qiladi. Ushbu maqsadda soʻrayotgan Ahdlashuvchi Tomon soʻralayotgan Ahdlashuvchi Tomonga ushbu shaxsga taalluqli hujjatlarni yuboradi va soʻrayotgan Ahdlashuvchi Tomonga tergovni olib borish uchun kerakli koʻmak beradi.

Soʻralayotgan Ahdlashuvchi Tomon soʻrayotgan Ahdlashuvchi Tomonga tergovning jarayoni va uning yakuniy natijalari toʻgʻrisida xabardor qiladi.

Tutib berish toʻgʻrisida iltimosnomani olgunga qadar, iltimosnomaga koʻra Ahdlashuvchi Tomonlar ushbu shartnoma 2-moddasiga muvofiq tutib topshirishga olib keladigan jinoyatlarni sodir etganligi uchun ayblanuvchi yoki jinoyatlarni sodir etganligi uchun jazoga hukm qilingan shaxslarning qidiruvini amalga oshiradilar, agar ushbu shaxslar soʻralayotgan Ahdlashuvchi Tomon hududida boʻlishiga asoslar boʻlsa.

Qidiruvda boʻlgan shaxslarni qidirish va hibsga olish toʻgʻrisida iltimosnoma yozma ravishda yuboriladi hamda quyidagilarni oʻz ichiga olishi lozim:

1) qidiruvda boʻlgan shaxs toʻgʻrisida zarur boʻlgan axborotni, jumladan fuqarolik va mumkin boʻlgan boʻlish joylari toʻgʻrisida maʼlumotlar;

2) sodir etilgan jinoyatning daliliy jihatlarini qisqa tavsifi, unda ayblanuvchi shaxs yoki uning uchun u jazoga hukm etilgan, jumladan uning sodir etilgan vaqti va joyi hamda yetkazilgan moddiy zarar tafsiloti;

3) ushbu jinoyat uchun qonun bilan belgilangan jazo, shuningdek, muddat oʻtganligi haqidagi moddalari bilan birga ushbu xatti-harakat jinoyat sifatida tan olinadigan soʻrayotgan Ahdlashuvchi Tomon qonunining tegishli moddalari matni.

Qidiruvni amalga oshirish toʻgʻrisida iltimosnomaga qidiruvda boʻlgan shaxsni hibsga olish haqida qarorni (ajrimni) yoki unga nisbatan chiqarilgan kuchga kirgan hukmni tasdiqlangan nusxasi yoxud undan ayblov qismi va hukmni mazmuni bilan tasdiqlangan koʻchirma ilova qilinishi lozim.

Qidiruvni amalga oshirish toʻgʻrisida iltimosnoma qidiruvda boʻlgan shaxsning imkon boʻlgan aniq tavsifi, uning shaxsini aniqlashga yordam beradigan har qanday boshqa axborot, jumladan fotosuratlar yoki boshqa tasvirlari hamda mavjud boʻlgan barmoq izlari bilan ilova qilinishi lozim.

Iltimosnomani olgandan soʻng soʻralayotgan Ahdlashuvchi Tomon oʻz hududida qidiruvda boʻlgan shaxsning boʻlish joyini aniqlash va uni tutib olishga zarur boʻlgan barcha choralarni koʻradi. Qidiruvda boʻlgan shaxsni tutib va hibsga olinganligi toʻgʻrisida darhol soʻrayotgan Ahdlashuvchi Tomonga xabar beriladi.

Ushbu moddaga muvofiq tutib olingan shaxs hibsga olingan sanadan oʻttiz kun oʻtgach ozod qilinishi lozim, agar tutib topshirish toʻgʻrisida iltimosnoma kelmagan boʻlsa.

Ushbu moddaga binoan shaxsni ozod qilinishi, tutib topshirish toʻgʻrisida iltimosnomani va zarur hujjatlarni olgandan soʻng uni takroriy tutish hamda hibsga olishga toʻsqinlik qilmaydi.

Ushbu Shartnomaga muvofiq tutib topshirilgan shaxsga nisbatan soʻrayotgan Ahdlashuvchi Tomon hududida iltimosnomada koʻrsatilgan tutib berilgan jinoyat boʻyicha boshqa tutib topshirishdan oldin sodir etilgan biron-bir jinoyati uchun jinoiy tergov olib borish, hukm chiqarish hamda hech qanday uning shaxsiy ozodligi cheklashga jalb etilishi mumkin emas, agar bunga soʻralayotgan Ahdlashuvchi Tomonning roziligi boʻlmasa.

Ushbu modda birinchi qismi qoʻllanilmaydi, agar tutib topshirilgan jinoyat boʻyicha javobgarlikdan butunlay ozod qilingandan soʻng tutib topshirilgan shaxs soʻralayotgan Ahdlashuvchi Tomon hududini tark etishga imkoniyati boʻlib va buni oʻttiz kun ichida amalga oshirmagan boʻlsa, yoki ushbu shaxs ixtiyoriy ravishda soʻrayotgan Ahdlashuvchi Tomon hududiga uni oldin tark etib qaytsa.

Agar tutib topshirilgan shaxs soʻrayotgan Ahdlashuvchi Tomon hududida tutib topshirilgan jinoyat boʻyicha javobgarlikdan butunlay ozod qilinishidan oldin soʻralayotgan Ahdlashuvchi Tomon hududiga qaytib kelsa, tegishli iltimosnomasiga koʻra ushbu shaxsni mazkur Shartnomaning 9-moddasida koʻrsatilgan hujjatlarni talab etmagan holda takroran tutib topshirilishi mumkin.

Tegishli iltimosnoma mavjud boʻlganda, huquqiy yordam soʻralgan jinoyat oqibatida oʻgʻirlangan hamda soʻralayotgan Ahdlashuvchi Tomon hududida topilgan barcha mulk, shaxsni tutib topshirishga olib keladigan yoki jinoiy ish boʻyicha dalillar sifatida kerak boʻlishi mumkin boʻlgan, jumladan jinoyatni sodir etish qurol, soʻrayotgan Ahdlashuvchi Tomonga beriladi. Mulkni berishning aniq shartlarini Ahdlashuvchi Tomonlar belgilaydilar. Bunda topshirilayotgan mulk soliqlar, bojxona bojlari, yigʻimlar va boshqa toʻlovlardan ozod qilinadi. Mulkni berish ushbu mulkka aloqador boʻlgan uchinchi tomonlarning huquqlariga toʻliq rioya qilinadigan tartibda amalga oshiriladi.

Agar soʻrayotgan Ahdlashuvchi Tomon buni iltimos qilsa, yuqorida koʻrsatilgan mulk, ahdlashuvga erishilgan shaxsni tutib topshirilishi har qanday sabablariga binoan amalga oshirilishi mumkin boʻlmasligiga qaramasdan, ushbu Tomonga oʻtkazilishi mumkin.

Agar koʻrsatib oʻtilgan mulk soʻralayotgan Ahdlashuvchi Tomonga jinoiy ishi boʻyicha dalil sifatida zarur boʻlsa, uning topshirilishi ish yurituv tugaguniga qadar kechiktirilishi mumkin.

Agar soʻrayotgan Ahdlashuvchi Tomon hududida ushbu mulk xatga olinishi yoki musodara qilinishi lozim boʻlsa, soʻralayotgan Ahdlashuvchi Tomon uni berishni rad qilishi yoki vaqtinchalik berib turishi mumkin.

Agar soʻralayotgan Ahdlashuvchi Tomon qonunchiligi yoki uchinchi tomon huquqlarini himoya qilish manfaatlari taqozo etganda, shunday yoʻl bilan berilgan har qanday mulk sud muhokamalari tugashi bilan soʻrov soʻralayotgan Ahdlashuvchi Tomonga, agar buni ushbu Ahdlashuvchi Tomon talab qilsa, qaytarilishi lozim.

Ahdlashuvchi Tomonlar bir-birlarini ularga tutib topshirilgan shaxslarga nisbatan jinoiy ish boʻyicha tergov natijalari toʻgʻrisida xabar qiladilar. Iltimosnomaga koʻra yakuniy qarorning nusxasi joʻnatiladi.

Ahdlashuvchi Tomonlardan har biri iltimosnomaga koʻra boshqa Ahdlashuvchi Tomonga uchinchi davlat tarafidan tutib topshirilgan shaxslarning oʻz davlati hududi orqali tranzit tashishga ruxsat beradi. Tranzit tashish toʻgʻrisida iltimosnoma shaxs toʻgʻrisida zarur boʻlgan axborotni, jumladan jinoyat haqida, unda ayblanuvchi shaxs yoki uning uchun u jazoga hukm etilgan, shuningdek, uni hibsga olish haqida qarorni (ajrimni) borligi toʻgʻrisida maʼlumotlar ilova qilinishi lozim. Ushbu qoida agar boshqa Ahdlashuvchi Tomon hududida qoʻnish moʻljallanmagan boʻlsa, havo transportidan foydalanish hollarida qoʻllanilmaydi.

Soʻralayotgan Ahdlashuvchi Tomon tranzit tashish toʻgʻrisida iltimosnomani qisqa muddat ichida qondiradi. Har bir aniq holatda Ahdlashuvchi Tomonlarning vakolatli organlari tranzit usulini, yoʻllanishi va boshqa shartlarni, jumladan olib oʻtilayotgan shaxsni kuzatish shartlari va tegishli hujjatlarni mavjudligini kelishib oladilar.

Tranzit tashish chogʻida tranzit davlati olib oʻtilayotgan shaxsni hibsda saqlashning yuridik imkoniyatlarini taʼminlaydi va olib oʻtilayotgan shaxsni boshqa Ahdlashuvchi Tomon kuzatuvchi vakillariga zarur boʻlgan yordam koʻrsatadilar.

Havo kemasining moʻljallanmagan qoʻnish hollarida, uning hududi ostidan parvoz qilinayotgan Ahdlashuvchi Tomon, shaxsni boshqa Ahdlashuvchi Tomon kuzatuvchi xodimlarining iltimosiga koʻra, tranzit tashish toʻgʻrisida ushbu moddaning birinchi qismiga muvofiq taqdim qilinadigan soʻrovni olingunicha 72 soatlik vaqt mobaynida shaxsni hibsda ushlab turishi mumkin. Ushbu iltimosnoma maʼlumotlarni elektron uzatgich vositalardan foydalangan holda berilishi mumkin.

Ushbu Shartnomani talqin qilish yoki qoʻllashda Ahdlashuvchi Tomonlar oʻrtasida bahslar paydo boʻlgan hollarda, Ahdlashuvchi Tomonlar kelishmovchiliklarni maslahatlashuvlar va muzokaralar orqali hal qilishga harakat qiladilar. Zarur boʻlgan hollarda Ahdlashuvchi Tomonlar Shartnomani qoʻllanilishini kuzatish va vujudga kelishi mumkin boʻlgan kelishmovchiliklarni hal qiluvchi qoʻshma komissiyani tuzishlari mumkin.

Ushbu Shartnoma qoidalari Ahdlashuvchi Tomonlar ishtirokchilar boʻlgan boshqa xalqaro shartnomalardan kelib chiqadigan ularning majburiyat va huquqlariga daxl qilmaydi.

Ahdlashuvchi Tomonlar ushbu Shartnomada tilga olingan masalalar boʻyicha, uning qoidalarini toʻldirish yoki kuchaytirish, unda oʻrnatilgan tamoyillarni qoʻllashini yengillashtirish maqsadida, oʻzaro, shu jumladan, idoralararo bitimlar tuzishlari mumkin.

Ahdlashuvchi Tomonlar ushbu Shartnomaga bayonnomalar orqali rasmiylashtiriladigan qoʻshimcha va oʻzgartirishlarni kiritishi mumkin. Ular ushbu Shartnomaning 26-moddasida koʻzga tutilgan tartibda kuchga kirganidan soʻng uning ajralmas qismi hisoblanadi.

Ushbu Shartnoma ratifikatsiya qilinishi shart va ratifikatsiya yorliqlari almashinuvidan soʻng oʻttizinchi kuni kuchga kiradi.

Ushbu Shartnoma noaniq muddatga tuzilgan.

Ahdlashuvchi Tomonlardan har biri boshqa Ahdlashuvchi Tomonni yozma ravishda xabardor qilib ushbu Shartnomani denonsatsiya qilishi mumkin. Ushbu holda Shartnoma mazkur Ahdlashuvchi Tomon xabarnomani olgan kundan soʻng olti oy oʻtgandan keyingi oyning birinchi kuni oʻz kuchini yoʻqotadi.

Ushbu Shartnoma u kuchga kirgunga qadar vujudga kelgan xatti-harakatlar boʻyicha tutib topshirish toʻgʻrisida iltimosnomalarni amalga oshirishda ham qoʻllanadi.

Sofiya shahrida 2003-yil 24-noyabrda ikki asl nusxada har biri oʻzbek, bolgar va rus tillarida tuzildi, bunda barcha matnlar bir xil kuchga egadir. Ushbu Shartnoma qoidalarini talqin qilish maqsadida rus tilidagi matndan foydalaniladi.